Na iDusidusi Vou ni Soqoni ni Matabete i Melikiseteki kei na iSoqosoqo ni Veivukei

“Dua na ibolebole e tiko ena lewenivuli vou o ya mera kakua ni veivakavulici na tamata e ‘na ivakarau makawa,’” a kaya o Bisopi Boyd Roberts. “Meda sa kakua ni vakatetea tu ga na itukutuku, vakatikitiki, me sa veivakavulici ga na Yalo.”

“Oqo e dua na sala vou ni veivakavulici ena rawa ni dredre vei ira eso,” e kaya o Lisa Smith, e dua na peresitedi ni iSoqosoqo ni Veivukei, ni tukuna tiko na Veivakavulici ena iVakarau ni iVakabula. “Oqo na vuna me vakaraitaki na iwalewale ni veivakavulici vinaka ka ra vakayaloqaqataki na iliuliu mera dau tiko ena bose ni qasenivuli,” a kaya.

E kaya o David Mickelson, e dua na qasenivuli ni ilawalawa ni bete levu, ni malanivosa “dou gumatua sara ena veivakavulici” ena Vunau kei na Veiyalayalati 88:78 “sa baleta tiko na noda vakarau taumada ka meda gumatuataka na muria na Yalo ni da veivakavulici tiko. Ni da gumatua ena veivakavulici, ena tiko kei keda na loloma soliwale ni iVakabula ka da na vakavulici vakauasivi cake. Au vakabauta ni oqo na sala uasivi ni veivakavulici ni Turaga. O qasenivuli—o koya e liutaka tiko na veivosaki—e dodonu me gadreva me vakavulici koya na Yalo.”

A vakarautaka na lesoni o Adam Bushman, e dua na qasenivuli ni italatala qase, ena talevi ni vosa digitaki mai na koniferedi raraba, ka masulaka na vakasama cava e bibi duadua ki na kuoramu. “Ni gadrevi me levu na gauna ni nodra vakasama vakatitobu na tagane,” a vakamacalataka, “a vakau e dua na imeli ena loma ni macawa e vakaoqo, ‘Oqo na vosa eda na veivosakitaka tiko ka sa kerei mo ni raica mada na veitaro oqo.’”

“Na Siga Tabu ni iSoqosoqo ni Veivukei sa sega tale ni nodra ilesilesi na iliuliu,” e kaya o Brooke Jensen, e dua na daunivakasala ena mataveiliutaki ni iSoqosoqo ni Veivukei. “Sa itavi nei lewenikalasi yadua mera veiqaravi kina.”

E kaya o Brother Bushman ni vinaka cake na dabe wavoki. “Au taleitaka,” a kaya. “E veisautaka na ivakarau ni veivosaki. E veisautaka na nanamaki ni tamata. Ia sa yaco kina na vakaitavi vakalevu. Mai na rua se tolu na veitacini bete era dau saumi taro tu ga, e vica na ka vou era sa vosa tale tikoga.”

Ni sa rogoca ena imatai ni gauna o Rebecca Siebach, e dua na marama ena iSoqosoqo ni Veivukei, na rai vou baleta na matabose, a vakasamataki ira sara na itokani era sa luluqa tu vakalotu. “Au sa kila na nodra gagadre,” a kaya. “Era talaucaka mai na nodra malumalumu kei na sasaga mera gole mai ki lotu, kau vakasamataka, oqo na madigi uasivi ni gole yani vei ira ka kaya, ‘O sa gadrevi ena noda matabose! Yalovinaka ni mai veiwasei!’”

“Niu sa tekivu vosa ena bose ni matabose,” a kaya o Lona Marie Cook, e dua na daunivakasala ena mataveiliutaki ni iSoqosoqo ni Veivukei, “a ka totoka dina mera vakadeitaka eso na ka au vakasamataka ka tiki ni ilawalawa o ya.”

“Eda sa bulia tiko e dua na ituvaki me veivakavulici kina na Yalo ka meda rogoca ka vakarorogo,” e kaya o Bisopi Roberts. “Sa yaco kina na Yalo me qasenivuli, ka vakaraitaka na ka meda cakava ena noda bula, matavuvale, kei na veikacivi. Na ka eda cakava mai na veivakauqeti o ya sai koya e veiliutaki ki na saumaki dina kei na veiqaravi.”

E kaya o Susan Farr, e dua na peresitedi ni iSoqosoqo ni Veivukei, “Na iwalewale oqo ena biligi keda meda tucake ka cakava, sega ni gole yani ni oti na lesoni ka vakasamataka ‘sa veivakauqeti dina,’ ia a totolo na kena guileca. Ni da veivakasalataki vata eda na raica kina ni vuli kei na cakacakataka sa noda kece sara—sega ni o qasenivuli ga.”

“Ni da vola noda vakauqeti ka cakacakataka, eda sa veisautaka na yaloda ka meda italai vinaka cake ni Turaga,” e kaya o Susan Mitchell, e dua na daunivakasala ena iSoqosoqo ni Veivukei.

“Ni ko sa kila ko na soli itukutuku baleta na ka eso ka na tarogi iko e dua ena ka o vakila,” e kaya o Sister Smith, “ena yaco mo vakaitavi vagumatua ena tarai cake ni nomu ivakadinadina.”

E kaya o Landen Roundy, e dua na iliuliu ni ilawalawa ni bete levu, ni imelitaki na ka sa boseri ka tuvanaki ena “vukei ira na lewe ni bose mera kila na veika era sotava ena loma ni macawa era na via wasea ena Siga Tabu e tarava.”

“Mai na itukutuku oqori,” e kuria o Bisopi Roberts, “Au sa raica na kena tomani tiko na yalo ni veiwasei kei na vuli ena loma ni macawa ni ra veivosakitaka na veitacini bete ena imeli na ikuri ni vakasama kei na nanuma, me vaqaqacotaka na nodra kuoramu.”

“Sa gadreva na Turaga meda golea na yaloda vua e dua vakai keda, ka rawa oqo ena noda sota vata vakainaki,” a kaya o Sister Siebach. “Na lewenivuli vou oqo ena vukea meda kila rawa na ulutaga taleitaki, lalawa, raica na ivurevure dodonu ni isaunitaro, ciqoma na ivakatakila, ka veitataki cake ka gole vei ira na parofita bula baleta na isaunitaro eda gadreva nikua.”