“Au na sureta vakacava na Yalotabu ki loma ni noqu vale kevaka era veiba ka veivala tiko na tamata?”

Niu dau veiba, au sa kunea ni o kaya ni o rarawataka ka tusanaka ni o cala, dina mada ni o nanuma se kila ni o dodonu tiko, ena vukea me lesu mai na vakacegu e loma ni rumu. Ka qai lako tani, vakagagalu, veisautaka na ulutaga, se kunea e dua na ka e veidonui kina. Ena sega ni dede esa na lesu tale mai na Yalotabu.

Au sa kunea ni ko vakaraitaka na loloma dina ki nomu matavuvale e sureta na Yalotabu me mai vakaitikotiko e loma ni noda vale. Na parofita e vosa e vuku ni loloma ni ivakatubu ka vakavu veisau ka ilumu e kauta mai na bula ki na yalo. Na yalo ni loloma e kauta mai na taqomaki kei na vakacegu ki na vuvale.

Kevaka era sega ni lewe ni Lotu na nomu matavuvale, tukuna vei ira na kena dau ca vei iko ni ra veiba ka kerei ira mera vakavinakataka. Kevaka e sega ni cakacaka oya, masulaka ka tovolea tale. Kevaka era lewenilotu, vakananumi ira ni ra luvena na Kalou ka dodonu mera levea na veiba.

Ena gauna era veiba kina na matavuvale, e dau dredre ni vakilai ni tiko na Yalotabu, ia e sega ni kena ibalebale ni ko sega ni rawa ni vakila ke o kilikili. Cavuta e dua na masu e lomamu me dua na ivakarau vakaikuritaki ni Yalo ni Turaga ka vakarorogo vakaukauwa cake ki na veivauqeti e talai mai. Na Tamada Vakalomalagi e rawa ni vukea mo vakila na vakacegu ka kila na kena vinaka duadua ni veivuke me kau mai na vakacegu oya ki nomu vuvale.

Vosa vei ira nomu matavuvale mera walia na leqa ena ivalavala ka na yaga kece vei ira yadua, se veiwasei ivolanikalou se laga serenilotu vata. E rawa ni o kerea na Tamada Vakalomalagi me veivuke ena wali ni leqa. Ena sala oqo, era na malumu kece kina ka rawa ni walia na leqa ka sega ni gadrevi na kaikaila se itovo kaukauwa. E dina na Yalo Tabu ena vakasinaiti kemuni kece ena vakacegu ka solia vei kemuni kece na marautaka moni kua ni veivala tale.