Kev Tshwm Sim rau lub Koom Txoos, Kev Tshwm Sim rau Peb lub Neej
Hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.
Nov yog ib lub cib fim zoo kawg nkaus uas peb ua koob tsheej nco txog Hnub Easter nrog nej rau Hnub Caiv no hauv lub tuam rooj sab laj! Tsis muaj ib yam dab tsi zoo tshaj qhov uas peb nco txog yam tseem ceeb tshaj plaws hauv ntiaj teb no thaum peb teev tiam tus neeg tseem ceeb tshaj plaws uas tau taug kev hauv ntiaj teb no. Nyob hauv no, Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb teev tiam Nws tus uas tau ua Kev Theej Txhoj zoo kawg nkaus hauv lub Vaj Khexemanes. Nws kam raug txom nyem rau peb txhua leej txhia tus tej kev txhaum thiab kev qaug zog, uas ua rau Nws “los ntshav ntawm txhua lub qhov hws.”1 Nws raug ntsia saum ntoo khaub lig tim lub roob Khauj Kaum Taub Hau2 thiab tau sawv hnub thib peb ua Leej Txiv Saum Ntuj Ceeb Tsheej cov me nyuam thawj tus neeg uas sawv rov qab los. Kuv hlub Nws thiab ua tim khawv tias Nws muaj sia nyob! Nws yog tus uas coj thiab kav Nws lub Koom Txoos.
Yog tsis muaj peb tus Txhiv Dim txoj Kev Theej Txhoj uas tsis paub kawg no, tsis muaj peb ib tug neeg twg uas yuav cia siab hais tias peb yuav rov qab mus nrog peb Leej Txiv Saum Ntuj Ceeb Tsheej nyob. Yog tsis muaj Nws txoj Kev Sawv Rov Los, kev tuag yuav yog qhov kawg. Peb tus Cawm Seej txoj Kev Theej Txhoj ua rau peb sawv daws txais tau txoj sia nyob mus ib txhis thiab kev tsis txawj tuag.
Twb yog vim muaj Nws txoj hauj lwm thiab txoj kev thaj yeeb nyab xeeb uas Nws muab rau Nws cov neeg kuv tus me poj niam, Wendy, wb tau kev nplij siab thaum lub Ib Hlis Ntuj hnub tim 2, 2018, thaum lawv hu xov tooj tsa wb es qhia hais tias Thawj Tswj Hwm Thomas S. Monson tau mus dhau plaws daim ntaub thaiv lawm.
Au peb nco Thawj Tswj Hwm Monson heev kawg! Peb hwm nws lub neej thiab nws zaj keeb kwm. Nws sab ntsuj plig loj kawg, nws qhia ntau yam rau txhua tus uas paub nws thiab tau pab lub Koom Txoos uas nws hlub no.
Hnub Caiv, lub Ib Hlis Ntuj hnub tim 14, 2018, hauv chav tsev sab saum lub Tuam Tsev hauv Salt Lake, tau rov qab txhim tsa Thawj Pawg Thawj Tswj Hwm raws li tus Tswv tus txheej txheem dawb ceev uas nws tsa cia lawm. Ces, nag hmo yav sawv ntxov hauv lub rooj sab laj dawb huv, lub Koom Txoos cov mej zeej thoob ntiaj teb no tau tsa lawv txhais tes qhia hais tias lawv pom zoo rau tej yam uas cov Thwj Tim ua los lawm. Kuv txo hwj chim ua nej tsaug vim nej txhawb nqa kuv.
Kuv kuj ua cov neeg uas kuv sawv ntawm lawv xwb pwg tsaug thiab. Kuv twb muaj cib fim ua hauj lwm hauv Pawg Kaum Ob tug Thwj Tim rau 34 xyoos lawm thiab yeej paub 10 tug ntawm 16 tus Thawj Tswj Hwm rau lub Koom Txoos rau yav tas los lawm. Kuv kawm ntau yam los ntawm lawv txhua tus.
Kuv tshuav kuv cov poj koob yawg koob nqi. Tag nrho kuv yim khub poj koob yawg koob tau los ntseeg lub Koom Txoos no hauv Europe teb. Lawv puav leej tau txi txhua yam tsav kom lawv yuav los rau Xi-oos. Hauv tej tiam neeg tom qab ntawd, kuv txhua tus poj koob yawm txwv tsis tau rau siab ntseeg li lawv. Yog li ntawd, kuv thiaj tsis tau loj hlob hauv ib tse uas muaj txoj moo zoo no.
Kuv hlub kuv niam kuv txiv. Nkawd tseem ceeb heev rau kuv thiab tau qhia kuv ntau tsav ntau yam. Kuv tsis muaj cuab kav ua nkawd tsaug txaus vim kuv thiab kuv cov kwv tij thiab muam muaj kev zoo siab tom tsev. Tab sis mas, thaum kuv tseem ua ib tug tub hluas, kuv paub hais tias peb yeej xiam ib yam dab tsi lawm. Muaj ib hnub kuv txawm caij tsheb ciav hlau mus rau lub tsev muag ntawv rau lub Koom Txoos thiab tau yuav ib phau ntawv qhia txog lub Koom Txoos. Kuv nyiam kawm txog txoj moo zoo.
Thaum kuv pib to taub Txoj Lus Txawj Ntse, kuv xav kom kuv niam txiv yuav ua raws li txoj kev cai ntawd. Ces, muaj ib hnub thaum kuv tseem hluas heev, kuv mus sab hauv peb lub tais tees thiab muab txhua lub hwj cawv tsoo pov tseg! Kuv xav tias kuv txiv yeej yuav muab kuv xyuas, tiam sis nws tsis tau hais ib lo lus hlo li.
Thaum kuv loj hlob tuaj thiab pib to taub hais tias Leej Txiv Saum Ntuj Ceeb Tsheej txoj hau kev zoo npaum li cas tiag, feem ntau mas kuv hais rau kuv tus kheej hais tias, “Kuv tsis xav tau ib yam khoom plig rau Christmas ntxiv! Kuv tsuas xav kom kuv niam txiv yuav raug sib khi ua ke xwb.” Qhov uas kuv ntshaw ntawd tsis tau muaj txog thaum kuv niam txiv muaj 80 xyoo tawm, ces yeej tau muaj li ntawd tiag. Kuv piav tsis tau zoo seb hnub ntawd kuv muaj kev zoo siab npaum li cas,3 thiab txhua hnub kuv muaj kev zoo siab vim nkawd raug sib khi thiab kuv raug khi rau nkawd thiab.
Hauv xyoo 1945, thaum kuv tseem kawm ua kws kho mob, kuv yuav Dantzel White ua poj niam hauv Salt Lake lub Tuam Tsev. Wb muaj hmoov yug tau cuaj tus ntxhais zoo kawg thiab ib tug tub tsim txiaj. Niaj hnub nim no wb tsev neeg uas tseem loj hlob tuaj yog ib yam uas ua rau kuv muaj kev zoo siab kawg nkaus li.
Hauv xyoo 2005, tom qab twb sib yuav 60 xyoo lawm, kuv tus me poj niam Dantzel txawm tso lub neej no tseg ncaim kuv mus lawm. Rau ib ntus mas, kuv nyuaj siab kawg ua tsis tau dab tsi li. Tiam sis txoj xov ntawm hnub Easter thiab kev cog lus hais tias yuav muaj kev sawv rov los tau txhawb nqa kuv.
Ces tus Tswv cia li coj Wendy Watson los nyob ntawm kuv ib sab. Wb raug sib khi ua ke hauv Salt Lake lub Tuam Tsev thaum lub Plaub Hlis Ntuj hnub tim 6, 2006. Kuv hlub nws kawg siab! Nws yog ib tug poj niam zoo kawg nkaus—ib qho koob hmoov loj heev rau kuv, rau wb tsev neeg, thiab tag nrho lub Koom Txoos.
Txhua txoj koob hmoov no los vim yog kuv tau tshawb nrhiav kom tau thiab kam ua raws li tus Vaj Ntsuj Plig Dawb Huv tej kev tshoov siab. Thawj Tswj Hwm Lorenzo Snow hais tias, “Ib Tsoom Haiv Neeg Ntseeg hauv Hnub Nyoog Kawg muaj txoj hmoov no … uas yog qhov uas peb muaj cai tau tus Ntsuj Plig tej kev tshoov siab txhua txhua hnub hauv peb lub neej.”4
Ib yam uas tus Ntsuj Plig pheej tso rau hauv kuv lub paj hlwb txij li thaum kuv raug hu los ua tus Thawj Tswj Hwm rau lub Koom Txoos yog qhia kuv seb tus Tswv yeej muaj lub siab xav qhia seb Nws lub siab thiab lub paj hlwb xav li cas tiag. Txoj kev uas yus txais kev tshwm sim yog Vajtswv ib lub txiaj ntsim zoo tshaj plaws rau Nws cov me nyuam.
Dhau ntawm tus Vaj Ntsuj Plig Dawb Huv tej kev tshwm sim, tus Tswv yuav txhawb pab peb ua txhua yam ncaj ncees. Kuv nco thaum kuv nyob rau hauv chav phais neeg, kuv twb sawv rau ntawm ib tug neeg mob—tsis paub tseeb seb kuv yuav ua ib txoj kev kho mob nyuaj heev li cas—es txawm hnov tus Vaj Ntsuj Plig Dawb Huv qhia hauv kuv lub paj hlwb seb kuv yuav tsum phais li cas.5
Xwv kom Wendy yuav kam yuav kuv, kuv thiaj hais rau nws hais tias, “Kuv los paub txog kev tshwm sim thiab paub yuav txais tshwm sim li cas.” Nws zoo kawg—thiab tam li kuv twb kawm los lawm, yog qhov uas nws ib txwm ua—nws los twb tshawb nrhiav lawm thiab tau txais kev tshwm sim txog wb lawm, nws thiaj ua siab loj hais tias nws kam yuav kuv.
Ua ib tug mej zeej hauv Pawg Kaum Ob tug Thwj Tim, kuv thov Vajtswv txhua hnub kom tau kev tshwm sim thiab tau ua tus Tswv tsaug txhua zaus uas Nws hais lus rau kuv lub siab thiab lub paj hlwb.
Nej sim xav seb no yog ib qho txuj ci tseem ceeb npaum li cas! Txawm peb raug hu los ua hauj lwm dab tsi hauv lub Koom Txoos, peb muaj cai thov rau peb Leej Txiv Saum Ntuj Ceeb Tsheej thiab yuav tau kev cob qhia, yuav raug lus ceeb toom thaum muaj xwm txheej ceev thiab dab tsi uas yuav tab kaum, thiab yuav muaj peev xwm ua tej yam uas peb yuav ua tsis tau peb tus kheej. Yog tias peb kam txais yuav tus Vaj Ntsuj Plig Dawb Huv tiag tiag li thiab yuav kawm kom to taub thiab paub hnov Nws tej kev tshoov siab, peb yuav tau kev cob qhia rau tej yam me thiab loj huv tib si.
Tsis ntev tas los lawm thaum kuv muaj teeb meem loj seb yuav xaiv ob tug pab cuam twg, kuv txawm xav tias kuv yuav ua li cas thiaj xaiv ob tug xwb vim muaj kaum ob leeg uas kuv hlub thiab saib lawv rau nqi heev.
Vim kuv paub hais tias kev tshwm sim zoo yog nyob ntawm seb peb puas tau tej xov xwm zoo, kuv ua tib zoo thov Vajtswv thaum kuv xam phaj txhua tus Thwj Tim ib leeg dhau ib leeg.6 Ces kuv thiaj mus nyob kuv ib leeg hauv ib chav tsev hauv lub tuam tsev thiab tau nug tus Tswv seb nws xav li cas. Kuv hais lus tim khawv hais tias tus Tswv tau qhia kom kuv yuav xaiv Thawj Tswj Hwm Dallin H. Oaks thiab Thawj Tswj Hwm Henry B. Eyring los ua kuv ob tug pab cuam hauv Thawj Pawg Thawj Tswj Hwm.
Ib yam li ntawd, kuv kuj hais lus tim khawv hais tias tus Tswv tau tshoov kuv siab kom hu Txwj Laug Gerrit W. Gong thiab Txwj Laug Ulisses Soares thiab tsa nkawd los ua Nws cov Thwj Tim thiab. Kuv thiab peb zoo siab tos txais nkawd los ua kuv ob tug kwv tij hauv txoj huaj lwm no.
Thaum peb koom ua ke havu Pawg Sab Laj ntawm Thawj Pawg Thawj Tswj Hwm thiab Pawg Kaum Ob tug Thwj Tim, peb tej chav sib ntsib hloov los uas tej chav tsev rau kev tshwm sim. Yus yeej hnov tau tus Ntsuj Plig nyob ntawd. Thaum peb sib tham txog tej teeb meem loj, txawm muaj ib qho zoo thaum txhua tus Thwj Tim zoo siab qhia seb nws xav li cas txog qhov ntawd. Txawm tias thaum xub thawj peb nyias muaj nyias lub tswv yim los, peb txoj kev hlub ib leeg rau ib leeg yog ib yam uas nyob ntawd tas mus li. Peb txoj kev sib koom siab pab tau peb to taub seb tus Tswv xav li cas txog Nws lub Koom Txoos.
Nyob hauv peb tej kev sib ntsib, peb tsis lam ua raws li cov coob xav ua xwb! Peb ib leeg ua tib zoo mloog ib leeg cov lus thiab sib tham mus txog thaum txhua tus sib koom tib lub siab lawm. Ces thaum peb sib koom siab tag nrho lawm, qhov uas tus Vaj Ntsuj Plig Dawb Huv los tshoov peb lub siab yog ib yam uas ua rau yus lub cev kub lug! Peb txais tau ib yam li tus Yaj Saub Yauxej Xamiv paub thaum nws hais tias, “Thaum sib koom siab peb thiaj muaj hwj chim nrog Vajtswv.”7 Tsis muaj ib tug twg hauv Thawj Pawg Thawj Tswj Hwm los sis Pawg Kaum Ob tug Thwj Tim uas yuav ua tej kev txiav txim rau tus Tswv lub Koom Txoos raws li nws lub tswv yim xwb!
Cov kwv tij thiab cov muam, peb yuav ua li cas thiaj rais los mus ua cov txiv neej thiab poj niam—Yexus cov tub qhe—uas tus Tswv xav kom peb ua? Peb yuav ua li cas thiaj tau lus teb rau tej lo lus nug uas xeeb txob peb? Yog peb kawm tau ib yam dab tsi los ntawm qhov uas Yauxej Xamiv tau muaj hauv Koog Ntoo Dawb Ceev ces, nws yog hais tias lub ntuj ceeb tsheej twb qhib plho thiab tias Vajtswv nrog Nws cov me nyuam tham.
Tus Yaj Saub Yauxej Xamiv coj tus yam ntxwv rau peb yoog thaum twg peb xav tau lus teb rau peb cov lus nug. Nws nyiam Yakanpaus lo lus cog tseg uas hais tias yog peb leej twg tsis muaj tswv yim peb muaj peev xwm thov Vajtswv,8 tus tub hluas Yauxej tau mus nug ncaj qha ntawm Leej Txiv Saum Ntuj Ceeb Tsheej. Nws xav tau kev tshwm sim rau nws tus kheej, thiab nws txoj kev tshawb nrhiav ntawd tau qhib lub caij nyoog kawg no.
Tib yam li ntawd, nej txoj kev tshawb nrhiav yuav qhib yam dab tsi rau nej? Nej ho tsis muaj tswv yim dab tsi? Nej muaj lub siab xav paub los sis to taub dab tsi? Ua raws li tus Yaj Saub Yauxej tus yam ntxwv. Nrhiav ib qho chaw uas ntsiag to uas koj yuav ib sij mus xyuas. Txo hwj chim rau ntawm Vajtswv. Qhia nej Leej Txiv Saum Ntuj Ceeb Tsheej seb nej lub siab xav li cas tiag. Mus rau Nws kom tau lus teb thiab tau kev nplij siab.
Thov Vajtswv hauv Yexus Khetos lub npe txog nej tej kev txhawj xeeb, nej tej kev ntshai, nej tej kev qaug zog—tiag mas, tej kev ntshaw hauv nej nruab siab. Ces nej mam li ua tib zoo mloog lus! Sau tej kev xav uas los rau hauv nej lub paj hlwb. Sau ntawv seb nej xav li cas thiab raws li li tej kev tshoov siab uas nej raug ntawd. Thaum nej ua li no ib hnub dhau ib hnub, ib hlis dhau ib hlis, ib xyoos dhau ib xyoos, nej thiaj yuav “loj hlob es txawj ua raws li tej kev tshwm sim.”9
Vajtswv puas xav nrog nej tham tiag? Yog mas! “Tib yam nkaus li tib neeg twb tsis muaj peev xwm muab nws txhais npab uas qaug zog los thaiv tus dej Missouri kom txhob ntws raws li tau tsim kom ntws, … ces tib neeg twb cuam tshuam tsis tau qhov uas tus Muaj Hwj Chim Tag Nrho yuav muab tej kev txawj ntse nchuav saum ntuj ceeb tsheej los rau Tsoom Haiv Neeg Ntseeg hauv Hnub Nyoog Kawg.”10
Nej tsis tas xav seb yam twg muaj tseeb.11 Nej tsis tas xav seb nej yuav tso siab taus rau leej twg. Dhau ntawm txoj kev tshwm sim, nej txais tau nej zaj lus tim khawv hais tias Phau Ntawv Maumoos yeej yog Vajtswv txoj lus, tias Yauxej Xamiv yog ib tug yaj saub, thiab tias nov yog tus Tswv lub Koom Txoos. Txawm hais tias luag lwm tus yuav hais los sis ua li cas los, tsis muaj leej twg uas tshem tau ib qho lus tim khawv thaum twg twb nkag mus hauv nej lub siab lub ntsws txog qhov tseeb lawm.
Kuv yaum kom nej yuav ncav tes ua ntau tshaj nej muaj cuab kav ntawm sab ntsuj plig kom tau kev tshwm sim, vim tus Tswv tau cog lus hais tias “yog hais tias nej [nrhiav], nej yuav tau txais kev tshwm sim ntxiv rau kev tshwm sim, kev txawj ntse ntxiv rau kev txawj ntse, kom nej yuav paub tej txuj ci uas neeg paub tsis txog thiab tej yam kaj siab lug—tej uas coj tau kev xyiv fab los, tej uas coj tau txoj sia nyob mus ib txhis los.”12
Au, yeej muaj ntau yam tsav uas nej Leej Txiv Saum Ntuj Ceeb Tsheej xav kom nej paub. Zoo li Txwj Laug Neal A. Maxwell qhia tias, “Rau cov uas muaj qhov muag pom kev thiab pob ntseg hnov lus, peb yeej paub hais tias Leej Txiv thiab Leej Tub xav qhia txog tej yam uas neeg tsis paub txog lub qab ntuj khwb no!”13
Tsis muaj ib yam dab tsi uas qhib lub ntuj ntau npaum li qhov uas yus muaj kev dawb huv, kev ua tib zoo mloog lus, rau siab nrhiav, niaj hnub nyeem Yexus cov lus hauv Phau Ntawv Maumoos,14 thiab ib sij mus ua tej hauj lwm hauv lub tuam tsev thiab nrhiav tsev neeg keeb kwm.
Nej yuav tsum to taub hais tias, yeej yuav muaj tej lub sij hawm thaum uas nej xav tias lub ntuj ceeb tsheej kaw lawm. Tiam sis kuv cog lus rau nej hais tias thaum nej pheej mloog lus, qhia kev ris txiaj rau txhua txoj koob hmoov uas tus Tswv muab rau nej, thiab thaum nej ua siab ntev kam ua raws li tus Tswv lub sij hawm, nej yuav kawm paub ntxiv thiab to taub tej uas nej tsis paub. Txhua txoj koob hmoov uas tus Tswv tau npaj rau nej—tej txuj ci—yeej yuav los rau nej. Txoj kev tshwm sim rau yus tus kheej twb yog yuav pab nej li ntawd ntag.
Kuv cia siab rau yav tom ntej. Yuav muaj tej lub cib fim rau peb sawv daws tau loj hlob tuaj, ua tej hauj lwm, thiab coj txoj moo zoo no mus rau txhua qhov chaw hauv ntiaj teb no. Tiam sis kuv tsis ruam kuv paub yuav muaj xwm dab tsi tom ntej. Peb nyob hauv ib lub ntiaj teb uas muaj kev kub ntxhov thiab haj yam muaj kev sib cav. Qhov uas sawv daws siv hluas taw xob tas li thiab qhia xov xwm tawm 24 xuab moos yeej tsim txom peb lub siab tas li. Yog tias peb yuav muaj cuab kav paub tej suab uas hais lus rau peb thiab to taub tib neeg tej tswv yim uas tawm tsam qhov tseeb, peb yuav tsum kawm kom paub txais kev tshwm sim.
Peb tus Cawm Seej thiab tus Txhiv Dim, Yexus Khetos, yuav ua Nws tej hauj lwm zoo tshaj plaws tas sim no mus rau thaum Nws yuav rov qab los. Peb yuav pom tej txuj ci tseem ceeb uas qhia tias Vajtswv Leej Txiv thiab Nws Tib Leeg Tub, Yexus Khetos, yeej muaj yeeb koob coj kav lub Koom Txoos no. Tiam sis hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.
Kuv cov kwv tij thiab cov muam, kuv taij thov kom nej sab ntsuj plig yuav haj yam muaj cuab kav txais kev tshwm sim. Cia Hnub Easter no ua ib lub sij hawm uas pauv tau nej lub neej. Xaiv los ua tej hauj lwm ntawm sab ntsuj plig uas nej yuav tsum ua kom thiaj txais tau lub txiaj ntsim ntawm tus Ntsuj Plig Dawb Huv thiab haj yam hnov tus Ntsuj Plig lub suab kom meej zog.
Nrog Maulaunais, kuv ntuas nej thaum Hnub Caiv Easter no hais tias “los cuag Khetos, thiab cia li tuav txhua yam txiaj ntsim uas zoo,”15 pib nrog lub txiaj ntsim ntawm tus Vaj Ntsuj Plig Dawb Huv, lub txiaj ntsim ntawd muaj cuab kav thiab yeej yuav pauv koj lub neej.
Peb yog cov neeg uas coj raws li Yexus Khetos. Yam tseem ceeb tshaj plaws uas tus Vaj Ntsuj Plig Dawb Huv yuav qhia rau nej yog qhov uas Yexus yog tus Khetos, Vajtswv uas muaj sia nyob Tib Leeg Tub. Nws muaj txoj sia noyb! Nws yog Tus Tuaj Peb Tog nrog rau Leej Txiv, peb tus Yam Ntxwv, thiab peb tus Txhiv Dim. Hauv Hnub Caiv Easter no, peb nco txog Nws txoj kev txi uas yog kev theej txhoj, Nws txoj Kev Sawv Rov Los tiag, thiab tias Nws los saum ntuj ceeb tsheej los.
Nov yog Nws lub Koom Txoos, uas raug muab txum tim rov qab los dhau ntawm tus Yaj Saub Yauxej Xamiv. Kuv ua tim khawv, nrog kuv txoj kev hlub rau nej txhua tus li no, los ntawm Yexus Khetos lub npe dawb ceev, amees.