Veivuke ena Gauna ni Leqa

Ni oti na cagilaba kei na ualuvu vakaitamera mai Houston, Texas, Amerika, e dua na kena marama a raici ira na Yalododonu Edaidai era dara tu na siqeleti dromodromo ni Liga Veivuke ni ra sa laki vukei ira na sotava tiko na leqa vakaitamera. “Au kila ni ra na lako mai na Momani!” a kaya.

Na ka oqo, a biu tu ena Facebook mai vei peresitedi ni Kaulotu e Texas Houston South, o Aaron T. Hall, e tukuna tiko na veivuke ni Lotu vei ira na lewena kei ira na neiba ena gauna ni leqa. “E sega na ibolebole me dredre vei ira na lewe ni Lotu ni Turaga!” A vola o Peresitedi Hall.

Ni yaco mai na leqa vakaitamera, sa dau dua vei ira na imatai me veivuke na Lotu, kei na vanua e vakacacani, e tomana na Lotu na veivuke ki na kawatamata ena veivakacokotaki lekaleka ka balavu, ena inaki ni tauyavutaki na bula rawati koya. Era duavata na iliuliu kei na itikotiko liu ni Lotu ena kena dikevi ka vakarautaki na ka e gadrevi ka tuvanaki na lewenilotu mera veivuke ena vakauyaki na iyaya, sasamaki, veivakalesuimai, kei na vakacokotaki.

Ni cakacaka vata na LDS Charities kei na mata ni veivukei tauyavu ena vanua a vakacacani, a vakarautaka na Lotu na veivuke vei ira na vakaleqai ena ualuvu mai Peru; na sisi ni qele mai Sierra Leone; na kama ni vanua e Montana, Amerika, kei Alberta, Canada; na cagilaba mai Texas, Florida, kei na yatu Caribbean, oka kina o Puerto Rico, Haiti, kei na Dominican Republic; kei na rua na uneune kaukauwa mai Mexico.

Ena Sepiteba, a vakaraitaka na Lotu ni na solia e $11 na milioni na dola ni Amerika me tokona na cakacaka ni vueti na viakana ka vakani ira na gonelalai walokai ena walu na matanitu e Aferika kei na Tokalau e Loma. E cakacaka vata na LDS Charities kei na 11 na mataisoqosoqo ena 25 na veivakatorocaketaki ni kena vakauyaki na iyaya.

Sa solia oti na LDS Charities e volekata na 2 na bilioni na dola mera vukei e milioni na tamata ena 189 na veimatanitu vakatekivu mai na 1985, ena nodra a vakani na vakaleqai ena lauqa mai Ethiopia.