Ye Oyo Akoyika Mpiko kino na Nsuka, Ye Wana Akobikisama

Bandeko mibali mpe basi, nasepeli mingi koleka na libaku ya kolobela bino ndambo ya mayoki na ngai.

Mibu ebele eleki, mwasi na ngai mpe ngai tozalaki na molulu ya bofongoli bolakisi ya mosalo ya bana na Ndako ya Bobombi ya Mambi ma kala ya Eklezia na Salt Lake City. Na nsuka ya molulu, Mokambi Thomas S. Monson atambolaki liboso na biso, mpe ntango ye apesaki biso mbote, alobaki, “Boyika mpiko, mpe bino bokolonga”—liteya moko monene mpe bosolo moko oyo, ya solo, tokoki banso kondima.

Yesu Klisto alaki biso ete “ye oyo akoyika mpiko kino na nsuka, ye wana akobikisama.”¹

Koyika mpiko elakisi “kotikala ngwi na bomipesi ya solo na mitindo ya Nzambe atako lisenginia, mpe  botelemeli, to motungisi.”²

Ata baye oyo bazalaki na mayele ya nguya ya molimo mpe bapesamaki mosala ya bosembo bakoki mokolo moko kobunga nzela mpe kokoma ya kolemba soki bango bayiki mpiko te kino na nsuka. Nalikii ete biso ntango nyonso mpe na makasi nyonso kobomba na makanisi mpe mitema na biso liloba “Yango ekokomela ngai te.”

Ntango Yesu Klisto ateyaki na Kapalanauma, “mingi kati na bayekoli na ye bazongaki nsima, mpe batambolaki lisusu elongo na ye te.

“Yango wana Yesu alobaki na bantuku mibale, Bino mpe bolingi bokende?”³

Nandimi ete lelo oyo, Yesu Klisto atuni na biso nyonso tosalaki mayokani ya bule na Ye, “Bino mpe bolingi bokende?”

Nasambeli ete biso nyonso, na bososoli ya makasi na oyo etali oyo baboseko esimbi mpo na biso, tokoka koyanola lolenge moko na Simoni Petelo: “Nkolo tokenda epai ya nani? Yo ozali na maloba ya bomoi ya seko.”⁴

Tika biso tozala na bosembo na oyo tondimelaki mpe toyebi. Soki biso tozalaki te kolandisamaka na boyebi na biso, tika biso tobongwana. Basumuki oyo bazali kokoba na masumu na bango, mpe bayamboli te, kokita na bozindo mpe bozindo makasi na kati ya bosoto, kino Satana asenga bango mpo na yemoko, na ndenge emonani mpenza kolinga kozanga libaku ya koyambola, kozanga kolimbisama, mpe kopambolama na mapamboli nyonso ya boseko.

Nayokaki ebele ya bantina uta na baye oyo batikaki kosanganaka mingimingi na Eklezia mpe babungisaki bososoli na bango ya semba na ntina ya mobembo na biso na mabele. Napesi bango makasi ya kokanisa mpe kozonga, mpo ete nandimi ete moko te akokoka kosenga bolimbisi liboso ya Nkolo na biso, Yesu Klisto.

Ntango tozwaki libatisi, tosalaki mayokani—na moto moko te kasi na Mobikisi, kondimaka mpo na “kotia likolo [na biso moko] nkombo ya Yesu Klisto, kozwaka mokano moko ya kosalela ye kino na nsuka.”⁵

Kosanganaka na liyangani ya elambo ezali moko ya banzela ya motuya tokoki koluka kotiela motuya mokano na biso ya kosalela Ye, makasi na biso ya molimo, mpe bokoli ya bondimi na biso na Yesu Klisto.

Kokabolaka elambo ezali ezali likambo ya motuya mingi tokosalaka na mokolo ya Saba. Nkolo alimbolaki makuli yango na bayekoli na ye yambo kaka Ye akufa. Ye asalaki lolenge moko na mokili ya America. Ye ayebisi biso ete soki tokoti na makuli oyo, yango ekozala litatoli epai na Tata ete biso tomikundoli Ye ntango nyonso, mpe Ye alaki ete, engebene na yango, tokozwa molimo na Ye ekozala elongo na biso.⁶

Na mateya ya Alma ya Elenge na mwana na ye ya mobali Shiblon, tomoni toli ya bwania mpe makebisi oyo esungi biso totikala bosembo na mayokani na biso:

“Tala ete otombwana te mpo na lolendo; iyo, tala ata omikumisa te na bwania na yo moko, to na bokasi na yo moko.

Salela mpiko, kasi enzombo te; mpe tala ete osimba mposa na yo nyonso, ete okoka kotondisama na bolingo; tala ete omibenda uta na goigoi.”⁷

Mibu ebele eleki, ntango tozalaki na bopemi, nalingaki kosala kayaki mpo na mbala ya yambo. Nadefaki kayaki mpe natondisami na esengo, nakotaki na mai ya mbu.

Nsima ya mwa minuti moke, mbonge moko ebalusaki kayaki. Na makasi mingi mpenza, kosimbaka nkayi na loboko moko mpe kayaki na mosusu, nakokaki kozonga na mokili na makolo.

Namekaki lisusu koluka nkayi ya kayaki na ngai, kasi kaka nsima ya minuti moke, ebalukaki lisusu. Nakobaki komekaka na moto makasi, kasi nalongaki te, kino moto moko oyo asosola kayaki ayebisaki ngai ete ekoki kozala na bopasuki na nzoto na yango mpe kayaki ekokaki kozala ya kotonda na mayi, kosalaka ete yango etatabana mpe nazanga motindo ya bokumbi. Nabendaki kayaki tii na libanda ya mayi nalongolaki ekangelo, mpe na solo ekoka, mayi ebele ebimaki na kati.

Nakanisi ete na bantango mosusu totambola na bomoi na masumu ete, lokola mai na kati ya kayaki na ngai, kokangaka bokoli na biso na molimo.

Soki tokangami na masumu na biso, tokobosana mayokani tosalaki elongo na Nkolo, kutu ata tokobi kokweyaka mpo na kotepatepa oyo masumu wana esali na babomoi na biso.

Lokola kaka bopasuki na kayaki na ngai, babopasuki na babomoi na biso esengi biso kokeba na yango. Ebele ya masumu ekosenga makoki ebele koleka misusu mpo na boyambola na yango.

Tosengeli na bongo komituna biso moko: Epai wapi biso tozali kotalaka ezaleli na biso liboso ya Mobikisi mpe mosala na Ye? Ezali biso na lolenge ya Petelo ntango awanganaki Yesu Klisto? To ezali biso kokende liboso na esika wapi tozwaki ezaleli mpe mokano ye azwaki nsima ya “etinda monene” ye azwaki uta na Mobikisi?⁸

Biso tosengeli kosala makasi mpo kotosa mitindo nyonso ya mpe kotia bokebi makasi na oyo nyonso ezali mpasi koleka mpo na biso kotosa. Nkolo akozala na ngambo na biso, kosungaka biso na ntango ya bosenga mpe ya botau, mpe soki biso tolakisi mposa ya sembo mpe tosali engebene na yango, Ye akosala ete “makambo ya botau ekoma makasi.”⁹

Botosi ekopesa biso makasi ya kotelemela lisumu. Tosengeli lisusu kososola ete etumba ya bondimi na biso esengi biso kotosa, mingi mingi na bozangi koyeba bamatomba.

Nazali kopesa esaleli moko oyo ekosunga biso koyika mpiko kino na nsuka:

1. Mokolo na mokolo, sambela mpe tanga makomi.

2. Poso nyonso, kabola elambo na motema moko mobukana mpe molimo ya mawa.

3. Futa moko na zomi mpe likabo na biso ya kokila ya sanza na sanza.

4. Mibu mibale nyonso—mobu nyonso mpo na bilenge—kobandela bandingisa na biso ya kokota na tempelo.

5. Na bomoi na biso mobimba, kosala na mosala ya Nkolo.

Nalikyi ete babosolo minene ya nsango malamu ekobatela makanisi na biso, mpe tika tobomba bomoi na biso nsomi na masumu oyo ekoki kokanga mobembo na biso ya bokengi na nzela ya mbu ya bomoi oyo.

Elonga na nzela ya Nkolo ezali na motuya moko, mpe nzela kaka moko ya kokokisa yango ezali kofuta motuya na yango.

Botondi boni nazali na yango ete Mobikisi na biso ayikaki mpiko kino na nsuka, kokisaka likabo na Ye monene ya bomikabi.

Ye aniokwamaki mpo na masumu, mpasi, babomikitisi, bolozi, bokakatali, mpe bobangi, mpe boye Ye ayebi lolenge nini kosunga biso, boniboni kofula biso, boniboni kolendisa biso, boniboni kopesa biso makasi mpo ete tokoka koyika mpiko mpe kozwa motole oyo ebongisami mpo na baye oyo bakweyisami te.

Bomoi ezali ya kokesana mpo na moko na moko na biso. Biso nyonso tozali na ntango moko ya mimekano, ntango moko ya esengo, ntango moko ya kozwa mikano, ntango moko ya kotelemelaka mabaku, mpe ntango moko ya kosepelaka na mabaku.

Atako ndenge nini lolenge na biso ya moto se yemoko ekoki kozala, natatoli ete Tata na biso ya Lola azali ntango nyonso koloba, Nalingi bino, Nakosunga bino, Nazali elongo na bino. Bolemba te. Boyambola mpe boyika mpiko na nzela oyo Ngai nalakisaki bino. Mpe nalaki bino ete tokomonana moko mpe mosusu na ndako na biso ya selesitiale.” Na nkombo ya Yesu Klisto, amene.