Teie te vāhi

Hōho’a

man standing in the temple

Fa’ahōho’ara’a nā Allen Garns

’Ua ha’api’i mai tō’u metua tāne, te hō’ē keritetiano ha’apa’o, iā’u ’ia fa’aro’o ia Iesu Mesia. ’Ua tauturu taua fa’aro’o ra iā’u ’ia ora mai i roto i nā matahiti e toru nō te tama’i tivira nō te fenua Nigeria ’a riro ai au ’ei fa’ehau i roto i te nu’u. Area rā i muri mai, ’ua ’āhuehue au ’e ’ua fa’aea vau i te haere i te purera’a.

I tō’u haerera’a atu i te fenua Marite i te matahiti 1981 nō te ha’api’ira’a, ’ua ’ite au ’ē ’ua hina’aro vau i te Atua i roto i tō’u nei orara’a. ’Ua haere atu vau e piti matahiti te maoro i te mau ’ēkālesia huru rau i Boston, Massachussetts, ’aita rā te hō’ē o teie mau ’ēkālesia i ’ana’anataehia e au. ’Aita vau i ’ite i te Vārua, nō reira vau i fa’aea ai i te ’imi.

’Aita i maoro roa i muri a’e tō tā’u vahine fa’aipoipo, o Mabel, haerera’a mai iā’u ra i Nigeria i te matahiti 1984, ’ua ha’amata vau i te ’ite i te hō’ē hina’aro ’ū’ana i te ha’afātata atu ā i te Atua ’e ’ia riro ’ei melo nō te hō’ē ’ēkālesia. ’Aita te hō’ē hoa tei tere mai na Nigeria i ’ite ’e tē ’imi ra vau i te hō’ē ’ēkalesia, ’ua parau mai rā ’oia iā’u nō ni’a i te hō’ē ’ēkalesia tāna i fa’aro’oro’o ’e tē vai ra tā rātou te hō’ē buka tei pi’ihia te Buka a Moromona.

I muri a’e i te reira, ’ua tāmau vau i te ’imi i te mau ’ēkālesia. ’Ua ’itehia iā’u te hō’ē ’ēkālesia tei pi’ihiia Te ’Ēkālesia a Iesu Mesia i te Feiā Mo’a i te Mau Mahana Hope’a Nei. ’Ua haru mai te ta’o feiā mo’a i tō’u ferurira’a. ’Aita vau i ’ite ē tē vai ra te hō’ē ’ēkālesia ’e ’ua pi’ihia te mau melo ’e feiā mo’a. ’Ua fa’aoti a’era vau i taua sābati ra ’ia hi’o.

I te purera’a ’ōro’a tā’u i haere atu, ’ua hīmene te ’āmuira’a i te mau hīmene ma te tura, ’ua ha’amaita’i te mau tahu’a i te pane ’e te pape, ’e ’ua ’arata’ihia te purera’a ma te nahonaho ’e te haeha’a. I muri iho, ’a haere atu ai au i te vāhi fāri’ira’a ’e a feruri ai au i ni’a i te purera’a, ua fa’aro’o vau i tō’u i’oa.

« E Simeon », ’ua parau mai te reo o te Vārua, « teie te vāhi ».

I taua taime ra, ’ua ha’afātata mai ra e piti nā misiōnare. ’Ua fa’a’ite mai rāua ē o vai rāua ’e ’ua fa’a’ite mai i te Buka a Moromona. ’Ua hi’o atu vau ia rāua ma te parau atu e, « ’aita vau i ’ite i te hō’ē noa a’e mea nō ni’a i te Buka a Moromona, ’ua ’ite rā vau i te Bibilia. ’Ua ineine au ».

’Ua ha’amata rāua i te ha’api’i iā’u i te ’ōpuara’a nō te fa’aorara’a. Iti mai i te hō’ē ’āva’e i muri mai, ’ua bāpetizohia vau. ’Ua tomo mai tā’u vahine fa’aipoipo i roto i te ’Ēkālesia i te tahi taime poto i muri mai. Te tahi mau matahiti i muri mai, ’ua tā’atihia māua i roto i te hiero nō Washington D.C. ’e ’ua tā’atihia tā māua nā tamari’i e pae i ni’a ia māua.

I roto i te hiero, e rave rahi mau mea tei heheuhia mai iā’u, ’ua ha’apāpū mai rā te mau parau tā’u i fa’aro’o i tō’u taime mātamua i te fare purera’a ’e e rave rahi mau taime nā roto i te heheura’a i roto i te hiero : « Teie te vāhi ». ’Ua fa’ataui roa te pūai o taua parau ra a te Vārua Maita’i i tō’u nei orara’a ’e te orara’a o tā’u vahine fa’aipoipo ’e o tā’u mau tamari’i.