Aatin sa’ xtiklajik

Ex was wiitz’in raarookex inb’aan, xoowan chiroyb’eninkil li hoonal tooruuq wi’chi chixch’utub’ankil qib’ eerik’in sa’ li jolomil ch’utub’aj-ib’ re octobre re li Iglees. Naqak’e jun sahil k’ulunik eere chejunjunqalex. Q’axal naqab’antioxi eere lee tij choq’ qe. Naqeek’aheb’ chi yaal. B’antiox eere!

Naqab’antioxi eere lix yalb’al eeq’e chixk’anjelankil li xnimal ru na’leb’ k’eeb’il sa’ li jolomil ch’utub’aj-ib’ waqib’ po chaq. Eb’ li awa’b’ej re oqech chiru li ruchich’och’ neke’xsik’ lix b’eresinkileb’ re xtusub’ankileb’ chi ak’il lix molameb’ li xb’eenil. Eb’ li winq sa’eb’ li molam a’an rochb’eeneb’ ajwi’ li qachaab’il komon ixq sa’ li Komonil re Tenq’ank yookeb’ chi k’anjelak chi k’eek’ookeb’ xch’ool chirilb’aleb’ li qakomon ixq ut winq chi jwal sant ut taqenaq wi’chik. Musiq’anb’ilo xb’aan lix chaab’ilal eech’ool ut lix yalb’al eeq’e chixk’amb’al chaq lix rahom li Kolonel rik’ineb’ lee junkab’al, lee rech kab’al, ut lee ramiiw ut chirilb’aleb’ jo’ tixb’aanu raj a’an.

Chalen chaq li ch’utub’aj-ib’ re abril, li Hermana Nelson ut laa’in xooch’utla rik’ineb’ li komon chiru chixjunil li ruchich’och’, toj sa’eb’ li ch’och’ sa’ xyi li palaw. Sa’ Jerusalen ut Harare, sa’ Winnipeg ut Bangkok, qilom lee nimla paab’aal ut lix kawilal lix nawom eech’ool.

Jwal nasaho’ qach’ool naq naab’aleb’ li qasaaj li xe’ok sa’ lix teep li Qaawa’ choq’ reheb’ li saaj re tenq’ank chixch’utub’ankil laj Israel li jek’inb’ileb’.¹ Naqab’antioxi eere! Ut naq ink’a’ teekanab’ xtaaqenkil inb’oqom k’eeb’il sa’ li qach’utam choq’ reheb’ li saaj li xk’utb’esiman chiru chixjunil li ruchich’och’, yookex chixk’utb’al jun li eetalil tento taqataaqe laa’o. Ut jwal chaab’il li jalaak yookex chixk’eeb’al chi uxmank!

Chiru junjunq chihab’, laa’o li wanko sa’eb’ li jolomil ch’utam re li Iglees yooko chixtz’ilb’al rix ut chixpatz’b’al: chan ru naq naru naqak’am li evangelio sa’ lix saqalil ru, jo’eb’ ajwi’ li k’ojob’anb’il k’anjel rik’ineb’ li junelikil osob’tesink rik’in chixjunileb’ li ralal xk’ajol li Dios?

Jo’ aj Santil Paab’anel sa’ Roso’jikeb’ li Kutan, k’aynaqo chixk’oxlankil naq li “iglees” a’an k’a’ruhaq li nak’ulman sa’eb’ li qach’utleb’aal kab’l, ut tenq’anb’il xb’aan li nak’ulman sa’ li ochoch. Tento taqajal li na’leb’ a’in. Anajwan ut naq na’ajman ru jun Iglees jayalinb’il sa’ li ochoch, li tenq’anb’il xb’aan li nak’ulman sa’eb’ li qach’utleb’aal kab’l re uq’ej, teep, ut oqech.

Naq yoo chi nimank li Iglees sa’ ruchich’och’, wankeb’ naab’al li komon li maak’a’eb’ xkapiiy—ut maare ink’a’ te’xk’ul sa’ junpaat. Jultik we jun li junkab’al li tento te’xch’utub’ rib’ sa’ rochoch. Xinpatz’ re li na’b’ej ma sa li xik sa’ iglees sa’ li rochoch? A’an xsume, “nawulak chiwu! Ink’a’ chik naroksi li yib’ ru aj aatin lin b’eelom sa’ qochoch, xb’aan naq naxnaw naq taarosob’tesi li loq’laj wa’ak arin rajlal domingo.”

Li tz’aqal rajom li Iglees, wanjenaq chalen chaq junxil, a’an xtenq’ankil chixjunileb’ li komon chixnimob’resinkileb’ xpaab’aal chirix li Qaawa’ Jesukristo ut lix tojb’al rix li maak kixb’aanu, xtenq’ankileb’ chixb’aanunkil ut chixpaab’ankileb’ lix sumwank rik’in li Dios, ut xkawob’resinkileb’ ut xtz’apb’aleb’ sa’ junajil chi junelik lix junkab’aleb’. Sa’ li ruchich’och’ anajwan, jwal ch’a’aj a’an. Laj tza yoo chixk’ihankil lix pleetihom chirix li paab’aal, chiqix laa’o, ut chirix li qajunkab’al. Re naq ink’a’ toosachq sa’ musiq’ej, tento xpleetinkil a’an rik’in li qachaab’il k’uub’anb’il na’leb’. Jo’kan ut, anajwan naqaq xb’aanunkil jun tusub’ank li tixkawob’resiheb’ li qakomon ut lix junkab’aleb’.

Chiru naab’al chihab’, eb’ laj jolominel re li Iglees yookeb’ chixyiib’ankil jun ak’ tzolok li tixkawob’resiheb’ li junkab’al ut li komon rik’in jun k’uub’anb’il na’leb’ jayalinb’il sa’ li ochoch ut tenq’anb’il xb’aan li Iglees re xtzolb’al li tzol’leb’ re li evangelio, re xkawob’resinkil paab’aal, ut re xtenq’ankil li loq’onink sa’ junesal. Lix yalb’al qaq’e chiruheb’ li chihab’ a’in re xloq’oninkil ru li hilob’aal kutan—re taa’ok a’an choq’ sahil kutan ut jun eetalil chiru li Dios chixk’utb’al li qarahom choq’ re—taatenq’aaq xb’aan li jalok li taqab’aanu anajwan.

Sa’ li eq’la a’in, taqaye resil jun ak’ na’leb’ chirix ut jun xjunajinkil li xtzolb’al li evangelio sa’ li ochoch ut sa’ li Iglees. Teneb’anb’il sa’ xb’een li junjunq qe sa’ junesal li k’iik sa’ musiq’ej. Ut eb’ li loq’laj hu neke’xk’ut chi saqen ru naq teneb’anb’il sa’ xb’eeneb’ li na’b’ej yuwa’b’ej xk’utb’al li evangelio chiruheb’ li ralal xk’ajol.² Taqlanb’il chaq sa’ choxa naq teneb’anb’il sa’ xb’een li Iglees xtenq’ankil li junjunq komon chixnimob’resinkil lix nawom chirix li evangelio

Anajwan, li Elder Quentin L. Cook tixch’olob’eb’ li aajel ruhil jalok a’in. Junajinb’ileb’ chixjunileb’ li komon sa’ lix Ch’utam li Xb’eenil Awa’b’ejil ut lix Molameb’ li Kab’laju chi Apostol sa’ li esil a’in. Naqak’e reetal rik’in qab’antioxihom lix musiq’anb’il na’leb’ li Qaawa’ li kixb’eresi lix yiib’ankileb’ li k’uub’anb’il na’leb’ ut k’anjel li te’k’utb’esiiq xb’aan li Elder Cook.

Ex was wiitz’in raarookex inb’aan, ninnaw naq yo’yo li Dios! Li Jesus a’an li Kristo! A’an a’in lix Iglees li naxb’eresi rik’in profeetil aatin ut li k’utb’esihom chiruheb’ lix tuulanil moos. Chirix a’in ninch’olob’ xyaalal sa’ xk’ab’a’ li Jesukristo, amen.