Cov Yaj Saub Hais Lus los ntawm tus Ntsuj Plig Dawb Huv lub Hwj Chim

Kuv cov kwv tij thiab cov muam, txawm nej nyob qhov twg los, kuv xav qhia kuv txoj kev ris txiaj rau nej txoj kev txhawb nqa kuv nag hmo. Txawm kuv xav tias kuv tsis txawj hais lus thiab hais lus qeeb qeeb li Mauxes, kuv tau kev nplij siab thaum kuv xav txog cov lus uas tus Tswv hais rau nws tias:

“Leej twg yog tus tsim neeg kom muaj qhov ncauj? Leej twg yog tus uas ua rau neeg lag ntseg los sis ruam? Leej twg ua rau neeg tsis pom kev los sis dig muag? Kuv yog tus Tswv uas ua tej no?

“Koj cia li mus! Kuv yuav pab koj hais thiab yuav qhia kom koj txawj hais” (Khiav Dim 4:11–12; kuj saib nqe 10).

Kuv tau kev zoo siab vim kuv tus me poj niam hlub thiab txhawb nqa kuv. Nws tau ua ib tug yam ntxwv txog kev ua siab zoo, kev hlub, thiab rau siab ntso muab siab npuab tus Tswv rau kuv thiab kuv tsev neeg pom. Kuv hlub nws tag siab tag ntsws, thiab kuv kuj ua nws tsaug vim nws tau pab peb ua qhov zoo.

Cov kwv tij thiab cov muam, kuv xav hais lus tim khawv tias Thawj Tswj Hwm Russell M. Nelson yog Vatjswv tus yaj saub uas nyob hauv ntiaj teb no. Kuv tsis tau pom ib tug neeg uas txawj hlub lwm tus neeg thiab ua siab zoo npaum li nws ua. Txawm kuv xav tias kuv tsis tsim nyog ua txoj hauj lwm dawb ceev no, nws hais lus thiab ua tib zoo ntsia kuv thaum nws thov kuv los ua txoj hauj lwm no ua rau kuv xav tias tus Cawm Seej txoj kev hlub nyob ntawm kuv ib puag ncig. Ua tsaug, Thawj Tswj Hwm Nelson. Kuv txhawb nqa koj thiab kuv hlub koj.

Peb puas tau koob hmoov zoo kawg vim peb muaj cov yaj saub, cov pom tau, thiab cov txais kev tshwm sim nyob rau hauv lub ntiaj teb uas peb nyob no, lawv yog cov uas sim kawm paub tus Tswv lub siab xav li cas thiab raws Nws qab. Peb tau kev nplij siab vim peb paub tias peb tsis nyob peb ib leeg xwb, txawm peb raug teeb meem ntau npaum li cas. Txoj kev muaj cov yaj saub yog ib lub cim txog Vajtswv txoj kev hlub rau Nws cov me nyuam. Lawv qhia Nkawd cov neeg paub seb Vajtswv thiab Yexus Khetos tus cwj pwm zoo li cas thiab txog Nkawd tej kev cog lus. Kuv kawm paub li ntawd vim kuv tau pom li ntawd los lawm.

Kaum yim xyoo tas los lawm Thawj Tswj Hwm James E. Faust, tus Pab Cuam Thib Ob hauv Thawj Pawg Thawj Tswj Hwm, hu xov tooj rau kuv tus poj niam thiab kuv. Nws hu wb los ua qhov chaw tshaj tawm txoj moo zoo tus thawj tswj hwm rau Portugal teb. Nws qhia wb hais tias wb tshuav rau lub lim tiam xwb ua ntej wb yuav pib ua tub txib li ntawd. Txawm wb xav tias wb tsis tau npaj thiab yeej tsis tsim nyog txaus, wb kam ua li nws hu ntawd. Qhov uas wb txhawj tshaj plaws yog seb yuav ua li cas thiaj tau daim ntawv nkag teb chaws txawv hauv lub teb chaws ntawd, tam li wb twb pom yav tas los lawm, wb paub hais tias yuav siv rau mus txog yim lub hlis thiaj txais tau daim ntawv nkag teb chaws.

Thawj Tswj Hwm Faust txawm nug wb seb wb puas muaj kev ntseeg tias tus Tswv yuav ua tau ib qho txuj ci tseem ceeb thiab wb yuav tau daim ntawv nkag teb chaws sai dua cov. Wb txawm teb hais tias muaj mas, ces wb tau pib ua tam sim ntawd. Wb tau ua cov ntaub ntawv kom tau daim ntawv nkag teb chaws, tau coj peb tug me nyuam yaus, thiab tau mus rau tsoom fwv lub tsev ua ntawv sai li sai tau. Ib tug poj niam siab zoo tos txais peb. Thaum saib peb cov ntaub ntawv thiab kawm txog peb me ntsis seb peb yuav ua dab tsi hauv Portugal teb, nws nug wb hais tias, “Neb puas yuav pab cov neeg hauv kuv lub teb chaws tiag tiag li?” Wb txawm teb hais tias pab mas thiab tau piav hais tias wb yuav sawv cev rau Yexus Khetos thiab yuav hais lus tim khawv txog Nws thiab Nws txoj hauj lwm rau lub ntiaj teb no. Plaub lim tiam tom qab ntawd wb rov los, txais wb daim ntawv nkag teb chaws, thiab ya dav hlau mus rau qhov chaw tshaj tawm txoj moo zoo ua ntej dhau rau lub lim piam ntawd, ib yam li tus Tswv tus yaj saub tau thov kom wb ua.

Cov kwv tij thiab cov muam, kuv hais tag siab tag ntsws, thiab lus tim khawv hais tias cov yaj saub hais lus los ntawm tus Ntsuj Plig Dawb Huv lub hwj chim. Lawv hais lus tim khawv txog Yexus thiab Nws txoj hauj lwm hauv ntiaj teb no. Lawv ua yam ntxwv txog tus Tswv lub siab thiab lub paj hlwb thiab raug hu los ua neeg sawv Nws cev thiab qhia peb seb peb yuav tsum ua li cas thiaj muaj cai rov qab mus nrog Vajtswv thiab Nws Tib Leeg Tub, Yexus Khetos nyob dua. Peb tau koob hmoov thaum peb muaj kev ntseeg thiab ua raws li lawv tej lus qhia. Thaum ua raws li lawv hais, peb haj yam muaj kev zoo siab thiab tsis tshua muaj teeb meem, peb haj yam tiv tau peb tej teeb meem thiab tej kev cov nyom, thiab peb muaj khoom tiv thaiv peb ib puag ncig uas yuav pov hwm peb ntawm cov yeeb ncuab hauv lub caij nyoog no tej kev tawm tsam.

Thaum hnub Easter no kuv txo hwj chim hais lus tim khawv tias Yexus Khetos tau sawv rov los, Nws muaj sia nyob, thiab tias Nws coj kav Nws lub Koom Txoos hauv ntiaj teb no dhau ntawm Nws cov yaj saub, cov neeg pom tau, thiab cov neeg qhia kev tshwm sim. Kuv hais lus tim khawv tias Nws yog tus Cawm Seej thiab tus Txhiv Dim rau lub ntiaj teb thiab tias dhau ntawm Nws ces peb thiaj yuav tau kev cawm dim thiab kev tsa nto mus nrog tus Vajtswv uas peb hlub nyob ua ke. Kuv hlub Nws; kuv pe hawm Nws. Kuv xav raws Nws qab thiab ua raws li Nws lub siab nyiam thiab rais los mus ua neeg zoo li Nws. Kuv txo hwj chim hais cov lus no los ntawm tus Tswv Yexus Khetos lub npe, amees.