Ouse Chuen Chon Nukun

Napengeni kich sia nom non och mettoch mi fo ngenikich, sia mefi pwe sia sokkono me ekkis meffen. Ei mettoch a fis ngeni am famini ukukun nimu ier me nom mwirin Presten Thomas S. Monson a kokkoriei ai upwe emon Meinap Unusan an ewe Mwichefen. Ei kokko a anamwota am me ai famini aupwe mokutokut seni ewe neni mi ningoch aua apwapwaiti nap seni rue ier. Am me punuei aua chuen chechemeni fofforun noum kewe nupwen ra kaeo usun ewe ekkesiwin epwene fis. Nouch we at a 16 ierin a apasa, “Ese wor osukosuk. Ami oupwe feino; Ngang upwe nonnom!”

Mwirin a muttir tipeu ngeni an epwe fitikem me a nukuchar ren an etiwa ei tufich minefo non manauan. Am nonnom non neni minefo non ekkewe ier a eu tufichin kaeo mi apwapwa ngeni chon am famini, wesen pokiten etiwatiwochun ekkewe Souneng. Ren am nonnom non sokkopaten neni, aua kinisou pwe noun Kot kewe aramas won fonufan ra ennetin chufengen non eu.

Wisei a emweniei ai upwe sai ngeni ekkoch eif me a atufichi ngeniei ai upwe nemeni chommong mwich. Nupwen ua nennefetan won ekkewe mwichen aramas, fan chommong ua kuna chon mwichefen seni sokkopaten eif, fos, me oreni. Eu kinikin mi amwarar usun ewe kapas allim non ei fansoun ina pwe ese kouk ngeni eu neni are ekkoch choke if. Mi nom ekkis meinisin won fonufan. A ammonata ren niwinsefaniton ewe Noun Kot seni ochufengenin Noun kewe seni ekkewe ruanu kinikinin ewe fonufan. .”¹

Ina mo chon Mwichefen ra chommonguno ren sokkofesenin chon fiti, ach uruo mi pin a nap seni sokkkofesenin. Kich chon ewe Mwichefen, sia tufichin fiti ewe imwen Israel. Sia pwipwi fengen, sia nonno non kinikinin ach kewe neuo non pekin ngun. Kot a pwon ngeni Abraham pwe ren ukukun aramas ra etiwa ei Kapas allim repwe kokko me ren iten Abraham, me repwe anea pwe noun kewe, me repwe feita me efeiochu i pwe semer we.”²

A wor eu pwon ngeni aramas meinisin ra choni ewe Mwichefen:”Ouse chuwen chon nukun are chon ekis, pun iei oua fiti noun Kot kewe aramas, iwe oua chon an Kot we famini.”³

Ekkewe kapas chon nukun a feito seni kapasen Latin extraneus, minne a wewen “me nukun” are “seni me nukun.” Iwe, a porausen emon a “chon nukun” ren sokkopaten popun, ika pokiten fonuer, orenier, ekiek, are namanam. Kich chon kunon Jises Kraist sia achocho pwe sipwe nom won fonufan nge sise chon fonufan, fan ekkoch kich sia mefi pwe sia chon nukun. Kich, nap seni chommong aramas, sia sinei pwe mi wor ekkoch mettoch esap tufich ngeni ekkewe ir mi sokkofesen.

Seni fansoun nom ekkewe aramasen Kot ra annuk ne tumunu meinisin aramas mi chon nukun are mi sokkofesen. Non fansoun Testamen Noom, emon chon nukun a feioch usun chok emon nipiich are emon ese wor semer are iner. Ussur chok, ewe chon nukun a nom nge ese wor emon epwe tumunu, me ika epwe manau a anongonong won ekkewe chon ena neni repwe tumunu i. Ekkewe aramasen Israel ra angei porausen awewe won ei itenap: “Oupwe kirokiroch ngenir ussun chok emon chienemi chon Israel o tonger ussun oua pwisin tongei kemi. Oupwe chechemeni ami mi piin chon ekis non ewe fonu Egypt.”⁴

Non fansoun A afanafan won fonufan, Jises a eu nenien appirun emon a achocho nap seni wisen tumunu me etiwa. Ekkewe ir ra chon nukun, ekkewe ir rese etiwa me aramas ra nuku pwe rese unusoch ra weri An tong me sufon. A nonno ar kuna An afanafan me misin.

Ren awewe, ewe Chon Amanau ese fiti ekkewe orenien An fansoun me a fos ngeni ewe Fin Samaria, a tingorei unuman konik. A mottiw ne mongo ren ekkewe chon tipis me chon takises. Ese mang ne feino ren ewe mi semwenin keinapan, ne attapa me echikarata. Non an tongei ewe meinapen sounfiu Rome, A kapas, “Upwe ereni kemi, usamo kuna emon me non Israel epwe iei ussun an nuku.”⁵

Jises a tingoreikich ne anneasosichi ewe annukun tong mi unusoch, minne a eu niffang ngeni aramas meinisin ese nifinifin. A apasa:

“Pwata Kot epwe niwini ngeni kemi ika oupwe chok tongei ekkewe aramas mi tongei kemi? Ekkewe mo chon angei takises ra fori ena sokkun!

“Iwe ika oupwe chok kapas ngeni chienemi, met, oua ekieki pwe oua fori och mettoch mi watte? Ekkewe mo mi rochopwak ra fori ena sokkun!

“Iwe oupwe fakkun unusoch ussun chok Sememi we non nang mi fakkun unusoch.”⁶

Non ei Mwichefen, ese wor chon nukun are chon ekis. Mi chok wor pwipwi. Ach miritin emon Semach won Nang Ese Much a anisikich pwe sipwe tumunuoch ach pwipwi nein mwan me fefin meinisin won fonufan.

Eu wokisin seni ewe puk Les misérables a awewe epwe ifa usun fofforun chon pristut ngeni chon nukun. Jean Valjean a keran ngaseno seni kanupus. A pekus ren an sai me a echik me kaka, a war non eu kukkun tenenimw me a kutta anan mongo me nenian epwe annut. Nupwen porausen an feito a choufetan, emon me emon chon ewe neni ra apungu asamer ngeni i. Esap ewe hotel, esap ekkoch nenien annut, pwan ewe kanupus esap mutata epwe tonong. Ra amam i, ra asueno. Iwe, nupwen ese chuen wor an pochokun, a turutiw won asamen ewe pisop non ewe neni.

Ewe pisop mi murinno a sinei porausen Valjean, nge a mut ngeni ewe chon tingor epwe tonong non imwan ren ekkei kapasen tong:

“‘Esap iei imwei; mi ewe imwen Jises Kraist. Ei asam ese afanni iten emon a tonong non, nge ika a wor an osukosuk. En ka riaffou, ka echik me kaka; ka etiwaoch ikkei. … Ese namwot upwe sinei itom? Pun, me mwen ka ereniei [itom], ua fen sinei.’

“[Valjean] a suki mesan ren an mairu.

“‘Fakkun? Ka sinei itei?’

“‘Ewer,’ ewe Pisop a kapas, ‘itom pwii.’”⁷

Non ei Mwichefen, sise nouni ekkewe wart me mwich. Jises Kraist a nounir. Ion a tonong non ekkewe imwen fan repwe mefi pwe ra nom non imwer. Mi auchea wisen etiwa aramas meisin. Ei fonufan a nom non ekkis osukosuk iei. Pokiten chommong tufichin mokutokut, muttirin poraus, me a chufengen fetanin eif me eif, ewe fonufan a winiti eu sopw mi watte minne aramas me eif ra chufengen, me poporaus fengen usen ese mo fis.

Ekkei mettoch ra ekkisiwin won unusen fonufan ra fis pokiten kokkoten Kot mi Napanap. Ochufengenin Noun kewe mi kefinita seni ekkewe ruanu kinikinin ewe fonufan ese chok fis me ren misineri ra feino ngeni fonu touau nge ren wareton aramas seni pwan ekkoch neni non pwisin ach tenenimw me sopw. Ina mo rese sinei, chommong aramas ra emwen seni ewe Samon ngeni neni ra tongeni rongorong ewe kapas allim me feito ngeni Mwichan.

Mi ennetin tufich pwe nupwen emon a feito ngeni ewe kapas allim non om wart epwe emon aramas kese mo chiechi ngeni are fen sinei. Meni kopwe kuna seni nikinikinin, an fos, ufan, are anuen sinin. Meni ei emon a mamarita non pwan eu namanam, a sokkono senuk ren fetanin manauan.

Chiechioch mi eu wisen pristut mi auchea. Mwichen pristut seni Aaron me Melkisetek repwe chufengen me ekkewe mwichen aninis fan emwenien ewe pisop ne pii pwe aramas meinisin ra etiwatiwaoch fiti tong me kirokiroch. Sensen famini me an fefin chon amwa repwe mammasa ne pii pwe emon ese monukano.

Mi namwot kich meinisin sipwe angang fengen ne chufengen non pekin ngun non ach wart me pranch. Eu awewen chufengen non eu mi unusoch a fis nein ekkewe aramasen Kot mwirin Kraist a churi Amerika. Ewe rekot a mak pwe “ese pwan wor ren ekkewe aramasen Leiman, are och napanapan repwe aimumu nefiner pwe ra eu chok non ewe iten Kraist, iwe, ir ra anamwiri ewe muun Kot.”⁸

Chufengen non eu ese fis me ren ach aimuno seni chon mwichefen ra sokkono senikich me seni ach chiechi ngeni aramas ussuch chok. Iwe nge oposetin, chufengen non eu mi fis seni ach etiwa me angang ngeni ekekwe chon minefo me ekkewe ir mi wor namwoter. Ekkei chon mwichefen mi efeiochu ewe Mwichefen me ra awora ngenikich tufichin angang ngeni chon oruch me aunusochuno pwisin netipach.

Iwe, pwii kana, wisemi pwe oupwe eitau ngeni emon a pwar non asamen om imwen Mwichefen. Oupwe etiwar ren kinisou nge ousap apungur. Ika aramas ouse sinei ra tonong non eu mwich, oupwe etiwar ren tong me tingoreir repwe mommot fengen reom. Ouse mochen oupwe pwisin akkomw achocho ne anisir ar repwe mefi tong me etiwaoch nap seni ami oupwe witir ar repwe feito remi.

Mwirin ka etiwar, kopwe ekieki usun napanap ka tongeni angang ngenir. Fan eu ua rong usun eu wart minne, mwirin ruemon fefin mi pung seninger ra papatais, ruemon Fin Anisi ra kaeo fosun pau pwe repwe tongeni fos ngeni ekkewe chon minefo. Mi fakkun amwarar ei nenien appirun tong fan iten pwiich kewe non ewe kapas allim!

Ua kapasen pwarata pwe ese wor emon a chon nukun ngeni Semach won Nang. Ese wor emon minne ngunun ese auchea ngeni I. Ren Peter, ua kapasen pwarata pwe :Kot a chok anonno fengeni aramas meinsin; “Ika emon a nuokusiti i me fori minne mi pung, ese nifinifin ii o, Kot epwe chok etiwa.”⁹

Ua iotek pwe nupwen ewe Samon a ionfengeni Noun kewe siip non ewe saingonun ran, Epwe kapas ngeni emon me emon kich, “Ua echik nge oua amongoni ei, ua kaka nge oua aunu ei, ua emon wasona nge oua etiwa ei.”

Mwirin sipwe apasa ngeni I, “Inet am aua kunok pwe en emon wasona nge am aua etiwok?”

Me Epwe pwonueni, “Upwe apasa ngeni kemi pwe fansoun meinisin oua fori ei napanap ngeni emon pwii kei mi kisifochofoch, oua pwan for ngeni ei.”¹⁰

Non iten Jises Kraist, amen.