Tei te fare fa’ahou

’Aita vau i ineine nō te niuniu ’a tō’u taea’e. « ’Ua pohe iho nei māmā », ’ua parau mai ’oia. « ’Ua marua ’oia ’e ’ua tupa’i tōna ’upo’o ».

’Ua hitimahuta roa vau. ’Ua reva ïa tō’u māmā, ’e ’ua paraparau ho’i au iāna i te pō nā mua atu. ’Ua tāmau vau i te ani iā’u iho ē nō te aha teie ’ohipa i tupu ai. ’Aita i nehenehe iā’u ’ia ta’a nō te aha ho’i ’oia i fa’aru’e mai ai iā’u. ’Ua riri au ! ’Ua vai noa tō’u riri e rave rahi atu mau hepetoma te maoro.

I te pae hope’a, ’ua fa’aoti au ē o vai rā te ti’a ’ia fa’ahapahia atu. Nā te Atua te hape. ’Ua rave ’oio’i ’ē atu ’oia i tō’u māma. ’Ua ’ere tō’u māmā i te mau mea faufa’a rahi e rave rahi i roto i tō’u orara’a, ’e ’ua mana’o vau ē nāna ïa te hape. E ’ere au i te melo nō te ’Ēkālesia i taua taime ra, ’e keritetiano ha’apa’o rā vau. ’Aita vau i ti’aturi i te Atua nō te pūai, ’ua fāriu ’ē atu rā vau iāna ’e ’ua tāpiri atu vau iāna i rāpae au i tō’u nei orara’a.

’Ua mihi rahi au i tō’u māmā. I tō’u pa’arira’a, ’ua riro tō’u ’utuāfare i piha’i iho i tō’u nā metua ’ei vāhi pāpū. Noa atu tei hea vau ’aore rā te mea tā’u e rave ra, i te mau taime ato’a e paraparau vau i tō’u māmā ’aore rā e parahi mai au i piha’i iho iāna, tei te fare ïa vau. I teie nei rā ’ua mo’e taua mana’o ra « tei te fare nei au » tā’u ho’i i here.

E rave rahi matahiti i muri mai, ’ua ’ore roa tō’u nei fa’aro’o. ’Ua tāmata vau i te ta’a nō te aha tō’u māmā i pohe ai, ’aita rā e mea tei ’afa’i mai iā’u i te hau. I reira, fātata hō’ē hepetoma te maoro, ’ua tāmau noa teie nei mana’o i te tae mai i tō’u nei ferurira’a : ’Ua ti’a iā’u ’ia hi’o atu i te ra’i nō te pāhonora’a. ’Ua parau atu vau i te reira i tō’u hoa here ’e melo ho’i nō te ’Ēkālesia. ’Ua ani mai ’oia, ’ua hina’aro ānei au i te ha’api’i hau atu nō ni’a i tāna fa’aro’o.

’Aita vau i ’ite i te reira ihoa taime, ’ua fa’aara mai rā te Vārua i tō’u vārua nā roto mai i te hō’ē ta’otora’a hōhonu. Te rahi o tō’u ha’api’ira’a mai nō ni’a i te ’evanelia, te rahi ïa tō’u ’itera’a ē ’ua ’iteahia iā’u te hō’ē fa’ahou ā vāhi pāpū. ’Ua ho’i mai taua mana’o ra « tei te fare nei au ».

’Ua bāpetizohia vau i te ’āva’e me 2013. ’Ua māuruuru vau ’e ’ua ho’i fa’ahou mai tō’u fa’aro’o. ’Aita vau i huri fa’ahou i tō’u nei tua i te Atua. ’Ua tauahi rā vau iāna. Tē ’oto noa ra vau nō te pohera’a o tō’u māma, nō tō’u rā fa’aro’o i te Atua, ’ua ’ite au ē i te hō’ē mahana « tei te fare fa’ahou vau » ’e tō’u māmā ’e tō’u ’utuāfare e a muri noa atu.