Achocho, Achocho, Achocho

Pwi me fefinei kana mi acheingicheing, ua kinisou ren ei tufich ai upwe afanafan ngeni kemi. Ei mwichenap mi awora pwapwa me mirit ngeniei. Ewe Ngun mi Fel a uwei ekkewe kon me afanafan ngeni netipach. Ua iotek pwe ewe Ngun mi Fel epwe pwan uwei ai afanafan ngeni netipemi.

Fitu ier me nom, ngang ewe aewin chon aninis ngeni ewe presetenin distrik non etiwen Merika. Fan chommong, nupwen aua sai ngeni eu kukkun pranch, a apasa ngeniei, “Hal, nupwen ka chufengen ren emon, kopwe anisir usun ita ra ennetin osukosuk, me kopwe pung esopun ewe fansoun.” Mi ennet, nge ua keao non ekkewe ier pwe a fen nap seni esop. Ikenai, ua mochen ngeni kemi kapasen pesepes ren ami kewe sosot non manauemi.

Manauach non fonufan a for me ren Kot pwe epwe eu tes me epwe efisata ach mamarita. Oupwe chechemeni met Kot a apasa usun Noun kewe semirit nupwen a Forata fonufan nupwen a apasa sipwe soutiniir, sipwe pi ika repwe fori mettoch meinisin minne ewe Samon Kot epwe annuku ngeniir.¹

Seni ewe nepoputan, ekkewe sossot rese mecheras. Sia kuna sossot pokiten mi wor inisich inisin fituk. Kich meinisin sia nom won eu fonufan ian an Setan a fiu ngeni ennet me ach pwisin pwapwa a awatteno. Oua tongeni ekieki pwe osukosuk non ewe fonufan me manauemi a chommongono.

Iei ai kapasen ekinamwei: ewe Kot mi tong minne a mut ngenikemi oupwe kuna ekkei sossot a pwan ammonata eu an ami oupwe poracho ngeniir. Semach won Nang a tongei fonufan iwe A tinato Noun we Acheingicheing An epwe anisikich.² Noun we, Jises Kraist, A fangeno manauan fan itach. Non Gethsemane me won ewe irapengas Jises Kraist A riaffou fan choun tipisich meinisin. A meffi meinisin ekkewe netipeingau, ekkewe metek, me niwinin tipisich An epwe tufichin aruru me apochokuna kich non meinisin ach kewe sossot non ei manau.³

Oupwe chechemeni pwe ewe Samon A apasa ei ngeni Noun kewe chon angang:

Pwe ewe Sam me I mi eu chok. I mi nom non ewe Sam me ewe Sam non I me ika sia etiwa I, sia pwan nom non I me I non kich.

A apasa pwe A nom rech, me I ewe chon mas allim, me ewe foun Israel. Ika sia kauta won foun sise tongeni tur.⁴

Nouch soufos, Preseten Russell M. Nelson, a pwan ngenikich ewe chok kapasen ekinamwe. A pwan awewe ifa usun sipwe kauta won foun Jises me makei iten ewe Samon non netipach pwe epwe emwenikich non ach kewe sossot.

A apasa: “Naman oupwe apinukungau ren ekkis fansoun, oupwe chechemeni, ei manau esap mecheras. Mi namwot sipwe poracho ngeni sossot me eningino non ach netipengau non manauach. Oupwe chechemeni pwe ‘ese wor och mettoch God ese tongeni fori’ (Luke 1:37), oupwe chechemeni pwe I Sememi. Ami Noun at are nengin mi for non Napanapan, me ren ami tupwen oua tongeni angei pwarata an epwe anisikemi non ami angang mi murrino. Oua tongeni watta womi iten ewe Samon mi pin. Oua tongeni tufichin kapas non iten Kot mi pin (nengeni D&C 1:20).”⁵

Kapasen Preseten Nelson a achemangenikich usun ewe pwon non ewe iotekin sakramen, eu pwon minne Semach won Nang A aponueta nupwen sia fori met sia pwonei.

Ausening ngeni ekkewe kapas: “O Kot, Samach mi Napanap, sia tingor ngonuk fan iten Noum we, Jises Kraist, om kopwene efeiochu me epinano ei pinewa ngeni aionen meinisin ekkewe ra angei, pwe repwe ani achechemenien inisin Noum we, me pwarata ngonuk, O Kot, Samach mi Napanap, pwe ra mochen ar repwe mwarei iten Noum we, o chechemeni i fansoun meinisin, me fori an kewe annuk a ngeni ir, pwe Ngunun epwe nonom rer fansoun meinisin. Amen.”⁶

Iteiten fansoun sia apasa ewe kapas amen nupwen emon a apasa ewe iotek fan itach, sia pwon ren ach ani ewe pinewa, pwe sia mochen mwarei iten Jises Kraist mi pin, chechemeni I, me fori An kewe annuk. Me niwinin, sia angei ewe pwon pwe Ngunun epwe nonnom rech fansoun meinisin. Pokiten ekkei pwon, ewe Chon Amanau I ewe fau minne sia tongeni uta won me sipwe tumun me esap wor ach nuokus non ekkewe sossot meinisin minne sia kuna.

Nupwen ua ekieki usun kapasen ewe pwon mi pin me ekkewe feioch mi pwon, ua fen ekieki met wewen ach mochen mwarei iten Jises Kraist.

Preseten Dallin H. Oaks a awewei: “Mi auchea pwe nupwen sia angei ewe sakramen sise pwarata pwe sia mwarei woch iten Jises Kraist. Sia pwarata pwe sia mochen fori. (Nengeni D&C 20:77.) Wewen ach sia chok pwarata pwe sia mochen fori pwe mi pwan wor met epwe fis me mwen sipwe ennetin mwarei itan mi pin non ewe napanap mi auchea.”⁷

Ekkewe kapas pwe sia “mochen [ach sipwe] mwarei” Itan a aitikich pwe ina mo pwe akkomwan sia mwarei Itan nupwen sia papatais, sise wes ach sipwe mwarei Itan nupwen sia papatais. Mi namwot sipwe sopweno ach achocho ne mwarei Itan non unusen manauach, pwan nupwen sia afososefani ach pwon mi pin ren ach angei ewe sakramen me ach fori pwon mi pin non an ewe Samon kewe tempel mi pin.

Iwe mi wor ru kapas eis mi aucheanap fan iten kich meinisin “Met upwe fori ai upwe mwarei Itan?” me “Ifa usun upwe sinei pwe ua fefeita?”

Kapasen Preseten Nelson a ngenikich eu ponuen ekkei kapas eis. A apasa pwe sia tongeni mwarei iten ewe Chon Amanau me sia tongeni kapas fan Itan. Nupwen sia kapas fan Itan, sia angang ngeni I. “Pun ifa usun an emon aramas epwe sinei ewe masta i esamo angang ngeni, me i emon chon ekis ngeni i, me mi towaw seni ekiekin me popun netipan?”⁸

Mi namwot epwe wor eu iotekin nuku. Mi namwot sipwe ennetin iotek ngeni Semach won Nang ach sipwe sinei met a mochen sipwe apasa ach sipwe anisi ewe Chon Amanau ren An angang. Mi namwot sipwe nimenimoch ach sipwe angei ewe pwon seni ewe Samon nupwen a apasa pwe seni pwisin mongungun are seni mongungun noun kewe chon angang, mi nonno chok.⁹

Nge, mi pwan wor met mi namwot nap seni ach kapas fan Itan ach sipwe mwarei Itan. Mi namwot epwe wor och memef non netipach ach sipwe tongeni winiti Noun chon angang.

Ewe soufos Mormon a awewei ekkewe memmef a otufichi kich ach sipwe mwari Itan. Iei ekkewe memeffin nuku, apinukunuk, me tong ennet, minnei ewe tong ennetin Kraist.

Mormon a awewei:

“Pun ua apungu pwe mi wor ami nuku non Kraist pokiten ami tipetekison; pun ika ese wor ami nuku non i iwe ouse fich ami oupwe anneanong nein ekkewe aramasen an we mwichefen.

“Iwe pwan, ami pwi achengicheng, ua mochen kapas ngenikemi usun apinukunuk. Ifa usun pwe ami oupwe tongeni angei nuku, tiwenon chok ika epwe wor ami apinukunuk?

“Iwe met ami oupwe apinukunuku? Nengeni ua apasa ngenikemi pwe epwe wor ami apinukunuk non ewe achasefanin Kraist me ewe manamanen an manausefan, pwe oupwe manaueta ngeni manau esemuch, iwe ei pokiten ami nuku non i anongonong won ewe pwon.

“Ina minne, ika a wor an emon aramas nuku mi auchea epwe wor an apinukunuk; pun me nukun nuku ese tongeni wor apinukunuk.

“Iwe pwan, nengeni ua apasa ngenikemi pwe i ese tongeni wor an nuku me apinukunuk, tiwenon chok epwe mosonoson me tipetekison non netip.

“Ika epwe ina, an nuku me apinukunuk mi namotmwan, pun ese wor emon a ketiw me mwen Kot, tiwenon chok ekkewe mi mosonoson me tipetekison non netip; iwe ika emon aramas mi mosonoson me tipetekison non netip, me pwarata me ren ewe manamanen ewe Ngun mi Fel pwe Jises i ewe Kraist, mi auchea pwe epwe wor an tong ennet; pun ika ese wor an tong ennet i mi namotongaw; ina minne mi auchea pwe epwe wor an tong ennet.”

Mwirin a awewei usun tong ennet, Mormon a sopweno ne apasa:

“Nge tong ennet ina ewe nimenimochun tong an Kraist, iwe a nikitu ngeni feinfeino; iwe ion a pwá pwe a wor ren atun ewe ranin soponon, epwe murino ren.

“Ina minne, ami pwi achengicheng, iotek ngeni ewe Sam ren unusen pochokunen netip, pwe oupwe ureno ren ei tong, minne a fen wata won ir meinisin chon ennetin tapweno mwirin Noun we, Jises Kraist; pwe oupwe winiti noun Kot; pwe nupwen i epwe pwato sipwe usun chok i, pun sipwe kuna i usun wesewesen i; pwe epwe wor ach ei apinukunuk; pwe sipwe nimenimochuno pwan mwo usun i mi nimenimoch. Amen.”¹⁰

Ai kapasen pwarata pwe ewe Chon Amanau a makei Itan non netipemi. Ren chommong me neimi, ami nuku non I a awatteno. Oua mefi pwan och apinukunuk me pwapwa. Me oua mefi ewe ennetin tongen Kraist fan iten ekkoch aramas me pwisin ami.

Ua kuna non ekkewe misineri mi angang ekkis meinisin won fonufan. Chon ewe Mwichefel ra kapas ngeni chiener me chon ar famini usun Ewe Mwichefenin Jises Kraist ren Aramas mi Pin non Fansoun Soponon. Mwan, fefin, serafo, me pwan semirit ra iamwir pokiten ewe tongen ewe Chon Amanau me fan iten chon orumi.

Non ach keran keao usun ekkewe osukosuk ekkis meinisin won fonufan, chon ewe Mwichefen ra fori ar kokkot ar repwe feino aninis, fan ekkoch ra sai won sat, ese wor emon a tungor ar repwe fori. Fan ekkoch rese mochen witiwit tori ewe neni mi osukosuk mi ammonata ar repwe etiwer.

Ua sinei pwe ekkoch me neimi minne oua ausening ikenai oua mefi pwe ami nuku me apinukunuk a kuf ren ami osukosuk. Me naman oua mochen oupwe mefi tong.

Pwi me fefinei, mi wor an ewe Samon tufich unukumi pwe oupwe mefi me pwarata An tong. Aua tongeni iotek fiti pochokunen ekiek pwe ewe Samon epwe emwenikemi ngeni emon pwe oupwe tongei i fan Itan. A ponueni iotekin ekkewe mi tipetekison ren chon angang usumi. Oupwe mefi ewe tongen Kot fan itemi me fan iten ewe emon ka angang ngeni fan Itan. Nupwen oua anisi noun Kot ren ar kewe osukosuk, naman ami kewe osukosuk repwe pwaseno. Ami nuku me ami apinukunuk repwe pochokununo.

Ngang mi pwisin kuna pwe mi ennet. Non unusen manauan, punuei a kapas fan iten ewe Samon me a angang ngeni aramas fan Itan. Usun ua fen apasa me nom, emon nei kewe pisop a apasa ngeniei: “Ua mwar. Iteiten fansoun ua rong pwe emon non ewe wart a osukosuk, ua mwitir feino aninis. Nge nupwen ua war, a usun ita iteiten fansoun punuom a akkommwei.” Ena mi pung non meinisin ekkewe neni aua nom non ukukun 56 ier.

Iei a chok tongeni apasa fitu chok kapas non eu ran. Aramas minne a tongei fan iten ewe Samon ra churi i. Iteiten nepwin me nesesor ua konu kon mi fel ren me aua iotek. Ngang ua wisin apasa ewe iotek. Fan ekkoch ua kuna i pwe a achocho ne konu ekkewe kon mi fel. A men sani ekkewe konun kinter. Ewe memmef a sani nap seni meinisin mi nom non ewe kon “Ua Achocho ne Appiru Jises.”¹¹

Non ewe ran, mwirin ua konu kapasen ewe kon: “Tong fengen usun Jises a tongek. Achocho oupwe kirokiroch ren mettoch meinisin oua fori,” a neukukun, nge mi fat ne apasa, “Achocho, achocho, achocho.” Ua ekieki pwe epwe kuna, nupwen a kuna I, pwe ach Chon Amanau a makkei Itan won netipan me a winiti usun I. I A uwei i non an kewe osukosuk iei, usun chok epwe uweikemi non ami kewe osukosuk.

Ua apasa ai kapasen pwarata pwe ewe Chon Amanau a sinei me tongei kemi. A sinei itemi usun oua sinei Itan. A sinei ami kewe osukosuk. Ren An Achesefan, A fen okkufatiw fonufan. Ren ami mochen mwarei Itan, upwe apwasa ousan chommong aramas. Me mwirin ekkis fansoun oupwe sinei pwe oua sinei ewe Chon Amanau nap seni nom me oua pwan tongei I nap seni nom. Itan epwe nom non netipemi me epwe fot non ami ekiek. Ua pwarata, fiti kinisou ren An tong me kirokiroch ngeniei, ekkewe aramas ua tongei, me ami, non iten Jises Kraist, amen.