Te ’itera’a i te Fa’aora

Hōho’a

Christ praying

Hu’ahu’a nō roto mai Tei hea nā ta’ata e ’iva, nā Liz Lemon Swindle

’A feruri e te tai’o nei ’outoui te mau mea ato’a nō ni’a i te Fa’aora i roto i te mau pāpa’ira’a mo’a—te Bibilia mo’a, te Buka a Moromona, te Parau Ha’api’ira’a ’e te Mau Parau Fafau, ’e te Poe Tao’a Rahi. E taime ’e e ’ohipa huru rahi ïa ! I te ’āva’e tenuare 2017 rā, ’ua hōro’a mai te peresideni Russell M. Nelson i te hō’ē tītaura’a ’ia rave noa i te reira—’ia tuatāpapa i te mau mea ato’a tā Iesu i parau ’e i rave i roto i te mau pāpa’ira’a mo’a. ’Ua parau te peresideni Nelson ē nā roto i te ravera’a i te reira ’ōpuara’a ’ua riro mai ’oia ’ei « hō’ē ïa ta’ata huru ’ē ». ’Aita ’oia i ha’api’i rahi noa nō ni’a ia Iesu Mesia ’ua ’ite ato’a rā ’oia i te hō’ē here fa’’āpīhia nōna.¹

E nehenehe tā ’outou e ha’afātata atu ā i te Mesia ’a ha’api’i mai ai ’outou nō ni’a iāna. E fa’ahaere mai te tuatāpapara’a i tōna orara’a ’e te tumu nō te reira, i tōna hau i roto i tō ’outou orara’a ’e e tauturu ’ia ’ite ’outou iāna ’e te Metua i te Ao ra. ’A hi’o e nāhea teie mau feiā ’āpī i te pāhonora’a i teie nā uira’a ’e piti : (1) E aha tā ’outou ’ā’amu au roa i roto i te mau pāpa’ira’a mo’a nō ni’a i te Fa’aora ’e nō te aha ? (2) ’E nāhea tā ’outou mau tuatāpapara’a i te ’evānelia i te ’āfa’i mai i te hau ia ’outou ?

Mea au nā’u te ’ā’amu ’o nā 10 ta’ata lepera nō te mea ’ua fa’a’ite te Mesia i tōna aroha rahi i te ta’ata lepera tei ha’amāuruuru Iāna. ’Ua parau ’oia, « ’ua ora ’oe i tō fa’aro’o » (Luka 17:19 ; ’a hi’o i te mau ’īrava11-19). Mea au nā’u te maita’i mau tāna i fa’a’ite’ite i te mau ta’ata ato’a.

Nō te tahi mau ’ati tei tupu iho nei i tā’u fare ha’api’ira’a, ’ua hina’aro te mau ta’ata ato’a i te hau ’e te tāmāhanahanara’a. ’Ua ’iteā iā’u te pūai nā roto i tā’u mau ha’api’ira’a i roto i te ha’api’ira’a ’evanelia seminaire. ’Ua fa’ariro te mau ’orometua ha’api’i ’evanelia seminaire i te mau pāpa’ira’a mo’a ’e te ’evanelia ’ei mau ha’api’ira’a nō te mau pīahi ato’a. E mea fa’ahiahia mau ’ia hi’o i te vāhi huru ’ē i rotopū i te piha nō te ha’api’ira’a ’evanelia ’e te tahi atu piha ha’api’ira’a noa. Tē vai nei te hō’ē vārua ta’a ’ē o te ’āfa’i mai i te hau.

Gabriel S., age 16, Colorado, Fenua Marite

’Ua ha’api’i mai te ’ā’amu o Alama nō ni’a i fe fa’aro’o ’e te parau a te Atua (’a hi’o Alama 32:18-43) ē ’ia ueue ana’e tātou i te here, e fāri’i ïa tātou i te here. Mai tā Alama i ha’amāramarama atu i tō Zorama, ’ua riro te fa’aro’o mai te hō’ē huero. ’O te ti’aturira’a ïa i te tahi mea mau ma te ’ore i ’ite mata atu i te reira. E tupu te fa’aro’o i te rahi ’ia hina’aro ana’e te hō’ē ta’ata i te ti’aturi ’e i te fa’aro’o i te parau a te Atua. ’Ua tauturu mai teie mau mea ato’a iā’u ’ia vai hau, ’ia ha’apūai i tō’u māfatu, ’e ’ia noa’a te hō’ē ’itera’a pāpū ē te ’ite mai nei te Metua i te Ao ra iā’u ma te mata o te here ’e o te aroha.

’A tai’o ai au i te mau pāpa’ira’a mo’a i te mau mahana ato’a, ’ua ta’a maita’i a’e iā’u i te here a tō tātou Fa’aora nō tātou tāta’itahi. ’Ua tauturu teie ’itera’a iā’u ’ia ha’amāramarama atu i tō’u mau hoa i te fare ha’api’ira’a ’e ’aita rātou i fa’aea ’ōtahi noa ’ia fifihia rātou nō te mea tē vai nei te hō’ē Atua o te here nei ia tātou.

Maria D., 17 matahiti, Guadalajara, Fenua Paniora

Hōho’a

Christ with children

Hu’ahu’a nō roto mai Te Mesia ’e te mau tamari’i nō te Buka a Moromona, nā Del Parson

Mea au nā’u te 3 Nephi 17 ’a tere ai te Fa’aora i te fenua Amerika ’e a ani ai ’oia i te mau tamari’i ’ia haere mai iāna ra. ’Ua pārahi ’oia i piha’i iho ia rātou ’e ’ua rave i te taime nō te tamari’i tāta’itahi. E ’ā’amu māere teie nō’u o tē fa’a’ite mai nei ē o vai mau Iesu Mesia ’e te rahi o tōna here nō tātou tāta’itahi. Tē ti’aturi nei au ē ’e pārahi mai ’oia i piha’i iho ia tātou tāta’itahi ’ia hina’aro ana’e tātou i tāna tauturura’a.

’Ua tītau vau iā’u iho i teie matahiti ’ia tai’o i te hō’ē ’api o te mau pāpa’ira’a mo’a i te mau mahana ato’a. ’A nā reira ai au, ’ua pa’ari au i te tīa’ira’a i te reira i te mau mahana ato’a. ’Ua rahi te mea tā’u i ha’api’i mai nā roto mai i te mau parau ’e te mau ’ā’amu i roto i te mau pāpa’ira’a mo’a ’a tāmata ai au i te rave i te taime ’ia ta’a maita’i i te reira, ’e ’ua piri atu vau i tō’u Metua i te Ao ra ’e i te Fa’aora ’a ha’api’i mai ai au nō ni’a ia rāua ato’a. Nā te reira i ’āfa’i mai i te hau rahi i roto i tō’u nei orara’a.

Anna C., 17 matahiti, Montana, Fenua Marite

Mea au nā’u ’a haere mai ai te Mesia i Amerika, ’e a ani ai ’oia mai te mea tē vai ra tei ma’ihia ’e tei ro’ohia i te ’ati i rotopū ia rātou, ’e ’a fa’aora ai ’oia ia rātou. I muri iho ’ua ha’amaita’i ’oia i te mau tamari’i ri’i. (’A hi’o 3 Nephi 1). Tē mana’o nei au ē e ’ā’amu nehenehe ’e te pūai. Mea au nā’u te mau tamari’i ri’i, ’e mea au nā’u ’ia hōro’a ana’e te ta’ata ia rātou i te tahi atu ā here, nō te mea e mea mā te mau tamari’i. Tē fa’a’ite mai nei te ’ā’amu iā’u i te hōhonura’a o te here o te Fa’aora nō tātou. Nō te mea ho’i ē ’ua here ’oia i te ta’ata i taua taime ra i rave ai ’oia i te mau mea ato’a tāna i rave, e nehenehe ato’a ïa iāna ’ia here ia tātou i teie mahana.

Tē parau nei Isaia 53:3 ē te Fa’aora « e ta’ata mataro ïa i te ’oto, ’e ’ua ’ite ho’i i te mihi ». ’Ia feruri ana’e au i te tāra’ehara a te Mesia, te mea tāna i fa’aruru nō tātou, e nāhea vau e fa’a’orehia ’ia tātarahapa vau i tā’u mau hara, ’ia ’ite mau vau i te hau. E rave rahi mau ta’ata i roto i te Buka a Moromona—te mau tamāroa a Mosia, Amona, ’e Alama tamaiti—e ’orara’a hara tō rātou i muta’a ihora, ’ua nehenehe rā tā rātou mau hara ’ia fa’a’orehia. ’Ua fāriu atu rātou i te Mesia, ’ua tātarahapa, ’e ’ua riro mai ’ei mau hi’ora’a māere tā tātou e nehenehe e ’apo mai i teie mahana. E mea māhanahana nō’u ’ia ’ite e nehenehe ato’a tā’u mau hara e fa’a’orehia.

Alina T., 18 matahiti, Oregon, Fenua Marite

Tā’u ’ā’amu au roa i roto i te pāpa’ira’a mo’a nō Iesu i te taime ’a taui ai ’oia i te pape ’ei uaina i roto i te hō’ē fa’aipoipora’a i te anira’a a tōna metua vahine (’a hi’o Ioane 2:1-11). Teie tā’u ’ā’amu au roa nō te mea tē fa’a’ite mai nei te ’ā’amu i te fa’atura o Iesu i te mau vahine ’e tōna metua vahine ihoa ra. Tē fa’aitoito nei teie ’ā’amu i te mau tamari’i ’ia fa’aro’o i tō rātou mau metua, ’eiaha nō te māta’u nō te here rahi rā. ’Ua riro te hi’ora’a ’o Iesu Mesia i te mea e ti’a i te mau ta’ata ato’a ’ia tūtava i te pe’e atu. ’Aita roa atu tōna here i tōna metua vahine i fa’aea, ’e e’ita ato’a tō tātou here nō tō tātou mau metua. O tāu ato’a ’ā’amu au roa nō te mea ’ua riro tāna temeio ’ei ’ohipa tāvini ’e e nehenehe ato’a tātou e fa’atupu i te mau temeio nā roto i te tauturura’a ia vetahi ’ē.

’Ua ’āfa’i mai teie ’ā’amu ’e te tahi atu mau ’ā’amu i roto i te mau pāpa’’ira’a mo’a i te hau i roto iā’u. E mea māhanahana ’ia ’ite ē, e mai te mea e tāmata noa vau i te ha’api’i nō ni’a i te Mesia ’e i te pe’e i tāna mau ha’api’ira’a, ’e nehenehe ïa iā’u ’ia ho’i atu i tō tātou ra Metua here i te Ao ra i te hō’ē mahana.

Anne R., 17 matahiti, Victoria, Auteraria

Mea au nā’u te ’ā’amu ’a haere ai te Mesia nā ni’a i te pape. ’Ua haere ’āvae atu ’oia i te poti i reira te tā’āto’ara’a o te mau ’āpōsetolo, ’e ’ua ani ’oia ia Petero ’ia haere mai i rāpae i ni’a i te pape. E fa’aro’o tō Petero i te ha’amatara’a ’e ’ua nehenehe iāna ’ia haere nā ni’a i te pape, i muri iho rā ’ua mo’e tōna fa’aro’o ’e ’ua ha’amata ’oia i te tomo. I reira ’ua toro atu te Mesia i tōna ra rima ’e ’ua haru mai iāna (’a hi’o Mataio 14:25-33). E ’ā’amu faufa’a rahi teie nō’u nō te mea i vai noa nā te rima o te Mesia i roto i tō tātou orara’a—tē pāruru nei ’oia ia tātou.

’Ua tauturu mai tā’u mau tuatāpapara’a iā’u nō te mea ’ua tuatāpapa vau i te mau pāpa’ira’a mo’a i te po’ipo’i ’e nā te reira i ha’amaita’i atu ā i te mahana. ’Ia ’ore ana’e au e tuatāpapa, e ’ere tā’u mahana i te mea ’oa’oa ’aore rā te mea ’ārearea—’aita vau e maita’i. ’Ia tai’o tāmau ana’e au i tā’u mau pāpa’ira’a mo’a i te po’ipo’i, e mea maita’i a’e tā’u mahana nō te mea tē ani nei au i te Vārua Maita’i ’ia pārahi mai iā’u ra i te roara’a o te mahana.

James K.,17 matahiti, Alaska, Fenua Marite

Hōho’a

Christ and the rich young man

Hu’ahu’a nō roto mai I TE MESIA ’E TE TĀVANA ’ĀPĪ TAO’A RAHI, NĀ HEINRICH HOFMANN

Mea au nā’u te ’ā’amu o te Mesia ’e te ta’ata ’āpī ’ona (’a hi’o Mareko 10:17-22). ’Ua rahi te mau mana’o ’e te hi’ora’a tei noa’a iā’u nō ni’a i te tu’ura’a i te Atua i ni’a a’e i te mau mea ato’a. ’Ia anihia ’ia ho’o atu i te hō’ē noa tao’a nō te ao nei o te hō’ē ïa anira’a fifi nā te mau ta’ata ato’a. I tō’u rā mana’o ’ia ineine ana’e tātou i te tu’u atu i te Atua i ni’a a’e i te mau tao’a o te hō’ē ïa o te mau mea ’e ti’a ia tātou tāta’itahi ’ia ha’api’i i roto i te orara’a nei. E mea fa’ahiahia mau te here ’ōti’a ’ore a Iesu Mesia nō tātou. E mea pāpū ē ’e mea maita’i a’e te reira i te rahira’a moni ’aore rā tao’a i noa’a ia tātou i roto i teie nei orara’a.

’Ua ’āfa’i mai te tai’ora’a i te mau pāpa’ira’a mo’a iā’u i te hau ’e te tāmāhanahanara’a, ’e te pa’ari ’e te māramarama rahi a’e. Noa atu e’ita vau e ’ite i te mau taime ato’a i te mana nō te tuatāpapara’a i te mau pāpa’ira’a mo’a i te reira ihoa taime, ’ua ’ite au e ha’amaita’i mai te tai’ora’a i te mau pāpa’ira’a mo’a i tō’u orara’a ’e e tauturu te reira iā’u ’ia ’ite i te Vārua ’e ’ia ’ite i tāna mau fa’a’itera’a.

Yuzhen C., 19 matahiti, Taichung, Taiwan

Hōho’a

woman touching the hem

Hu’ahu’a nō roto mai Vahine e tāpe’a ra i te hiti ’ahu a te Mesia, nā Heidi Daynes Darley

’A haere ai te Mesia nō te hi’o i te hō’ē tamāhine ’āpī e pohe ra, ’ua tāpe’a atu te hō’ē vahine tei pohe i te tapahi i tōna ra ’ahu ’e ’ua fa’aorahia. ’Ua fāriu atu te Mesia ’e ’ua paraparau atu iāna i muri a’e i tōna ’itera’a ē ’ua tāpe’a ’oia iāna (’a hi’o Luka 8:43-48). Noa atu e tē haere ra ’oia e tauturu i te tahi ’ē atu ta’ata, ’ua rave ato’a ra te Mesia i te taime nō teie vahine. E rave ato’a te Mesia i te taime nō tātou pā’āto’a.

E orara’a ’ohipa roa tō’u, horora’a i te fare ha’api’ira’a ’aore rā te mau piha ’orira’a ’aore rā te tahi atu mau tere ’ohipa. I roto i teie mau mea ato’a, ’aita i noa’a iā’u te taime nō’u ana’e ’aore rā i te ’ite i te hau. ’Ia tai’o ana’e au i tā’u mau pāpa’ira’a mo’a ’aore rā ’ia pure au, e ’ite au i te hau. E mea maita’i ’ia ’ite i taua huru maita’i ra ’e ’ia rave i te taime nō te fa’afa’aea i teie huru ma’ama’a. I roto i taua mau taime hau ra, e rahi atu ā tō’u pirira’a atu i te Fa’aora ’e e tupu vau i te pa’ari i roto i te ’evanelia.

Zoe B., 17 matahiti, Utah, USAT