Emwitiri an ewe Samon Kokkot!

Ekkoch ier ra no mi namwot upwe fos ngeni punuen emon pisop non am steik, iwe ua kokkori imwer. Emon kukkun at a pwonueni ewe fon. Ua apasa, “Ran annim. Inom mi nom?”

A pwonueni; “Ewer, mi nom. Upwe feino ren. Ion ei?”

Ua ereni: “Kopwe ereni pwe ngang Preseten Nielsen.”

Mi wor ekkis mosonoson, me mwirin, non mongungun meseik, ua rong, “O, inei, Preseten Hinckley a kokko won fon!”

Use tongeni sinei met a ekiek. Meni an fetan ngeni ewe fon mi fakkun tam. Ua ekieki: “Upwe nikinikinin?” Use fori, nge aua fakkun takir. Iei nupwen ua ekiek usun, meni ese pwapwa pwe a chok fos ngeniei.

Met kopwe fori ika ewe soufosen ewe Samon a ennetin kokkoruk? Iwe, a fen fis! Preseten Thomas S. Monson, usun nesesorewe a kokkori emon me emon kich ngeni eu angang mi auchea. A apasa, “Iei ewe fansoun pwe chon mwichefen me misineri repwe chufengen, repwe angang fengen, repwe angang non an ewe Samon we atake ne emweni ngun ngeni I” (“Faith in the Work of Salvation,” [mwichen osukuna souemwen won unusen fonufan, June 2013]; lds.org/broadcasts).

Sia fen ausening?

Ekkis meinisin won fonufan, steik, tischrik, me misin ra kuna meseik minefo, met ewe Chon Amanau a apasa ngeni Joseph Smith non 1832 a ponueta: Nengeni upwe amwitiri ai angang non pwisin an fansoun (Nengeni D&C 88:73).

Pwi me fefinei, iei ena fansoun! Ua mefi, me ua sinei pwe oua pwan mefi.

Ua mochen anganga ai meseik me ai nuku non Jises Kraist pwe epwe fiti foffor. Nupwen ua foootball, ua ekieki non kinikinin kokkoten urumot. Sia sinei nepoputan eu urumoten football ika aua monnota ren ekkewe kokkot, iwe aupwe tongeni angangoch. Iwe nge, ua keran fos fengen ren an BYU chon emweni football itan LaVell Edwards usun am kokkoten urumot, me a apasa, “Use afanni met ka mochen fori nge ika sia touchdown iwe ua pwapwa!” Nupwen ngang emon chon moneno ewe pwor, ua ekieki pwe mi osukosuk nap seni ena, nge meni an tipemecheres mi ewe popun a wor eu nenien football a iteni mwirin i.

Pokiten kich meinisin sia fiti ewe kumien ewe Samon, mi wor pwisin ach kokkoten winini? Sia monnota ngeni ach sipwe fifiti? Ika kich, chon mwichefen, sia ennetin tongei ach famini, chienach kewe, me aramas sia sinei, sipwe mochen aporausa ach kapasen pwarata usun ewe kapas allim mi niwin sefen ngeni ir?

Non ewe mwichen presetenin misin minefo non June, ukukun 173 preseten minefo me punuer ra etiwa porausen awewe me mwen ra poputa ar angang. Meinisin chon ewe Aewin Presetensi me ewe Mwichen Engon me Ruemon Aposel ra fos ngeni ei mwich.

Elter L. Tom Perry a wisen afanafan saingon, “Iei eu fansoun mi fakkun amwarar non uruon ewe Mwichefen. Iei och mettoch mi wewe ngeni ekkewe mettoch ra fis non uruon nom, usun ewe Aewin Nemasepwi, usun ewe niffangen ewe Puken Mormon, usun Aniwinsefaniton ewe kapas allim, usun mettoch meinisin mi kouta nongonongen ach sipwe fefeita me afanafan non muun Semach won Nang” (“Concluding Remarks” [afanafan non ewe Seminar for new mission presidents, June 26, 2013], 1, Church History Library, Salt Lake City).

Sipwe fiti angangen misineri nap seni me nom pwe sipwe usun chok ach kewe souemwen me ekkewe misineri. Ei angang esap fefeita non napanapan ewe Samon ika esap punun kich! Usun Preseten Henry B. Eyring a apasa, “Ese nifinifin fitei ierich, ach tufich, wisach non Mwichefen, are neniach, sia kokko ngeni ewe angangen anisi I non An amanaua ngun” (“We Are One,” Ensign are Liahona, May 2013, 62).

Amo upwe aporausa ai kokkot ua mefi pwe upwe fori mwirin iotek, anneani sopun 13 seni Preach My Gospel, me ekipwichi usun mettochun nom? Ua tingoreikemi pwe oupwe ekieki usun ekkei unungat mettoch nupwen oua ekieki usun ami kokkot.

Akkaewin, sipwe iotek pwe sipwe emweni emon pwe epwe arap ngeni ewe Chon Amanau me an kapas allim iteitan ran. Oua tongeni fori ei me ren ach kuna aramas meinisin pwe ir noun Kot kewe mi aninisfengen won ar sai ngeni imwach. Ekieki usun ekkewe aramas oupwe chiecehi ngeni.

Oruan, kopwe iotek fan iten ekkewe misineri mi angang non neniom me ekkewe chon kaeo me ren iter iteitan ran. Ewe chok napanap ne fori ei ina ne sinei ir, nenengeni iter, kokkorir ren iter, me eisinir ion ra aiti. Elter Russell M. Nelson a apasa non mirit: “Ika ouse sinei itan me mesan emon aramas, ewe Samon ese tongeni anisikemi ami oupwe sinei netiper.”

Ua fiti ewe mwichen papatais an emon fefin a apasa an kapasen pwarata. Usap monukano an apasa pwe, “Ese fen wor ei ukukun chommong aramas ra iotek fan itei me ua mefi ar tong! Ua sinei pwe ei angang mi ennet!”

Unungatin, kopwe tingorei emon chienom ne fiti eu mwich non imwom are pwan eu. Ia chok ka feino ia are met chok ka fori, kopwe ekieki usun ion epwe apwapwaiti ewe tufichin fituk me kopwe ausening ngeni ewe emwen seni ewe Ngun min Fel.

Ewe Chon Amanau a aitiei eu nesen mi mecheres non pwisin ai kaeo ewe kapas allim minne, ua nuku, a fich ngeni ewe “emwitirin.” Nupwen ua fakkun meseik usun och mettoch, a pwar non ai tichikin mak minne a pwarata eu “memef mi pochokun [are eu] awewen auchean och mettoch” (Merriam-Webster’s Collegiate Dictionary, 11th ed. [2003], “exclamation point”).

Ua sani ai upwe nenengeni ekkewe wokisin usun “ewe ochufengen,” mi osupwano ren ei esisinnan mak, ra pwar ekkis meinisin, usun an Alma tingor pwe epwe tongeni emon chon nang, pwe epwe tongeni feino me fos fengen ren Kot, ren mongungun epwe efisata chechen fonufan, me epwe pupuchor usun aier ngeni aramas meinisin! (Alma 29:1).

Non ai nenengeni mi wor 65 wokisin ra pwarata usun ei sokkun memefin angangen misineri, ikkei ekkoch me neir:

Ewe Chon Amanau a apasa pwe a fakkun pwapwa nupwen emon aramas a aier! …

Me ika sia angang ren unusen manauach ne aiti usun aier ngeni ekkoch me emon chok a niwin ngeni I sipwe fakkun pwapwa ren ena emon non ewe muun Semach we!

Me ika ach pwapwa epwe napanap ren chok emon ngun sia eniwini ngeni ewe Chon Amanau non ewe muun Semach we, epwe ifa watten ach pwapwa ika sia eniwini chommong ngun ngeni I! (D&C 18:13, 15–16).

Ai esinna ekkei wokisin mi auchea ngeni ei non ewe aewin wisei nupwen ua emon Area Fik. Ua ekkis noninen ren ai upwe chiechi ngeni emon Aposel, Elter Quentin L. Cook, non eu mwichen steik. Nupwen ua tonong non ofesin ewe presetenin steik ren ewe akkaewin mwich non ekkena ran, ua kuna ru sus mi akkaea, nge ra nom won ewe neni mwirin an nenien angang fiti eu wokisin mi osupwano ren eu esisinnan mak. Nupwen ua anneani, ua mefi ewe Samon a senei met ua fori, a pwonueni ai iotek me A sinei met chok mi namwot pwe netipei epwe kinamwe.

Ua eiseni ewe presetenin steik pwe epwe aporausa porausen ekkewe sus ngeni ei.

A apasa:

“Ekkewe sus noun emon chon fiti ewe Mwichefen minne an famini ra osupwang, nge a ennetin mochen fori angangen misineri me a fis non Guatemala. Nupwen a niwin ua chufengen ren i ai upwe epichi seni wisan me ua kuna pwe noun kewe sus mi fakkun ta. Ei mwan a fangeno meinisin ngeni ewe Samon nge ese chommong aninis seni an famini.

“A kuna pwe ua nenengeni noun kewe sus me a eisiniei, ‘Preseten, mi wor och mettoch mi mwan?’

“Ua pwonueni, ‘Apw, Elter, meinisin mi och! Ua tongeni nouni noum kana sus?’”

Ewe presetenin steik a sopweno: “Ai sufoniti me tong ngeni ei misineri mi fen niwin i mi fakkun watte! Ua mochen chechemini ei fansoun, iwe ina popun ekkei sus mi nom. iteitan fansoun ua tonong non ai we ofes ren met isa fori non nonnomuch.Ewe wokisin non Isaiah: ‘Ifa me ochun ach kuna emon chon kuno a feito won ekkewe chuk, pwe epwe wato ekkewe poraus mi och, porausen kinamwe; a aporausa ussun win o a apasa ngeni Zion, Om we Kot i king!’ (Isaiah 52:7).”

Pwii me fefinei kana, meni punuen ewe pisop a ekieki pwata ewe soufos a kokkori i. Ua pwarata pwe mi namwot kich sisap chuen ekieki pwata—APASA FITI POCHOKUN!

Ua sinei pwe mi namwot sipwe kaeo me fori pwisin ach kokkot ren meseik ne angang ren ekkewe misineri—APASA FITI POCHOKUN!

Ua pacheta ai kapasen pwarata ngeni an ewe Soufos Joseph Smith: Mwirin chommongun ekkewe kapasen pwarata mi fen apasata usun ewe Chon Amanau, iei saingonon an kapasen pwarata: Pwe ewe Chon Amanau a manau! (Nengeni D&C 76:22). Fan iten Jises Kraist, amen.