Nāhea e nehenehe ai iā’u ’ia ’ana’atae fa’ahou i tā’u tai’ora’a i te pāpa’ira’a mo’a ?

Hōho’a

woman sitting at a desk

Fa’ahohoʻara’a nā Bradley Clark

E toru noa ’āva’e tō’u ho’ira’a mai i te fare mai tā’u misiōni mai ’a ha’amata ai au i te fifi i te tai’o i te mau pāpa’ira’a mo’a.

’Ua tai’o vau i te mau pāpa’ira’a mo’a i te mau mahana ato’a i roto i tā’u misiōni ’e ’ua fafau vau i te tāmau noa ’ia ho’i au i te fare. ’A tere rā te taime, e au ra e rave rahi mau mea e ha’atāfifi nei i taua ’ōpuara’a ra. ’Ua rahi roa ānei tā’u ’ohipa ha’api’ira’a, tā’u ’ohipa, ’aore rā ’ua rohirohi roa vau. Nā roto i te mau ’ōtohera’a ato’a, ’ua topatopa tā’u tai’ora’a i te mau pāpa’ira’a mo’a ē tae noa atu ’e ’aita vau i tai’o fa’ahou.

’Ua ’iriti au i te Buka a Moromona i te hō’ē pō ’e ’ua ’ōpua vau i te tai’o i te hō’e noa ’īrava. ’Ua fa’aha’amana’o mai te ’īrava tā’u i tai’o ē, tē vai nei i roto i te mau pāpa’ira’a mo’a « te parau ha’amāuruuru a te Atua, ’oia ïa, te parau e fa’aora i te ’ā’au i putahia ra » (Iakoba 2:8).

’Ua feruri hōhonu vau i teie ’īrava ’e ’ua ’ite a’era vau i te huru ’ino o te ha’apa’o-’ore-ra’a i te tai’ora’a i te pāpa’ira’a mo’a i ni’a iho ia’u. ’Ua rahi atu tō’u hepohepo i te fare ha’api’ira’a, ’ua rahi atu tō’u tau’a-’ore-ra’a i te fare purera’a, ’e ’ua rahi atu tō’u āteara’a i te Atua. ’Ua hina’aro tō’u vārua i te parau fa’aora a te Atua tei ’itehia i roto i te mau pāpa’ira’a mo’a. ’Ua ’ite au ’e ’ua ti’a iā’u ’ia fa’anahonaho i te mau mea e ti’a iā’u ’ia rave mātāmua.

’Ua fāriu atu vau i tō’u mau hoa, te ’utuāfare, te feiā fa’atere o te ’Ēkālesia nō te ani i te mau mana’o nō te ’ana’anatae fa’ahou i tā’u tai’ora’a i te pāpa’ira’a mo’a. ’Ua ’itea iā’u e toru mea o te tauturu.

’A tahi, ’ua ’ite au ē, e ’ere te tai’ora’a i te mau pāpa’ira’a mo’a i te pō i te mea manuia roa nō’u. Nā roto i te tai’ora’a i te po’ipo’i, ’ua ti’a iā’u ’ia feruri hōhonu i te mahana tā’ato’a nō ni’a i te ha’api’ira’a tumu ’e te mau parau tumu ta’u i tai’o i taua po’ipo’i ra.

Te piti, ’ua ha’api’ihia tātou ’ia tai’o i te mau pāpa’ira’a mo’a ’e tō tātou mau ’utuāfare, ’e nō te mea ho’i ē, tei te fare ha’api’ira’a teitei au ’e ’ua ātea vau i te ’utuāfare, ’ua ha’amata ïa vau i te tai’o i te mau pāpa’ira’a mo’a nā muri i te mau pīahi hō’ē ā tō mātou vāhi ta’otora’a ’e tō’u mau hoa. Nā te reira i tauturu iā’u ’ia vai ara noa ’e nā te reira i fa’atupu i te mau tāu’ara’a parau fa’ahiahia nō ni’a i te ’evānelia.

Te toru, ’ua ha’amata vau i te pāpa’i i te mau fa’a’itera’a a te Vārua ’e te mau mana’o tā’u i fari’i i roto i te tai’ora’a i te pāpa’ira’a mo’a. Nā te reira i tauturu iā’u ’ia fa’atumu i ni’a i te mea tā’u e tai’o ra ’e i tauturu iā’u ’ia ’ite maita’i a’e i te reo o te Vārua.

I te taime ’ua riro fa’ahou te tai’ora’a i te pāpa’ira’a mo’a ’ei ’ohipa mātāmua i roto i tō’u nei orara’a, ’ua ’ite au ē ’ua rahi tō’u taime ’e tō’u itoito i te ravera’a i te mau mea ato’a e ti’a iā’u ’ia rave fa’aoti. Te mea hau roa atu i te faufa’a rahi, ’ua ’ite au ē, ’ua piri fa’ahou atu vau i te Atua ’ia tai’o ’e ’ia feruri au i te mau pāpa’ira’a mo’a. I teienei ’ia rave au i te taime nō te mau pāpa’ira’a mo’a, e ’ite au i te hau ’e te fa’aorara’a nō tō’u vārua.