Kosap Osukosuk

Ua apachata ai pwarata ngeni ekkewe porous seni Preseten Russell M. Nelson me Elter Quentin L. Cook a fen kawor iwe chok ekiseno ren ewe kinamwein me tipeewin ewe mwichen soupungun ewe Aewin Presetensi me Mwichen ekkewe Engon me Ruemon Aposel. Ua sinei pwe ekkei esinesin ren pwarata ikana ekkewe ekiekin me mochenin ewe Samon me epwe efeiochu me apochokuna emon me emon, famini, me Ewe Mwichefenin Jises Kraist ren Aramas mi Pin non Fansoun Soponon ren tappin aramas repwe feito.

Ekkoch ier ra no, emon me nein noum kewe nengin mi pupunu me punuwan ewe ra eisini kem me Sister Rasband ew kapas eis mi fokkun auchea: “Mi chok och ach sipwe nounoutiw semirit non ei fonufan sia nom won mi enuokus me efeiengaw?”

Iwe, ena a ew kapas eis mi auchea ren emon in me sam ar repwe ekieki fiti nour kewe ra pupunu. Sia tongeni rongorong ewe ngingin nuokus me mefi ewe nuokus non netiper. Aua ponueni ar ewe kapas eis ren pochokun “Ewer, a fokkun nap seni Murino,” nupwen sia afanafana afanafanen ewe kapas allim me pwisin memefin netipach me met sia sinei non ei manau.

Nuokus ese minefo. Noun Jises Kraist kewe chon kuno, non ewe Setin Galilee, ra nuokusiti ewe “asapwan mi pochokun … [me] ekkewe no” non kirochun pwin.¹ Usun noun kewe chon kuno ikenai, a pwan wor ach nuokus. Nouch kewe sarafo rese mo pupunu ra nuokus ar repwe wata ar memef usun ar repwe pupunu. Pupunu non ier kukkun, ussun nouch kewe semirit, ra tongeni nuokus ar repwe nounoutiw non ei fonufan mi kirikiringaw. Misineri ra pwan nuokusiti chommong mettoch, akaewin ar repwe churi aramas rese sisiner. Ekkewe mi mano punuwer ra nuokus ar repwe akanamon. Kewe sarafo ra nuokus ar resap ketiw; chon sukun ra nuokus non ewe aewin ranin poputan sukun; chon sukunen university ra nuokus ar repwe angei sefani ewe tes. Sia nuokusiti nipwakingaw, ketiwengawach, me netipengaw, me ekkewe mettoch sia sisinei. Sia nuokusiti asapwan watte, chechin fonu, me ekkei mi efeiengawa fonu me manauach. Sia nuokus ren ach sise kefin me sinnengaw, sia nuokus ach sia kefin. Sia nuokus ika sise murinno; sia nuokus ika ese wor feiochuch me ren ewe Samon. Sia nuokusiti ekesiwin me ach kewe nuokus ra tongeni napeno. Met uwa fen apachanong meinisin?

Seni fansoun nom, nuokus mi aukuku nonnomun noun Kot kewe. Ngang uwa sani ewe porousen Elisha non 2 Kings. Ewe Kingen Syria a tinato ew mwichen sounfiu “ra tori ewe teninimw nepwin o ra rokopwanieno.”² Popun ar fori ewe ar repwe supuri me nieno soufos Elisha. Sia annea:

“Sorotan ewe soran, nupwen noun Elisha we chon angang a pwaata a kuna ekkewe sounfiun syria pwe ra rokopwani ewe teninimw. A niwinsefanino ren Elisha o a erreni, ‘Masta, ispwe ne mano! Met ei sipwe ne fori?’”³

Ena mi kapasen enuokus.

“Elisha a ponuweni, ‘Kosap nuokus pwe a chommong chon ppeni kich nap seni chon penir.’”⁴

Nge ese kouno me ikana.

“Iwe [Elisha] a iotek, ‘Samol, kopwe anenoi mesan nei ei chon angang pwe epwe kuna!’ Ewe Samol a rong an we iotek, iwe noun Elisha we chon angang a neta o a kuna won ekkewe kukkun chuk pwe a urono ren arus me chariot mi ngetenget ren ekkei ra rokopwanieno Elisha.”⁵

Epwe wor ika esap wor wach chariotun ekei repwe feitto repwe awesano ach nuokus me okkufu ekkewe chon efeiengawa kich, nge ewe nesen mi fat. Ewe Samon a fitikich, a ekiekikich me efeiochu kich non ekkoch an i chok a tongeni fori. Iotek a tongeni ngenikich ewe pochokun me ewe pwarata sia mochen pwe sipwe anomu Jises Kraist nukanapen ach ekiek me An ewe achasefan. Ewe Samon a sinei pwe fan ekkoch sipwe mefi nuokus. A fen fisingeniei me pwan ami, ina pwata ekkewe pukefel ra nonno ngeni an ewe Samon kapasen aurour:

Epwe wor kinamwe remi, me ousap nuokus.⁶

Kutaei non ekiek meinisin; kosap tipemwaramwar, kosap nuokus.⁷

Kosap nuokus, nei kukkun.⁸ Ua tongei pweteten kewe kukkun. Non ei Mwichefen meni repwe chokukun ren napanapen ewe fonufan, nge nupwen sipwe suki mesach non pekin ngun, “chon ppeni kich nap seni chon penir.”⁹ Nouch ewe Chon Masen Siip, Jises Kraist, a sopweno, Mut ngeni fonufan me een repwe chufengen ne uu ngonuk, pwe ika ouwa kau won ai we fau, rese tongeni win.¹⁰

Ifa ussun nuokus a wesino? Ren ewe anuon, I mi uta unukun Elisha, emon noun Kot soufos. A wor rech pwan na pwon. Ika sia rongorong ngeni Preseten Russell M. Nelson, nupwen sia rongorong ngeni an kapasen aurour, sia uta ren emon soufosun Kot. Chechemeni ekkewe kapasen Joseph Smith: Iwe iei, me mwirin ekkewe chommongun kapasen pwarata ekkewe a kawor seni I, iei ewe kapasen pwarata, amuchunon me neir, ewe sia sinei ussun I: Pwe I mi manau!¹¹ Jises Kraist mi manau. Ach tongei I me An ewe kapas allim a awesano nuokus.

Ach mochen pwe ngunun¹²epwe nonnom rech epwe tinano nuokus ren napanapen manauen inisich. A wor an Preseten Nelson kapasen ammon, “Non kan ran epwe feitto, esap tufich ach sipwe manau non pekin ngun ika ese wor kait, emwen, ourur, me emwen seni ewe Ngun mi Fel.”¹³

Ewe Samon a apasa, pokiten ekkewe osukosuk repwe ponueno ewe fonu me apochokunano netipen chommong, nei kewe chon kuno repwe uta non neni mi pin me resap mokutukut.¹⁴

Iwe mwirin ei kapasen aurour mi unusoch: Kosap osukosuk, pun, nupwen ekkei mettoch meinisin repwe wareto, oupwe sinei pwe ekkewe pwon ra fen for fanitemi repwe ponueta.¹⁵

Uta non neni mi pin—ousap osukosuk—me ekkewe pwon repwe ponueta. Sipwe nengeni fengeni ekkei ussun ngeni ach kewe nuokus.

Akkom, uta non neni mi pin. Nupwen sia uta non neni mi pin–imwach kewe mi pin, ach kewe fan ra epinipin, ekkewe tempel—sia mefi ewe Ngunun ewe Samon a nom rech. Sia kuna ponuwen kewe kapas eis a ngeni kich ika ewe kinamwe epwe mecheres ne kekinino senikich. Ina ewe Ngun a mokutukut. Ekkei neni mi pin non ewe muun Kot won fonufan ra iteni ach anononun osufonoch, ach osufonu ekkoch, murinon inisich non ach manaueni ewe kapas annim, me ach anean ach sipwe ekina senikich ach kewe nuokus me kutta ewe manamanen echikara an Jises Kraist ren an ewe Achasefan.

Ese wor nenien nuokus non ekkei neni mi pin an Kot ika non netipen noun kewe. Pwata? Pokiten tong. Kot a tongei kich—fansoun meinisin—me sia tongei I. Ach tongei Kot a epetano nuokus meinisin me An tong chufengen non neni mi pin. Ekieki ussun. Nupwen sia tipemwaramwar non ach pwon ngeni ewe Samon, nupwen sia rikino seni an ewe an mi emwen ngeni manau ese much, nupwen sia tipemwaramwar ika kapas eis ussun auchean foforuch meren, ika sia mut ngeni nuokus epwe suki ewe asam ngeni meinisin chiechian—tipemwaramwar, song, ningeringer, netipengaw—ewe Ngun epwene susenikich, iwe ewe Samon ese chiwen nomnom rech. Ika ke sinei met wewen na, kopwe sinei pwe esap ew neni mi murinno ach sipwe nom ie. Sokofesenin, nupwen sia uta non neni mi pin, sia tongeni mefi an Kot tong, me “unusochun tong a asueno nuokus meinisin.”¹⁶

Ewe pwan ew pwon ina kosap osukosuk.¹⁷ Ina mo ika a watte osukosuk me kakotongaw a masoweni fonufan, a wor ew pwon ngeni kich ren ach nukuchar fansoun meinisin non Jises Kraist ewe “an God kinamwe, ewe sise tongeni weweiti.”¹⁸ Me nupwen Kraist a feitto non an manaman me ning, kirikiringaw, u ngeni, me asokafeseni repwe wesino.

Me nom ewe Aposel Paul a kuna non an nemasepwi ach fansoun, a apasa ngeni ewe onuon Timothy:

“Kopwe chechchemeni pwe epwe fakkun weires ekkewe fansoun non ekkewe ran nesoponon.

“Ekkewe aramas repwe maicha, tipemmong, namanam tekia o eingeing. Repwe kapas mi ngaw, repwe anneasonap ngeni semer me iner, repwe kirikiringaw o ungeni namanam, …

“… repwe sani pwapwan fonufan nap seni Kot.”¹⁹

Chechemeni, “chon ppeni kich” won me ruepek ewe eppet, ekkana ra tongei ewe Samon ren ennetin netiper, ngunur, ekiekir, me ar pochokun, mi “nap seni chon penir.”²⁰ Ika sia ennetin epinukunuk non ewe Samon me napanapan, ika sia pachenong non an angang, sisap nuokusiti ekkewe ekkesiwinin ewe fonufan ika osukosuk rer. Uwa tingor ngenikemi oupwe nikitano angangen fonufan me osukosukan o kutta memefin ewe ngun non manauom iteiten ran. Tongei met ewe Samon a tongei, minne a pachenong An kewe annuk, Imwan kewe mi pin, ach kewe pwon mi pin ngeni, ewe sakramen iteiten Raninifen, ach porous non iotek—iwe ousap osukosuk.

Amuchunon: epinukunuku ewe Samon me An kewe pwon. Ua sinei pwe An kewe pwon repwe ponueta. Ua sinei pwe ussun chok pochokunen ai ua uta ikei mwemi non ei mwich mi pin.

Ewe Samon a fen pwarano: Pun ir ekkewe ra tipachem me angei ewe ennet, me ewe Ngun mi Fel pwe nour chon emwen, o resemo sonono—Ennet upwe apasa ngeni kemi, resap pokupokutiw me koturunong non ewe ekei, nge repwe ketiw non ewe ran.²¹

Ina pwata sisap osukosuk ren osukosuken ikenai, seni ekkewe non ewe wachimuken imw, seni ekkewe ra turunufasei ennetin angang weires me angangen fangeno ngeni ewe Samon Jises Kraist. Epinukunuk, pworacho, pwan angangen aninis ren ekkewe mi osupwang ra feito seni ew netip ese chourek ren osukosuk ika kokotongaw. Preseten Nelson, ewe a aneanei me nukunuku fansoun mwach, a achema ngenikich, “Ika epwe wor ach aneanei keimufesenin ngingin chommong aramas me ekkewe nonnomun aramas ra ataieno ewe ennet, sipwe kaeo ach sipwe angei pwarata.”²²

Ach sipwe angei ach pusin pwarata, sipwe akomw ne manaueni ewe kapas allim me pesei nukunuk me pekin ngun non ekkoch pwan ussun chok kich.

Spencer W. Kimball emon me nein ekkewe soufos ne anuwoni we . Ekkei ier a no, mwirin ai uwa koko ngeni emon Aposel, uwa kuna kinamwe non an ewe aewin afanafan non ewe mwichenapen mwichefen non October 1943. A fokkun tinisuk ren kokkon ewe; ua sinei ifa ussun ena memef. Elter Kimball a apasa: “Ua fokkun fori ew watten ekiek me iotek, me echikefen me iotek. A wor osukosuken ekiek a tonong non mokurei—ussun mongungu ra apasa: ‘Kose tongeni fori ena angang. Kose nimenimoch. Ese wor om nipwakoch’— iwe a etto ew pochokunen ekiek: ‘Kopwe fori ewe angang a fin ngonuk—kopwe fori inisum an epwe tongeni, nimenimoch, me tufich ngeni.’ Iwe ewe maunen orukoruk a soposopono.”²³

Uwa angei memefin netipei seni ena kapasen pwarata mi unusoch an ei Aposel ewe epwe winiti ewe Engon me Ruemonun Presetenin ei pochokunen Mwichefen. I a sinei pwe epwe nukusokuru an nuokus an “epwe fori ewe angang a ewis ngeni” me epwe anongonong won ewe Samon ren ewe pochokun an epwe fori inisin an epwe tongeni, nimenimoch, me nipwakoch.” Kich mi pwan tongeni. Ekkewe maun epwe chok soposop, nge sipwe mesengenir ren ewe ngunun ewe Samon. Kich “sisap osukosuk” pun nupwen sipwe uta ren ewe Samon me uta ren an kewe nongonong me an ewe kokot ese much, sia uta won pun mi pin.

Iwe, met ussun ena nengin me punuan ewe ekkewe ra eis ewe kapas eis mi ku netip me fatafatoch, anongonong won- nuokus ekkoch ier a no? Ra fokkun ekieki ach ewe poporous non ena pwinin, ra iotek me echikefen me ra tori soponon. Ra pwapwa me meseik me pwan kich, ekkewe in me sam chinap, iei ra feioch ren nour fumon semirit mi fokkun murinno nupwen ra feinno mwer non ar nuku me tong.

Sasing

Efumonun noun noun Elter me Sister Rasband kewe

Oupwe pwaracho, pwi me fefinei. Ewer, sia nom non fansoun osukosuk, nge nupwen sia nom won ewe an mi pwon, sisap nuokus. Ua efeiochukemi pwe nupwen oupwe fori, ousap osukosuk ren ekkewe fansoun minne sia nom non ika ekkewe osukosuk ra toruk. Ua efeiochukemi pwe oupwe finata pwe oupwe uta non neni mi pin me ousap mokutukut. Ua efeiochukemi pwe oupwe nuku non an Jises Kraist kewe pwon, pwe mi manau, I a mamasa kich, a tumunu kich me uta unukuch. Non iten ach Samon me Chon Amanau, Jises Kraist, amen.