Lix k’anjel lix Hu laj Mormon sa’ li jalok ch’oolej

Sa’ Predicad mi Evangelio, naqil: “Chijultiko’q aawe naq li naqataw ru [chirix li qaChoxahil Yuwa’ ut lix k’uub’anb’il na’leb’ re sahil ch’oolejil] nachal rik’ineb’ li profeet re qakutankil—laj Jose Smith ut li neke’chal chirix—li neke’xk’ul li k’utb’esinb’il na’leb’ tz’aqal rik’in li Dios. Jok’an naq, li xb’een patz’om li tento tixsume raj raj anihaq, a’an ma yaal naq laj Jose Smith kiwan choq’ profeet, ut naru xsumenkil li patz’om a’an rik’in rilb’al ru ut tijok chirix lix Hu laj Mormon.”²

Lix nawom inch’ool chirix lix choxahil b’oqb’al li Profeet aj Jose Smith ak nakawob’resiik xb’aan xtzolb’al rik’in tijok lix Hu laj Mormon: Jun chik ch’olob’anb’il esil chirix li Jesukristo. Ak inb’aanuhom lix b’oqom laj Moroni re “xpatz’b’al re li Dios, li Junelik Yuwa’b’ej, sa’ lix k’ab’a’ li Kristo,” re xnawb’al ma yaal lix Hu laj Mormon.³ Ninch’olob’ xyaalal naq ninnaw naq yaal. Li nawom a’an xchal wik’in, jo’ naru taachalq aawik’in laa’at, “rik’in lix wankil li Santil Musiq’ej.”⁴

Lix tikib’ankil lix Hu laj Mormon naxye; “Ebʼ li nekeʼkʼuluk re chi joʼkan li choxahil yaal [chirix lix Hu laj Mormon] kʼutbʼil xbʼaan li Loqʼlaj Musiqʼej teʼxnaw ajwiʼ rikʼin li wankilal ajwiʼ aʼan naq li Jesukristo aʼan aj Kolol re li ruchichʼochʼ, naq laj Jose Smith aʼan laj kʼutbʼesinel ut profeet chiru saʼebʼ li rosoʼjik kutan aʼin, ut naq Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan aʼan lix awaʼbʼejihom li Qaawaʼ, xaqabʼanbʼil jun sut chik saʼ li ruchichʼochʼ, roybʼeninkil lix kabʼ xkʼulunik li Mesias.”⁵

Jo’ saaj misioneer xik we aran Chile, xintzol jun na’leb’ li tixjal inyu’am chirix lix wankilal lix Hu laj Mormon re jalok ch’oolej. Li Qawa’ Gonzales kik’anjelak sa’ jun oxloq’inb’il xb’oqb’al sa’ lix iglees chiru k’iila chihab’. Naab’al lix tzolom chirix li paab’ank, jo’ ajwi’ lix licenciatura chirix li teologia xk’ulum. Nim lix nawom chirix li Santil Hu. Ch’olch’o naq a’an jun aj nawonel ru li paab’ank.

Naxnaw ajwi’ chirixeb’ li misioneer re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan li yookeb’ chi k’anjelak sa’ lix tenamit aran Lima, Peru. Junelik naraj xtawb’aleb’ re naq taaruuq tixk’ut lix nimal lix nawom chirix li Santil Hu chiruheb’.

Sa’ jun li kutan, chanchan jun maatan li nachal sa’ choxa, jo’ xk’oxla a’an, wiib’ li misioneer xe’xxaqab’ sa’ li b’e ut xe’xpatz’ re ma te’ruuq chi chalk sa’ rochoch re xwotzb’aleb’ li loq’laj hu rik’in. A’an a’in li royb’enihom! Xe’sumeek lix tij. Anajwan ut, taaruuq tixtijeb’ li saajeb’ winq sachenaqeb’ a’in. Xye reheb’ naq sahaq xch’ool chixk’ulb’aleb’ sa’ rochoch re aatinak chirixeb’ li loq’laj hu.

Jwal ch’a’aj chiru royb’eninkil naq te’chalq. Yoo’on wan re roksinkil li Santil Hu re xk’utb’al xmajelaleb’ xpaab’aal. Xpaab’ chi kaw xch’ool naq li Santil Hu tixk’ut chi saqen ru ut chi ch’olch’o li sachk wan wi’ lix b’eheb’. Xwulak xhoonalil naq te’chalq, ut eb’ li misioneer xe’xtoch’ rokeb’aal li rochoch. Jwal sa sa xch’ool. Anajwan ut lix hoonal a’an.

A’an xte li okeb’aal ut xb’oqeb’ chi ok li misioneer sa’ rochoch. Jun reheb’ li misioneer xk’e re jun tasal hu rax rix ut xwotz xnawom xch’ool chi maak’a’ xb’alaq’ naq naxnaw naq wan li raatin li Dios chi sa’ li hu a’an. Li misioneer jun chik xch’olob’ ajwi’ xyaalal li hu rik’in wankilal, xch’olob’ankil xyaalal naq kijaltesiik ru xb’aan jun xprofeet li Dios, laj Jose Smith xk’ab’a’, ut naq nak’utuk chirix li Kristo. Eb’ li misioneer xe’xb’antioxi re ut xkoheb’.

Xraho’ b’ayaq xch’ool li Qawa’ Gonzalez. A’b’an xte li hu ut x’ok chireek’asinkileb’ xperel. Xril ru li xb’een perel. Chirix a’an xril ru jun chik ut jun chik ut jun chik ut ink’a’ xkanab’ rilb’al ru toj sa’ ewu re li kutan jun chik. Xril ru chixjunil li hu ut xnaw naq tz’aqal yaal. Xnaw li tento tixb’aanu. A’an xb’oqeb’ li misioneer, xk’uleb’ li tzolok, ut xkanab’ chirix lix junxil yu’am re taa’ok choq’ komon sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

Li chaab’il winq a’an, a’an aj k’utunel we sa’ li CCM sa’ Provo, Utah. Li esil chirix lix jalajik xch’ool li Hermano Gonzalez ut lix wankil lix Hu laj Mormon jwal wi’chik xtoch’ inch’ool.

Naq xinwulak chaq aran Chile, li awa’b’ej re lin mision, li Awa’b’ej Royden J. Glade, xooxb’oq chirilb’al ru lix nawom xch’ool li Profeet aj Jose Smith li tz’iib’anb’il sa’ li hu Jose Smith—Resilal ut naq taqab’aanu rajlal xamaan. A’an xk’ut chiqu naq jun xnawom ch’oolej chirix li Xb’een K’utb’esink taawanq tz’aqal rilom rik’in xnawom qach’ool chirix li evangelio ut chirix lix Hu laj Mormon.

Xinpaab’ chi tz’aqal lix b’oqom. Wilom ruheb’ li esil chirix li Xb’een K’utb’esink; wilom ru lix Hu laj Mormon. Xintijok jo’ k’utb’il xb’aan laj Moroni ut xinpatz’ re “Dios, li Junelik Yuwa’b’ej, sa’ lix k’ab’a’ li Kristo”⁶ ma yaal lix Hu laj Mormon. Ninch’olob’ xyaalal anajwan naq ninnaw naq lix Hu laj Mormon, jo’ kixye li Profeet aj Jose Smith, a’an “li hu q’axal ch’olch’o ru wan sa’ li ruchich’och’, ut a’an li taqenaqil pek li xaqab’anb’il wi’ li qapaab’aal, ut jun li winq q’axal wi’chik taaruuq chixjilosinkil rib’ rik’in li Dios rik’in xpaab’ankil li na’leb’ wan chi sa’, chiru k’a’ruhaq chik chi hu.”⁷ Li Profeet aj Jose Smith kixye ajwi’: “Chi maak’a’ lix Hu laj Mormon ut chi maak’a’eb’ li k’utb’esinb’il na’leb’, ut b’ar wan li qapaab’aal? Maak’a’ ut.”⁸

Naq naniman qanawom chirix aniho ut chirixeb’ li rajom lix Hu laj Mormon, naniman ajwi’ lix jalajik qach’ool ut ch’olch’ooq chik ru. Nokokawob’resiik sa’ li qateneb’ankil chixpaab’ankileb’ li sumwank xoo’ok wi’ rik’in li Dios.

Jun reheb’ li tz’aqal rajom lix Hu laj Mormon, a’an xch’utub’ankil laj Israel li jek’inb’ileb’. Li ch’utub’ank a’in naxk’e re chixjunil li rajal xk’ajol li Dios li hoonal re ok sa’ xb’ehil li sumwank ut, rik’in roxloq’inkileb’ li sumwank a’an, q’ajk chiru rilob’aal li Yuwa’b’ej. Naq naqak’ut li jalb’a-k’a’uxlej ut naqakub’siheb’ xha’ li kristiaan, yooko chixch’utub’ankil laj Israel li jek’inb’ileb’.

Sa’ lix Hu laj Mormon nak’utman resil lix junkab’al aj Israel 108 sut. Sa’ xtiklajik lix Hu laj Mormon, laj Nefi kixk’ut, “Xbʼaan naq lix tzʼaqalil li wajom, aʼan naq tinqʼunbʼesihebʼ xchʼool li winq re naq teʼchalq rikʼin lix Dios laj Abraham, ut lix Dios laj Isaak, ut lix Dios laj Jakob, ut te’kole’q.”⁹ Lix Dios laj Abraham, laj Isaak, ut laj Jakob, a’an ajwi’ li Jesukristo, li Dios re li Najter Chaq’rab’. Nokokole’ naq nokochal rik’in li Kristo rik’in lix yo’yookil evangelio.

Moqon, laj Nefi kixtz’iib’a:

“Relik chi yaal, naabʼal ajwiʼ kiʼaatinak lin yuwaʼ chirixebʼ laj Gentil, ut joʼkan ajwiʼ chirix lix junkabʼal laj Israel, naq teʼjuntaqʼeetaaq rikʼin jun xtoonal li cheʼ olivo, naq teʼtoqeʼq li ruqʼ ut teʼjekʼiiq chiru chixjunil lix xbʼeen li ruchichʼochʼ. …

“Ut chirix naq teʼjekʼiiq lix junkabʼal laj Israel teʼchʼutubʼaaq wiʼchik; malaj ut naq ak xeʼxkʼul laj Gentil lix tzʼaqalil li Evangelio, li tzʼaqal ruqʼ lix toonal li cheʼ olivo, malaj ebʼ li relaʼ lix junkabʼal laj Israel, teʼletzeʼq wiʼchik saʼ xtoonal, malaj teʼkʼameʼq chixnawbʼal chirix li tzʼaqal Mesias, aʼan lix Qaawaʼebʼ ut laj Tojol rixebʼ.”¹⁰

Jo’kan ajwi’, sa’ xraqik lix Hu laj Mormon, li profeet aj Moroni naxjultikaheb’ qe li qasumwank. A’an naxye, “Re naq inkʼaʼ chik taasachq aanaʼlebʼ, re naq lix sumwank li Junelik Yuwaʼbʼej li kixkʼuubʼ aawikʼin, at xjunkabʼal laj Israel, taaruuq chi tzʼaqlok ru.”¹¹

K’a’ruheb’ “lix sumwank li Junelik Yuwaʼbʼej” yeeb’ileb’ resil xb’aan laj Moroni? Naqil ru sa’ lix Hu laj Abraham:

“Lin kʼabʼaʼ aʼan li Jehova, ut ninnaw li rosoʼjik chalen chaq saʼ lix tiklajik; joʼkan naq li wuqʼ taawanq saʼ aabʼeen.

“Ut aawikʼin tinyiibʼ jun xnimal ru tenamit, ut tatwosobʼtesi chi qʼaxenaq xbʼisbʼal, ut tinnimobʼresi ru laa kʼabʼaʼ saʼ xyanqebʼ chixjunil li tenamit, ut tatwanq choqʼ osobʼtesink chiruhebʼ laa wiyajil moqon chik chawix, re naq saʼ ruqʼebʼ aʼan teʼxkʼam li kʼanjel ut li Tijonelil aʼin rikʼinebʼ chixjunil li tenamit.”¹²

Li Awa’b’ej Russell M. Nelson toje’ xk’ut sa’ jun ch’utam choq’ re chixjunil li ruchich’och’ naq “relik chi yaal naq a’aneb’ a’in li roso’jikeb’ li kutan, ut li Qaawa’ yoo chixseeb’ob’resinkil lix k’anjel re xch’utub’ankil Israel. Li ch’utub’ank a’an li k’anjel q’axal aajel ru li yoo chi k’ulmank sa’ li ruchich’och’ anajwan. Maak’a’ chik naru xjuntaq’eetankil rik’in lix nimal ru, rik’in lix aajelil ru, rik’in lix loq’alil. Ut wi nakasik’ ru, wi nakawaj, naru naq nimaq laa tz’aqonik sa’ li k’anjel a’an. Naru naq nimaq aatz’aqonik sa’ jun k’anjel nim ru, chaq’al ru, ut loq’!

“Naq noko’aatinak chirix li ch’utub’ank, ka’ajwi’ naqaye li yaalil na’leb’ aj k’ojob’anel a’in: chixjunileb’ li ralal xk’ajol li qaChoxahil Yuwa’, sa’ xka’pak’alil li tz’apleb’ t’ikr, xk’ulub’eb’ re rab’inkil li esil chirix lix evangelio li Jesukristo k’ojob’anb’il wi’chik. Xjuneseb’ rib’ neke’xsik’ ru ma te’raj xnawb’al xkomon.”¹³

A’an a’in li yooko chixb’aanunkil jo’ komon sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan: laa’o naqaj xk’eeb’al li ruchich’och’ chixtawb’al ru—ut chixjalb’al xch’ool rik’in—lix evangelio li Jesukristo. Laa’o “laj ch’utub’anel re roso’jikeb’ li kutan.”¹⁴ Saqen ru li qak’anjel. Ex was wiitz’in, chinawe’q qu jo’ eb’ li neke’xk’uula sa’ xch’ooleb’ lix yeechi’ihom laj Moroni, li xe’tijok ut xe’xk’ul xsumehom naq yaal lix Hu laj Mormon, toja’ naq xe’xwotz li nawom a’an rik’ineb’ li ras riitz’in sa’ li ruchich’och’ rik’in raatineb’, ut chi aajel wi’chik ru chiru a’an, rik’in xb’aanuhomeb’.

Wan chi sa’ lix Hu laj Mormon lix tz’aqalil lix evangelio li Jesukristo.¹⁵ Nokoxk’am rik’ineb’ lix sumwank li Yuwa’b’ej, li te’xk’e qe lix maatan k’a’jo’ xnimal ru wi taqapaabeb’—li yu’am maak’a’ roso’jik.¹⁶ Lix Hu laj Mormon a’an li taqenaqil pek re li jalok ch’oolej choq’ reheb’ chixjunileb’ li ralal xk’ajol li qaChoxahil Yuwa’.

Nawoksi wi’chik li raatin li Awa’b’ej Nelson: “Naq laa’at … nakawil ru lix Hu laj Mormon wulaj wulaj, taatzol li tzol’leb’ chirix li ch’utub’ank, eb’ li yaalil na’leb’ chirix li Jesukristo, lix tojb’al rix li maak kixb’aanu, ut lix tz’aqalil lix evangelio li moko neke’tawman ta sa’ li Santil Hu. Lix Hu laj Mormon a’an tz’aqal xyi lix ch’utub’ankil Israel. Relik chi yaal, wi ta maak’a’ lix Hu laj Mormon, ink’a’ taak’ulmanq raj lix yeechi’inb’il ch’utub’ankil laj Israel.”¹⁷

Tinraq li waatin rik’ineb’ li raatin li Kolonel naq kixk’ut chiruheb’ laj Nefita li yeechi’inb’il osob’tesihom: “Ut kʼehomaq reetal, laaʼex ralal xkʼajol li profeet; ut laaʼex xkomonex lix junkabʼal laj Israel; ut laaʼex wankex saʼ li sumwank li kixkʼuubʼ li Yuwaʼbʼej rikʼinebʼ lee yuwaʼ naq kixye re laj Abraham: Ut rikʼinebʼ laa wiyajil teʼosobʼtesiiq chixjunilebʼ li junkabʼal re li ruchichʼochʼ.”¹⁸

Ninch’olob’ xyaalal naq ralal xk’ajolo li Dios, li riyajil laj Abraham, lix junkab’al laj Israel. Yooko chixch’utub’ankil Israel li jun sutaq chik ut yooko chixb’aanunkil rik’in lix Hu laj Mormon—jun li hu, naq junajinb’il rik’in lix Musiq’ li Qaawa’, a’an jun reheb’ li k’anjeleb’aal k’a’jo’ xnimal xwankil re jalok ch’oolej. B’eresinb’ilo xb’aan lix profeet li Dios, li Awa’b’ej Russell M. Nelson, li yoo chixb’eresinkil lix ch’utub’ankil Israel sa’ li qakutankil. Tz’aqal yaal lix Hu laj Mormon. Xjala inyu’am xb’aan li hu a’an. Ninyeechi’i aawe, jo’ kixb’aanu laj Mormon ut naab’aleb’ chik li profeet chiru xq’ehil li ruchich’och’, naq naru ajwi’ tixjal laa yu’am.¹⁹ Sa’ xk’ab’a’ li Jesukristo, amen.