Dua na Sigege ni Veiciqomi

Dua na bogi ea dua na itaviqaravi na neitou tabanalevu ka keimami vakarau kina me vica vata na auwa. Ni oti na itaviqaravi e dua na dauvakatataro itabagone e vakamoce mai vei au ia e oti e vica na miniti e suka tale mai ka taroga, “Bisopi, na gauna cava e gadrevi tale kina meu lesu mai?” Au tukuna vua ena Sigatabu, e tukuna vakatotolo mai o cauravou, “Sega, e sega ni dua tale na itaviqaravi?” E taleitaka vakalevu na gauna vata kei ira na itabagone ni neitou tabanalevu ka vinakata me lesu tale mai.

Au veitalanoa talega kei na dua na veiwatini siko mai ka rau a tiko ena itaviqaravi ka taroga na nodrau nanuma. Na tagane ea kaya, “Ena neirau yaco ga mai, keirau vakila na vakacegu kei na maravu,” ka vakadonuya ena deguvacu ko watina. Au kurabuitaka oya baleta ni rau qai yaco ga mai, era lewe levu era veitalanoa tiko ka ra vakasausa. Ia ea kuria ka raici au ni kaya, “Oya na Yalo Tabu, e donu?” Ena kurabui, au rawa ga ni tukuna yani io.

E levu na ka mea caka me rawa kina na itaviqaravi oqo, ia ni sa bogi mai ka sa oti na ka kecega, na ka ga au via cakava meu lako ki vale ka laki moce. Baleta na levu ni wawale sa tu vei au, au a sega ni vakanananutaka vinaka na noqu veitalanoa kei ratou na dauvakatataro. Niu yaco ki vale, au cavuta noqu masu ka laki davo, ia au a sega ni rawa ni moce; ena noqu vakasama au raitayaloyalotaka na Turaga ni sigege tiko. Oqo e dua na sigege ni veiciqomi. Ena tikinigauna oya au tekivu nanuma na veika kurabui ka yaco ena itaviqaravi.

Au qai kila na nodra gumatua kei na loloma na lewe ni tabanalevu ka rawa kina me tarai na yalodratou na dauvakatataro oya. Au kila ni sigege ni veiciqomi oya e baleta na ka keimami cakava tiko. Au sega ni kinoca rawa noqu tagi, kau vakavinavinakataka na isolisoli e solia vei keda na Turaga. Ea solia vei keimami e dua na sigege ni veiciqomi. Au vakadinadinataka ni vosa ni Turaga e dina; ni da kauta mai e dua mada ga na yalo kivei au, sa na vuabale sara na nomudrau marau vata kei koya ena matanitu i Tamaqu (raica na V&V 18:15).