Nengeni ewe Mwan!
Ion kana ra kuna ew an ar repwe ennetin nengeni ewe Mwan ra kuna ewe an ngeni ewe wachemuken pwapwan manau me ewe mettochun echikara.
Pwi me fefinei achengicheg, achengicheng chienei, ua kinisou ren ai nom remi non ei murinnon mwichenapen mwichefen nesoponon ei week. Harriet me ngang am ouwa fitikemi ne pwapwa ne etiwa ekkewe Elter Gong me Sores me pwich kewe penan me fefinach ekkewe ra angei wiser kewe minefo non ei mwichenapen mwichefen.
Ika mwo use chiwen kuna chienei we achengicheng Preseten Thomas S. Monson, ua tongei, tipeew, me anisi nouch soufos me Preseten, Russell M. Nelson, me noun kewe chon aninis.
Ua pwan kinisou me pwapwaiti ai upwe pwan angang sefan fengen ren pwi Achengicheng chon ewe Mwichen ekkewe Engon me Ruemon.
Akaewin, uwa unusen tekisoson me fokkun pwapwa ai uwa choni Ewe Mwichefenin Jises Kraist ren Aramas mi Pin non Fansoun Soponon, ikewe minionen mwan, fefin, me semirit ra mochen ar repwe seikita me ian ra nom ian—non ese nifinifin wiser me kokkor—me angang fiti ennetin netiper ar repwe angang ngeni Kot me aramas, ne aueta ewe muun Kot.
Ikenai ew ran mi pin. Ewe Ranin fenin Paska, nupwen sia awora achechemen ena amwararen sosoran nupwen ach ewe Chon Amanau a muti ewe fofon mano1 me pwata seni ewe peias.
Ewe Auchean Ran non Uruo
Uwa chok karan eisini ewe internet “Menni ran e kon siwini ewe fetanin uruo?”
Ponuwan kewe ra no seni ai mairu me fatafatangaw ngeni ach weweiti me mwasangasangen ekiek. Ew me neir, ewe ran nupwen efou foun fan nang a atai Yucatán Peninsula; ika nupwen non 1440, Johannes Gutenberg a awesano noun ewe mwesinen mak taropwe; me pwan ewe ran non 1903 nupwen kewe pwipwi ren Orville me Wilbur Wright ra pwarano pwe mwan ir mi tongeni chang.
Ika emon e eisinuk pwan chok ei kapas eis, met kopwe ura?
Ponuan merei mi fatafatoch.
Ren ach sipwe kuna ewe auchean ran non uruo, sipwe niwinsefaniti ewe kunionun arapakan 2,000 ier a no non ewe Atake Gethsemane nupwen Jises Kraist a fotopukutiw non an iotek me fangeno inisin pwe niwinin ach tipis. Non ei wachemuken me ese wor ne muchun asor ren ukukun eriafoun ese wor met epwe nonno ngeni non pekin inis me ngun pwe Jises Kraist, pwan Kot, a puputiw chan. Pokiten an tong mi unusoch, A fangeno meinisin pwe sipwe pwan angei meinisin. An monomonen asor, a weires ach sipwe weweiti, nge sipwe chok mefi ren unusen netipach me ach ekiek, a achema ngenikich ussun ukukun ach kinisou ngeni Kraist ren an monomonen niffang.
Mwen ena pwinin, ra etekinono Jises me mwen mesen ekkewe souosor me ekkewe sou apung ekkewe ra turunufasei I, ra ni I, me etipisi I ngeni ew eriafoun mano. A nom won ewe irapenges non riafoun metek tori, “an [a] wesino.”2 Soman Jises ewe ra isenanong non ewe peias non ewe achaw, nesosorun ewe ounungatin ran, Jises Kraist, ewe Noun ewe Kot mi Tekia, a tou seni ewe peias a manau non an ning o echipor, saram, me amwarar.
Ewer, mi chommong met mi fisnon unusen uruon nom a fokkun angawano ussun fetanin nonomun mu me aramas. Nge sipwe ochu fengeni meinisin, rese tongeni anonno ngeni ewe auchean met mi fis non ewe aewin sosoren Paska.
Met ena e fori ewe asor ese wor ne muchun me ewe Manausefanitan Jises Kraist ewe akkauchean mettoch non uruo—e kon amwasangasang porousan nap seni ekkewe mounen fonufan, eriaffou, tatakis, me ekesiwinin manaw kunaien saintis?
Pokiten Jises Kraist, Sia Tongeni Manau Sefan
Ponuwan a tongeni pwa me non ruu wachemuken mettoch, a affata sosot mi weires an epwe suseni kich meinisin mi mesengeni.
Ewin, kich meinisin sipwe ma. Ese pwan nifinifin ika onuon ika fopun, mesoch, pochokun, ika en mi tumunoch, ew ran inisum epwe mano. Chiechiom me om famini repwe riafoutuk. Nge rese tongeni eniwinsefanuk.
Nge, pokiten Jises Kraist, om mano epwe chok mwochomoch. Ew ran ngunum epwe pwan niwinsefaniti inisum. Ei inis mi manausefan ese tongeni chiwen mano,3 me kopwe nom non ewe manau feinfeino, ngas seni metek me riaffoun inis.4
Ei epwe fis pokiten Jises ewe Kraist, ewe a fangano manawan me pwan angei sefani.
A fori ei fan iten meinisin mi nuku non I.
A fori ei fan iten meinisin rese nuku non I.
A pwan fori ei pwan fan iten ekkewe ra turunufasei, eriaffou, me panmwani itan.5
Pokiten Jises Kraist, Sia Tongeni Nom ren Kot
Oruan, meinisin sia fen tipis. Ach tipis epwe epeti senikich ach sipwe nom ren Kot feinfeino, pokiten “ese wor och mettoch mi nimengaw epwe tonong non muun.”6
Pungunon pwe meinisin mwan, fefin, me semirit rese tongeni niwino mwen mesan—tori an Jises Kraist, ewe Apanen Siip mi nimenimoch, a fangeno manawan pwe niwinin ach tipis. Pokiten Jises ese wor an niwinimang, I a tongeni omusa ach kewe niwinimang me a tufich ngeni ekkewe niwinin tipis fan iten meinisin. Me ena a apachanong en me ngang.
Jises Kraist a moni niwinin ach kewe tipis.
Ir meinisin.
Non ena auchean ran non uruo, Jises ewe Kraist a suki ekkewe asamen mano me oturano ekkewe osukosuk minne a epeti senikich ach sipwe tonong non ekkewe etip mi pin ngeni manau ese much. Pokiten ach ewe Samon me Chon Amanau, ngang me en sia angei ewe niffang mi unusen auchea me ese kamo—ese nifinifin foforuch me nom, sia tongeni aier me fetan non ewe an a emwen ngeni saramen nang me ningoch, noun Samach Kot non Nang mi pwenieno.
Pwata Sia Pwapwa
Iei met sia fori apwapwai non Ranin fenin Paska—sia fori apwapwan manau!
Pokiten Jises Kraist, sipwe pwata seni ewe riafoun mano me foropachei ekkewe sia tonger non pouch, kechiw ren ach pwapwa me ur ren ach kinisou. Pokiten Jises Kraist, sipwe ne fis non napanapen sipwe nom feinfeino, fonufan ese wor nesoponon.
Pokiten Jises Kraist, ach tipis resapw chok totonuno; ra pwan tongeni nemeno.
Sia tongeni winiti nimenimoch me fefeita.
Pin
Pokiten ach ewe Chon Amanau mi Achengicheng, sia tongeni un seni ewe nenien konik ewe a puputa ngeni manau esemuch.7 Sia tongeni nonom non imwen ach ewe King feinfeino, non ning me unusochun pwapwa.
Kich Mi “Nengeni ewe Mwan”?
Nge ren ekkei meinisin, mi chommong non ewe fonufan ikenai ekkewe rese eteneki ika rese nuku non ewe auchean niffang Jises Kraist a fen ngenikich. Meni repwe rong ussun Jises Kraist me sinei I pwe emon mi wor uruon nge rese kuna Iika ennetin I ion.
Nupwen uwa kan eieki ussun ei, a chemeto an ewe Chon Amanau ewe uta me mwen mesen Pilatus ewe kepinan Judea, fitu awa chok me mwen an ewe epwene ma.
Pilatus a ekiei pwe Jises I noun chon Juta ew King, a wor angang Pilatus epwe fori, a pachenong ruu watten angang: ioni takises fan iten Rome me tumunu an epwe wor kinamwe. Iei ewe mwichen Jews ra wato emon mwan ra ura pwe ew osukosuk ngeir me ruepek.8
Mwirin an kapas eis ngeni noun ewe chon kanapus, Pilatus a afata, “Ua kuna atei pwe ese wor mo nge ekis an mwan.”9 Nge a mefi pwe epwe fori an epwe menemenoch netipen ekkewe chon tipingeni Jises, iwe Pilatus a fori ew angangen oruni ewe repwe mutata an emon chon kanapus epwe musono nupwen fansoun Fatanap. Resapw ureni epwe omusano Jises nap seni ewe mi itefouno non sona me nimanau itan Barabas?10
Nge ewe okurangarangen mwichen aramas ra chok puchor ngeni Pilatus epwe epichano Barabbas me irapengesi Jises.
“Pwata?” Pilatus a eis. “Met mi ngaw a fen fori?”
Nge ra chok osomongeta ne puchor. “Irapengesi I!”11
Non ew amuchunon met Pilatus a fori a aponueta mochenin ewe mwichen aramas o a urenir pwe repwe wichi Jises.12 Iei met ra fori, ra nikitano inisin a chok cha me pwopwokis. Ra turunufasa I, ra pacheta won mokuran mwarin ira fonufon, me aufoufa ngeni I echo uf mi forket.13
Meni Pilatus e ekieki pwe iei met epwe menemenoch ren mochenin ekkewe aramas ren cha. Meni repwe awora umoumoch ngeni ewe mwan. “Nengeni, uwa uweato atei remi, Pilatus a apasa, pwe oupwe sinei pwe use kuna mo ew an mwan. … Nengeni ewe mwan!”14
Ewe Noun Kot a uta non ununun aramas me mwen ekkewe aramasen Jerusalem.
Ra tongeni kuna Jises, nge rese wesewesen nengeni I.
Ese wor meser ar repwe kuna.15
Non ew sokkun napanap, sia pwan koko ngeni ach sipwe “nengeni ewe mwan.” Memef ussun I a sokofesen me non ewe fonufan. Soufosun nom me ikenai ra pwarata pwe I ewe Noun Kot. A fokkun auchea me namot pwe kich meinisin sipwe pusin sinei won winikapach. Nge, nupwen ka ekieki ewe manau me afanafan an Jises Kraist, met ouwa kuna?
Ion kana ra kuna ew an ar repwe ennetin nengeni ewe Mwan ra kuna ewe an ngeni ewe wachemuken pwapwan manau me ewe mettochun echikara.
Nge, nupwen oua ono ren sosot me tipis, nengeni ewe Mwan.
Nupwen ouwa mefi pwe ouwa morukono me monnukono, nengeni ewe Mwan.
Nupwen oua epinukunukungaw, me imuno, ekiekingaw, feiengaw ika nukunukumang, nengeni ewe Mwan.
I epwe ekinamweikemi.
I epwe echikarakemi me ngenikemi wewen ami sai. I epwe ninau Ngunun me amasowa netipemi ren chommongun pwapwa.16
I a awora “pochokun ngeni ekkewe mi apwangapwang; me ngeni ekkewe ese wor ar pochokun I a anapano pochokun.”17
Nupwen sia ennetin nengeni ewe Mwan, sia kaeo ussun I me kukuta ach sipwe awenechara manauach ngeni. Sia aier me achocho ngeni ach sipwe emwirinouono nonomuch me anapano ach sipwe kan ngeni I. Sia nuku I. Sia pwarano ach tong ngeni I ren ach aponueta An kewe annuk me asamonu ach kewe pwon mi pin.
Non pwan ekkoch kapas, sia winiti noun chon kaeo.
An ewe nimenimochun saram a asaramano ngunuch. An ning a seikikicheta. Osach kewe mi chou ra mecheresino, ach kinamwe a watteno. Nupwen sia ennetin nengeni ewe Mwan, sipwe angei pwonen mwach minne epwe pesei me anisi kich non fansoun osukosuken manau. Ika sipwe nenesefan, sipwe esina pwe mi wor ew etetten mi pin, epwe aweweochu mettoch meinisin mi fis.18
Nupwen ouwa etiwa An ewe asor, winiti Noun chon kaeo, me tori amuchunon om ewe sai won ei fonufan, met epwene fis ngeni ekkewe osukosuk ka ani non ei manau?
Ekkewe osukosuk repwene morono.
Ekkewe netipengaw, nukunukumang, eriaffou ouwa fen mesengeni?
Ra morono.
Ewe riaffou, metekin netip, mengiringir, saw me semwenin riaffou ouwa fen wes seni?
Ra morono.
Ra nemeno.
Esapw ren ach mochen sinei pwe “am aua kapas usun Kriaist, aua pwapwa non Kraist, aua afanafan usun Kraist, aua osini ussun Kraist … pwe noum kewe repwe sinei ian repwe apinukunuk won ren omusomusen arkewe tipis”?19
Esapw ren ach mochen sinei pwe sia achocho fiti unusen netipach ach sipwe ennetin nengeni ewe Mwan?
Pwi me fefinei mi Achengicheng, ua pwarata pwe ewe akaewin auchean ran non uruon aramas, ewe ran nupwen Jises Kraist, ewe Noun Kot, a okufu mano me tipis ren noun Kot meinisin. Me ewe akaewin auchean ran non manawemi me manauei ewe ran nupwen sia sinei ach sipwe “nengeni ewe mwan ”; nupwen sia kuna ika ennetin I ion; nupwen sia angei fiti ennetin netipach me ach ekiek manamanen An ewe achasefan; nupwen sia mochen tapweno mwirin I fiti asofosefanin ach mwasangasang me pochokun. Epwe ena ran nge ew ran mi chok fifis non unusen manauach.
Uwa nikitatiw remi ai kapasen pwarata me efeioch pwe nupwen sia “nengeni ewe mwan, sipwe kuna wewen, pwapwa, me kinamwe non ei manau won ei fonufan me manau ese much non ewe manau epwe feitto. Non ewe it mi pin iten Jises Kraist, amen.