iVakavuvuli ni Veiqaravi
E Rawa NIU Veivuke me Vukei ira na Tani
Eda okati ira vakacava na tani ni da gadreva me vukei noda sasaga meda veiqaravi? Vakaitavi ena veitarotarogi ni veiqaravi kei na soqoni ni matabose ni imatai ni Sigatabu.
Ni sa vesuki Kathy ki na qiqi na mate ni ua levu (multiple sclerosis), e kunea ni gadreva me vukei ena veibogi mai na idabedabe ki nona idavodavo. Na cakacaka oya esa rui bi vua e dua ga na lewenilotu. O koya era qai veivosaki na kuoramu ni italatala qase me baleta nona ituvaki ka vakatulewa me dua na ituvatuva me vukei koya e veiyakavi.1
Ni da kila na nodra gagadre kei na nodra kaukauwa eda qaravi ira, e rawa ni da raica ni da gadreva na veivuke me vukea na sotavi ni nodra gagadre. Na veivakatarogi ni veiqaravi kei na soqoni ni matabose ni imatai ni Sigatabu e rua na madigi me veitalanoataki kina na nodra okati vakamatau na tani.
Veivakatarogi ni Veiqaravi
Na veivakatarogi vakavulatolu oqo vei rau na marama veiqaravi kei na mataveiliutaki ni iSoqosoqo ni Veivukei se na turaga veiqaravi kei na mataveiliutaki ni kuoramu ni italatala qase esa ikoya duadua ga na ripote tuvai eda vakayacora baleti ira eda qarava. Dau vakayacori na veivakatarogi ni veiqaravi (1) me veitalanoataki na veika vinaka, na leqa, kei na nodra bolebole na matavuvale kei na tamata yadua, (2) me lewai na leqa cava e rawa ni veivuke kina na kuoramu, iSoqosoqo ni Veivukei, se matabose ni tabanalevu, kei na (3) me ra vuli mai vei ira na iliuliu ka vakayaloqaqataki ena sasaga ni veiqaravi.
Na peresitedi ni kuoramu ni italatala qase kei peresitedi ni iSoqosoqo ni Veivukei e rau na vakatakea vakadodonu vei bisopi na veigagadre bibi ka ciqo ivakasala kei na veidusimaki maivua.
Ena kunei e vuqa tale na itukutuku baleta na veivakatarogi ni veiqaravi ena ministering.lds.org.
Caka Na Veivakatarogi ni Veiqaravi me Vakaibalebale
Ena nona tokona na itukutuku nei Peresitedi Russell M. Nelson ni na parokaramu ni veiqaravi ena dua na isema ka na cowiri kina na itosotoso ni Lotu, ea vakatavulica o Elder Gary E. Stevenson ena Kuoramu ni iApositolo Le Tinikarua, “Na vakavatukanataki ni nona rai … ena rawa beka ni laurai mai na nodra vakatavulici vinaka ka vakayagataki na turaga kei na marama veiqaravi ena loma ni veitarotarogi ni veiqaravi.”2
E Va na idusidusi vei ira na turaga kei na marama veiqaravi:
-
Lako ki na veitarotarogi ena vaqara ivakasala. Tu vakarau mo vuli.
-
Vakavakarau mo veitalanoataka na vei gagadre ka ko gadreva mo vukei kina.
-
Raimatua ki na nona kaukauwa kei na nona rawaka na tamata yadua, ka sega walega na gagadre.
-
Veitaratara kei na mataveiliutaki me veitalanoa ena maliwa ni veivulatolu, ke gadrevi.
E lima na idusidusi vei ira na iliuliu:
-
Na veitarotarogi e sega ni gadrevi me balavu, ia me lokuci na gauna vakarauta me sota kina ena vanua e rawa kina na veitalanoa vakaibalebale.
-
Taura na madigi mo veiqaravi kina vua na turaga se marama veiqaravi.
-
Kua ni taroga na taro ka na vakaibalebaletaki ni wilika tiko ga na siko se toqa tiko na yaca (“O sa cakava oti nomu veiqaravi?”). Taroga na taro e vaqaqacotaka na ivakarau e gadrevi (Na veivauqeti cava o vakila ni ko masulaka tiko na matavuvale? Na cava e yaco ni ko cakacaka mai na veivauqeti oya?”).
-
Vakarorogo lomadina ka vola
-
Veivosakitaka vata. O ira na veitokani dauveiqaravi e dodonu mera cilavi ena ivakatakila baleti ira ka ra lesi mera qarava.
Taro kei na iSau baleta na Veitarotarogi ni Veiqaravi
Na cava na veitarotarogi ni veiqaravi?
Oqo e dua na veitalanoa vei ira na turaga veiqaravi kei na dua mataveiliutaki ni kuoramu ni italatala qase se vei ira na marama veiqaravi kei na dua na mataveiliutaki iSoqosoqo ni Veivukei ena dua na draki ka rawa kina vei ira mera vakasaqara ka ciqoma na veivakauqeti mai na Yalo Tabu. Ena qai yaco, mera rawa ni vakauqeti na turaga kei na marama veiqaravi mera vakauqeti mera wanonovi, lomani, vakatavulici. ka vakacegui ira ena sala ni iVakabula.
E gadrevi beka mera tiko sara ga ena veivakatarogi ni vula tolu oqo?
E kena ivakarau me dau vakayacori e matanavotu, ia e rawa talega ni yaco ena talevoni se onilaini ni sa sega ni rawa na sota matanavotu. Vakararaba, ke rawa me rau vakaitavi ruarua na veitokani ena veitarotarogi ke matau.
•Na cava na inaki ni veitarotarogi ni veiqaravi?
Na veitarotarogi ni veiqaravi sa dua na madigi mera railesuva kina na turaga kei na marama veiqaravi na veika e yaco tiko, caka ituvatuva ni sigavou, ka qara na veivuke ki na tamatayadua kei na matavuvale ka ra qarava. Esa dua na gauna me veivosakitaki kina se ivurevure cava e rawa ni vakarautaka na kuoramu kei na iSoqosoqo ni Veivukei.
Au na qarava vakacava na veika maroroi ka vakamareqeti?
Era na wasea duadua ga na itukutuku maroroi vua na peresitedi ni kuoramu ni italatala qase se iSosoqoso ni Veivukei—se vakadodonu sara vei bisopi. Na itukutuku maroroi se vakamareqeti e sega ni dodonu me wasei ena soqoni ni matabose ni imatai ni Sigatabu.
Soqoni ni Matabose ni iMatai ni Sigatabu
Me ikuri ni veitarotarogi ni veiqaravi, na soqoni ni matabose ni imatai ni Sigatabu sa dua tale na sala mera oka kina na tani ena veiqaravi. Ena veisoqoni ni iSoqosoqo ni Veivukei kei na kuoramu ni italatala qase, sa rawa ni lako mai kina na veivauqeti vei ira na tiko mai na Yalotabu ka mai vei ira na tani e loma ni ilawalawa,
Na inaki ni dua na soqoni ni matabose sai koya me:
-
“Veitalanoataka vata na itavi ena itikotiko, veimadigi, kei na bolebole;
-
“Vuli mai na dui raikiloma kei na ka sotavi; ka
-
“Tuva na sala me cakacaka muria na veivauqeti e ciqomi mai na Yalotabu.”3
Na soqoni ni matabose e levu cake mai na veitalanoa: na soqoni e muataki keda meda yavala vaka tamatayadua se vaka ilawalawa mai na veivauqeti ni Yalotabu. O ira na lewenilotu e rawa ni ra na vakila na uqe me vakayacora na cakacaka ni Turaga mai na revurevu ni veisoqoni oqori.
Veisureti me Cakacaka
“Sa noda masu nikua,” e kaya o Elder Jeffrey R. Holland ena Kuoramu ni iApositolo Le Tinikarua, “oya na tagane kei na yalewa—kei ira na noda cauravou kei na goneyalewa itabaqase—era sa yalataka vakatitobu cake mera dau veikauwaitaki mai vuniyalodra, ena veivakayarayarataki walega ni loloma savasava i Karisito.”4