Kev Txhawb Pab
Peb yuav siv ib tug txheej txheem tshiab thiab dawb huv ntxiv kom saib xyuas thiab txhawb pab lwm tus.
Ua tsaug rau Txwj Laug Gong thiab Txwj Laug Soares, rau neb tej lus txog kev ntseeg. Peb yeej zoo siab ua tsaug rau neb thiab neb ob tug poj niam.
Cov kwv tij thiab cov muam, peb ib sij xav kom tus Tswv coj peb kev kom peb paub pab peb cov mej zeej ua raws li Vajtswv tej lus txib, qhov tseem ceeb yog ob lo lus txib tseem ceeb kom hlub Vajtswv thiab peb cov neeg zej zog.1
Tau ntau lub hlis peb tau nrhiav ib txoj kev zoo dua txhawb pab peb cov neeg sab ntsuj plig thiab sab cev nqaij daim tawv raws li tus Cawm Seej txoj kev.
Peb twb txiav txim siab tsis ua kev mus qhia tom tsev thiab kev mus saib xyuas tom tsev zoo li tau ua yav tas los. Tiam sis, peb yuav siv ib tug txheej txheem tshiab thiab dawb huv ntxiv kom saib xyuas thiab txhawb pab lwm tus. Peb yuav hu tej dej num no ua “kev txhawb pab.”
Kev txhawb pab uas zoo yeej yuav los ntawm cov muam tej lub txiaj ntsim thiab los ntawm lub hwj chim pov thawj hwj uas tsis muaj dab tsi piv tau. Peb txhua tus xav tau kev pov hwm kom txhob raug tus yeeb ncuab tej kev ntxias.
Txwj Laug Jeffrey R. Holland los ntawm Pawg Kaum Ob tug Thwj Tim, thiab Muam Jean B. Bingham, tus Tuam Thawj Tswj Hwm ntawm lub Koom Haum Niam Tsev, yuav piav hais tias cov kwv tij uas tuav lub pov thawj hwj thiab cov muam hauv Koom Haum Niam Tsev thiab Koom Haum Ntxhais Hluas yuav ua hauj lwm thiab saib xyuas cov mej zeej ntawm lub Koom Txoos nyob thoob plaws lub ntiaj teb.
Thawj Pawg Thawj Tswj Hwm thiab Pawg Kaum Ob tug Thwj Tim koom siab pom zoo rau nkawd ob zaj lus. Peb ua Vajtswv tsaug thiab thov Nws thaum peb qhib lub caij nyoog tshiab ntawm lub Koom Txoos zaj keeb kwm. Los ntawm Yexus Khetos lub npe, amees.