Ren Ew Etipeew
Ren ach sipwe tikeri nang, kich mi auchea fengen, me mi auchea sipwe tipeew fengen.
Ewe watten nipisipiskon ew me nein ekkewe monun won fonufan mi kon amwarar. Won ew sai ngeni Mexico ren am aupwe ani Kirisimas ren an punuwei we famini, aua tonong non ew nenien tumunun nipisipiskon, ikewe minion watten nipisipiskon ra nom ie fansoun patapat. A fakkun amwarar am kuna ei mettoch mi ning me pwan ren am ekiek won ewe awewen tipeu me aneasochis ngeni annukun nang minne ekkewe mettoch Kot a forata ra pwomweni.1
Watten nipisipiskon ra angangoch non pekin emweni sai. Ra aea nenien ewe akkar ar repwe kuna aan repwe no ie. Iteiten spring, ra sai ngeroun mwain seni Mexico ngeni Canada, me iteiten fall, ra niwin ngeni ekkewe chok irannap mi pin non Mexico.2 Ra fori ei iteiten ier, ew kukkunun pau a aas fan ew. Fansoun ar sai, ra kinefengen nepwin won ira, ar repwe tumunur seni ewe patapat me seni chon efeiengawer.3
Ew mwichen nipisipiskon a iteni kaleidoscope usun ew pinukun ponira.4 Met esap ew nios mi ning ena? Emon me emon nipisipiskon non ew kaleidoscope ra sokofesen, nge ekkei man mi pwetete ra fen wis me ren emon Chon For mi tong ren ewe tufich ar repwe tongeni manau, aas ika chang, chommongono, me acheweno manau nupwen ra no seni epa ponira ngeni pwan epa, ar awora mworomworen foun ira. Iwe, inamo ika emon me emon nipisipiskon mi sokkono, ra angang fengen ar repwe fori ewe fonufan epwe ew neni mi ning me uwaoch.
Usun ekkewe nipisipiskon mi watte, kich sia nom won ew sai sefan ngeni imwach nang ikewe sipwe chusefan ngeni Semach me Inach non nang.5 Usun ekkewe nipisipiskon, a fen wor rech ekkewe napanap mi mut ngeni kich ach sipwe sai non manauach, ren ach sipwe aunusa popun ach foruta.6 Usur chok, ika sipwe achufengeni netipach,7 ewe Samon epwe tumunu kich “usun emon inenapen chuko a [ionfengeni] etenin kewe fan poun”8 me epwe fori ach sipwe usun ningen eu pinukun ponira.
Nengin me at, fopun me anuon, pwii me mwongei, sia nom fengen non ew sai. Ren ach sipwe tikeri nang, kich mi auchea fengen, me mi auchea sipwe tipeew fengen. Ewe Samon a annuku ngeni kich, Oupwe ew; iwe ika ousap ew iwe esapw ami nei.9
Jises Kraist i ewe amuchunon nenien appirun etipeew ngeni Seman we. Repwe ew non ew popun, non tong me non angang, ren “mochenin ewe Nau epwe kuf ren mochenin ewe Sam.”10
Ifa usun ach sipwe tapweno mwirin an ewe Samon we unusochun nenien appirun tipeew ngeni Seman we me afeu fengenir me emon me emon?
Ew tetten mi amwarar a pwa m enon Foffor 1:14. Sia anneani, “[Ekkewe mwan] meinisin ra soposopono ren ew etipeew non iotek me tingor, fiti ekkewe fefin.”11
Ai nuku mi auchea pwe ewe kapas “ren ew etipeew” mi pwa fan chommong me non ewe puken Foffor, ikewe sia anneani usun met ekkewe chon tapweno mwirin Jises Kraist ra fori mwirin chok An we feita nang non inis mi manau sefan, pwan ekkewe feioch ra angei pokiten ar achocho. Mi pwan auchea pwe sia kuna ena chok sokkun etetten me nein ekkewe mi tupwon chon ewe fonuen Merika atun ewe fansoun ewe Samon a churir me angang ngenir. “Ren ew etipeew” wewen non tipeew, non chufengen me meinisin fengen.
Ekkoch ekkewe mettoch ekkewe Souneng mi tupwon ra fori non tipeew non ir me ru neni pwe ra pwarata usun Jises Kraist, kaeo ewe kapasen Kot, me angang fengen ren tong.12
Noun ewe Samon chon tapweno mwirin ir ew non popun, non tong, me non angang. Ir mi sinei ika ir ion, ir mi sinei met repwe fori, me ra fori ren tong fan iten Kot me fan iter. Ir chon ewe mwichen pinukun ponira mi ning ar feino ren ew etipeew.
Ekkoch ekkewe feioch ra angei pwe ra ureno ren ewe Ngun mi Fel, manaman a fis ngenir, ewe Mwichefen a marino, ese wor anini fengen nein ekkewe aramas, me ewe Samon a efeiochur non mettoch meinisin.13
Sia tongeni ekieki pwe ewe popun ra tipeew pwe pokiten ir mi pwisin sinei ewe Samon. Ir mi fen kane ngeni, ra fen chon pwarata usun An misin mi pin, usun ekkewe manaman A fori, me usun An manausefan. Ra kuna me attapa ekkewe esisin non Poun me pechen. Ir mi ennetin sinei pwe I ewe Messiah, ewe Chon Angasanon ewe fonufan. Ir mi sinei pwe “I ewe popun echikar meinisin, kinamwe, me fefeita esemuch.”14
Ina mwo ika sise kuna ach Chon Amanau ren pwisin mesach, kich mi tongeni sinei pwe I mi manau. Nupwen sia arap ngeni I, nupwen sia kutta ach sipwe angei pwisin ach pwarata me ren ewe Ngun mi Fel usun An misin mi pin, epwe wor ach weweoch usun ach popun; ewe tongen Kot epwe nonnom non netipach;15 epwe wor rech ewe mochenin sipwe ew chok non ewe pinukun poniran ach kewe famini, wart, me neni; me sipwe angang fengen “non aan mi minafo, me murino.”16
Manaman ra fis nupwen noun Kot kewe ra angang fengen me emwen me ren ewe Ngun ar repwe angang ngeni ekkoch mi osupwang.
Sia rong usun chommong porousen tongen aninis mi pwa nein aramas nupwen a wor osukosuk. Ren awewe, nupwen ewe teninimwen Houston a osukosuk ren watten no non ewe ier a no, aramas ra poutano ekiekin pwisin ar osupwang me ra feino aninis. Emon presetenin ewe mwichen elder a tingor aninis seni ewe neni, iwe ew mwichen 77 mota a mwitir amwoneta. Chon aninis ra no fetan non ekkewe neni mi tori osukosuk me uwano famini ngeni ew nein ach kewe imwenipin, ikewe ra angei tumun me aninis mi auchea ngenir. Memper me esap memper ra angang fengen ren ew popun.
In Santiago, Chile, emon presetenin Fin Anisi a wor an mochen an epwe anisi ekkewe chon feito seni ekis non nenian we seni Haiti. Ren an aurour fengen me noun kewe souemwenin pristut, i me pwan ekkoch souemwen ra ekiekieta ar repwe awora klasin fosun Spanish ngeni ekkewe chon feito, ra anisir ne achufengenir ngeni imwer minafo. Iteiten nesosorun Ammon, misineri ra kan chufengen me nour kewe chon sukun mi chengen. Ewe memefin tipeew non ena imw a ew nenien appiru an aramas seni sokopaten neni mi tongeni angang fengen ren ew etipeew.
Non Mexico, fite puku memper ra sai non fitu awa ar repwe anisi ekkewe mi manau seni ru watten chechin fonu. Ra feito fiti ar pisekin angang, mwesin, me ar tong fan iten chon orur. Ir chon aninis ra ioifengen non ew ach kewe imwenipin me awitiwiti aurour, ewe kepinan ewe teninimwen Ixhuatán a kechiw ren an kuna pwanon ewe “tong ennet ina ewe nimenimochun tong an Kraist.”17
Iei ewe Samon a ngeni kich ewe tufichin aurour fengen iteiten maram non ach kewe mwichen pristut me Fin Anisi, pwe sipwe tongeni chon aninis non ach pinukun poniran wart me pranch—ew neni ikewe kich meinisin mi fich non me ikewe kich mi auchea me non.
Ew me ew ach aan mi sokkono, nge sia afetaner fengen. Aanach kewe esap usun met sia fen fori ika ian sia fen no ia; nge usun ikewe ia sipwe no ie me met sipwe winiti, non tipeew. Nupwen sia aurour fengen ren emwenin ewe Ngun mi Fel, sia tongeni kuna ia sia nom ia me ikewe sipwe no ia. Ewe Ngun mi Fel a ngeni kich nemasepwi mesach kewe rese tongeni kuna, pokiten “pwarata mi toropas neich,”18 me nupwen sia achufengeni ena pwarata, sia tongeni weweochuti.
Nupwen sia angang fengen non tipeew, ach popun pwe sipwe kutta me fori mochenin ewe Samon; ach pesepes epwe ewe tong sia mefi fan iten Kot me chon oruch;19 me ach watten mochen pwe sipwe “achocho ne angang,”20 pwe sipwe amonata ewe aan ngeni ewe niwinsefanito mi ning an ach Chon Amanau. Ewe chok aan sipwe fori an epwe fis ina epwe “ren ew tipeew.”
Usun ekkewe watten nipisipiskon, sipwe soposopono won ach sai non kinamwe me popun, emon me emon kich ren pwisin tufich me aninis, sipwe angang ne fori ei fonufan epwe kon ning me uwaoch—eipweipw ekis me ekis me pwan non unusen tipew ren an Kot kewe annuk.
Ach we Samon Jises Kraist a fen pwonei ngeni kich pwe nupwen sipwe mwich fengen non Itan, I epwe nonnom rech.21 Ua pwarata pwe mi manau me I a fen manau sefan non ew sosorun spring mi ning usun ikenai. I ewe Meinapen meinap meinisin, “ewe Kingen king, me [ewe] Samonun samon.”22
Amwo sipwe ew me non ewe Samon me Noun we Anaemon, nupwen sia emwen me ren ewe Ngun mi Fel, ina ai iotek non iten Jises Kraist, amen.