Pawg Txwj Laug
Qhov uas muaj ib pawg Pov Thawj Hwj Mekixedes hauv ib pawg ntseeg ua rau cov uas tuav lub pov thawj hwj koom siab kom ua tau txhua yam ntawm tej hauj lwm cawm seej.
Tsis ntev tom qab tau muab lub Koom Txoos txhim tsa hauv lub caij nyoog tso txoj cai kawg no, nyob hauv kev tshwm sim tus Tswv hais tias, “Thiab los ntawm nej txoj kev thov Vajtswv nrog kev ntseeg nej yuav tau txais kuv txoj kev cai, kom nej yuav paub tswj kuv lub koom txoos thiab ua txhua yam kom yog rau kuv pom.”1 Txij thaum ntawd peb tau ua raws li lub ntsiab cai no hauv lub Koom Txoos—thiab tus Tswv tau pom zoo rau txoj kev cog lus ntawd. Tej lub sij hawm Vajtswv tau muab kev tshwm sim qhia yuav tsum tsa thiab kho tej pawg pov thawj hwj li cas txij thaum tus Yaj Saub Yauxej Xamiv tau muab tej luag hauj lwm thiab tej pawg pov thawj hwj tsa los nyob hauv peb lub caij nyoog. Vajtswv twb muab kev tshwm sim txog tej yam uas yuav tsum hloov thaum lub sij hawm uas Brigham Young, John Taylor, thiab Spencer W. Kimball yog tus yaj saub hais txog Pawg Kaum Ob tug Thwj Tim, Pawg Xya Caum, pawg pov thawj hlob, thiab lwm yam luag hauj lwm thiab tej pawg nyob hauv lub Pov Thawj Hwj Mekixedes thiab Aloos.2 Nim no, nyob hauv ib zaj lus uas tau hais ib pliag tas los, Thawj Tswj Hwm Russell M. Nelson tshaj tawm txog ib yam ntxiv uas yuav kho.
Kuv yuav hais ob peb yam los ntawm nws zaj lus: “Hmo no peb tshaj tawm txog kev muab peb tej pawg Pov Thawj Hwj Mekixedes hloov loj heev kom haj yam txawj ua tus Tswv txoj hauj lwm. Nyob hauv txhua pawg ntseeg, pawg pov thawj hlob thiab pawg txwj laug los yuav koom ua ke ua ib pawg txwj laug … [thiab] cov nyob hauv [ceg txheem ntseeg pawg pov thawj hlob] yuav nyob ntawm seb leej twg ua tej hauj lwm pov thawj hwj twg tam sim no.
Thawj Tswj Hwm Nelson hais ntxiv hais tias:
“Peb tau tshuaj xyuas tej kev hloov no tau ntau lub hlis. Peb xav xav kho txoj kev uas peb saib xyuas peb cov mej zeej. … Yog peb yuav ua li ntawd zoo dua ntxiv, peb yuav tsum txhawb peb tej pawg pov thawj hwj lub zog kom coj tau txoj kev txhawb pab uas yog kev hlub thiab kev txhawb nqa uas tus Tswv xav muab rau Nws Haiv Neeg Ntseeg.
“Tej kev hloov no yog los ntawm tus Tswv txoj kev tshoov siab. Thaum peb hloov tej yam no, peb yuav haj yam txawj ua hauj lwm zoo dua li yav tas los.”3
Raws li Thawj Pawg Thawj Tswj Hwm qhia, Txwj Laug Ronald A. Rasband thiab kuv yuav hais tej yam ntxiv uas peb cia siab tias yuav teb nej tej lus nug.
Pawg Txwj Laug thiab Pov Thawj Hlob
Qhov thib ib, yuav rov hais dua, tej yam twg yuav hloov rau pawg ntseeg pawg pov thawj hlob thiab pawg txwj laug? Nyob hauv txhua pawg ntseeg, cov mej zeej ntawm pawg txwj laug thiab pawg pov thawj hlob yuav koom ua ke ua ib pawg Pov Thawj Hwj Mekixedes uas muaj ib pawg thawj tswj hwm. Pawg no, uas muaj neeg coob ntxiv thiab koom siab, peb yuav hu ua “pawg txwj laug.” Yuav tsis muaj tej pawg pov thawj hlob ntxiv. Pawg txwj laug yog tag nrho cov txwj laug thiab cov uas tseem tsis tau tsa ua txwj laug nyob hauv ib pawg ntseeg thiab cov pov thawj hlob uas tsis ua hauj lwm hauv ib pawg npisov, ceg txheem ntseeg pawg thawj tswj hwm, pawg sab laj hlob, los sis tsis yog tus yawg suab. Pawg pov thawj hlob nyob hauv ceg txheem ntseeg yog cov pov thawj hlob uas tam sim no ua hauj lwm hauv ceg txheem ntseeg pawg thawj tswj hwm, pawg npisov, pawg sab laj hlob, thiab tus yawg suab.
Pawg Txwj Laug Pawg Thawj Tswj Hwm
Yuav tsa pawg txwj laug pawg thawj tswj hwm li cas? Ceg txheem ntseeg pawg thawj tswj hwm yuav muab cov thawj coj ntawm pawg pov thawj hlob thiab pawg txwj laug pawg thawj tswj hwm tso thiab yuav hu ib pawg txwj laug tus thawj tswj hwm thiab ob tug pab cuam tshiab nyob hauv txhua pawg ntseeg. Pawg txwj laug pawg thawj tswj hwm tshiab tej zaum yuav muaj cov txwj laug thiab pov thawj hlob, uas muaj hnub nyoog sib txawv, ua hauj lwm ua ke hauv ib pawg thawj tswj hwm. Ib tug txwj laug los yog ib tug pov thawj hlob muaj cai ua pawg txwj laug tus thawj tswj hwm los yog ib tug pab cuam hauv pawg thawj tswj hwm. Qhov no tsis yog pov thawj hlob yuav los coj pawg txwj laug. Peb xav tias yuav muaj cov txwj laug thiab cov pov thawj hlob ua hauj lwm ua ke nyob hauv pawg thawj tswj hwm thiab thaum mus pab lwm tus. Thaum lub sij hawm yooj yim hloov tej yam no hauv pawg txwj laug ces xav hloov sai li sai tau.
Tej Luag Hauj Lwm hauv Pawg Txwj Laug
Kev hloov ob pawg no puas hloov qhov uas nyias muaj nyias lub luag hauj lwm pov thawj hwj hauv pawg txwj laug? Tsis hloov li, yog tau muab ib tug mej zeej ntawm ib pawg tsa rau ib lub luag hauj lwm pov thawj hwj thaum yav tas los ces qhov no yuav tsis thim txoj kev tsa ntawd. Zoo li nej paub lawm, yog muab ib tug txiv neej tsa rau tej lub luag hauj lwm txawv nyob hauv nws lub neej, nws tsis poob los yog xiam ib txoj kev tsa uas muaj dhau los thaum nws txais ib lub luag hauj lwm tshiab. Muaj tej lub sij hawm uas ib tug uas tuav lub pov thawj hwj yuav muaj ob lub luag hauj lwm thaum tib lub sij hawm, xws li thaum ib tug pov thawj hlob yog ib tug yawg suab los sis tus npisov, tiam sis feem ntau nws tsis ua tag nrho tej yam ntawm nws tej luag hauj lwm pov thawj hwj thaum tib lub sij hawm. Piv txwv hais tias, cov npisov thiab cov Xya Caum tsis ua tej yam rau tej luag hauj lwm ntawd tom qab peb tso lawv tawm los yog tso lawv nrog kev hawm. Yog li ntawd, txawm yog ib tug txiv neej muaj lub luag hauj lwm twg los, thaum nws yog ib tug mej zeej hauv pawg txwj laug, nws yuav ua tej hauj lwm li ib tug txwj laug.
Ntau xyoo tas los, Thawj Tswj Hwm Boyd K. Packer hais tias “lub pov thawj hwj yeej tseem ceeb tshaj tej luag hauj lwm ntawm lub pov thawj hwj. … Faib tsis tau lub pov thawj hwj. Ib tug txwj laug yeej muaj lub pov thawj hwj ntau npaum li ib tug Thwj Tim. (Saib Q&K 20:38.) Thaum ib tug txiv neej [txais lub pov thawj hwj], nws txais tag nrho. Tiam sis, muaj tej luag hauj lwm hauv lub pov thawj hwj—kev faib txoj cai thiab kev lav ris. … Tej lub sij hawm peb hais tias ib lub luag hauj lwm ‘siab dua’ los yog ‘qis dua’ lwm lub luag hauj lwm. Tiam sis tsis yog ‘siab’ los sis ‘qis,’ es tej luag hauj lwm hauv lub Pov Thawj Hwj Mekixedes yog tej kev ua hauj lwm uas sib txawv xwb.”4 Cov kwv tij, kuv cia siab hais tias peb yuav tsis txhob hais tias peb muab ib tug neeg tsa “siab dua” rau lwm lub luag hauj lwm hauv lub Pov Thawj Hwj Mekixedes.
Tseem yuav muab cov txwj laug tsa ua cov pov thawj hlob thaum lawv ua hauj lwm hauv ceg txheem ntseeg pawg thawj tswj hwm, pawg sab laj hlob, los sis pawg npisov—los sis lwm lub sij hawm thaum ceg txheem ntseeg tus thawj tswj hwm thov Vajtswv thiab txais kev tshoov siab kom nws txiav txim siab ua li ntawd. Thaum cov pov thawj hlob ua hauj lwm tiav hauv ceg txheem ntseeg pawg thawj tswj hwm, pawg sab laj hlob, los sis pawg npisov, ces lawv yuav rov qab koom pawg txwj laug hauv lawv pawg ntseeg.
Kev Coj Pawg Txwj Laug tus Thawj Tswj Hwm
Leej twg yog tus coj pawg txwj laug tus thawj tswj hwm? Ceg txheem ntseeg tus thawj tswj hwm yog tus uas tswj hwm lub Pov Thawj Hwj Mekixedes nyob hauv nws ceg txheem ntseeg. Yog li ntawd, pawg txwj laug tus thawj tswj hwm yeej txais dej num los ntawm ceg txheem ntseeg tus thawj tswj hwm, uas qhia thiab coj hauv pawg ceg txheem ntseeg pawg thawj tswj hwm thiab dhau los ntawm pawg sab laj hlob. Tus npisov, uas yog tus pov thawj hlob uas tswj hwm ib pawg ntseeg, kuj sib ntsib ntau nrog pawg txwj laug tus thawj tswj hwm. Tus npisov ntuas nws thiab qhia nws txog qhov uas yuav ua li cas kom pab thiab foom koob hmoov rau cov mej zeej hauv pawg ntseeg, ua hauj lwm ua ke nrog txhua lub koom haum hauv ib pawg ntseeg.5
Vim Li Cas Muab tej No Hloov
Vim li cas yuav muaj tej yam no hloov hauv ob pawg ntawm lub Pov Thawj Hwj Mekixedes? Qhov uas muaj ib pawg Pov Thawj Hwj Mekixedes hauv ib pawg ntseeg ua rau cov uas tuav lub pov thawj hwj koom siab kom ua tau txhua yam ntawm tej hauj lwm cawm seej, tsis hais tej hauj lwm hauv lub tuam tsev thiab kev nrhiav tsev neeg zaj keeb kwm uas yav tas los pawg pov thawj hlob tau saib xyuas. Tej yam uas hloov no yuav pab cov nyob hauv pawg txwj laug uas muaj hnub nyoog thiab caj ceg sib txawv kom txais kev pab los ntawm qhov uas ib leeg xav txawv ib leeg thiab ib leeg muaj lub neej txawv ib leeg. Tej no kuj yuav ua rau cov uas tuav lub pov thawj hwj tau ntev muaj cib fim qhia lwm tus, tsis hais cov uas tseem tsis tau ua txwj laug, cov mej zeej tshiab, cov tub hluas, thiab cov uas rov qab los koom lub Koom Txoos. Kuv piav tsis tau hais tias kuv zoo siab npaum li cas thaum kuv xav txog tej dej num tseem ceeb uas tej pawg txwj laug yuav ua thaum yav tom ntej. Lub tswv yim, kev txawj ntse, kev muaj peev xwm, thiab lub zog uas yuav nyob hauv tej pawg txwj laug no yeej yuav npaj rau ib hnub tshiab thiab qhib ib txoj kev txawj uas hauj lwm pov thawj hwj pab lwm tus nyob thoob plaws lub Koom Txoos.
Nees nkaum xyoo tas los nyob hauv lub tuam rooj sab laj, kuv twb hais ib zaj uas Txwj Laug Vaughn J. Featherstone ntawm Pawg Xya Caum tau hais es kuv xav tias tsim nyog kuv rov hais dua.
Thaum xyoo 1918 Tij Laug George Goates yog ib tug neeg ua liaj teb, uas ua qoob ua loo ua cov zaub ntug hauv paus liab nyob hauv Lehi, Utah. Lub caij no no tuaj ntxov xyoo ntawd thiab ua rau nws cov zaub ntug hauv paus liab feem ntau khov tas nyob hauv av. Nyuaj nyuaj rau George thiab nws tus tub hluas Francis maj mam sau cov qoob loo. Thaum tib lub sij hawm ntawd, muaj mob khaub tuas kis tag zej zos. Kev raug kis mob lawm ua rau George tus tub Charles thiab peb tug ntawm Charles cov me nyuam tas sim neej—ob tug me ntxhais thiab ib tug me tub. Nyob ntawm rau hnub ntawd xwb, George Goates uas nyuaj siab kawg tau mus peb zaug rau Ogden, Utah coj lawv lub cev los faus. Thaum lub sij hawm txom nyem no kawg lawm, George thiab Francis tau muab lub laub khi rau ntawm cov nees thiab rov qab mus rau thaj teb mus sau cov zaub ntug hauv paus liab.
“[Thaum nkawd tab tom mus] muaj ntau lub laub uas puv zaub ntug hauv paus liab hla lawv uas rov qab mus rau qhov chaw npaj zaub mov uas cov neeg ua liaj teb hauv zej zog tau sau lawm. Thaum lawv hla mus, txhua tus uas tsav lub laub tau co tes hais tias: ‘Nyob zoo, Dab Laug George,’ ‘Thov txim, George,’ ‘Pab koj nyuaj siab, George,’ ‘Koj muaj phooj ywg coob os, George.’
“Nyob hauv lub laub kawg yog Jasper Rolfe uas lub ntsej muag muaj quav hnav. Nws luag nyav hais tias, ‘Tas lawm os, Dab Laug George.’
“[Tij Laug Goates] tig mus rau Francis thiab hais tias: ‘Kheev lam peb ua tas thiab.’
“Thaum lawv tuaj txog qhov rooj laj kab, Francis tau dhia tawm ntawm lub laub thauj cov zaub ntug hauv paus liab thiab qhib qhov rooj laj kab kom [nws txiv] tsav tau nkag mus hauv thaj teb. [George] mus haud, ua kom cov nees nres, … ces saib thaj teb. … Tsis muaj ib lub zaub ntug hauv paus liab nyob hauv thaj teb ntawd. Ces ua rau nws paub kiag lub ntsiab ntawm Jasper Rolfe tej lus thaum nws hais tias: ‘Tas lawm os, Dab Laug George!’
“[George] dhia tawm ntawm lub laub, xuas tes nqa ib cov av zoo uas nws nyiam tshaj, ces khaws tau … ib lub ntsis ntawm zaub ntug hauv paus liab, thiab nws ntsia ob lub cim txog nws tej hauj lwm, zoo li nws ntseeg tsis tau tej uas nws qhov muag pom.
“Ces [nws] zaum rau ntawm ib co ntsis zaub ntug hauv paus liab—tus txiv neej uas tau siv rau hnub xwb coj plaub tug uas nws hlub rov qab los tsev kom muab lawv faus cia; tau txia hleb, dig qhov ntxa, thiab tau pab npaj cov khaub ncaws rau lub ntees tuag—tus txiv neej uas yeej tsis tau nres, tsis tau tsum, thiab yeej nyob khov kho kom tag nrho tej kev txom nyem no—tus txiv neej no tau zaum rau ntawm cov ntsis zaub ntug hauv paus liab thiab quaj li ib tug me nyuam.
“Ces nws sawv, so nws lub kua muag, … ntsia saum ntuj, thiab hais tias: ‘Ua tsaug, Leej Txiv, rau cov txwj laug hauv peb pawg ntseeg’”6
Yog los mas, ua Vajtswv tsaug rau cov txiv neej ntawm lub pov thawj hwj thiab txoj kev pab uas lawv tseem yuav ua thaum lawv mus txhawb nqa tib neeg thiab tsev neeg thiab txhim tsa Xi-oos.
Thawj Pawg Thawj Tswj Hwm, Pawg Kaum Ob tug Thwj Tim, thiab Pawg Xya Caum Pawg Thawj Tswj Hwm tau xav txog tej kev hloov no tau ntev. Nrog kev thov Vajtswv, kev ua tib zoo kawm cov vaj lug kub txog tej pawg pov thawj hwj, thiab kev txais tus Tswv txoj kev pom zoo, peb koom siab koom ntsws mus tom ntej uas tiag tiag yog ib qho ntxiv nyob hauv txoj Kev Muab Txoj Moo Zoo Txum Tim Rov Qab Los. Tus Tswv tau qhia Nws lub siab nyiam rau peb, thiab kuv zoo siab txog qhov no, thaum kuv ua tim khawv txog Nws, Nws lub pov thawj hwj, thiab nej tej kev tsa hauv lub pov thawj hwj no, los ntawm Yexus Khetos lub npe, amees.