Fa’ateitei i te u’i ’āpī

’Aita i maoro a’e nei, ’ua haere atu vau i te hō’ē puhapara’a nā te feiā ’āpī pa’ari i Tona. I mua iā’u, i te reira po’ipo’i mahana pae maita’i, tē vai ra hau atu i te pae hānere o te mea maita’i a’e a te Fatu. ’Ua ori ’e ’ua hīmene rātou, ’ua au roa rātou i te mau ’ohipara’a ’āmui maitata’i ’e ’ua fa’aro’o i te mau arata’ira’a ha’apoupou ’a te tahi ’e te tahi ’e ’a tō rātou feiā fa’atere. E ’oa’oa rahi i te fa’aeara’a i pīha’i iho ia rātou, te ’itera’a i tō rātou maita’i ’e ’ia ’ite ē nā mua iā’u tē vai ra te tahi mau feiā fa’atere o te ’Ēkālesia, o te ’oire ’e o te ’imira’a faufa’a.

E mea rahi te mau ’ohipa tā mātou i fa’ahanahana ’e te au maita’i tei fa’aotihia e te u’i ’āpī tamāroa ’e tāmahine nō Pātifita. E rave rahi o rātou e tāvini nei i te misiōni, e fa’aipoipo nei i roto i te hiero, ’e e tāvini nei i roto i te mau pāroita ’e te mau ’āma’a nā roto i te mau fenua nō Pātifita. Noa atu ā teie mau fa’aotira’a rahi, tē vai noa nei te hō’ē āteara’a faufa’a roa i roto i te feiā te tāpe’a pūai nei ’e tē ha’apa’o nei i tā rātou mau fafaura’a ’e te tahi ’aita roa, o te reira te ha’ape’ape’ara’a rahi nō tātou pā’āto’a.

Tē pi’i nei te peresidenira’a ārea nō Pātifita i te u’i ’āpī ’ia aupuru i te au maita’i mure ’ore o tō rātou iho vārua. E’ita te hō’ē melo nō teie ui ’āpī e nehenehe e vaiiho i teie hōpoi’a nā te tahi ’ē atu ta’ata e rave. Nā te ta’ata tāta’itahi e ’imi i tōna iho fa’ateiteira’a mure ’ore ma te fa’a’amu iāna iho i te pae vārua, o te tītau ’ia rave ’e ’ia ha’apa’o i te mau fafaura’a ’e ’ia ’āmui atu i roto i te mau ’ohipara’a maitata’i. Te hō’ē pipi auraro a te Mesia e vai ïa te Fa’aora ’ei pū nō tō rātou orara’a ’e e rave i te mau mea tei riro hau atu i te faufa’a i te hō’ē mea mātāmua roa. Te pure ha’eha’a tāmau, te tai’ora’a i te pāpa’ira’a mo’a, te taera’a i te seminaire ’e te institut, te taera’a i te purera’a, te maura’a i te hō’ē parau fa’ati’a mana nō te hiero, te fa’a’āpīra’a i te mau fafaura’a ’e te tāvinira’a ia vetahi ’ē o te tahi noa o te mau mea hau atu i te faufa’a. ’Oia mau, e ti’a i te melo tāta’itahi o te u’i ’āpī ’ia rave i te hōpoi’a nō tōna iho au maita’i pae vārua ma te rave i te mea hau atu i te faufa’a.

Ia te Mesia ’ei pū nō tō tātou orara’a, tē vai nei e maha tuha’a o te tauturu ia tātou ’ia fa’aea pūai ’e te ha’apa’o i te ’evanelia tei fa’aho’ihia mai. Tei roto i te reira te fa’ahiahia i tō ’outou rirora’a ’ei melo nō te ’Ēkālesia. I te taime ’a tāu’a ’ore ai tātou i te reira tumu parau o te reira ato’a te taime e ha’amata ai te tāu’a-’ore-ra’a i tā tātou mau fafaura’a. Te piti, e ti’a ia tātou ’ia ha’amana’o ē tē vai nei hō’ē fa’anahora’a nō te mau tamari’i a te Atua i ni’a i te fenua nei ’e, i te hope’a, e ti’a ia tātou ’ia ho’i e ora fa’ahou ā i pīha’i iho iāna. Maita’i atu ā tō tātou māramaramara’a i te fa’anahora’a rahi nō te ’oa’oa, hau atu ïa tō tātou manuiara’a ’ia fa’aoti i te fa’anahora’a. Te toru, e ti’a ia tātou ’ia ha’amana’o ē e fa’ahōhonu te tāvinira’a misiōnare i tō tātou fa’afāriura’a i te Mesia ’e e ha’amara’a i tō tātou fa’aro’o iāna. E ti’a ia tātou pā’āto’a ’ia fa’afāriu-tā’āto’a-hia nō te pāto’i i te mau pātia a te ’enemi. Te maha e mea faufa’a roa ’ia fa’aō atu i roto i te fa’aipoipora’a. ’Ua ha’apa’ohia te fa’aipoipora’a i roto i te hō’ē tāne ’e i te hō’ē vahine e te Atua ’e ’eiaha te reira ’ia fa’anu’u-faufa’a-’ore-noa-hia.

’Aita te ta’ata i fa’ata’ahia ’ia vai ’ōtahi noa i te tāhuti nei ’e ’ua rave te Atua mai te mea ra ē ’ia tae mai te rāve’a, tē vai ra te tauturu. E ’ite mai te u’i ’āpī i te reira tauturu i pīha’i iho i te mau metua maita’i, te feiā fa’atere o te autahu’ara’a ’e te mau pupu tauturu ’e te mau hoa pāpū e turu ra i te reira mau faufa’a. Mai te mau melo ato’a, e ’ite mai rātou ē te tauturu maita’i roa a’e e ’itehia ’ia tūturi ’a ani ai rātou i te tauturu ’ia fa’a’oroma’i i te mau fifi ’e te mau tamatara’a o tā rātou e fa’aruru ra. E fāri’i rātou, mai tā’u i fāri’i, i te fa’aurura’a a te Vārua Maita’i e arata’i ra ’e e ha’ati’aturi ia rātou i roto i te mau taime pe’ape’a.

I roto i te hina’aro ’ia tauturu rahi atu i te u’i ’āpī, ’ua ani ta’a ’ē o Elder Christofferson i te « mau tāne pa’ari—te mau metua tāne, te feiā pa’ari ’ōtahi, te mau upo’o fa’atere ’utuāfare, te mau fatu fare—’ia riro rātou ’ei mau hi’ora’a ti’amā ’e ’ia tauturu i te u’i ’āpī tamāroa ’ia riro ’ei mau tāne. ’Ia ha’api’i ia rātou i te mau peu tōtiare ’e te tahi atu : Nāhea ’ia ’āmui atu i roto i te hō’ē ’āparaura’a, nāhea ’ia ha’amātau ’e ’ia fa’aō atu e vetahi ’ē, nāhea ’ia ’aparau i te mau vahine ’e te mau tamāhine, nāhea ’ia tāvini, nāhea ’ia vai itoito noa ’e ’ia ’oa’oa i te mau fa’a’ana’anataera’a, nāhea ’ia fa’aohipa i te mau fa’a’ana’anataera’a ’eiaha rā ’ia fa’atumu roa atu i roto, nāhea ’ia tāta’i i te mau hape ’e ’ia rave i te mau mā’itira’a maita’i » Te mau tāne pa’ari nō Pātifita, tē ani atu nei mātou ia ’outou ’ia pāhono mai i teie anira’a a te hō’ē peropheta na te Atua.

’Ua parau ato’a ’oia ē « ’aita e vāhi ’ē atu e ’itehia te fa’aurura’a pae morare a te hō’ē vahine, i tōna mana rahi a’e, ’aore rā nō te fa’a’ohipara’a i te reira maori rā i roto i te fare. ’Aita e fa’anahora’a maita’i a’e nō te ’atu’atura’a i te u’i ’āpī maori rā i roto i te fa’anahora’a ’utuāfare mātauhia, i reira te metua tāne ’e te metua vahine e ’ohipa hō’ē ai nō te fa’afana’o, nō te ha’api’i ’e nō te aupuru i tā rāua mau tamari’i ». Pāpū roa ē, ’ua riro te hō’ē ’utuāfare feiā mo’a ’ei hō’ē tuha’a faufa’a roa nō te ’atu’atu i te u’i ’āpī.

Tē ani nei mātou i te mau metua ato’a ’e te feiā fa’atere ’ia rave mai te mea ra ē, i mua i te pāto’ira’a ’e te mau fa’ahemara’a, ’eiaha te hō’ē u’i ’āpī ’ia mo’e ’e ’ia ’āmui atu ’outou ’ia rātou i roto i tā rātou tītaura’a ’ia vai ha’apa’o noa i tā rātou mau fafaura’a ’e ’ia fa’aora i tō rātou ’āpiti tei mo’e.