“Kopwe Nonnom Rer me Apochokunereta”

Upwe apasa sefani met Ralph Waldo Emerson a fen makkei, ekkewe fansoun non manau kich mi kon chemeni ina ekkewe fansoun kich mi mefi atapwanapanen pwarata.¹ Preseten Nelson, Use sinei ika fite nusun pwan “atapwanapwan” am mi tongeni engino ngeni nesoponon ei wik. Ekkoch me neich mi apwangapwang ngasangasem. Nge nupwen ua ekieki, en mi mi pwan tongeni tumunu ena. Mwa met emon soufos mi amwarar!

Ach tapweno mwirin an Preseten Nelson amwararen afanafan me kapasen pwarata nepwinewe me non ei soran, ua awora pusin ai pwarata pwe ekkei ekkesiwin ra awewen ewe pwarata minne mi emweni ei Mwichefen seni nepoputan. Ir ekkoch pwan pisekin pwarata pwe ewe Samon a amwitiri An angang non pwisin fansoun.²

Ngeni kich meinisin ekkewe sia mochen sinei usun tichikin ekkei mettoch, oupwe sinei pwe mwirin chok nesopun ei mwichenap, ew etetten epwe poputan ewe epwe tinano echo toropwe seni ewe Aewin Presetensi ngeni meinisin chon ewe Mwichefen ekkewe mi wor ar email rem. Echo fisu peich toropwen kapaseis me ponuwan epwe kapach ngeni fan iten souemwenin pristut me kinikinin mwichen aninis meinisin. Amuchunon, ekkena mettoch ra fen pacheta won ministering.LDS.org. “Tingor iwe kopwe angei. Kutta iwe kopwe kuna.”³

Iei ngeni ewe wis mi amwarar Preseten Russell M. Nelson a fen ngeniei, me fefinei we Jean B. Bingham. pwi me fefinei, nupwen ewe angangen ekkewe mwich me kinikinin mwichen aninis ra marino, epwe pwan fis pwe sipwe pwan pusin marita won winikapach—pwan—emon me emon kich sipwe nikitano ekkewe nikinik sia soun fori rese feito seni netipach ngeni ennetin chon kuno usun met ewe Chon Amanau a pwarano nesopun An angang won fonufan. Nupwen a amonata an epwene feinno seni an ewe kukkun mwichen chon tapweno mwirin ir mi mese nuokus me osukosuk, ese pwan etetenatiw met repwe fori ika ese pwan awora ngenir watten repot repwe awora unungat kapin echo me echo. Apw, a fen chemeni ar angang non ew auchean annuk: “Oupwe tongofengen nefinemi; ussun uwa tongekemi … ren ei aramas repwe sinei pwe ami nei chon kaeo, ika ouwa tongofengen nefinemi.”⁴

Non ew tufich an epwe akana fengenikich ngeni ena kapas allim, ei minefon esinesin pwe kokotun an pristut me Fin Anisi kokotun tumun epwe pachenong, me nein ekkoch mettoch, ekkei mettoch mi tettenitiw, ekkoch ekkewe Fin Anisi ra fen pin akkaea fiti murinon met mi pwano.⁵

• Sisapw chiwen aea kapasen sukunen famini me porous seni fefin chon amwa. Pokiten napengeni angangen tumun epwene nom non ateten nap seni non imw me fan ekkoch pokiten kewe porous esapw fateoch ren nesenin osukun mi amoneta, ika mo ew nesen mi auchea an epwe wor osukun won. Ewe auchean popun ach tumunu chiechiach epwe ussun met a fen affat ussun kewe aramas non fansoun Alma, sipwe “nenengeniochu nour kewe aramas, me tumunur non mettoch ren pekin wenechar.”⁶

• Sipwe sopweno ne amwa ekkewe imw nupwen mi tufich, nge mokutukutun non pusin nonomuch mi pachenong chommongun aramas, towaw, pekin tumunun manauach, me pwan ekkoch mettoch minne epwe epeti senikich ach sipwe churi ekkewe imw iteiten maram. Ussun met ewe Aewin Presetensi a ani aurour non kewe ier a no, fori ukukun om tongeni fiti ekkewe mettoch mi wor remw.⁷ Kapach ngeni met chok kokot ka fori ren om kopwe fori angangen churi imw, ewe pwinin maram epwe kapach ngeni koko won fon, mak toropwe, mak won fon, email, video chat, porous fengen ren non mwich non fan, chiechi fengen won angang, mokutukutun non neniach, me ekkoch tufich seni ewe social media non unusen fonufan. Nge upwe apochokuna ei minafon ekiek ese pachenong ei nuku ua keran kuna won pamperin efoch taraku. A mak, “Ika uwa epip, a fen wor osukun ngonuk me non imwom.” Ouse mochen, pwi kana, ren ekkei ekkesiwin sia mochen epwe napeno ach eteneki me ngungu, nge esap kukunuo.

• Fiti ei minefon, napanapen afanafanen ewe kapas allim, Ua mefi pwe oua poputa ne nuokus ussun met mi ketiw won ewe repot. Iwe, kopwe ekinamweuk, pun ese wor repot—esap amuchunon ewe maram, “Uwa chok karan fen awesano ewe repot. A watteno ach wewe. Ewe chok repot epwe fis ekkewe tetenin interfiu ekkewe sou emwen ra ani fiti ewe chiechi fengen ne tumunu non ewe wart me kinikinin. Eni mi nikinikin mecheres, chiechiei, ekkena interfiu mi fokkun auchea. Me nukun ekkena porous ewe pisop esap tongeni sinei usun nonnomun noun aramas non pekin ngun me aion. Chechemeni: Pwich chon iamwiri ra tupuni ewe Mwichen Pisop me presetenin mwichen elter; resap siwinir. Ewe kien emon Pisop me emon Presetenin Mwich mi nap seni ei prokramin iamwiri.

• Pokiten ei repot sia wanong mi sokono seni och mettoch ka fen wanong me nom, upwe apochokuna pwe ese auchea amekkewe mi nom ren ofesinapen Mwichefen aupwe sinei ifa usun ika ian ika inet oua churi noumi kewe aramas, aua chok mochen sinei pwe oua fori me oua afeiochur ren ami tongeni.

Pwii me fefinei, Kot a ngeni kich ew tufich ren ach ununusen Mwichefen ne pwarano “nimenimochun manaman … me mwen Kot”⁸—“ach sipwe mwarei fengeni an emon me emon chou pwe repwe tongeni pan” me aururu ekkewe ra mochen aurur,” ⁹ me iamwiri ekkewe fefin mi mano punuwer me ekkewe semirit ese wor semer, ekkewe mi pupunu me ekkewe rese pupunu, ekkewe mi pochokun me ekkewe mi osukosuk, ekkewe mi chourekin samau me ekkewe mi pochokun, kewe mi pwapwa me netipechou—ennetin, kich meinisin, iteiten emon me emon kich, pokiten mi auchea sipwe mefi ewe pwichikaren chiechi fengen me rongorong ewe pochokunen esinesinen nuku. Nge, ew minefon it, minefon amokut, me chokukunun repot esap fori mwo nge ew sokofesenin non ach angang me nukun chok ika si nenengeni ei pwe ew tingorun ach sipwe tumunu fengenikich non ew an mi pochokun, minafo, me pin. Nupwen sia neneta non mesach non pekin ngun ach sipwe aponueta ewe annukun tong, sia pwapwa ren chommong aramas ra angang non ena sokkun napanap ren chommong ier. Upwe apasa ew ussun chok pwan ach mochen fori non anean pwe ena penen aramas repwe kamoch an ewe Samon ewe annuk pwe repwe nom ren ekkewe mi pochokun”¹⁰ pwi me fefinei.

Non eweJanuary 14, non ew Raninfel, ekis chok fansoun mwirin 5:00 nekunion, chiechiei kewe ren Brett me Kristin Hamblin ra kan akaporous ren imwer ewe non Tempe, Arizona, mwirin an Brett ewe ranin angang non ewe mwichen pisop me Kirstin a aani osukosuken tumunun nour kewe nimon semirit.

Mwitir chok Kristin, emon mi ngas seni an semwenin kanserin oupun ewe ier a no, a mwitir turuno me ese chiwen mefi. Ew koko ngeni 911 a uweato ew kumien anisi osukosuk mi weiweita ra achocho ne anisi neminewe an epwe mefsefani. Nupwen Brett a tungor non iotek, a mwitir ne fori ruu pwan kokko won tenefon: ew ngeni inan ewe a tingor an aninis ren kewe semirit, ewe pwan ew ngeni Edwin Potter, noun ewe sensen famini. Ewe oporous nefinen Brett me noun ewe sensen famini a soposopono a iei ussun:

Edwin, a kuna ewe it won ewe caller ID a apasa, “Hey, Brett, met a fis?”

An Brett ewe ponueni ussun a chok puchor a apasa: “Uwa mochen kopwe etto ikei—iei chok!”

Non fitu chok minich Brett a tongeni aneani, chienan ewe pristut a nom unukun, a anisi ren kewe semirit me untengi Brother Hamblin ngeni ewe pioing mwirin ewe sein pioing a uwei punuwan ewe. Me ikana, kukkun seni faik minich mwirin an a opungano mesan, ewe tokter a afata pwe Kristin a ma.

Nupwen Brett a fokkun kechiw, Edwin a komoch I non poun me fiti ne kechiw—ren fansoun nakatam. Mwirin a nikitano Brett pwe a fiti chon an ewe famini non ar netipechou, Edwin a sa ngeni imwen ewe pisop ewe pwe a ureni met ewe a karan chok fis. Mwitir chok ewe pisop a sa ngeni ewe pioing nupwen Edwin a sa ngeni imwen ekkewe Hamblin ewe. I me punuwan ewe, Charlotte, ewe a pwan sato, a kan kukunou ngeni ekkewe nimmon semirit noun Hamblin iei ese chiwen wor iner, ierir 12 feitiw ngeni 3, a amongonir ngeni ar mongon nekunion, omochu ew minen kon me anisir ar repwe moneta ar repwene mour.

Mwirin Brett a ureniei, “Ewe amwararen kinikinin ei porous esapw ewe Edwin a sato nupwen uwa kori. Non fansoun weiweita, mi chok okkor aramas ra mochen aninis. Apw, ewe amwararen kinikinin ei porous nupwen Edwin ewe emon uwa ekieki ussun. Mi wor ekkoch aramas unuki. Mi wor emon mongeen Kristin me emon pwin ir me ruemon ra chok nom kukun seni unungat mwain seniei. A wor nouch pisop mi fokkun murinno. Nge ewe Akoko nefinen Edwin me ngang ew mi fokkun pochokun uwa kori nupwen uwa mochen an aninis. Ewe Mwichefen a awora ngenikich ew napanapen anen ach sipwe aponueta ewe oruwen annuk—sipwe awora tong, aninis me forata akoko ngeni pwich kewe me fefinach ra anisikich ach sipwe kan ngeni Kot.”¹¹

Edwin a apasa ussun met ewe a fis, “Fen pwan osokurun porousen non ei porous pwe Brett I noum sensen famini ren fansoun nakatam, a tam seni ai uwa noun ar ewe famini sensen famini. Non ena fansoun, a kan chuchurikem napengeni ren chok emon chiechiem nge esapw ren an angangen sensen famini. I a ew nenien apiru mi napanap, ew nenien apiru mi unusoch ussun emon mi wor an pristut mi pochokun achocho. Punuwei we, noum kewe at me ngang am ouwa chok ekieki pwe I chok emon aramas a fori wisan an epwe uweato ewe porous ngenikem nesoponon ew me ew maram; aua chok eieki pwe I emon chok chiechiem ewe a chok nom pepetiw non ewe aporopor ewe a fori ese pwan nifinifin non ei fonufan an epwe efeiochukem. Uwa pwapwa uwa tongeni mon ngeni ekis met uwa niwinimang ngeni won.”¹²

Pwi me fefinei, Uwa fitikemi ne afona meinisin sensen famini me sensen wart me sensen famini me fefin chon amwa ekkewe ra pwarano ar tong me aninis non ennetin nukucharnon unusen manauach. Am iotek ikenai pwe meinisin mwan me fefin—me nouch kewe onuon me fopun ra mukono—repwe feinno seni ei mwichenapen mwichefen nge epwe napeno memefin netip ami oupwe mochen eteneki fengenikemi, mwasangasang ren ewe nimenimochun tong an Kraist. Ese nifinifin met sia mefi ren aukukuch me ach nipwakingaw, amwo sipwe angang fengen me ewe Samonun ewe atake,¹³ me ngeni Kot ewe Semenapen kich meinisin aninisin pau ren An watten angang ne ponuweni iotek, awora kinamwe, echipa ekkewe mi sengiseng, me apochokuna ekkewe pwasuk mi apwangapwang. ¹⁴ Ika sipwe fori ena, sipwe winiti usun noun Kraist chon kuno mi ennet usun ururun sipwe winiti. Amwo pwe sipwe tong fengen usun I a tongeni kich,¹⁵ uwa iotek fan iten Jises Kraist, amen.