Soqoni ni Matabose ni iMatai ni Sigatabu

Ena imatai ni Sigatabu ni veivula, na soqoni ni kuoramu, ilawalawa, kei na Soqosoqo ni Veivukei ena sega ni oka kina na lesoni e vakatavulica e dua na qasenivuli. Ia, na mataveiliutaki se iliuliu ni lawalawa ena liutaka na matabose. Na kuoramu, ilawalawa, se Soqosoqo ni Veivukei ena veitalanoa vata me baleta na itavi, madigi, kei na veibolebole; ka vuli mai na nodra rai titobu se veika e sotava; ka tuvatuva ka taka na veika me vakayacori ena veivakauqeti e ciqomi mai na Yalo.

“Na ivakatakila e kaburaki raraba tu vei keda.”¹

Elder Neil L. Andersen

Ni Se Bera na Soqoni ni Matabose

Era dusia na veiliutaki ni itavi, madigi kei na bolebole ka digia ena masumasu na iulutaga me veitalanoataki.
Na tamata kece e vakasaqara na veidusimaki ni Yalo.
Na tamata kece e vavarau mai me wasea na nodra vakasama kei na veika era sotava.

iVakatakilakila

Era soqoni vata na veitacini ena Soqosoqo ni Veivukei

Na Gauna ni Soqoni ni Matabose

Era sureti ira na leweni lotu na iliuliu me ra wasea na veika era sotava ena nodra cakacaka ena veivakauqeti mai na soqoni sa oti.
Na tamata kece era veitalanoataka na iulutaga, veirogoci, ka vakasaqara na veidusimaki ni Yalo.
Era vakasokumuna na iliuliu na veika bibi ka qai veisureti me cakacakataki.

iVakatakilakila

Soqoni ni Matabose ni Matabete Vakamelikiseteki

Ni Oti na Soqoni ni Matabose

Na tamata kece era cakacakataka na veika era vakila kei na veisureti, ka vakatamata yadua talega.
Kerei ira mera wasea na veika era sa sotava ena kalasi e tarava.

iVakatakilakila

Era veimoko tu na veitacini ena Soqosoqo ni Veivukei

“Eda sa Ligana.”²

Peresitedi Dieter F. Uchtdorf

Na iVakavuvuli ni Veitalanoa Vata

E sega ni dau tautau vata na irairai ni matabose kece. Vakatara me vakavulici iko na Turaga. Oqo eso na ivakavuvuli mo rawa ni tekivu kina:

Na inaki ni soqoni ni matabose me veitalanoataki vata na itavi, madigi, kei na veibolebole; ka vuli mai na nodra rai titobu se veika e sotava; ka tuvatuva ka taka na veika me vakayacori ena veivakauqeti e ciqomi mai na Yalo.
Na soqoni ni matabose me veimuataki kina na cakacaka—na ituvatuva yadua kei na ilawalawa, e vakauqeta na Yalo, me cakacaka ena taudaku ni soqoni me rawata na cakacaka ni Turaga (raica na V&V 43:8–9).
Me vakayagataka na matabose na ivolanikalou kei na vosa ni parofita kei na iapositolo ena gauna edaidai, ira na Vakaitutu Raraba, kei na Vakailesilesi Raraba me liutaka ka tokona na veitalanoa. Ena sala oqo, e rawa ni vukea na kuoramu, ilawalawa, kei na Soqosoqo ni Veivukei na vosa vakauqeti ni iliuliu ni Lotu me wali kina na gagadre bibi.
Na veitalanoa me kua ni tara yani na veika bibi ni veileqa e sotava tiko na lewenilotu yadua se vakamatavuvale.
E dina ga ni liutaki na soqoni ni matabose mai vua e dua na leweni mataveiliutaki se liuliu ni lawalawa, e sega ni rogovaki vakalevu o koya ena veiwasei. Na iliuliu e vakamacalataka taumada na leqa e veitalanoataki ka qai sureti ira kece me ra wasea na nodra vakasama kei na veika era sotava, e veivakauqeti kina na Yalo.
E dina ni sega ni dodonu me vakasaurarataki e dua me vakaitavi, e dodonu me ra sega ni rere se ririko me ra wasea na nodra nanuma kei na veika era via kaya, ka sega ni vakalewai.
Ena gauna e rawa kina, na dabe cawiri ena wirini e rawa ni bucina na yalo ni veiwasei kei na veitalanoa dolavi raraba.

Na iUlutaga e Rawa ni Veitalanoataki ena Matai ni Sigatabu ena Soqoni ni Matabose

Vakasama eso ni iulutaga me veitalanoataki ena soqoni ni matabose e rawa ni tauri mai ena matabose ni tabanalevu, matabose ni mataveiliutaki, na ituvatuva ni wasewase, na veika era vakila na liuliu ena nodra veiqaravi vei ira na lewenilotu, kei na veivakasama mai na Yalo Tabu. Na iulutaga eso e ra e vakatutu walega. E rawa ni ra kila na iliuliu eso tale na gagadre era vakauqeti me ra veitalanoataka.

Ena rawa vakacava meda tuva vaka kena e bibi duadua na itavi duidui e tu meda qarava?
Ena rawa vakacava meda toro voleka mai vua na Kalou ka ciqoma na veidusimaki levu cake mai na Yalo ena noda bula kei na noda itikotiko?
Eda na wasea vakacava na kosipeli vei ira na noda itokani kei ira na tiko tikivi keda? (raica na Alama 17).
Ena rawa vakacava meda taqomaki keda kei na noda matavuvale mai na tawayaga ni tabana ni tukutuku raraba kei na iyaloyalo vakasisila. (raica na V&V 42:22–23).
Na cava eda rawa ni cakava me vukei ira ka vaqaqacotaki ira noda gone kei na itabagone ena noda tabanalevu?
Ena rawa vakacava ni da vakalevutaka cake na duavata ena noda kuoramu, ilawalawa, se Soqosoqo ni Veivukei? (Raica na Mosaia 18:19–22).
Ena rawa vakacava mo vakaitavi vakalevu cake ena cakacaka ni tuva kawa kei na sokalou e valetabu?
Eda vakasaqara vakacava na veivuke ni Turaga ena noda vakasaqara na isaunitaro kina noda taro kei na kena vakatitobutaki na noda kila na kosipeli?
Ena rawa vakacava me ra itubutubu vinaka cake na veiliutaki ena nodra vuvale?
Ena rawa vakacava meda vaqaqacotaka na noda ivakadinadina ni Turaga kei na Nona kosipeli ka vukea na noda vuvale me ra bula rawati keda vakayalo?
Na cava na kena ibalebale mo veiqaravi? Eda sa veiqaravi tiko vakacava vei ira na wavoliti keda? (raica na 1 Pita 4:11).

Kevaka e rawa, e rawa ni ra tukuna yani me ra kila rawa tiko na lewenilotu baleta nai ulutaga me rawa ni ra vakavakarau mai me veitalanoa.