Osukun non Imw—eu Wis mi Pin me Apwapwa
Ua tingor aninis seni nang nupwen sia achocho ngeni ach sipwe usun chok An Kraist osukun me non imw.
Ngang, me punuweiwe mi achengicheng, Julie, aua amarata onomon noum semirit mi unusen auchea, nge iei rese chiwen nonom remw non imwem we. Ua wesen positi ekkewe fansoun ir mi nonom remw fansoun meinisin. Ua positi ekkewe fansoun ua osukuner me kaeo senir.
Ikenai, upwe afanafan ngeni ami meinisin semenap me inenap me ekkewe ra mochen ar repwe pwan in me sam. Chommong me neimi a wor noumi semirit ikenai. Ren ekkoch, achok arapakan ar fansoun. Me pwan ekkoch, repwe semenap me inenap non kan fansoun mwach. Ua iotek pwe kich meinisin sipwe mefi me sinei ewe wis mi pin me apwapwa pwe sipwe osukuna ekkewe semirit.1
Kich sam me in, sia aiti ngeni nouch kewe usun Semach won Nang me Noun we Att, Jises Kraist. Sipwe anisi nouch kewe semirit ar repwe apasa ar akaewin iotek. Sipwe anisir me apochokuner ar repwe tonong non ewe an mi pin2 ren ar repwe paptais. Sipwe aitir ar repwe aneasosich an Kot kewe annuk. Sipwe osukuna ngenir usun An we kokkot fan iten Noun semirit, me sipwe anisir ar repwe esina mongungun ewe Ngun mi Fel. Sipwe aporousa ngenir usun porousen ekkewe soufosun nom me pesei ngenir ar repwe aneasosich ngeni ekkewe soufos mi manau. Sipwe iotek faniten ar weires me metek nupwen ra nom non riafou. Sipwe pwarata ngeni nouch kewe semirit ekkewe efeiochun tempel, me sipwe achocho ne amonareta ar repwe fori angangen missin. Sipwe fokkun tonger me aitiochur met mine repwe fori ika pwe ra winiti sam me in. Nge—ina mwo— nge fokkun kich chok iner me semer. Sisapw tongeni ukutiw ne osukuner. Sise tongeni wes seni wisach ei pwe eu wis mi ese much.
Ikenai sipwe ekieki usun ekkoch anen ach sipwe tongeni asukuna nouch kewe semirit me non imwach kewe.
Sukunen Pwinin Famini non Imw
Sipwe poputa ren ewe sukunen pwinin famini, ina ewe akon auchea me non ewe imw mi ur ren nuku ikewe ie ua wateta me ia. Use chechemeni met ekkewe nesenin non ekkewe sukunen pwinin famini, nge ua chechemeni pwe esapw mwo eu wiik aisapw fori am sukunen pwini famini.3 Ua sinei pwe iei eu mettoch amen auchea me ren inei kewe me semei.4
Ua chechemeni eu urumot me non am we pwinin famini ukan wesen sani. Semei we ekan tingor ngeni kem meinisin noun kewe am aupwe angei “Ewe Tes.” Ekan ngeni emon me neim eu kukun nesen usun, “Ewin, feino non ewe kichen kopwe suki me esipano ewe icebox. Mwirin sanong non rumei we ka angei eu pea sitakin me non ai we nenien pisek. Mwirin niwin sefanito, mweteta mwetetiw fan unungat, me apasa, ‘Papa, ua fori!’’’
Ukan wesen sani nupwen akan tori ai fansoun. Ukan mochen ai upwe fori tichikin tetenin, ukan wesen pwapwa ai upwe apasa, “Papa, Ua fori!’’ Ei urumot a anisi me anapano ai nukunuk me ngeni ei anen mecheresin ai upwe auseningoch nupwen Mama ika Papa rakan afanafan usun ewe kapas allim
Preseten Gordon B. Hinckley a aiti kich: “Ika pwe mi wor om tipemwaramwar ren feiochun ewe pwinin famini, sotuni. Ochufengeni noum kewe, iwe ka osukuner , apasata om kapasen pwarata ngenir, anea fengen ekkewe pukefel me awora ami fansoun fengen.”5
Epwe wor osukosuk a achocho an epwe epeti ach sipwe fori ach pwinin famini non imw.6 Inamwo, ua etiwa kemi ami opwe kuta anen ami opwe anisi ekkewe osukosuk me fori pwe pwinin famini non imw epwe auchea me akom mwen meinisin—me fori anen an epwe apwapwa.
Sukunen Iotekin Famini
Iotekin famini pwan eu anen osukun amen murino.
Ua men sani usun an semen Preseten N. Eldon Tanner we osukun ngeni nupwen ar iotekin famini. Preseten Tanner a apasa ei:
“Ua chechemeni non eu pwinin ai wa fotopwukutiw non am we iotekin famini, semei we a apasa ngeni ewe Samon, ‘Eldon a fori och mettoch ese fich ngeni an epwe fori ikenai; a omusomus, me era ika pwe ka epichano, iwe esapw chiwen pwan fori sefan.’
“A aiti ngeni ei ai usapw tongeni chiwen fori sefan—nap seni ai upwe angei tipisin met ua fori.”7
Ne ati we, fan ekkoch ua kan ani chipwaken am we soun fori am iotekin famini, ua kan ekieki ngeni ei, “Aise keran fen chok wes me iotek iwe chok ekiseno?” Iei, ua emon semenap, ua weweiti pwe amen namot me auchea ach sipwe iotek fansoun meinisin non ach kewe famini.8
Amen ku netipei usun an Semach won Nang we pwarata usun Jises Kraist pwe Ii Noun Att mi Achengicheng.9 U kan sani ai upwe ioteki emon me emon nei kewe ren iter pwe repwe rong usun ai tingor ngeni Samach won Nang usun ai tonger me aucheanir. Ese pwan wor eu anen ach sipwe pwarano ach tong ngeni nouch kewe nap seni ach sipwe iotek ngenir me efiochur. Nupwen famini repwe chufengen non tipetekisonun iotek, pochokun me nesen ese much mine oua aiti ngenir.
Kokon Osukun
An sam me in osukun a usun chok eu kokon angang. A namot ach sipwe chok moneta ach sipwe osukuna nouch kewe pwe sise sinei ika epwe inet akon auchea.
Sia wewe ngeni ewe Chon Amanau, ewe a osukun iteitan “esapw chok non ekkewe imwen fan pwe ese pwan nifinifin, ran me masowa—fansoun mongo ren Noun kewe chon kuno, etit konik seni ewe ito, ika pwan chon passini ewe ira fig.”10
Ekkewe ier ra no inei we a aporousa usun an kewe ruu fansoun ne kapas ngeni pwi we watte Matt, won ewe kapas allim, aewin nupwen an anun pisek me oruan nupwen an uweano ngeni ewe dentist. Eu mettoch ua men kinisou ngeni inei we ren an fokkun achocho ne aiti noun kewe.
An we angangen osukun ese wor nekoukun. Nupwen ai we ua emon pisop, inei we, a 78 ierin, a ereniei pwe a namot ai upwe fichi mokurei. Mi sinei pwe upwe eu nenien apiru, iwe ese wor an tipemwaramwar an epwe ereniei ai upwe fich. Ai tong ngonuk, Mama!
Pokiten ngang emon semenap, ua fokkun pochokun ne kaeo me iotek ekkewe pukefel ren ai upwe moneta ngeni nei kewe are noun noun nei kewe nupwen ra mochen ai aninis ai upwe osukuner.11 “Ekkoch anen osukun amen murino akan poputa ren kapas eis are wewengawen netipen chon non ewe famini.”12 Kich mi ausening non ekkei fansoun?13
Ua men sani an ewe Aposel Peter we tingor: “Amoneta fansoun meinisin pwe oupwe tongeni ponuweni emon [me ua pwan kapachenong, semirit] nupwen epwe eisini kemi ussun minne oua epinukunuku.”14
Ne anuwoni we, am me semei we am ukan ekemis ika ion e pochokun poun. Am ukan fiei fengeni poum kewe angoto fengeni non ukukun pochokunen emon tori otun an emon me neim epwe fangeta ren metek. Ewer ese och pwe ese apwapwa, nge a chok wor auchean na fansoun. Mwirim am ekemis, iwe semei we ekan neto me a ereniei, “Nei at, poum kena amen pochokun. Ai nuku pwe poum kena epwe fokkun pochokun an esapw atapa emon nengin non eu napanap mi ngaw.” A tingorei upwe manauen nimenimoch me anisi ekkoch ar repwe pwan fori.
Elter Douglas L. Callister a aporousa ei usun seman we: “Nupwen aua sangeni imwem we sarim me angang non eu ran Semei we a apasa, ‘Ua monatiw ai asor ikenai. U maketiw “kinisou ngonuk” on ewe taropwen asor. Ua men unusen kinisou chapur ngeni ewe Samon ren an efeiochu ach famini.’’’
Elter Callister a fokkun asamonu me eningano met seman we a osukuna ngeni: “A aiti ngeni ruu mettoch foffor me manauen anneasosich.”15
Ua ekieki pwe amen murino ach sipwe kan pusin eisini kich iteitan, “Met upwe ani osukun, ika met upwe osukana, nei kewe semirit ren ai foffor me manauen anneasosich?”
Osukunen Anea Pukefel non Famini
Kaeo pukefel non famini eu anen ach sipwe osukuna ekkewe annuk me non imw.
Preseten Russell M. Nelson a apasa, “Esapw chok sam me in repwe kaeo ewe kapas an ewe Samon, pwe mi pwan wor wiser mi unusen auchea ren ar repwe osukuna ngeni nour kewe.”16
Nupwen aua amarata noum kewe me Julie, aua achocho ngeni am aupwe wewe me sinei. Eu ier, am aua finata pwe aupwene aneani ewe Puken Mormon non kapasen Spanish non am we famini. Epwe ina popun ewe Samon a kori meinisin noum kewe ra fori ar angangen misin ar repwe angang ikewe ie ra kapas non kapasen Spainish? Es posible [mi tufich].
A wesen kuu netipei nupwen Brother Brian K. Ashton a aporousa ngeni ei usun ar ra anea fengen ewe Puken Mormon me seman we otun an a mwichen engon me ruu ier non high school. Brother Ashton a wesen tongei ekkewe pukefel. Ra mak non ekiekin me non netipan. Seman we mine a fotuki nupwen Ashton mi chiwen anuon, iwe ena foun ira17 a marino me a pwuuk waran ren ewe ennet. Brother Ashton apwan fori ngeni noun we at watte.18 a wanu-ierin-noun we akan kapas eis, “Papa, inet sipwe pwan anea fengen ewe Puken Mormon?”
Sukunen Awewe
Saingonon, met akon auchea ngeni ach osukun ach nenien apiru. Sia pesepes ach sipwe “ew nenien appiru ren ekkewe chon nuku ren om afanafan, om foffor, om tong, om nuku me nimenimoch.”19
Kukuto chok non eu am sai, ngang me Julie aua fiti fan me aua kuna eu uwekisin non foffor. Emon anuon, a moneta ngeni an epwe sai ngeni an angangen misin, a afanafan non mwichen sakrament.
A apsa, “Ami meinisin oua ekieki pwe semei we ii emon mwan mi murino me non fan, nge …”A mwo fanafanono, me ua nuokus oh ekieki ika met epwe pwan era mwirin. A sopwosopwono me a apasa, “I emon mwan amen unusen murino me non imw.”
Ua men kinisou ngeni ei anuon ren ukukun an aneasosichi me eningano o asamonu seman we. Ua sinei pwe seman we ii ewe pisopun ewe wart. Ewer ei pisop a fokkun angang ngeni an ei wart non nukuchar, nge noun we at a mefi pwe an we angang akon murino ewe a fori me non imwer we.20
An Elter D. Todd Christofferson pesepes: “Mi chommong anen ach sipwe osukana ekkewe … maritan tapin aramas, me a namot ach sipwe fokkun ekipwichi me achocho ngeni ne osukuner. Auchean mettoch meinisin, sipwe sopweno ne apochokuna me anisi ekkewe sam me in ar repwe pochokun me murino ne asukun … akaewin ren ar repwe eu nenien apiru.”21
Ina usun an ewe Chon Amanau osukun.22
Non eu fansoun aua no kunou me asoso fiti noum kewe ruemon kukun semirit, Julie a era pwe aupwe fori angangen paptais fan iten ekkewe mi mano me non ekkewe ruu tempel St. George me San Diego Tempel. Ua ngunungun—non netipei—ekieki, “Sia fen no non tempel me non neniach we, nge iei sia nom won asoso. Pwata sise fori och mettoch a namot ren ach asoso?” Mwirin am uwe paptais, Julie a mochen epwe fich sassing nukun ewe tempel. Ua pwan ngunungun—sefan. Ka tongeni ekiekieta met epwe fis mwirin—am uwe fich sassing.
Julie a mochen an noum kewe repwe chechemeni nupwen am aua anisi am kewe newo, nge pwan ngang. Ese pwan namot ngeni kich nesenin auchean tempel. Sia fen manaueni—kinisou ngeni ewe inenap ewe amen tongei tempel me a mochen noun kewe repwe pwan mefi ena tong.
Nupwen inenap me semenap ra pwapwa fengen me pwarano eu nenien apiru mi murino, ekkewe semirit repwe fokkun unusen feioch.
Omuchunon
Ngeni kemi meinisin ekkena oua men achocho ne osukun me non imw, oupwe fokkun kuna kinamwe me pwapwa ren ami angang. Me ika pwe oua mefi pwe mi chiwen wor fansoun ami opwe pwan sopwei ne kaeo ika fansoun amon, ose mochen opwe rong ngeni met ewe Ngun mi Fel a amefi me anuku ngonuk om kopwe fori.23
Elter L. Tom Perry a apasa, “Ewe pochokun ngeni choo meinisin, ewe pwapwa ngeni aramas, tufichir me ar kinamwe a pwuuk me non ewe osukun ngeni ekkewe semirit non imw.”24
Ewer, non imwei we a pon, nge ngang mi chiwen nomw won kokon osukun, moneta me chengen ai upwe kuta ekkoch anen ai upwe osukuna nei kewe semirit ra watte, nour kewe, me eu ran, ua nuku, noun noun nei kewe.
Ua tingor aninis seni nang nupwen sia achocho ngeni ach sipwe usun chok An Kraist osukun me non imw. Non iten Jises Kraist, amen.