Kev Nrhiav Tsev Neeg Zaj Keeb Kwm thiab tej Hauj Lwm hauv lub Tuam Tsev: Kev Khi thiab Kev Kho Mob
Thaum twg peb muab peb tsev neeg zaj keeb kwm sib sau ua ke thiab mus rau hauv lub tuam tsev sawv peb cov poj koob yawm txwv cev, Vajtswv ua raws li Nws tau cog lus muab cov koob hmoov no rau cov neeg ciaj thiab cov neeg tuag huv tib si.
Tsev neeg txoj kev sib raug zoo yeej yog ib qho uas ntxim nyiam tshaj plaws tiam sis muaj teeb meem loj tshaj plaws hauv peb lub neej. Peb feem coob twb muaj ib txhia uas tsis sib raug zoo nyob hauv peb tsev neeg. Muaj ob tug tseem ceeb thaum muab Yexus Khetos lub Koom Txoos Txum Tim Rov Qab Los nyob hauv hnub nyoog kawg uas muaj kev tsis sib raug zoo li no. Parley thiab Orson Pratt yog ob tug kwv tij, ob tug uas hloov siab los ntseeg thaum ntxov, thiab nkawd yog ob tug Thwj Tim. Nyias muaj nyias qhov uas sim nkawd txoj kev ntseeg tiam sis thaum kawg nkawd muaj ib zaj lus tim khawv uas tsis txawj ploj. Ob tug ntawd twb ua ntau yam kom pab muaj qhov tseeb.
Thaum nyob hauv Nauvoo, nkawd tsis tshua sib raug zoo, thaum kawg nkawd sib cav sib ceg tab meeg cov pej xeem thaum xyoo 1846. Ua rau nkawd tsis sib raug zoo hlo li tau ntev. Parley sau ntawv rau Orson kom kho nkawd qhov teeb meem, tiam sis Orson tsis teb. Parley twb tsis ua dab tsi ntxiv, nws xav tias nkawd yuav tsis sib tham ntxiv tas mus li, tsuas yog Orson yog tus uas sau ntawv.1
Xya xyoo tom qab ntawd, thaum lub Peb Hlis Ntuj 1853, Orson kawm txog ib lub hom phiaj kom muab ib phau ntawv luam tawm txog William Pratt cov xeeb leej xeeb ntxwv, uas yog ob tug kwv tij no tus yawg koob uas tuaj txog lub Teb Chaws Amelikas. Orson pib quaj “zoo li ib tug me nyuam yaus” thaum nws saib nws tsev neeg zaj keeb kwm uas muaj nqi no. Ua rau nws lub siab mos muag, ces nws txiav txim siab kho qhov teeb meem no nrog nws tus tij laug.
Orson sau ntawv rau Parley hais tias, “Nim no kuv tus tij laug, tsis muaj leej twg ntawm tag nrho cov xeeb leej xeeb ntxwv ntawm wb yawg koob, Lieu[tenant] William Pratt, uas xav xav nrhiav nws cov xeeb leej xeeb ntxwv npaum li wb.” Orson yog ib tug uas to taub hais tias Haiv Neeg Ntseeg yuav tsum ua kev tshawb fawb thiab muab tsev neeg zaj keeb kwm sib sau ua ke xwv kom peb yuav sawv peb cov poj koob yawm txwv cev ua cov kab ke. Nws sau ntxiv hais tias: “Peb paub hais tias peb cov yawg koob tus Vajtswv tau ua kom muaj li no. … Kuv thov txim vim kuv twb tsis tau sau ntawv tuaj rau koj. … Kuv cia siab hais tias koj yuav zam txim pub rau kuv.”2 Txawm yog nkawd ob leeg muaj zaj lus tim khawv uas tsis txawj ploj hlo li, nkawd txoj kev hlub rau nkawd poj koob yawm txwv yog qhov uas kho tau nkawd qhov teeb meem, kho tau mob, thiab pab nkawd ob leeg nrhiav kev zam txim.3
Thaum Vajtswv qhia kom peb ua ib yam dab tsi, feem ntau Nws yeej muaj ntau lub hom phiaj. Kev nrhiav tsev neeg zaj keeb kwm thiab tej hauj lwm hauv lub tuam tsev tsis yog rau cov tuag xwb tiam sis cov ciaj tau koob hmoov ib yam. Hais txog Orson thiab Parley, ua rau nkawd ib leeg muab siab npuab ib leeg. Kev nrhiav tsev neeg zaj keeb kwm thiab tej hauj lwm hauv lub tuam tsev twb muab hwj chim rau nkawd kho tau ib yam uas yuav tsum kho.
Vim peb yog cov mej zeej hauv lub Koom Txoos, Vajtswv tau txib peb mus nrhiav peb cov poj koob yawm txwv thiab muab peb tsev neeg zaj keeb kwm sib sau ua ke. Qhov no tsis yog ib txoj kev muaj kev lom zem xwb, vim hais tias tag nrho Vajtswv cov me nyuam yuav tsum txais cov kab ke cawm seej.4 Peb yuav tsum nrhiav tau peb cov poj koob yawm txwv uas tas sim neej ua ntej lawv tau txais cov kab ke cawm seej. Peb ua tau cov kab ke no rau lawv nyob hauv cov tuam tsev, thiab tej zaum peb cov poj koob yawm txwv yuav txais yuav cov kab ke no.5 Cov thawj coj kuj yaum peb kom pab cov mej zeej hauv peb pawg ntseeg thiab ceg txheem ntseeg nrhiav lawv poj koob yawm txwv tej npe. Yeej yog ib yam uas ua rau peb xav tsis thoob, vim dhau los ntawm kev nrhiav tsev neeg zaj keeb kwm thiab tej hauj lwm hauv lub tuam tsev, peb pab tau cov tuag txais kev txhiv dim.
Tiam sis, thaum peb koom tes nrhiav tsev neeg zaj keeb kwm thiab ua hauj lwm hauv lub tuam tsev niaj hnub nim no, peb kuj txais tau cov koob hmoov uas “kho mob” zoo li cov yaj saub thiab cov thwj tim tau cog lus.6 Cov koob hmoov no ua rau peb xav tsis thoob vim hais tias cov koob hmoov no yeej loj, muaj nqi rau peb, thiab ua rau peb tau zoo hauv lub neej no. Muaj cov koob hmoov xws li no:
-
Kev to taub ntxiv txog tus Cawm Seej thiab Nws txoj kev txi theej txhoj;
-
Kev muab tus Vaj Ntsuj Plig Dawb Huv lub hwj huam hauv peb lub neej7 kom muaj dag zog thiab paub coj peb lub neej;
-
Kev ntseeg ntxiv, yog li ntawd kev hloov siab ntseeg tus Cawm Seej muaj zog thiab kav ntev;
-
Kev txawj thiab kev xav kawm thiab hloov siab lees txim8 vim peb to taub peb yog leej twg, peb tuaj qhov twg tuaj, thiab paub meej dua ntxiv peb yuav mus qhov twg;
-
Lub hwj huam ntxiv nyob hauv peb lub siab uas ua rau peb hloov ua zoo, hloov ua dawb huv, thiab nyob tus;
-
Kev xyiv fab ntxiv vim yus yuav txawj paub tus Tswv txoj kev hlub;
-
Cov koob hmoov ntxiv hauv yus tsev neeg, txawm yog yus tsev neeg tam sim no, dhau los, los sis yav tom ntej yuav zoo li cas, tsis hais yus tsev neeg tsis zoo tag nrho los yog;
-
Kev hlub thiab kev ris txiaj ntxiv rau cov poj koob yawm txwv thiab cov txheeb ze uas tseem ciaj, peb thiaj tsis xav tias peb nyob peb ib leeg xwb;
-
Lub hwj chim ntxiv kom paub cov uas xav tau kev kho mob, nrog tus Tswv txoj kev pab, yus pab tau lwm tus;
-
Kev pov hwm ntxiv kom tiv tau kev ntxias thiab tus yeeb ncuab lub hwj huam uas loj tuaj; thiab
-
Kev pab ntxiv kom kho tau kev nyuaj siab txhawj xeeb thiab kho tau cov neeg uas muaj lub siab mob.9
Yog tias nej tau thov kom tau ib txoj koob hmoov twg zoo li no, cia li nrhiav tsev neeg zaj keeb kwm thiab ua hauj lwm hauv lub tuam tsev. Thaum nej ua li ntawd, ces Vajtswv yuav teb nej tej lus thov. Thaum nej sawv cev rau cov neeg tuag ua tej kab ke li no, Vajtswv cov me nyuam nyob hauv ntiaj teb txais kev kho mob. Yog li ntawd Thawj Tswj Hwm Russell M. Nelson, nyob hauv thawj zaj thaum nws yog tus Thawj Tswj Hwm ntawm lub Koom Txoos, hais tias, “Nej txoj kev teev tiam hauv lub tuam tsev thiab nej txoj kev pab nej cov poj koob yawm txwv nyob ntawd yuav foom koob hmoov rau nej kom nej txais kev tshwm sim thiab kev kaj siab lug ntxiv thiab yuav pab txhawb nqa nej txoj kev cog lus tias nej yuav coj raws nraim txoj kev khi lus.”10
Ib tug yaj saub puag thaum ub kuj pom ua ntej txog cov koob hmoov rau cov ciaj thiab cov tuag.11 Ib tug tub xa xov uas los saum ntuj los twb ua rau Exekees ua yog toog pom ib lub tuam tsev uas muaj dej txhawv txia tawm. Nws qhia Exekees tias:
“Tus dej no ntws … mus tshuam lub hav Yauladees thiab ntws mus rau Hiav Txwv Tuag lawm … , [thiab] cov dej no yuav hloov cov dej daw ntsev hauv hiav txwv kom tsuag.”
“Tus dej no ntws mus txog qhov twg, yuav muaj txhua yam tsiaj thiab muaj ntses coob nyob hauv. Tus dej no yuav ua rau Hiav Txwv Tuag tsuag, thiab tus dej no ntws mus txog qhov twg txhua tsav yam yuav muaj sia.”12
Muaj ob yam txog tus dej uas yuav tsum nco ntsoov. Yam thib ib, txawm yog tus dej me me tsis muaj me nyuam dej, tus dej no loj zuj zus, ua rau tus dej dav thiab tob ntxiv thaum ntws mus tom ntej. Muaj ib yam zoo li no thaum yus tau koob hmoov uas los ntawm lub tuam tsev thaum muab tib neeg khi rau lawv tsev neeg. Ua rau yus tsev neeg loj tuaj mus tom ntej thiab mus tom qab ib tiam dhau ib tiam thaum cov kab ke khi yus tsev neeg ua ke.
Yam thib ob, tus dej no twb kho txhua qhov chaw uas tus dej ntws mus txog. Cov koob hmoov hauv lub tuam tsev yeej txawj kho mob zoo li no thiab. Cov koob hmoov ntawm lub tuam tsev yeej kho tau peb lub siab thiab lub neej thiab tsev neeg.
Cia kuv hais ib zaj lus piv txwv. Xyoo 1999 ib tug tub hluas hu ua Todd vau vim hlab ntshav nyob hauv nws lub hlwb tau tawg. Txawm yog Todd thiab nws tsev neeg yog mej zeej hauv lub Koom Txoos, lawv tsis tshua muab siab rau ntseeg, thiab tsis tau muaj ib tug uas txais koob hmoov hauv lub tuam tsev. Thaum hmo kawg ntawm Todd lub neej, nws niam, Betty, nyob ntawm nws lub txaj ib sab plhws nws txhais tes thiab hais tias, “Todd, yog tias koj yuav tsum mus tiag tiag, kuv cog lus tias kuv yuav ua tib zoo kom tib neeg ua koj cov kab ke hauv lub tuam tsev.” Hnub tom qab ntawd, Todd lub hlwb twb tuag lawm. Cov phais mob muab Todd lub plawv tso rau hauv ib tug neeg mob uas kuv saib xyuas, ib tug neeg zoo hu ua Rod.
Ob peb hlis tom qab tau muab lub plawv tso hauv Rod nrog cev, Rod kawm tias tus uas muab lub plawv rau nws tsev neeg yog leej twg thiab pib sau ntawv rau lawv. Ob xyoos tom qab ntawd, Todd niam, Betty, caw Rod nyob thawj thawj zaus nws mus rau hauv lub tuam tsev. Rod thiab Betty xub sib ntsib nyob hauv chav xilethi-aus ntawm lub Tuam Tsev St. George Utah.
Tsis ntev tom qab ntawd, Todd txiv—Betty tus txiv—tas sim neej. Ob peb xyoos tom qab ntawd, Betty tau caw Rod sawv cev rau nws tus tub uas tuag lawm ua cov kab ke hauv lub tuam tsev. Rod yeej zoo siab ua li ntawd, thiab qhov chaw kawg uas nws tau ua tej hauj lwm sawv cev ntawd yog nyob hauv chav sib khi ntawm lub Tuam Tsev St. George Utah. Tau muab Betty sib khi rau nws tus txiv uas tuag lawm, nws txhos caug rau lub thaj sab tod nws tus tub xeeb ntxwv uas yog tus sawv cev. Ces, cov kua muag ntws los rau ntawm nws sab plhu, es nws tau hais kom Rod koom nrog nkawd nyob rau lub thaj. Rod tau txhos caug nrog nkawd, sawv nws tus tub, Todd, cev, tus uas nws lub plawv tseem dhia nyob hauv Rod lub xub ntiag. Ces tau muab Todd, tus uas muab lub plawv rau Rod, sib khi nrog nws niam nws txiv mus ib txhis li. Todd niam ua raws li nws cog lus thaum nws tus tub tas sim neej ob peb xyoos ua ntej.
Tiam sis zaj dab neeg tsis kawg li ntawd. Kaum tsib xyoos tom qab muab lub plawv tshiab rau nws, Rod qhaib poj niam thiab thov kuv ua kev sib khi hauv lub Tuam Tsev Provo Utah. Thaum hnub sib yuav, kuv ntsib Rod thiab nws tus poj niam, Kim, nyob hauv ib chav uas nyob ib sab rau ntawm chav sib khi, es nyob ntawd lawv tsev neeg thiab cov phooj ywg tos ntsoov. Tom qab kuv nrog Rod thiab Kim tham me ntsis, kuv nug seb nkawd puas muaj lus nug.
Rod hais tias, “Muaj mas. Tus uas muab lub plawv rau kuv nws tsev neeg nyob no thiab xav ntsib koj.”
Ua rau kuv xav tsis thoob thiab kuv nug hais tias, “Koj hais tias lawv nyob no los? Tam sim no los?”
Rod teb hais tias, “Yog mas.”
Kuv tawm mus ntawm ib ces kaum thiab hais kom tsev neeg no tawm chav sib khi los. Betty, nws tus ntxhais, thiab nws tus vauv koom nrog peb. Rod muab Betty puag, ua nws tsaug, ces qhia nws rau kuv. Rod hais tias, “Betty, nov yog Txwj Laug Renlund. Nws yog tus kws kho mob uas tau saib xyuas koj tus tub lub plawv tau ntau xyoos.” Nws twb hla chav thiab khawm kuv. Ces ob peb feeb tom qab ntawd, txhua tus nyias khawm nyias thiab los kua muag vim xyiv fab heev.
Tom qab peb rov qab nyob tus, peb twb mus rau hauv chav sib khi, nyob ntawd Rod thiab Kim tau ua kev sib khi rau lub neej no thiab nyob mus ib txhis. Rod, Kim, Betty, thiab kuv ua tim khawv tias lub ntuj ceeb tsheej yeej tsis nyob deb, thiab muaj lwm tus nrog peb nyob hnub ntawd uas twb tau tso lub ntiaj teb no tseg lawm.
Vajtswv, vim Nws txawj ua txhua yam, yeej muab neeg sib khi thiab kho tib neeg thiab tsev neeg txawm yog lawv raug txom nyem, xiam ntau yam, thiab muaj teeb meem. Tej lub sij hawm peb hais tias tej yam uas peb xav hauv lub tuam tsev yeej yog zoo li peb twb pom ntuj ceeb tsheej.13 Hnub ntawd nyob hauv lub Tuam Tsev Provo Utah, ua rau kuv nco txog ib zaj lus los ntawm C. S. Lewis hais tias: “{tib neeg] hais txog lawv txoj kev raug txom nyem hauv lub ntiaj teb no hais tias, ‘Tsis muaj ib yam kev zoo siab rau yav tom ntej uas yuav pab tau,’ vim lawv tsis paub tias thaum twg lawv los txog lub Ntuj Ceeb Tsheej, ces Vajtswv yuav ua hauj lwm kom muab kev nyuaj siab ntawd hloov los ua ib qho yeeb koob. … Cov uas Tau Koob Hmoov yuav hais tias, ‘Peb tsis tau nyob qhov twg tsuas yog nyob saum Ntuj Ceeb Tsheej xwb.’”14
Vajtswv yuav ntxiv zog, pab thiab txhawb nqa peb;15 thiab Nws yuav muab peb tej kev ntxhov siab loj tshaj plaws hloov los ua ib yam dawb huv.16 Thaum twg peb muab peb tsev neeg zaj keeb kwm sib sau ua ke thiab mus rau hauv lub tuam tsev sawv peb cov poj koob yawm txwv cev, Vajtswv ua raws li Nws tau cog lus muab cov koob hmoov no rau cov neeg ciaj thiab cov neeg tuag huv tib si. Ib yam li ntawd, peb tau koob hmoov thaum peb pab lwm tus nyob hauv peb pawg ntseeg thiab ceg txheem ntseeg ua ib yam. Cov mej zeej uas tsis nyob ze ib lub tuam tsev kuj tau koob hmoov thaum lawv nrhiav tsev neeg zaj keeb kwm, thiab sau tej npe ntawm lawv cov poj koob yawm txwv kom ua tau lawv cov kab ke hauv lub tuam tsev.
Tiam sis Thawj Tswj Hwm Russell Nelson ceeb toom hais tias: “Tej yam uas muaj los ntawm lwm tus txoj kev nrhiav tsev neeg zaj keeb kwm thiab tej hauj lwm hauv lub tuam tsev tej zaum yuav tshoov peb lub siab txhua hnub. Tiam sis peb yuav tsum ua ib yam dab tsi kom muaj kev xyiv fab ntawd peb tus kheej.” Nws hais ntxiv hais tias, “Kuv caw nej kom thov Vajtswv seb nej yuav pub dab tsi—qhov zoo tshaj yog nej pub sij hawm—kom ua li nej ua tau ua hauj lwm hauv lub tuam tsev thiab nrhiav tsev neeg zaj keeb kwm.”17 Thaum nej ua raws li Thawj Tswj Hwm Nelson caw, nej yuav nrhiav tau nej tsev neeg, muab lawv sib sau, thiab muab lawv sib txuas. Tsis tas li ntawd, cov koob hmoov yuav ntws los rau nej thiab nej tsev neeg zoo li tus dej uas Exekees hais txog. Nej yuav txais kev kho mob rau tej yam uas yuav tsum kho.
Orson thiab Parley Pratt yeej tau txais kev kho thiab kev khi uas los ntawm kev nrhiav tsev neeg zaj keeb kwm thiab tej hauj lwm hauv lub tuam tsev nyob hauv lub caij nyoog tso txoj cai no. Betty, nws tsev neeg, thiab Rod tau txais thiab. Nej kuj txais tau thiab. Dhau los ntawm Nws txoj kev txi theej txhoj, Yexus Khetos xav muab cov koob hmoov rau txhua tus, tsis hais cov tuag thiab cov ciaj los yog. Vim muaj cov koob hmoov no, peb yuav kawm hais tias, zoo li peb “tsis tau nyob qhov twg tsuas yog nyob saum Ntuj Ceeb Tsheej xwb.”18 Kuv hais lus tim khawv li no los ntawm Yexus Khetos lub npe, amees.