Ekkewe Annuk me Nongonong mi Nom non ekkewe Nongonongen Achifoua
Seni Elter L. Tom Perry
Seni Mwichen ekkewe Engon me Ruemon Aposel
Iteiten nongonongen achifoua a kapachenong met mi auchea ngeni ach weweiti ewe kapas allimen Jises Kraist.
Nupwen ua angei wisen afanafan non ewe mwichen pristut an mwichenapen mwichefen, Ua muttir ne ekieki usun emon fefin sensen Kinter mi amwarar. Ennetin an mochen pwe epwe ammonakemeta am aupwe nimenimoch ne angei ewe pristut. A men testinikem won met mi namwot ne sochungio seni Kinter—am aupwe achemano iten chon ewe Mwichen ekkewe Engon me Ruemon Aposel me ekkewe Nongonongen Achifoua. A pwan pwon ngeni kem—ika am meinisin mi tongeni apasa ekkewe engon me unugat Nongonongen Achifoua seni pwisin am achechem, aupwe tongeni finata eu neni minne aupwe feino ia faniten saigonon am klas.
Aua finata eu neni mi auchea aua sani ne eta neman won ekkewe achau asan chok ewe aewin nenien eppetin konik nepoputan Logan Canyon. Mi wor eu neni mi sonosonoch nein ekkewe achau ikkewe ia sia tongeni fori ekkei ne ekipwichi hotdog me marshmallows. Nge nupwen aua fini ewe neni, ause fen ekieki noum we sense, i emon mi ekkis chinnap me esap i emon mi fakkun attaiso. Ika aupwe fen tumunuoch ne ekiek usun, aupwe fen esinna pwe epwe weires ngeni an epwe eta neman. Nge a mochen apwonueta an pwon, iwe a tipepochokun ne tapweikem.
Aewin aua tota won ewe kukkun chukuchukuta. Me nom ese fen wor ekkewe seinin fifi ne epeti am fefetan. Ren am aninis noum we sense a eta won ewe chukuchukuta. Mwirin aua tota won ungen ewe chuuk aua pwan totiw won eu achau ngeni eu neni aua eita ngeni “Sekurun Pwӓpwӓ.”
Mwirin aua wareiti ewe neni, mi namwot noum sense epwe ekkis asoso ne amangatiw an ngasangas. Mwirin aua fen ammonata ne motiw me mongo, a ekkis pochokun sefan pwe a tongeni aitikem saigonon am nesen. A erenikem pwe a men pwapwaiti an aitikem non Kinter ren ekkewe ru ier. A ingeiti kem ren am achemano ekkewe Nongonongen Achifoua. A tongeni korata nampan eu nongonong ese nifinifin iwe am mi tongeni apasa masouan. Iwe a era pwe am achemano ekkewe Nongonongen Achifoua ese wewen mwo och mettoch me nukun kapas chinon chok aua kan weweiti ekkewe annuk me nongonong mi masoueni ekkei wokisin. A peseikem am aupwe statini ekkewe annukun kapas allim non eu me eu Nongonongen Achifoua. A awewe pwe ekkewe annuk mi nom non ekkewe Nongonongen Achifoua mi kinikin fesen.
I. Ewe Mokuran Kot me ekkewe Nongonongen Kraist
Seni ewe aewin nongongonen achifoua sia kaeo pwe mi wor ekkewe Unumon non Kot: Kot ewe Sam, Jises ewe Kraist, me ewe Ngun mi Fel.
Eweoruan nongonongen achifoua a aitikich pwe sipwe tipisini pwisin tipisich won fonufan.
Ewe aunungatin nongonongen achifoua a awewe an ewe Chon Amanau we misin faniten amanauen noun Semach won Nang kewe semirit.
Ewe aruanuen nongonongen achifoua a aitikich auchean ekkewe nongonong me efeioch.
Manamanen anon noum we sense a eu popun pwarata ngeniei pokiten an esissinata auchean statini kapas allim. Ekkewe pukfel ra emwenikich ngeni eu nongonongen ennet pwe sipwe tongeni apungu ika ewe mettoch sia angei, mi ennet ika mi mwan. Ekkewe nongonong mi pung ra eto seni Kot, ewe nepoputan me nongonongen mettoch meinisin mi pung are ennet. Ekkewe nongonongen annuk mi ennet mi nom non ewe kapas allim an ach Samon me Chon Amanau. Mettoch mi mwan ra eto seni Setan, ewe semenapen chon chofona. An mochen pwe epwe angawano, siwini, me ekkesiwini ewe ennet mi fen pwa ngenikich. A mochen otupukich pwe ekkoch aramas me neich repwe mwanecheno non ach achocho ne niwiniti neniach me nang.
Ekkewe pukfel ra aitikich ifa usun sipwe kunnu seni afanafan mi mwan. Awewe chok, non an Paul we taropwe ngeni Timothy sia anneani:
“Unusen ewe Pukepin a popu seni Ngunun Kot o a namwot ngeni ar aea ne afanafana minne mi ennet, fonou minne mi muan, apungano manauen aramas o afanafana ussun manau mi pung:
“Pun ewe aramas a angang ngeni Kot epwe tongeni nipwakoch o fori sokkun angang mi och meinisin” (2 Timothy 3:16–17).
Ekkei nongonong mi fakkun namwot ngeni Mwichefen usun chok eu battery mi auchea ngeni cell fon. Nupwen ka uwau ewe battery seni noum cell fon, mi namwotongau. Ika nongonong mi ennet ese afanafan non eu Mwichefen iwe a pwan namwotongaw. Ese tongeni emwenikich sefanni ngeni Semach won Nang me neniach ese much.
II. Napanapan me Tettenin ewe Pristut
Mwirin sia poputa ne weweiti ekkewe nongonongen Kraist, ewe enimuen me wonuen nongonongen achifoua ra aitikich usun napanapan me tettenin ewe pristut. Fan emwenin ewe Samon, Jospeh Smith a efisata an ewe Chon Amanau we Mwichefen ren mwumwutan pristut—ewe manamanen Kot. Ewe Mwichefenin Jises Kraist ren Aramas mi Pin non Fansoun Soponon mi nonno fengen ren ewe mwichefen Kraist a efisata me nemeni nupwen A nom fonufan.
A men amwarar ewe ran faniten Joseph Smith me Oliver Cowdery non May1829 nupwen ra feino nein ira ne iotek usun ewe nongonongen papatais ren omusomusen tipis minne ra annea usun nupwen ra chiakuni ewe Puken Mormon. A wor chommong sokkun afanafan usun napanapan papatais aramas ra aiti me non ekkewe sokopatten mwichefen nepoputan ewe ier 1800, me Joseph o Oliver ra sinei pwe esap meinisin mi ennet. Ra mochen sinei usun ewe pungun napanapen papatais me ion a wor an mwumwuta ne papatais.
Ponuen ar iotek ngeni ewe Samon, a eto ren emon chon pwarata seni nang, John ewe Soupapatais, a pwa ngenir. A isseta poun won mokurer me a efeiochur ren ewe mwumwuta ne papatais, a erenir pwe a efeiochur pwin kewe chon angang, ren ewe Pristut seni Aaron faniten ewe Messaia (D&C 13:1).
Mwa ren amwararen ena ran non porausen fonufan! Ewe pristut mi niwinsefanito fonufan.
Nupwen sia angei ewe pristut, sia angei ewe mwumwuta ne angang faniten Kot me emweni ekkoch won ekkewe anen ennet me wenechar. Ei mwumwuta a men namwot ngeni manamanen wenechar faniten efeiochun noun Kot kewe semirit won fonufan me epwe nom rech mwirin ach mano. A namwot ewe pristut epwe niwinsefanito me mwen ewe ennetin Mwichefenin Jises Kraist a tongeni fisita. Iei ewe nesen mi auchea sia kaeo seni ekkewe enimuen me wonuennongonongen achifoua.
III. Pisekin Aninis Seni Nang non Manauach won Fonufan
Ekkei unugat nongonongen achifoua—fisu, wanu, me tiw—ra awewe pisekin aninis mi kawor ngenikich non manauach won fonufan. Sia angei niffangen ngun ne emwenikich nupwen sia tapweno afanafanen ewe Samon pwe repwe tumunu kich seni mettoch mi ngaw. Ekkewe pukfel mi pwan pisekin emwen;ika sia kan anneaochu ewe kapasen Kot, Epwe pwar ngenikich ewe anen manau ese much.
Ewe etiwen nongonongen achifoua a aitikich pwe Kot a fen pwarata, mi chuwen pwarata, me epwap pwan pwarata chommong minen ennet mi auchea ngeni Noun kewe soufos, chon oesini, me chon pwarata. Sia pwan kaeo pwe pacheta ngeni ach rongosich mongungun ewe Ngun mi Fel, mi neukukkun me annea pukfel, pwan eu pisekin emwen ina nouch kewe souemwenin Mwichefen, pwe ir mi kefin, koko, o sekita ne efeiochu manauach seni ar kewe nesen.
IV. Chon Mwichefen mi Misineri
Ewe engon, engon me aewin, me engon me oruan nongonongen achifoua ra aitikich ifa usun sipwe fori angangen misineri me afanafana ewe kapas allim won ewe fonufan mi wor sokopatten eif me annuk. Sia kaeo usun ionifengenin Israel ne ammonata faniten ewe Oruan Niwinsefaniton ewe Chon Amanau. Sia kaeo pwe mwan me fefin repwe pwisin finata, me ra tongeni etiwa are poponi ewe kapasen Kot anongonong won pwisin mochenin netiper. Saigonon, sia kaeo pwe nupwen sia achoufetani ewe kapas allimen Jises Kraist ekkis meinisin won fonufan, sipwe asamonu ekkewe muun iteiten eif sia tonong non. Ennet, sia nuku ach sipwe anneasochisi, asamonu, me etiwa ekkewe annuk non iteiten fonu sia tori.
V. Napanap Sipwe Achocho ne Napanapeni
Ewe engon me aunungatin nongonongen achifoua a awora ach tipachem won ifa usun sipwe manueni manuach me angang fengen ren aramas. A apasa: “Sia nuku pwe sipwe wenechar, ennet, nimenimoch, me foforoch ngeni aramas; pwe sipwe tongeni apasa pwe sia tapweno mwirin ewe ourour an Paul—Sia nuku mettoch meinisin, me mochen sipwe anemwiri metoch meinisin. Ika pwe epwe wor nimenimoch, tongefengen, are ekkei sokkun sipwe kutta ekkei mettoch.”
Kich meinisin sipwe resin achocho ne napanapeni ekkei napanap me manaueni manauach pwe eu nenien appirun ekkei mettoch. Ekkewe ennet non ekkewe Nongonongen Achifoua mi apochokuna fengenir mi usun chok masouan eu cell fon mi angang fengen. Usun chok mwokutokutun forun ekkewe kinikinin eu cell fon, ekkewe Nongonongen Achifoua ra awora kich ren ekkewe nongonong mi auchea an ewe Aniwinsefanito. Iteiten nongonongen achifoua a kapachenong met mi auchea ngeni ach weweiti ewe kapas allimen Jises Kraist.
Nei we sensen Kinter a anisiei ne finata non pochokun ai upwe statini nongonongen ewe muun Kot. A aitiei ai upwe kutta wewen ekkei Nongonongen Achifoua mi anonnon. A pwon ngeniei pwe ika upwe kaeo ekkei pisekin ennet mi pin, ewe tipachem ua angei epwe aochuno manauei, iwe ua pwarata pwe a ennetin iei usun.
Newesinon ewe nesen an nei we sense mi fakkun och won ena chuuk non Logan Canyon, aua esinna pwe aua ekkis nomotam nap seni met aua kokkot ngeni. Chipu a pwiniti kich, iwe aua esinna pwe mi wor am osukosuk.
Nei we sense a men attures ne wareiti neniem mi auchea, nge am niwinitiw neimw epwe pwan wesen weires ngenikich. Weiresin ne totiw me won chuk a chok anapano ngawenon am finata ne eto ikkei ia. A kan weires ngenikem, nge a watteno weiresin ngeni i pwe a chinnap.
Nupwen aua attures ne anisi neminewe, ruemon chon police ra war. Ewe presetenin Kinter a titiir ne kuttakem, pun a niuokus pwe aua mwanecheno. Use tongeni monnukano met a fis pokiten weiresin am feitiw fitifengen me amwararen ewe nesen.
Ami kana anuon—Ua pesei kemi ami oupwe aea tupuwemi mi tipachem ne kaeo me statini ekkewe Nongonongen Achifoua me ekkewe nongonong ra aitikich. Ra nom nein ekkewe nongonongen Mwichefen mi kon auchea o mochomoch. Ika kopwe aea ekkei nongonong ne emweni ami statini ewe kapas allimen Jises Kraist, oupwe kuna pwe oua monata ne uwau ami kewe kapasen pwarata usun ewe ennet mi niwintiw ngeni fonufan. Oupwe tongeni pwarata non eu napanap mi mecheres, wenechar, me auchea ekkewe nongonong oua kan aucheani usun chon ewe Mwichefenin Jises Kraist ren Aramas mi Pin non Fansoun Soponon.
Ua pacheta ai kapasen pwarata ngeni ennetin ekkewe engon me aunungatin Nongonongen Achifoua non iten ach Samon me Chon Amanau, ewer pwe Jises Kraist, amen.