Kev Qhia hauv Tsev—Kev Lav Ris uas Xyiv Fab thiab Dawb Ceev
Kuv thov Vajtswv pab thaum peb siv zog ua cov xib hwb uas txawj qhia zoo li Yexus Khetos nyob hauv peb tsev.
Kuv tus poj niam, Julie, thiab kuv wb tau tu rau tus me nyuam uas muaj nqi heev, thiab tsis ntev tas los wb cov me nyuam loj hlob tas lawm. Kuv nco nco muaj wb cov me nyuam nyob hauv tsev txhua lub sij hawm. Kuv nco qhia lawv thiab kawm los ntawm lawv.
Hnub no kuv xav hais rau tag nrho cov niam tsev txiv tsev thiab tag nrho cov uas xav ua ib tug niam tsev los sis txiv tsev. Nej feem coob tu me nyuam tam sim no. Nej ib txhia los tej zaum tsis ntev nej yuav ua zoo ib yam. Thiab ib txhia los, tej zaum kev ua niam tsev txiv tsev yog ib txoj koob hmoov uas yuav muaj thaum yav tom ntej. Kuv thov kom peb txhua tus yuav to taub hais tias kev qhia ib tug me nyuam yog ib qho ntiag tug hauj lwm xyiv fab thiab dawb ceev.1
Peb cov niam tsev txiv tsev qhia peb cov me nyuam txog Leej Txiv Saum Ntuj Ceeb Tsheej thiab Nws Leej Tub, Yexus Khetos. Peb pab peb cov me nyuam thawj zaug uas lawv thov Vajtswv. Peb coj thiab txhawb nqa lawv thaum lawv khi lus2 ua kev cai raus dej. Peb qhia lawv kom coj raws li Vajtswv cov lus txib. Peb qhia lawv txog Nws txoj hau kev rau Nws cov me nyuam, thiab pab lawv to taub tus Vaj Ntsuj Plig Dawb Huv tej kev ntxhi. Peb hais dab neeg rau lawv txog cov yaj saub puag thaum ub thiab yaum kom lawv coj raws li cov yaj saub uas muaj txoj sia nyob. Peb thov Vajtswv kom lawv kov yeej thiab pab lawv tu siab thaum lawv raug txom nyem. Peb ua tim khawv rau peb cov me nyuam txog cov koob hmoov los ntawm lub tuam tsev, thiab peb sim pab lawv npaj zoo ua tub txib. Peb ntuas lawv thaum peb cov me nyuam los ua niam tsev txiv tsev lawv tus kheej. Tiam sis—tsis hais txog lub sij hawm ntawd los yog—peb yeej yog lawv niam lawv txiv. Peb yeej tsis tsum ua lawv cov xib hwb. Vajtswv yeej tsis tso peb tawm ntawm txoj hauj lwm no mus ib txhis li.
Hnub no cia peb xav txog tej cib fim zoo kawg uas peb muaj kom qhia peb cov me nyuam nyob hauv peb tsev.
Qhia hauv Tsev Neeg Hmo Ua Ke
Cia peb pib hais txog tsev neeg hmo ua ke, uas nyob hauv kuv tsev yog ib yam tseem ceeb heev. Kuv tsis nco txog ib zaj lus uas kuv tau kawm hauv tsev neeg hmo ua ke, tiam sis kuv nco qab tias peb twb muaj txhua lub lim tiam.3 Kuv paub tias kuv niam kuv txiv xav tias qhov ntawd tseem ceeb heev.4
Kuv nco txog ib yam peb ua hauv tsev neeg hmo ua ke uas kuv nyiam heev. Kuv txiv yuav caw nws ib tug me nyuam ua kev “Sib Tw.” Nws yuav hais kom tus me nyuam ua tej yam xws li, “Qhov thib ib, mus rau hauv chav ua mov ces muab lub teb yees qhib thiab kaw. Ces khiav mus rau hauv kuv chav pw thiab nqa ib nkawm thoom thaub. Ces rov qab los txog kuv, dhia peb zaug, thiab hais tias, ‘Txiv, kuv ua lawm!’”
Kuv nyiam nyiam thaum txog kuv thib ua. Kuv xav xav ua txhua yam raws li qhov yog, thiab kuv nyiam lub sij hawm thaum kuv tau hais tias, “Txiv, kuv ua lawm!” Yam ntxim ua no pab kuv txoj kev ntseeg kuv tus kheej thiab ua yooj yim rau ib tug tub uas nyob tsis tus tsom ntsoov thaum Niam thiab Txiv qhia ib lub ntsiab cai txog txoj moo zoo.
Thawj Tswj Hwm Gordon B. Hinckley ntuas hais tias: “Yog tias nej tsis paub tseeb tias tsev neeg hmo ua kev yog ib yam zoo, cia li ua xwb. Cia li muab nej cov me nyuam sib sau ua ke, qhia lawv, ua tim khawv rau lawv, nyeem vaj lug kub ua ke, thiab muaj kev lom zem ua ke.”5
Yeej yuav muaj tej yam uas tawm tsam nej thaum muaj tsev neeg hmo ua ke.6 Txawm li ntawd los, kuv caw nej kom nrhiav kev kov yeej tej teeb meem thiab saib tsev neeg hmo ua ke rau nqi—thiab muaj kev lom zem.
Qhia Thaum Tsev Neeg Thov Vajtswv
Tsev neeg txoj kev thov Vajtswv yog ib lub cib fim zoo qhia.
Kuv nyiam Thawj Tswj Hwm N. Eldon Tanner txoj kev qhia nws thaum nws tsev neeg thov Vajtswv. Thawj Tswj Hwm Tanner hais tias:
“Kuv nco txog ib hmo thaum peb tsev neeg tau txhos caug thov Vajtswv, es kuv txiv hais rau tus Tswv hais tias, ‘Eldon twb ua ib yam dab tsis uas tsis tsim nyog nws ua; nws thov txim, thiab yog koj yuav zam txim pub rau nws, nws yuav tsis ua ntxiv.’
“Qhov nws hais li ntawd ua rau kuv txiav txim siab kuv yuav tsis txhob ua ntxiv—pab tau kuv ntau dua li nws ntaus kuv.”7
Thaum kuv yog ib tug me nyuam tub, tej lub sij hawm ua rau kuv npau taws vim peb tsev neeg pheej thov Vajtswv, ces kuv xav tias, “Peb twb thov Vajtswv ob peb feeb tas lawm nev.” Nim no, vim kuv yog ib tug txiv tsev, kuv paub tias peb tsev neeg yuav tsum thov Vajtswv tas zog.8
Kuv yeej ib txwm nyiam rau qhov uas Leej Txiv Saum Ntuj Ceeb Tsheej qhia hais tias Yexus Khetos yog Nws Leej Tub uas Nws hlub.9 Kuv nyiam hais kuv cov me nyuam lub npe thaum lawv mloog kuv thov Leej Txiv Saum Ntuj Ceeb Tsheej qhia Vajtswv tias kuv hlub lawv npaum li cas. Tsis muaj lwm lub sij hawm zoo dua li thaum peb thov Vajtswv nrog peb cov me nyuam los yog foom koob hmoov rau lawv kom qhia lawv tias peb hlub lawv. Thaum tsev neeg koom ua ke txo hwj chim thov Vajtswv, ces lawv qhia tej zaj uas muaj hwj chim thiab kav ntev.
Qhia Thaum Xav Tau
Cov niam tsev txiv tsev txoj kev qhia yeej zoo li ib tug kws kho mob uas yus hu thaum twg los tau. Peb yeej yuav tsum npaj siab qhia peb cov me nyuam vim peb tsis paub thaum twg peb yuav muaj cib fim qhia lawv.
Peb zoo li tus Cawm Seej, uas feem ntau “tsis tau [qhia] nyob hauv ib lub tsev teev ntuj tiam sis Nws qhia nyob hauv tej qhov chaw dog dig uas neeg nyob txhua hnub—thaum noj mov nrog Nws cov thwj tim, hais dej los ntawm lub qhov dej, los yog mus kev dhau ib tug ntoo txiv ncuav pias.”10
Ntau xyoo tas los, kuv niam qhia kuv hais tias ob zaus uas nws sib tham txog txoj moo zoo nrog kuv tus tij laug, Matt, uas zoo tshaj plaws, yog ib zaug thaum nws muab cov khaub ncaws tais thiab lwm lub sij hawm thaum nws tsav tsheb coj nws mus rau tus kws kho hniav. Ib qho uas kuv qhuas txog kuv niam yog qhov uas nws yeej npaj siab qhia nws cov me nyuam.
Nws txoj kev qhia nws cov me nyuam yeej tsis tau tas. Thaum kuv yog ib tug npisov, kuv niam, uas muaj 78 xyoo, qhia kuv tias kuv yuav tsum txiav plaub hau. Nws paub tias kuv yuav tsum coj yam ntxwv zoo, thiab nws tsis tau tos kom qhia kuv li ntawd. Niam, kuv hlub koj!
Vim kuv yog ib tug txiv tsev, kuv xav tias kuv yuav tsum kawm thiab xav txog cov vaj lug kub xwv kom kuv qhia tau kuv cov me nyuam los yog cov xeeb ntxwv thaum muaj cib fim qhia lawv.11 “Tej lub sij hawm zoo tshaj plaws qhia lwm tus mas ib feem yog thaum ib tug hauv yus [tsev neeg] muaj ib lo lus nug los yog muaj kev txhawj xeeb.”12 Peb puas mloog lawv thaum muaj tej lub sij hawm ntawd?13
Kuv nyiam tus Thwj Tim Petus tej lus caw hais tias: “Nej yuav tsum npaj tos txhua lub sij hawm, yog thaum twg muaj neeg [thiab kuv ntxiv lo lus, me nyuam] nug nej hais tias vim li cas nej muaj chaw cia siab, thaum ntawd nej thiaj paub teb lawv.”14
Thaum kuv yog ib tug tub hluas, kuv txiv thiab kuv wb nyiam sib tw seb leej twg muaj zog tshaj thaum nyem tes. Wb ib leeg yuav siv zog nyem ib leeg txhais tes seb ib leeg puas ua rau ib leeg ua ntsej muag dub txig vim mob heev. Tam sim no kuv xav tias tsis tshua lom zem, tiam sis thaum ntawd zoo li yog ib qho lom zem heev. Tom qab ib txoj kev sib tw li ntawd, kuv txiv ntsia kuv qhov muag thiab hais tias, “Koj txhais tes muaj zog, Me Tub es. Kuv cia siab hais tias koj yeej yuav muaj zog txaus kom koj tsis txhob uas tsis tsim nyog kov ib tug ntxhais hluas.” Ces nws caw kuv kom kuv coj dawb huv thiab pab lwm tus ua zoo ib yam li ntawd.
Txwj Laug Douglas L. Callister hais li no txog nws txiv: “Thaum kuv txiv tab tom mus tsev tom qab ua hauj lwm lawm, nws txawm hais tias, ‘Kuv twb them ib feem kaum hnub no. Kuv sau “ua tsaug” rau daim ntawv them ib feem kaum. Kuv ris tus Tswv txiaj vim Nws foom koob hmoov rau peb tsev neeg.’”
Ces Txwj Laug Callister qhuas nws txiv thiab xib hwb: “Nws qhia txog kev mloog lus los ntawm tej yam nws ua thiab nws tej cwj pwm.”15
Kuv xav tias yog lub tswv yim zoo nug peb tus kheej tias, “Kuv yuav qhia, los sis kuv tab tom qhia dab tsi, rau kuv cov me nyuam txog kev mloog lus los ntawm tej kuv ua thiab kuv tej cwj pwm?”
Qhia Thaum Tsev Neeg Kawm Vaj Lug Kub
Tsev neeg kev kawm vaj lug kub yog ib lub sij hawm zoo qhia txog cov lus qhuab qhia hauv tsev.
Thawj Tswj Hwm Russell M. Nelson hais tias, “Tsis yog cov niam tsev txiv tsev yuav tsum muab siab npuab rau tus Tswv txoj lus xwb, tiam sis Vajtswv kuj txib kom lawv qhia Nws txoj lus rau lawv cov me nyuam.”16
Thaum Julie thiab kuv wb tu wb cov me nyuam, wb tau sim ua tej yam tshiab thiab ua tau zoo nkaus li qub tas li. Muaj ib xyoo wb txiav txim siab wb tsev neeg yuav nyeem Phau Ntawv Maumoos uas sau Lus Mev. Puas yog vim li ntawd tus Tswv thiaj hu peb txhua tus me nyuam uas mus ua tub txib mus qhia cov neeg uas hais lus Mev.? Es posible.
Kuv txais kev tshoov siab heev thaum Tij Laug Brian K. Ashton qhia kuv tias nws thiab nws txiv nkawd twb nyeem txhua phab hauv Phau Ntawv Maumoos ua ke thaum nws kawm ib tug senior nyob hauv tsev kawm ntawv high school. Tij Laug Ashton nyiam cov vaj lug kub heev. Tej lus ntawd los twb sau rau hauv nws lub siab lub ntsws. Nws txiv tau cog lub noob ntawd thaum Tij Laug Ashton yog ib tug tub hluas, thiab lub noob ntawd17 twb loj hlob tuaj ua ib tug ntoo uas muaj cag mus tob tob hauv qhov tseeb. Tij Laug Ashton twb ua zoo ib yam li ntawd rau nws cov me nyuam hlob.18 Nws tus tub uas muaj yim xyoo nug nws hais tias, “Txiv, kuv yuav nyeem Phau Ntawv Maumoos nrog koj thaum twg?”
Qhia Los ntawm Kev Coj Yam Ntxwv
Qhov kawg, peb cov niam tsev txiv tsev txoj kev qhia uas ntxim tshaj plaws yog los ntawm peb tus yam ntxwv. Vaj lug kub qhia kom peb “yuav tsum ua lub neej rau cov ntseeg xyaum, tsis hais tej lus uas hais, tej hauj lwm uas ua, hlub lwm tus, muab siab rau ntseeg thiab ua neeg zoo.”19
Thaum Julie thiab kuv ncig teb chaws tsis ntev tas los, wb mus rau ib lub tsev koom txoos thiab pom tias muaj li nqe vaj lug kub no hais. Ib tug tub hluas, uas tsis ntev yuav mus ua tub txib, tau hais lus hauv kev sib ntsib txais lub cim nco txog.
Nws hais tias, “Nej txhua tus xav tias kuv txiv yog ib tug txiv neej zoo nyob hauv lub koom txoos, tiam sis …” Nws nres, thiab kuv txhawj hais tias nws yuav hais dab tsi tom qab nws hais li no. Nws hais ntxiv hais tias, “Nws yog ib tug txiv neej zoo dua nyob hauv tsev.”
Tom qab kev sib ntsib kuv ua tus tub hluas no tsaug rau qhov nws qhuas nws txiv li ntawd. Ces kuv kawm tias nws txiv yog tus npisov ntawm pawg ntseeg ntawd. Txawm yog tus npisov rau siab pab nws pawg ntseeg, nws tus tub xav tias nws ua tau hauj lwm zoo tshaj plaws nyob hauv tsev.20
Txwj Laug D. Todd Christofferson ntuas hais tias: “Muaj ntau txoj kev qhia … tiam neeg uas tab tom loj hlob tuaj, thiab peb yuav tsum rau siab xav txog thiab sib zog siv tag nrho tej txoj kev ntawd. Qhov tseem ceeb tshaj plaws, peb yuav tsum yaum thiab pab cov niam tsev txiv tsev qhia zoo dua thiab qhia ntxiv … qhov tseem ceeb yog los ntawm lawv tus yam ntxwv.”21
Tus Cawm Seej qhia li ntawd.22
Xyoo tas los, thaum peb so hauj lwm mus ua si nrog wb ob tug me nyuam yaus, Julie xav mus sawv neeg tuag cev ua kev cai raus dej nyob hauv ob lub tuam tsev St. George thiab San Diego. Kuv yws yws—rau kuv tus kheej—xav hais tias, “Peb mus rau lub tuam tsev thaum peb nyob hauv tsev, thiab tam sim no peb so hauj lwm mus ua si. Ua cas peb tsis ua ib yam lom zem ntxiv?” Tom qab peb ua kev cai raus dej, Julie xav thaij duab nyob nraum lub tuam tsev. Kuv rov qab yws yws ntsiag to. Nej yeej paub peb tau ua dab tsi tom qab ntawd: peb tau thaij duab.
Julie xav kom peb cov me nyuam nco ntsoov tias peb tau ua li cas pab peb poj koob yawm txwv, thiab kuv xav ua li ntawd thiab. Wb tsis tas qhia ib zaj lus txog qhov uas cov tuam tsev tseem ceeb npaum li cas. Wb yeej ua neej qhia li ntawd—ua ib tug niam tsev tsaug vim nws nyiam lub tuam tsev thiab xav kom nws cov me nyuam nyiam thiab.
Thaum cov niam tsev txiv tsev ib leeg hlub ib leeg thiab coj yam ntxwv ncaj ncees, cov me nyuam yuav tau koob hmoov mus ib txhis.
Lus Xaus
Hais rau nej txhua tus uas ua zoo npaum li nej ua tau kom qhia nyob hauv tsev, thov kom nej yuav nyob kaj siab lug thiab muaj kev xyiv fab thaum nej ua li ntawd. Thiab yog nej xav tias nej ua tau zoo dua ntxiv los sis xav npaj siab ua li ntawd ntxiv, thov nej cia li txo hwj chim ua raws li tus Ntsuj Plig tshoov nej lub siab ua thiab cog lus tias nej yuav ua li ntawd.23
Txwj Laug L. Tom Perry hais tias, “Ib lub sawm fem txoj kev zoo, tib neeg txoj kev zoo siab, lawv txoj kev vam meej, thiab lawv txoj kev nyob kaj siab lug yeej muaj los ntawm txoj kev qhia cov me nyuam hauv tsev.”24
Tam sim no kuv lub tsev tsis muaj me nyuam nyob ntxiv li lawm, tiam sis kuv tseem tos kom qhia tau, kuv npaj siab thiab xav nrhiav cib fim uas muaj nqi ntxiv kom qhia kuv cov me nyuam uas loj hlob tas lawm, qhia lawv cov me nyuam thiab muaj ib hnub, kuv cia siab, yuav qhia lawv cov me nyuam thiab.
Kuv thov Vajtswv pab thaum peb siv zog ua cov xib hwb uas txawj qhia zoo li Yexus Khetos nyob hauv peb tsev. Los ntawm Yexus Khetos lub npe, amees.