Vuli ena iVakarau ni Turaga

Ena ivakatakila a soli vei Parofita Josefa Simici ena June ni 1831, a kaya kina na Turaga: “Au na solia talega vei kemudou na ivakarau ni ka kecega mo dou kakua kina ni vakacalai; ia sa lako voli yani ko Setani ena loma ni vanua, ka sa lako yani me temaki ira na veimatanitu” (V&V 52:14).

E veivakurabuitaki, ni sa solia vei keda na Turaga “e dua na” ka sega “na” ivakarau ni ka kecega. Au sega ni vakabauta ni sa vakatura tiko na Turaga ena vosa e dua “na ivakarau ni ka kecega” ni dua tu ga na Nona ivakarau me vakayagataki ena veituvaki kecega. Ia, e oka tiko ena ivakarau ni Turaga e vica vata na ivakarau e rawa ni vakayagataki me rawati kina na inaki vakayalo duidui.

Na usutu ni noda lalawa ena vuli kei na veivakavulici eda sotava o ya me vakadeitaki ka vakayagataki na ivakarau se ivakarau eso e sotava vinaka na gagadre ka rawati na inaki ni vuli.

Na Yalo Tabu sa ikatolu ni Lewe Tolu Vakalou ka Dauniivakatakila, e Qasenivuli, sa Dauveivakacegui, na Dauveivakatabui, ka sa dauvakananuma vei keda na ka kecega (raica na Joni 14:16–17, 26; 3 Nifai 27:20). A vakamacalataka o Elder James E. Talmage (1862–1933) ena Kuoramu ni iApositolo Le Tinikarua, “Na iLesilesi ni Yalo Tabu ena Nona veiqaravi vei ira na tamata sa vakamacalataki tu ena ivolanikalou. Sai koya na qasenivuli a tala mai na Tamada; vakakina vei ira kece sa nodra na Nona veivakavulici ena vakatakila mai kina o Koya na ka kecega e gadrevi me bula torocake kina na yalo ni tamata.”¹ Na nona sureti na Yalo Tabu me sa qasenivuli sa usutu ni inaki ni ivakarau kecega ni Turaga me baleta na vuli kei na veivakavulici.

iVakatakilakila

young woman reading Preach My Gospel

E dua na dau vuli ka cakacakataka nona galala ena qaravi vakadodonu ni ivakavuvuli e sa dolava na lomana ki na Yalo Tabu—ka sureta na Nona veivakavulici, vakadinadinataka na kaukauwa, ka sa ivakadei dinati. Na vuli ena vakabauta e gadrevi kina na sasaga vakayalo, vakasama kei na yago ka sega ni itavi me na vakawaleni tu ga. Ena noda yalomalua kei na dei ni itavi e vakabauti ka veivakauqeti, eda sa vakaraitaka vua na Tamada Vakalomalagi kei na Luvena, o Jisu Karisito, na noda sa tuvakarau ni vulica ka ciqoma na ivakasala mai vua na Yalo Tabu.

Dikeva mada se veivuke cava era cakava na daukaulotu mera vuli kina ena vakabauta na dauvakatataro. Na kena qaravi ka maroroi na yalayala vakayalo, vakataka na vulici kei na masulaki ni iVola i Momani, tiko ena soqoni vakalotu, kei na maroroi ni ivakaro, sa na gadrevi kina vua e dua na dauvakatataro me na cakacakataka na vakabauta ka me kitaka. Na ivakavuvuli oqo sa nodra na lewenilotu kecega, oka kina na itubutubu, qasenivuli, kei ira na iliuliu.

Na veivakavulici, veituberi, kei na vakamacala—ni ra sa ka bibi—ena sega ni rawa me tukuni vei koya na dauvakadidike, vua e dua na gone, gonevuli, se lewenilotu me vakadinadinataka na dina ni kosipeli vakalesuimai. Ena gauna ga sa yavalati kina na vakabauta ni dua na dauvakadidike ka tadolava na salatu ki na lomana sa na rawa kina vua na Yalo Tabu me solia e dua na ivakadinadina dei. Sa dodonu kina vei ira na daukaulotu, itubutubu, kei na iliuliu mera vulica mera veivakavulici ena kaukauwa ni Yalotabu. Me vaka ni sa ka bibi talega, na nodra itavi mera na vukei ira eso mera vulica ga vakai ira ena vakabauta.

Na vuli au tukuna tiko e uasivia vakadua na kila ka ni vakasama taumada kei na kena maroroi ka nanumi na itukutuku. Na mataqali vuli au tukuna tiko e vakavuna meda kilai yaloda vua na Kalou (raica na Alama 5:7), mo luvata na tamata sa vakavuravura (raica na Mosaia 3:19), me veisautaka na yaloda (raica na Mosaia 5:2), ka me saumaki yani vua na Turaga ka sega ni lutu tani (raica na Alama 23:6). Na vuli ena vakabauta sa gadrevi kina na yalo kei na vakasama sa gadreva (raica na V&V 64:34) ka sa yaco kina na Yalo Tabu me kauta voli na kaukauwa ni vosa ni Kalou ena taudaku kei na uto ni yalo. Na vuli ena vakabauta e sega ni rawa me vakadewataki maivei qasenivuli kivei gonenivuli, maivei daukaulotu kivei dauvakadidike, ena veivakavulici dodonu, ivakaraitaki, se dua na cakacaka ni vakatovotovo; ia sa gadrevi ga vei koya e vuli tiko me vakabauta tiko ka cakacakataka me rawata kina na kila o ya me nona.

1. Vakarau mo vuli. Ni ko tiko ena kalasi ni Matawilivola ni Sigatabu ka rogoci nomu qasenivuli ni vakamacalataka e dua na ulutaga, sa ka vinaka oqori. Ia ke o a cakacakataka ka vakavakarau mai kina, ke o vakasamataka eso na ka sa sureti iko kina o qasenivuli mo wilika, vakasamataka vakatitobu, ka masulaka mai ni bera na kalasi, sa na rawa me veisobuti kaukauwa mai na Yalo, ka yaco na Yalo Tabu me nomu qasenivuli. Na vakavakarau ena sureta na ivakatakila.

2. Mo veimaliwai mo veilaveti cake. Au vinakata mo rogoca matua na tikina oqo. “Dou lesia e dua me nomudou qasenivuli, ia mo dou kakua ni vakamacala kecega ena dua vata na gauna; raica me dua ga e vosa ka ra vakarorogo na kena vo ki na nona ivakamacala, ia ni dou sa vosa oti kece, dou sa vuli ka veivakavulici kece tale ga, raica ena soli vakatautauvata na dodonu ki na tamata yadua” (V&V 88:122).

iVakatakilakila

young man teaching

Oqo e dua na ivakarau qaqa ni vuli kei na veivakavulici ni Turaga. Meu tukuna e dua tale na sala ni kena kilai na tikina oqo: “Dou lesia e dua vei kemudou me qasenivuli.” O cei e qasenivuli? Na Yalo Tabu. Ena rairai beka o a gadreva na Yalo Tabu me qasenivuli, “me kakua ni dou vakamacala ena gauna vata ga, me dua ga e vosa ka vakarorogo na kena vo, ni dou sa vosa oti kece, dou sa na tuberi kece beka kina”? O koya duadua ga ena rawa ni vakavurea na veilaveti cake sai koya na Yalo Tabu.

Na veimaliwai me ia na veilaveti cake e sureta na ivakatakila. Ena Lotu ena gauna oqo, eda sa vulica ka cakacakataka tiko na veivakavulici vakayalo e veimaroroi, qaqa, ka taleitaki. Eda na dau cakava na veika eda sa vakamatautaki keda kina ka rawata tikoga na kena isau, se meda veivutuni ka vulica ka veisau ka vakavulica vakalevu na ivakarau ni Turaga?

3. Sureta me cakacakataki. E dua ga na taro ena vukea na kena rawati na lalawa oqo. Na cava o na cakava ena veika o sa vulica rawa? Na cakava na ivakatakila ena sureta na ivakatakila.

Sa noqu masu ni da vakusakusa vata tiko kei na Turaga, ni da sega walega ni cakava tikoga na ka makawa ena ivakarau eda dau vakayacora tiko kina.

Au vakadinadinataka ni sa bula dina na Turaga o Jisu Karisito. Au kila ni bula tiko o Koya. Sa tucake tale o Koya. Sai Koya sa liutaka tiko na Lotu oqo ka sa dusimaka tiko o Koya na kena qaravi. Sa kerei keda tiko meda vakusakusa vata tiko kei Koya ena muria na ivakarau sa tuvanaka tu o Koya meda tubu cake ka vuli kina.