Ka Mochen Pwe Kopwe Unus?

Non ewe fansounen kamatip mi apwapwa non Jerusalem, ewe Samon a fetan seni nein ekkewe aramas fan itan an epwe kutta ekkewe ir mi namwot ar repwe kuna aninis. A kuner non Bethesda, ewe nenien konik a wor nimu pwangan konik unukun ewe asamen siip mi kan itefouno pwe chommong aramas ren sokkopatten semwen ra eto ikkei.

Ewe Kapas Allim Makkean John a aporausakich pwe unukun ewe nenien konik “chommong aramas mi semwen ra kokkon won pwanangan kewe, ekkewe mi chuun, ekkewe mi pechema me ekkewe mi mwok ra chok witiwiti an ewe konik epwe mwokut.

“Pun ekkoch fansoun emon chon nangin ewe Samon a kan feitiw non ewe konik o amwokutu ewe konik. Ewe aramas mi semwen a akkom ne tonong non ewe konik murin chok an mwokut a tongeni chikareta seni sokkun semwen mi wor ren” (John 5:3–4).

Atun an ewe Samon a tonong non ei neni mi pwa non eu chunga seni Carl Bloch a iteni Kraist mi Apochokunata ekkewe mi Semwen non ewe Nenien Konik itan Bethesda. Bloch a chungani Jises a ekieta kinikinin mangaken eu imwan mangaku me a pwari emon “mwan mi semwen” a nom non (John 5:7) mi kokkon unukun ewe nenien konik, nge mi chok witiwit. Non ei, ewe kapas semwen mi wewen ngeni emon ese wor an pwisin pochokun me a pwari kirokirochun me chenin ewe Samon, ewe ion a eto non mosonoson an epwe anisi ekkewe ir rese tongeni anisir pwisin.

Non ewe chunga, ewe mwan mi semwen a momot won ewe pwun fan nurun ewe imwan mangak, a kan pekus me netipechou pokiten a riaffou non an we semwen iteitan ran, iteitan wik, iteitan maram fan 38 ier.

Atun ewe Samon a ekieta kinikinin ewe mangak ren efoch poun, A tingorei ren ewe efoch poun me a kapas eis ngeni ewe mwan: “Ka mochen pwe kopwe pochokuneta?”

Ewe mwan a ponueni, “Maing, ese wor emon ikei epwe ekieitiw non ewe konik atun ewe konik a mwokut: nupwen ua sotuni ne totiw non, nge emon a fen akkom ne tonong mwei” (John 5:6–7).

Jises a awora ponuan ewe osukosuk mi weires an ewe mwan:

“Kopwe pwaata, angei kiom na o kopwe fetan.

“Muttir chok ewe mwan a pochokuneta, iwe a angei kian we o a poputa ne fetan” (John 5:8–9).

Non pwan eu angangen tong, Luke a aporausakich pwe ewe Chon Amanau, nupwen a fetan ngeni Jerusalem, a fetanno non ewe kia nefinen Samaria me Galilee o a tonong non eu sop. A churi 10 mwan mi semwenin keinapan, ra “ukkuta ekkis towaw” (Luke 17:12). Ir mi chok sokkono—ra nimengau me ese wor emon mi tongeir.

“Jises, Masta, kose mochen kopwe umoumoch ngeni kem” ra puchoruta, are tingorei(Luke 17:13)—are ra apasa, “ese wor met kopwe tongeni for fan item?”

Ewe Chon Safei mi nap, mi uren kirokiroch me tong, mi chiwen sinei pwe nuku epwe akkom me mwen ekkewe efeioch me a erenir, “Oupwe feino pwe ekkewe sou-asor repwe nengeni kemi” (Luke 17:14).

Nupwen ra feino non ar nuku, eu feioch a fis. Oua tongeni ekieki usun ewe pwapwa mi nap a feito atun ekkei aramas ra nenengeni inisir pwisin me ra kuna pwe inisir mi chok animenimochuno, chikar, are unuseno mwen meser kewe pwisin?

“Nupwen emon me neir a sinei pwe a nimenimochuno, a niwinsefan o a neuommong ne mwareiti Kot,

“A chapetiw won pwun ren pechen [ewe Masta], o a kinisou ngeni. …

“Iwe Jises a apasa ngeni, Kopwe uta o feino: om nuku a echikaroketa” (Luke 17:15–16, 19).

Me nom non ai angangen chon safei are chon reirei, ua chok ekiek won ai upwe echikareta are apungano ekkewe kinas no pekin inis. Jises Kraist mi echikarakicheta non pekin inis, non pekin ekiek, me non pekin ngun, an An tufich ne echikarakicheta a pop seni ach nuku non I.

Oua chemeni ewe fansoun ami nuku me pwapwa mi unus? Oua chemeni oua pwisin esinna pwe a wor ami kewe kapasen pwarataare nupwen Kot a pwari ngonuk pwe ka wesewesen emon Noun we at are nengin me a wesewesen tongeok—me oua mefi unus? Ika fan ekkoch ekkei memmef a poutsenikemi, oupwe tongeni kunasefanni.

Anon ewe Chon Amanau, A erenikich ifa usun sipwe tongeni unus—ach sipwe unus are chikar:

“Oupwe feito rei, ami meinisin mi pekus ren choun osemi o ngang upwe asoso kemi.

“Oupwe angei osei o oupwe mwarei o oupwe kaeo seni ei; pun ngang mi mosonoson o tipetekison: iwe oupwe kuna ami ngaseno.

“Pun osei we upwe ngenikemi mi mecheres o upwe ngeni kemi osemi mi pwas” (Matthew 11:28–30).

“Kopwe tapweto mwiri” (Luke 18:22) ekkei kapasen pesepes ra peseikich ach sipwe nikiti manauemi manauen nom pwan ami kewe mochenin fonufan, oupwe winiti emon mi sofo me ekkewe “minen nom a wesino, [me] ewe minafo a wareto” (2 Corinthians 5:17), mi pwan fiti eu netip sofo mi nukuchar. Me sipwe tongeni unus sefan.

A apasa pwe sipwe arap ngeni I me I epwe arap ngenikich; sipwe akkachocho ne kutta I me sipwe kuna; sipwe tingorei me sipwe weri; sipwe fichifich me epwe suk ngenikich (D&C 88:63).

Non ach sipwe arap ngeni I, sipwene sinei pwe manauach ikenai epwe fakkun weires, pwe a wor “apponuen mettoch meinisin” (2 Nephi 2:11) esap ngawen ewe kokkotun manau ese much. Ekkewe sossot sia kuna won fonufan mi namwot ngeni pwisin kich non manauach me epwe apochokunata ach mochen ne fini mi pung. Ekkewe osukosuk non manauach sise tongeni pwisin nemeni epwe anisikich ne apochokuna nefinach me ren Kot—pwe sipwe awora ewe ununun Kot pwe epwe makketiw won mesach kewe non ach sipwe ngeni I unusen netipach (nengeni Alma 5:19).

“Oupwe fori ei pwe achechemeniei” (Luke 22:19) mi chok met ach Chon Amanau a tingoreikich nupwen a poputani met sia eita ngeni ewe angangen sakramen. Ei angang mi pin sia fori ren ewe pinewa me konik mi asofosefanni ekkewe pwon mi pin sia for ngeni Kot me a anisikich ne etiwanong ewe Achasefan non manauach. Sipwe chikar non ach nikitano ekkewe angang me fofor mi ngau mi atipeforea netipach. Sipwe akokkonono ekkewe pisekin maun an ach ungeni Kot (Alma 23:7), pwe sipwe wesewesen ngaseno me fori pwisin netipach (D&C 58:28), sisap chiwen mesechun pokiten ekkewe tupun Satan are seningepung pokiten akurangen chon fonufan.

Non ach sipwe aier me kunnu ngeni ewe Samon, sipwe mefi pwe sia unus, me ach kewe memefen niamam epwe susenikich. Sipwe ekieki, usun chok Inos, “Epwe ifa usun an epwe fis?” Ewe Samon a ponueni: “Pokiten om nuku non Kraist.  … Iei minne, feino, om nuku a enimenimochukeno” (Enos 1:7, 8).

Corrie ten Boom, emon fin Dutch mi nuku non Kraist, a angei ei sokkun chikar nge i mi nom non nenien annomu ekkewe re Jus non fansounen ewe Oruan Maun Fonufan. A kan riaffou, nge ese usun pwin we itan Betsi a mano non eu nenien annomu ekkewe re Jus, Corrie a manau.

Mwirin ewe maun, a kan fofos ngeni chommong aramas usun ekkewe a fis ngeni i pwan usun an we nifangen omusomus. Non eu fansoun emon sounfiu seni ewe atun Corrie mi nom non ewe nenien annomu ekkewe re Jus non Ravensbrück non Germany, iwe a feino ren, nge a pwapwa pwe a rong porausan Corrie usun an Kraist we omusomus me tong.

“Ua kinisou ngonuk Fraulein, pokiten porausom.’ A apasa. ‘Pwe mi tufich, seni om pwisin kapas, pwe Jises A tongeni omuseno ai kewe tipis!’

“A eitau poun pwe epwe kapwong ngeniei,” Corrie a apasa. “Me ngang, ewe emon mi afanafana fan chommong … pwe mi namwot ach sipwe omusano tipisin aramas, u chok annomu pei nepeki.

“Ekkewe memmefen song me oput ra tonong non netipei, nge ua kuna tipisin ekkei memmef. … Ua iotek, “Jises, kopwe omusaeino pwan anisiei ne omusano i.

“Ua achocho ne emenimen ngeni, [me] ua weires ne eitata pei. Use tongeni. Use mefi kirokiroch are ewe tongen Kot fan itan ei mwan. Iwe, ua achocho sefanni ne iotek non netipei, Jises use tongeni ai upwe omusano tipisin. Ngeniei om omusomus.

“Atun ua komochuno poun ewe mwan eu mettoch mi amwarar a fis. Eu memmef a feino seni afarei tori pei ngeni poun, me eu tong mi unusen pochokun woi a fisita me non netipei fan itan ei mwan use mwo sinei.

“Iwe ngang mi kuna pwe ese nongonong won ach omusomus are fen ochun manauach pwe chon fonufan repwe chikar, nge mi nom ren Jises an epwe omusano tipisir. Nupwen A erenikich ach sipwe tongei chon koum ngenikich, A ngenikich, fiti ewe annuk, ei tong pwisin.” ¹

Corrie ten Boom mi unus.

Preseten Thomas S. Monson a apasa, “Mei wor emon mi manau a tongeni ekieta ekkewe ir mi osukosuk o netipechou pokiten tipisir are riaffou—ewe Samon Jises Kraist.” ²

Ika ka mefi pwe ka nimengau non pekin ngun, aramas rese tongeok, kese pwapwa, kese nimenimoch, kopwe chemeni pwe “mettoch meinisin ese pung non manauach epwe apungano me ren ewe Achasefanin Kraist.”³ Kopwe nuku non fansoun ewe Samon me an popun fan itom. “Kosap niuokus, kopwe chok nuku” (Mark 5:36).

Oupwe sinei pwe ewe Chon Amanau mi chiwen kutta ekkewe ir mi apwangapwang. A witi nukun ewe asam me a fichifich. Sipwe ponueni I ren ach sipwe poputa sefan ne iotek, aier, omusano tipisin ekkoch, me nikiti ekiekich usun ekkewe ra tipis ngenikich. Sipwe tongei Kot me anisi chon unukuch me sipwe uta non ekkewe neni mi fel non manauach mi nimenimoch. Ewe mwan mi semwen unukun ewe nenien konik itan Bethesda, ewe mwan mi semwenin keinapan“ won ewe an ngeni Jerusalem, me Corrie ten Boom ir mi winiti unus. Ka mochen pwe kopwe unus? Pwaata me oupwe fetan. An “chen mi naf ngonuk” (2 Corinthians 12:9), me kesap akanaemon non fetanin manauom.

Ngang mi sinei pwe Kot mi manau. Ua sinei pwe kich meinisin wesewesen Noun kewe pwe a kan tongei pwisin kich pwan ion sia tongeni winiti. Ua sinei pwe A tinatiw Noun we epwe fori ewe achasefan fan itan aramas meinisin me ekkewe ir mi etiwa An kapas allim me tapweno mwirin repwe unus—“non an pwisin fansoun, me non pwisin napanapan, me non pwisin netipan” (D&C 88:68), me ren An kirokiroch. Iei ai kapasen pwarata fan itan Jises Kraist, amen.