Iei Ewe Fansoun
Ika mei or och mettoch non manauom om kopwe ekieki usun, iei ewe fansoun.
Ekkoch ier a no, ren ai ua ammona ai sai pokiten ai business, ua popueta ne mefi metekinfan mwari. Ren an a noninen, punuwei a mochen fitieno ngeni pioing. Ren am sai won sepenin me am we aewin kouno, ewe metek a men wateno me a men weires ai upwe ngasangas. Nupwen aua tori ewe neni, am aua no seniewe ermaik me feino ngeni pioing, mwirin chomong test, ewe toktor a era pwe a och am oupwe sopweino am sai.
Am aua niwinsefan ngeni ermaik me am aua sopweno am sai ngeni ewe saingonon neni. Ren am oua tori ewe neni ewe chon uwei ewe sepenin a kapas won ewe speaker me eis pwe upwe affata ion ngang. Ewe fin anisi sepenin a feito rei me era pwe a keran angei eu porous mi weiweita, me a ereni ei pwe mi wor sein pioing a witiei non ewe ermaik epwe uweiei ngeni pioing.
Am aua tonong won ewe sein pioing me aua mwitireno ngeni rumwen emerechensi . Ikewe ie, ruemon toktor ra kapong ngeni kem me awewei pwe re mwan ar checki inisi pwe mi or ewe mettoch mi akouno fetanin chaa, non ammatei , minne mi auchea ai upwe safei. Ekkewe toktor ra pwan ereni kem pwe chomong rese manau seni ei sokkun osukosuk. Iwe ren am aua sinei pwe am aua towau seni imwem me ause sinei ika aua monneta ren ei sokkun osukosuk, ekkewe toktor ra era ika pwe mi wor och mettoch non manauem aupwe ekieki usun, pwe iei ewe fansoun.
Ua chechemeniochu ifan ai ekiek a mwitir siwin non ena atun. Met kewe a men auchea ekkoch minich a no esap chuen wor namotan. Ai ekieki a mwitereno feino ngeni eu neni mi asoso me kinamwe ei neni pwe neni fochofoch—ekiekin ai famini, nei kewe, punuwei we, me muchunon eniwinin pwisin manauei.
Ifan usun aua fori ren am famini me pwisin emon me emon? Am mi manaueni manauem epwe nonnochok ngeni aanen pwon aua fori ren am we Samon me an mochen rem, are meni aua mut ngeni mettochun ewe fonufan epwe osukasuka seni ekkewe mettoch mei namot me auchea?
Ua mochen ami oupwe kaeo seni ei napanapen nesen ua tonong non: ami oupwe ipwesefan seni ewe fonufan me eniwini pwisin manauemi. Are non an ewe toktor kapas , ika pwe mi wor och mettoch non manauom om kopwe ekieki usun, iei ewe fansoun.
Eniwini Pwisin Manauach
Kich meinisin sia nonnom non ewe fonufan mei wor chommong kapas a aura mokurach, napengeni ekkei a osukasuka kich seni internet me fori pwe epwe weires ne aimueno osukosukan ei fonufan seni ekkewe mettoch mi wor namotan fochofoch. Iteitan ranin manauach a fisino chommong mettoch a otupu mesach, pwe mwitir seni teknology mi sou siwin.
Ika pwe sisap angei fansoun ach sipwe ekichou, meni sisap esinna ngauen ei napanapen siwin mi mwitir a fisino non manauach me pwan finiach. Meni sipwe kuna manauch mi ur ren chommong ekkei kapasen internet non och sokkun esisin, viteo, me och sokkun kapasan. Iwe mo mei amwarar me meni mi pwapwa, chommong me nein ekkei esap mo wor namotan ngeni ach feifeita esemuch, nge ennet ekkei mettoch ra apungano napanapen ach ekieki manauch non ei fonufan.
Ekkei otuputupen fonufan mi nonno ngeni ekkena mettoch non an Liai tan. Ren ach sia fetano won ewe aanen pwon ren ach komochunuk ewe wokun mecha, sipwe rongogong me atona ekkeena ir “asaua me itini pour” seni ewe wate me wamongun imw (1 Nifai 8:27). Meni ita esap fat ach ekiek ne fori, nge fan ekkoch sia kouno me kunnu ngeni met kewe a fifis. Ekkoch me neich sipwe nikitano ewe wokun mecha me feino ngeni pwe epwe och ach atona. Ekkoch repwe rikino me monucheno “pokiten ekkewe ra turunufaser” (1 Nifai 8:28).
Ewe Chon Amanau a pesei ngeni kich ne “mamasa … pwe non och fansoun netipemi epwe aurek ren … noninen ei manau” (Luke 21:34). Ekkewe kapasen pwarata a achema ngeni kich pwe choomong ra kokko, nge chokukkun ra finita. Ir resap finita “pokiten netiper a fot … won ekkewe mettochun fonufan, me ra ekita ningen asamonun aramas” (Doctrine and Covenants 121:35; nengeni pwan uwekisin 34). Eniwini pwisin manauach a ngeni kich eu tufich ach sipwe ipwesefan seni fonufan, eniwinsefanieno ia sia uta ia won ewe aanen pwon, me, ika pwe mi namot, fori sefanni pwe ach kamoch mi pochokun me mesach a atona mwach.
Iwe iei chok, non eu mwichenap ren serafo, Preseten Russell M. Nelson a tingorei ekkewe serafo ar repwe ipwesefan seni ewe fonufan, are repwe imuno seni internet ren ar repwe echikipin non fisu ran seni internet. Iwe a pwan eisiniir ika pwe ra esinna och mettoch usun met ra mefi, pwan met ra ekieki, me ifa usun ar ekiek. Iwe mwirin a tingorer repwe “fori eniwini pwisin manauer ren ewe Samon … repwe cheki pwe inisir ra nom won ewe aanen pwon. A pwan peser pwe ika mi wor och mettoch non manauer mi auchea epwe siwin, ikenai ewe ran me fansoun mi och ne siwin.”1
Non eniwinsefeanni mettoch non manauach mi namot an epwe siwin, meni sipwe pwisin eisini kich och kapaseis: ifan ach sia uta seni osukasuken fonufan me nomofoch won ach atona mettochun feinfeino mwach?
Non ew afanafanen 2007 itenapen “Och, Murino, Echipwer,” Presten Dallin H. Oaks a afanafana ifan ach sipwe anenia finiach nein chommong fitikokon fonufan. A auroura kich, “Kich sipwe poutano ekkoch mettoch mi och ren ach sipwe fini och a men murino seni pokiten a forano ach nuku non ewe Samon Sises Kraist me epwe apochokuna ach kewe famini.”2
Ua pesei kemi pwe ekkewe mettoch non ei manau mi murino ra anonga won Sises Kraist me weweiti ekkewe ennet fochofoch ren ion Ii me ion kich non nefinach we ngeni Ii.
Kutta Ennet
Ren ach sia achocho ne sinei ewe Chon Amanau, kich sisap nikitano ekkewe nongonongun ennet ren ion kich me pwata sia nonnom ikei. Amulek a achema ngeni kich pwe “ei manau ewe fansoun…ne ammona ne churi Kot,” ewe fansoun “a ngeni kich ne ammonata ren manau ese much”(Alma 34:32–33). Usun och kapas monomon a achema ngeni kich, “Sisap aramas mi manaueni manau non pekin inis. Nge kich aramas ngun sia manaueni manauen aramas.”3
Ach sineiochu ach pwisin nepoputan neni a men namot ren ach feifeita fochofoch me a agasano kich seni osukasuken ei manau. Ewe Chon Amanau a afanafan:
“Ika ami oua sopwosopwono non ai kapas, iwe ami nei chon kaeo;
“Me ami oupwe sinei ewe ennet, me ewe ennet epwe angasakemino” (John 8:31–32)
Preseten Joseph F Smith a apasa, “Ewe chok mettoch mi napanap ne tori non ei manau pwe sipwe sineiochu me miritochu ekkewe ennet me asan, ennetin sineiir, non ukukkun ach tongeni pwe esap wor och mettoch seni ei fonufan epwe etipemwaramwarer seni ewe sineinap a wor rer.”4
Non ei fonufan ikenai, ewe anini won ewe ennet a tori kapasen anini, ren ruepek ra ara pwe ir mi ennet usun ita pwe ei ennet a pwisin awewei ngeni kich. Ewe anuwon Joseph Smith a kuna pwe “chommong anini me osukasuk” non manauan “pwe a men weires..an epwe finata ion mei ennet me ion mei mwan” (Joseph Smith—History 1:8). Pwe “ua nom non ei rochopwaken maunen kapas me aninin ekiek” pwe a achocho ne kuta aninisin seni asan an epwe kuta ennet (Joseph Smith—History 1:10).
Non mwichenap non April, Preseten Nelson a afanafan, “Ika epwe wor ach apinukunuk ne atonaochu ekkei ekiek me asukunen aramas mi angawano ennet, mi auchea sipwe kaeo ach sipwe angei pwarata.”5 Mi auchea sipwe anonga won Ngunun Ennet, minne “ewe fonufan esap mo etiwa pokiten esap tongeni atona i, pwan esap sinei i” (John 14:17).
Pwe ei fonufan a mokut ngeni och ekiek, sipwe fokkun chechemeni ekkewe kapasen Jacob pwe “ ewe Ngun a kapas ennet me ese chofona. Ina minne, a kapas usun mettoch usun wesewesen nonnomur, me usun mettoch usun repwe wesewesen fis; ina minne, ekkei mettoch ra pwano ngenikich non fatafatoch, pokiten amanauan ngunuch.” (Jacob 4:13).
Nupwen sia ipwesefan seni fonufan me eniwinsefenni manauch, iei ewe fansoun ne ekiek met kewe mettoch sipwe siwini. Sipwe fokkun epinukunuk pwe sia sinei Nouch Chon Appiru Jises Krasit a emweni kich non ena aan. Me mwen An mano me Manausefan, ren an a anganga ne anisi ekkewe ir mi weweiti Wisan we me tekia , A achema ngeniir pwe “non ngang epwe wor kinamwe. Non ewe fonufan epwe fis fitikoko, nge oupwe pwapwa; Ngang ua pworacho ngeni ewe fonufan” (John 16:33). Pokiten I, ua pwarata ai kapasen pwarata non iten Jises Kraist, amen.