Ekkewe Angang mi pinen amanau Epwe Awora Ngenikich Saram Echipwer
Ach fiti kewe foforun angang mi pin me epwenueta kewe pwon epwe awora ningochun saram me epetin ei fonufan mei rochopwak.
Pwii me fefinei kana, ua fitikemi ne pwapwa non ewe kapas allim ika ekkewe kapas allimen Kraist.
Fan ew emon chienan Elter Neil L. Andersen a eiseni, nupwen i chon ewe mwichen Fiik, met a mefi nupwen a afanafan ngeni 21,000 aramas non ewe nenien mwich. Elder Andersen a apasa, “Esapw kewe 21,000 aramas kewe ra anuwokusuk; pwe pwii kewe engon me nimen (15) ra momot nukunsekuri.” Ua fen takir, nge ua mefi iei. Ua unusen tongei me etiwa ekkei engon me nimen non wiser wisen soufos, chon osuni, me pwarata.
Ewe Samol a ureni Abraham pwe ren mwiriwmirin me pwan ren ewe pristut, meinisin ekkewe famini non fonufan repwe feiech “ren feiechun ewe kapas allim … fen pwan manaw ese mwuch” (Abraham 2:11; nengeni pwan wokisin 2–10).
Ekkei feiechun ewe kapas alim me ewe pristut ra niwin sefan ngeni fonufan, me pwan non 1842, ewe soufos Joseph Smith a fori ewe efeiech ngeni ekkoch chok mwan me fefin. Mercy Fielding Thompson ii emon me neiir. Ewe soufos a apasa ngeni, “Ei [efeiech] epwe atouk seni rochopwak me tonong non saram.”1
Ikanai ua mwochen kapas usun kewe angang mipinen amanau—kewe repwe awora saram ngenikich.
Kewe Angang mi Pin me Pwon mi Pin
Non ewe puken True to the Faith sia aneani: “Ew angang mi pin mi ew fofor mi pin me auchea a kawor me ren mwumwutan ewe pristut. [Kewe] angang mi pin [ra] namwot ngeniach pwapwa esemwuch… ra iteni kewe angang mi pinen amanau. Ra kapachonong papatais, pwarata, seikita ngeni ewe Melchizedek Priesthood (ren mwan), ewe efeiech non temple, me epwupwunuwen ririfengen.”2
Elter David A. Bednar a aitikich, “Kewe angang mi pinen amanaw esemwuch me manau fefeita mi epinepin me non an ewe Samon Mwichefel mi niwinsefanito … a forata kewe kinikin ren kewe feiech me pechekun seni nang repwe tongeni tonong non manawen emen me emen kiich.”3
Usun kewe ruu pekin efow foun moni meinisin kewe angang mi pinen amanau mi fiti pwon meren Kot. Kot a pwon ngenikich feiech ika sia unusen nuku kana pwon mi pin.
Ewe soufos Amulek a apasa, “Iei … ewe fansoun … sipwe amonata ach sipwe churi Kot” (Alma 34:32). Ifa usun sipwe amonakichita? Ren ach angei ekkewe angang mi pin. Sipwe pwan, non an Preseten Russell M. Nelson kapas, “nomw chok won ewe anen pwon mi pin.” Preseten Nelson a sopwosopwono, “Omw aneasochis me tapwei ewe chon amanaw ren omw fori omw pwon mi pin ngeni me pwan omwochunuku kana pwon mi pin epwe suki ewe asam ngeni ekkewe feiechun ngun me feiech ngeni mwan, fefin, me semirit ekis meinisin.”4
John me Bonnie Newman, usun chomong me neimi, ra choni ewe feichun ngun Preseten Nelson a pwonei. Ew Raninfel, mwurin an fiti fan me neun kewe unumen kukun semirit, Bonnie a apasa ngeni John, ewe esapw ii emon chon ewe mwichefel, “Use tongeni ai upwe fori ei won winikapei. Kopwe finata ika kopwe fiti ai ei fan ika kopwe fini ew fan sipwe tongeni fiti, nge kewe semirit men euchea ar repwe sinei pwe semer ewe mei pwan tongei Kot.” Ewe Raninfel mwurin me iteiten Raninfel ra tapwoto, John ese chok fiti fan; pwe apwan aninis, etik ewe piano ngeni tepetep wart, pranch, me Kinter non chomong ier. Ngang ua kinisow ren ai churi John non April 2015, me non am na chufengen, am aua pworous ren met mi ech an epwe pwari an tong ngeni Bonnie ren an epwe uwei ngeni ewe temple, nge ena esapw tongeni fis ika ese papatais.
Mwurin an fiti ewe Mwichefenin Jises Kraist ren aramas mi Pin non Fansoun sopwonon non 39 ier, John a papatais non 2015. Ew ier mwurin, John me Bonnie ra riri fengen non ewe Memphis Tennessee Tempel, 20 ier mwurin Bonnie a angei pwisin an efeiech. Neur ewe 47-ierin-aat, Robert, a apasa ren seman ewe, “Papa a men fokkun, fokkun mwanech senichok nupwen a angei ewe pristut.” Bonnie apwan apasa, “John emon aramas amen chok sou pwapwa me takirikir, nge an a angei kewe angang mi pin me osufonu kewe pwon mi pin a awateno an mosonoson.”
An Kraist Achasefan me an Nenien appiru
Chommong ier ra no, Preseten Boyd K. Packer a apasa, “Foforech nge ese wor kewe angang mi pinen ewe kapas alim epwe fen angawano ika eechueno aramas.”5 Mi ennet, sisapw chok mwochen kewe angang mi pin me pwon mi pin ren ach sipwe niwin ngeni Samach, nge sipwe pwan mwochen neun we aat, Jises Kraist, me an we achasefan.
King Benjamin a aitikich pwe non chok me fan iten Kraist manaw ese mwuch epwe tongeni tori ekkewe neun aramas (nengeni Mosaia 3:17; pwan nengeni Nongonongen Achifoua 1:3).
Ren an Achasefan, Jises Kraist a angasakich seni niwinin an Adam we tur me a tongeni awora ach sipwe aier me feiech. Ren non manawan, a aiti ngenikich ren ach sipwe angei kewe angang mi pin—ren ewe pechekunen Kot epwe pwano (D&C 84:20).
Mwurin ewe Samon a angei ewe angang mi pinen an papatais pwe epwe “apwonueta wenechar meinisin” (nengeni 2 Nifai 31:5–6), Setan a sotuni. Usun chok ach mwochen esapw keuk mwurin ach papatais ika ririno, nge ach angei kewe angang mi pin me eucheani kewe pwon mi pin a efeiechukich ren unusechun saram me a ngenikich pechekun ach sipwe tongeni fiu ngeni kewe sosot.
Asisin
Isaiah a osuni pwe non ewe fansoun sopwonon, “fonufan epwe pwan rochopwak … pwe ra fen … ekkesiwini kewe annuk” (Isaiah 24:5; nengeni pwan D&C 1:15).
Ekkoch asisin, ra pwano ngeni ewe Soufos Joseph Smith, pwe ekkoch “ra kan ngeni [ewe Samol] ren ar kapas, … ra osukun ren ewe kapas alim nge ra aa kewe annuk meren aramas, ra pwari usun Kot, nge rese nuku an manamanan kewe” (Joseph Smith—History 1:19).
Paul apwan apasa pwe mi chomong rafen “fis ren aramasech, nge ra anini … pwe ewe pechekun: ren ar rese chiwen nuku” (2 Timothy 3:5). Ua pwan eniwini, ren ar rese chiwen nuku.
Ekkewe chommong pekin sosot me fofor mingaw ren manaw ra usun “en wolve an mwochen mwenge” (Matthew 7:15). Ewe chon mas epwe amonakicheta, tumunukich, me aiti kewe sheep me flock nupwen kei wolves ra kanoto (nengeni John 10:11–12). Ren ewe chon aninis me mas ewe a kutta an epwe awateno ewe manuwechun kewe chon mas mi eech, esapw kich chon masen manawach pwusin usun chok kewe chon masen manawen ekkoch? Ren ewe aurour an soufos, chon osuni, me chon pwarata, me fiti ewe pechekun me nifangen ewe ngun mi pin, sia tongeni kuna kewe wolves ra feito ika kich mei katonech me monota. Awewe chok, nupwen sia chok fori mas ren pwusin ngunuch me ngunun ekkoch, epwe chok tongeni fis. Ika sisapw fori wisach epwe fori an ngunuch me ngunun ekkoch repwe ngaweno. Ua tungor pwe emon me emon kiich sipwe chon mas mi unusen nukunuk.
Sine me Pwarata
Ewe sakramen pwan ew angang mi pin epwe anisikich ach sipwe feri met mi ech, me ach angei ina ew esisin pwe kich sia anomwu kewe pwon mi pin ren meinisin kewe ekoch angang mi pin. Ekkoch ier ra no, nupwen pwunuwei we, Anita, me ngang aua serf non ewe Arkansas Little Rock Mission, ua fiti ruemen misineri am aua no osukun. Fansoun am osukun, ewe mwanechun mwan aua osukuna a apasa, “Wafen tori ami we fan; pwata ami oua mwongo pinewa me un konik iteiten Raninfel? Non am we fan, am aua for ena fan ruu non ew ier, Easter me Kirisimas, me amen unusen auchea me namot.”
Am aua pwan aitngeni pwe ina met kich mei kaeo pwe sipwe “chufengen iteitan ach sipwe angei ewe pinewa me wain(Moronai 6:6; nengeni pwan D&C 20:75). Am aua aneani ngeni Matthew 26 me 3 Nephi 18. Me a penuweni pwe ese mwo kuna euchean.
Iwe am aua aitingeni ei awewe: “Sotun ekieki omw nomw non ew watten aksetenin toraku. En ka feiengaw me kose mwekutukut. Emon a sato unukumw, a kuna pwe kose mwekutukut, a tiki ewe nampan weiweita, 911. Ra anisuk me ka mwekutukut sefan.”
Am aua eisini pwiich ei, “Nupwen ka tongeni esina met mi nomw unukumw, met sokkun kapas eis a wor remw?”
A apasa, “Ngang upwe mwochen ai upwe sinei ifa usun ai tori ikewe me ion a kunaei. Ngang upwe mwochen ai upwe kinisow ngeni iteiten ran pwokiten an seifini manawei.”
Am aua aiti ngeni pwiich ei ifa usun ewe Samol a seifini manawach me usun ach sipwe kinisow ngeni iteiten ran, iteiten ran, iteiten ran!
Mwurin aua eisini, “Ren omw sinei pwe a fangono manawan fan itom me am, fan fite ka mwochen kopwe mwenge ewe pinewa me un ewe konik ren achechemen inisin me chaan?”
A apasa, “Ua weweiti, ua weweiti. Nge pwan ew mettoch. Ami fan ese manau usun am we.”
Ren ena aua penuweni, “Sipwe nenengeni asamwomw nan. Met kopwe fori ika ewe chon amanau Jises Kraist a fetanong non ena asam?”
A apasa, “Mwutir, upwe fotopwosukutiw won pwosukii.”
Aua eis, “Esapw ina met ka mefi nupwen ka fetanong non an kewe Aramas mi pin non fanoun sopwonon imwen fen—mosonoson me echeni ewe chon amanaw?
A apasa, “Ua weweiti, ua weweiti, ua weweiti!”
A wareiti fan non na Raninfelin Easter me a chok niwinsefan ngeni fan iteitan.
Ua mwochen pwe emon me emon kich sipwe eisinikich, “Menni angang mi pin, kapachonong ewe sakramen, ewe mi auchea ai upwe angei, me meni pwon mi pin mi auchea ai upwe fori, me eningano?” Ua pwon pwe ach fiti kewe annuk me eucheani kewe pwon mi pin mi fiti epwe ngonuk ningechun saram me epetin non ei fonufan rochopwak. Non iten Jises Kraist, amen.