Tus uas Nyiaj Mus Kom txog Hnub Kawg, Tus Ntawd Yuav Dim

Cov kwv tij thiab cov muam, kuv zoo siab uas kuv muaj cib fim hais lus rau nej txog kuv tej kev xav.

Ob peb xyoos tas los, kuv tus poj niam thiab kuv wb nyob hauv kev ua koob tsheej qhib yeeb yam rau cov me nyuam saib nyob hauv lub Koom Txoos lub Tsev Ceev Teej Tug txog Keeb Kwm nyob hauv Salt Lake City.Thaum ua kab ke tas lawm, Thawj Tswj Hwm Thomas S. Monson tau tuaj txog wb, thiab thaum nws tuav wb tes tas, nws hais tias, “Cia li nyiaj mus tom ntej, thiab nej yuav kov yeej”—yog ib txoj lus qhia tseem ceeb thiab ib qho tseeb uas peb txhua tus pom zoo.

Yexus Khetos tau qhia peb tias “tus uas nyiaj mus kom txog hnub kawg, tus ntawd yuav dim.”¹

Kev nyiaj mus txhais hais tias “nyob khov kho ua raws li tau cog lus tias yus yuav coj raws li Vajtswv cov lus txib txawm yus raug kev ntxias, kev tawm tsam, thiab teeb meem los yog.”²

Cov uas tau txais tej yam tseem ceeb los ntawm sab ntsuj plig thiab tau rau siab pab lwm tus ntshe muaj ib hnub lawv yuav mus ua yuam kev los yog tso kev ntseeg tseg yog tias lawv tsis nyiaj mus kom txog thaum kawg. Thov kom peb yeej yuav rau siab khaws tej lus no hauv peb lub siab lub ntsws hais tias, “Kuv yuav tsis raug li no.”

Thaum Yexus Khetos qhia hauv Kapena-us, “cov neeg uas caum Yexus qab muaj coob leej thiaj tso Yexus tseg thiab tsis nrog nws mus lawm.

“Yog li ntawd, Yexus thiaj nug nws kaum ob tug thwj tim hais tias, Nej ne, nej yuav tso kuv tseg thiab los?”³

Kuv ntseeg tias niaj hnub no, Yexus Khetos nug peb txhua tus uas tau ua kev khi lus nrog Nws hais tias, “Nej yuav tso kuv tseg thiab los?”

Kuv thov kom peb txhua tus yuav xav xav txog tej yam uas peb yuav txais tau hauv lub neej nyob mus ib txhis, peb thiaj yuav teb zoo li Ximoos Petus hais tias: “Tus Tswv, peb yuav mus cuag leej twg? koj tej lus pub tau txoj sia ib txhis rau neeg.”⁴

Cia peb rau siab ua raws li tej yam uas peb ntseeg thiab paub. Yog peb tsis ua neej raws li tej yam uas peb paub, thov kom peb hloov siab. Cov neeg txhaum uas pheej ua txhaum, thiab tsis hloov siab lees txim, lawv ua phem ua qias zuj zus mus, txog thaum Dab Ntxwg Nyoog txeeb tau lawv ua nws li, ua rau lawv tsis muaj cib fim hloov siab lees txim, txais kev zam txim, thiab tau koob hmoov nrog tag nrho cov koob hmoov uas nyob mus ib txhis.

Kuv twb hnov cov uas tsis tshua muab siab rau ntseeg lub Koom Txoos lawm uas hais ntau yam qhia vim li cas lawv tau tsum tsis tuaj ntxiv thiab lawv twb poob lub zeem muag txog lub hom phiaj ntawm peb lub neej hauv lub ntiaj teb no. Kuv ntuas lawv kom xav txog qhov no thiab rov qab los, vim kuv ntseeg tias tsis muaj leej twg zam tau lawv tus kheej nyob rau ntawm tus Tswv, Yexus Khetos.

Thaum peb ua kev cai raus dej, peb tau ua kev khi lus—tsis yog ua nrog ib tug txiv neej xwb tiam sis yog nrog tus Cawm Seej, es peb txaus siab “ris Khetos lub npe, thiab txiav txim siab los ua hauj lwm rau nws kom mus txog thaum kawg.”⁵

Kev koom kev sib ntsib txais lub cim nco txog yog ib txoj kev tseem ceeb rau peb tshuaj ntsuam peb tus kheej seb peb puas ua hauj lwm rau Nws, peb sab ntsuj plig puas muaj zog, thiab peb txoj kev ntseeg Yexus Khetos puas loj tuaj.

Kev txais lub cim nco txog yog qhov tseem ceeb tshaj plaws uas peb ua thaum Hnub Caiv. Tus Tswv piav txog txoj kab ke no rau Nws cov Thwj Tim tsis ntev ua ntej Nws tuag. Nws twb ua ib yam li ntawd nyob hauv thooj av Amelikas. Nws qhia peb tias yog peb ua txoj kab ke no, ces qhov ntawd yuav ua tim khawv rau Leej Txiv tias peb nco ntsoov txog Nws, thiab Nws cog lus tias, peb yuav muaj Nws tus Ntsuj Plig nrog peb nyob.⁶

Nyob hauv Amas tus Hluas tej lus qhia rau nws tus tub Sinploos, peb kawm tau tej lus ntuas thiab tej lus ceeb toom uas pab peb ua raws nraim li peb tej kev khi lus:

“Ceev faj kom koj tsis txhob muab hlob; muaj tseeb tiag, ceev faj koj tsis txhob khav txog koj tus kheej lub tswv yim, thiab txhob khav txog koj lub zog.

“Ua siab loj, tiam sis tsis txhob muab hlob heev; thiab kuj ceev faj tias koj yuav tswj tag nrho koj tej kev ntswv siab, xwv kom koj yuav muaj kev hlub puv npo; ceev faj kom koj tsis txhob ua tub nkeeg.”⁷

Ob peb xyoos tas los, thaum kuv phav hauj lwm, kuv twb xav mus nquam lub nkoj ntev. Kuv xauj ib lub nkoj ntev, thiab kuv zoo siab kawg, pib nquam nkoj hauv hiav txwv.

Tom qab ob peb feeb, ib nthw dej tau muab lub nkoj ntev ntxeev. Kuv ib sab tes tuav tus duav thiab ib sab tes tuav lub nkoj ntev, es thaum kuv sib sib zog ces kuv rov qab ntxeev raws li qhov yog.

Kuv rov qab sim nquam kuv lub nkoj ntev, tiam sis ob peb feeb tom qab ntawd, lub nkoj ntev rov qab ntxeev kiag. Kuv ua siab tawv sim ua ntxiv, es ua tsis tau, mus txog thaum ib tug neeg uas to taub kev nquam lub nkoj ntev qhia kuv tias nyaj lub plhaub tawg pleb thiab lub nkoj ntev puv dej lawm, ua rau lub nkoj ntev tsis khov thiab tswj tsis tau. Kuv muab lub nkoj ntev rub rau ntug dej thiab rho lub pob ntsaws, thiab muaj tseeb tiag, ib co dej ntau heev tawm tuaj.

Kuv xav tias tej lub sij hawm peb ua peb lub neej nrog tej kev txhaum uas, zoo li cov dej xau nkag rau hauv kuv lub nkoj ntev, tab kaum peb txoj kev vam meej ntawm sab ntsuj plig.

Yog peb tseem ua txhaum ntxiv, peb hnov qab txog tej kev khi lus uas peb tau ua nrog tus Tswv, txawm yog peb pheej ntxeev vim hais tias kev txhaum ua rau peb lub neej tsis sib txig.

Zoo li qhov tawg pleb nyob hauv kuv lub nkoj ntev, peb yuav tsum kho tej qho tawg pleb hauv peb lub neej. Ib txhia tej kev txhaum los yuav tsum siv zog ntxiv thiaj li hloov siab lees txim tau.

Yog li ntawd peb thiaj yuav tsum nug peb tus kheej, Peb txoj kev xav txog tus Cawm Seej thiab Nws txoj hauj lwm zoo li cas? Peb puas zoo li Petus thaum nws xyeej Yexus Khetos? Los yog peb puas tau ua zoo mus txog thaum peb muaj cwj pwm thiab kev mob siab xav ua uas nws muaj tom qab tus Cawm Seej tso cai loj rau nws?⁸

Peb yuav tsum siv zog ua raws li tag nrho cov lus txib thiab tsom ntsoov rau tej lus txib uas nyuaj tshaj plaws rau peb ua. Tus Tswv yuav nrog nraim peb nyob, pab peb thaum peb xav tau thiab thaum peb qaug zog, thiab yog peb xav ua tiag thiab ua li ntawd, Nws yuav ua kom “tej uas qaug zog los ua tej uas muaj zog.”⁹

Kev mloog lus yuav ua rau peb muaj zog kov yeej kev txhaum. Peb kuj yuav tsum to taub hais tias thaum sim peb txoj kev ntseeg peb yuav tsum mloog lus, feem ntau peb tsis paub yuav zoo li cas tom qab ntawd.

Kuv xav qhia txog ib tug txheej txheem uas yuav pab peb nyiaj mus kom txog thaum kawg:

1. Txhua hnub, cia li thov Vajtswv thiab kawm vaj lug kub.

2. Txhua lub lim tiam, txais lub cim nco txog nrog ib lub siab mob thiab lub siab xav ua zoo.

3. Them ib feem kaum thiab nyiaj yoo mov txhua lub hlis.

4. Txhua ob xyoos—txhua xyoo rau cov tub hluas ntxhais hluas—rov qab ua rau peb daim ntawv tso cai nkag tuam tsev.

5. Tas peb lub neej, ua tus Tswv tej hauj lwm.

Thov kom tej yam tseeb ntawm txoj moo zoo yuav pab peb lub siab nyob khov kho, thiab thov kom peb yuav ua peb lub neej kom txhob raug tej qho tawg pleb uas tab kaum peb txoj kev nyab xeeb nyob hauv cov dej ntawm lub neej no.

Tus Tswv txoj kev muaj ib tug nqi, thiab yog tias yus xav taug txoj kev ntawd ces yuav tsum them tus nqi ntawd.

Kuv yeej zoo siab vim peb tus Cawm Seej tau nyiaj mus kom txog thaum kawg, Nws ua Nws txoj kev txi theej txhoj tiav lawm.

Nws raug kev txom nyem rau peb tej kev txhaum, kev tu siab, kev nyuaj siab, kev mob, thiab tej kev ntshai, Nws thiaj li paub pab peb, tshoov peb lub siab, nplij peb lub siab, ntxiv dag zog rau peb kom peb nyiaj tau thiab txais tau lub nqi zog uas tau muab ceev cia rau cov uas tsis raug kov yeej.

Peb nyias muaj nyias lub neej sib txawv. Peb txhua tus muaj tej lub sij hawm uas sim peb lub siab, lub sij hawm rau kev zoo siab, lub sij htawm txiav txim, lub sij hawm kov yeej teeb meem, thiab lub sij hawm txais tau cib fim.

Txawm nej tej xwm txheej zoo li cas los, kuv ua tim khawv tias peb Leej Txiv Saum Ntuj Ceeb Tsheej ib sij hais tias, “Kuv hlub nej. Kuv txhawb nqa nej. Kuv nrog nraim nej. Tsis txhob tso tseg. Hloov siab lees txim thiab nyiaj mus tom ntej rau ntawm txoj kev uas kuv tau qhia nej. Thiab kuv qhia nej tias peb yeej yuav sib pom dua nyob hauv peb lub tsev xilethi-aus.” Los ntawm Yexus Khetos lub npe, amees.