E Pei ona sa Ia Faia

Pe tusa ma le 18 masina talu ai, i le tautoulu o le 2017, na faailoa mai ai e lo’u uso o Mika e 64 tausaga ua maua o ia i le kanesa o le ate. Sa ia ta’u mai ia te a’u sa ia maua se faamanuiaga faaleperisitua mai lona faiaoga o aiga, lea sa la feiloai foi ma lana epikopo. Sa ia tesi mai foi ia te a’u se ata o le Malumalu o Oakland Kalefonia na pu’e mai le falema’i i le mea sa faia ai ona togafitiga, ma le faaupuga “Tagai i le mea e mafai ona ou vaai i ai mai lo’u potu i le falema’i.”¹

Sa ou te’i i ana faamatalaga e uiga i faiaoga o aiga, faamanuiaga faaleperisitua, epikopo, ma malumalu e pei lava foi e uiga i le kanesa. Tou te silafia, o Mika, o se ositaulaga i le Perisitua Arona, na seasea auai i le lotu mo le toeitiiti 50 tausaga.

I le avea ai ma se aiga, sa toetoe tutusa le matou naunau atu i lona alualu i luma faaleagaga e pei o lona alualu i luma i le tauiviga ma le kanesa, masalo ona o ana fesili faisoo i le taimi nei e uiga i le Tusi a Mamona, le mana o faamauga, ma le olaga pe a mavae le oti. A o faagasolo masina ma sosolo pea le kanesa, o se manaoga mo nisi togafitiga sili atu ona faapitoa na aumai ai Mika i Iuta ma le Huntsman Cancer Center.

I se taimi puupuu talu lona taunuu, na asia ai Mika e John Holbrook, taitai misiona a le uarota lea e i ai le nofoaga tausimai lea o loo ia nofo ai nei. Fai mai John, “na manino ia te a’u o Mika o se atalii o le Atua” ma sa lei umi ae la atia’e se sootaga ma se faigauo, lea na oo atu ai i le avea o John ma uso o auaunaga mo Mika e ui e le’i tofia . Sa i ai se valaaulia vave e asiasi mai faifeautalai, lea na teena ma le faaaloalo e lo’u uso, ae o le masina talu le la faigauo, na toe fesili ai John, ma faamalamalama atu ia Mika, “Ou te manatu o le a e fiafia e faalogo i le savali o le talalelei.”² O le taimi la lea na taliaina ai le valaaulia, ma taitai atu ai i feiloaiga faifaipea ma faifeautalai, atoa ai foi ma asiasiga mai ia Epikopo Jon Sharp, o ana talanoaga na i’u ina taitai atu ai i le mauaina e Mika o lona faamanuiaga faapeteriaka, 57 tausaga talu lona papatisoga.

I le amataga o Tesema o le tausaga ua mavae, i le mavae ai o masina o togafitiga, na filifili ai Mika e taofi togafitiga o le kanesa, lea e mafua ai ni aafiaga ogaoga, ae tuu po o a lava taunuuga e oo i ai. Sa faailoa mai ia i matou e lana foma’i pe toe tolu masina e ola ai Mika. I lea lava taimi, sa faaauau pea fesili o le talalelei—faapena foi ma asiasiga ma le lagolago o ana taitai perisitua i le lotoifale. I a matou asiasiga ia Mika e masani ona matou vaaia se kopi o le Tusi a Mamona o tatala i luga o le laulau o le moega a o matou talanoa i le Toefuataiga o le talalelei, ki o le perisitua, sauniga o le malumalu, ma le natura e faavavau o le tagata.

E oo atu i le ogatotonu o Tesema, faatasi ai ma lona faamanuiaga faapeteriaka i lona lima, na foliga mai ua maua e Mika le malosi ma o lona faamoemoe ia aulia se isi tolu masina na foliga lelei mai. Sa matou faia foi ni fuafuaga mo ia e faatasi ma i matou mo le Kerisimasi, le Tausaga Fou ma tala atu. I le aso 16 o Tesema, sa ou maua se valaau faate’ia mai ia Epikopo Sharp, e ta’u mai ai ia te a’u sa la faatalanoaina ma le peresitene o le siteki ia Mika, o loo agavaa o ia e maua le Perisitua Mekisateko, ma fesili mai po o afea ou te avanoa ai e auai atu. Sa faatulagaina le sauniga mo le Aso Faraile, aso 21 o Tesema.

Ina ua oo i lea aso, sa ma taunuu atu ma lo’u toalua, o Carol, i le nofoaga tausimai ma faafuasei lava ona faafeiloai ma’ua i le auala savali e lata i lona potu ma logo mai ai e le o tata [le fatu] o Mika. Sa ma ulu atu i le potu ma tau atu i le peteriaka, lona epikopo, ma lona peresitene o le siteki o loo faatali mai—ona pupula mai lea o Mika. Sa ia iloaina a’u ma faailoa mai e mafai ona ia lagonaina mai a’u ma ua sauni ina ia maua le perisitua. Limasefulu tausaga talu ona faauuina Mika o se ositaulaga i le Perisitua Arona, sa ou maua le avanoa, ma le fesoasoani a ona taitai faalelotoifale, e faaee atu ai le Perisitua Mekisateko ma faauuina lo’u uso i le tofi o le toeaina. I le lima itula mulimuli ane, na maliu ai Mika, ma laasia ai le veli e feiloai ma o ma’ua matua o se tasi e umia le Perisitua Mekisateko.

I le na o le tasi le tausaga ua mavae, na tuuina mai ai se valaau e Peresitene Russell M. Nelson mo i tatou taitoatasi e tausia o tatou uso ma tuafafine i se “auala maualuga atu, ma paia atu.”³ O le talanoa ai e uiga i le Faaola, na aoao mai ai Peresitene Nelson faapea “ona o Lana Ekalesia lenei, o i tatou o Ana auauna o le a auauna atu i le tasi, e pei ona sa Ia faia. O le a tatou auauna atu i Lona suafa, i Lona mana ma le pule, ma i Lona agalelei alofa.”⁴

I le tali atu i le valaaulia a se perofeta a le Atua, o loo faagasolo ni taumafaiga ofoofogia e auauna atu ai i le toatasi i le lalolagi atoa, i taumafaiga tuufaatasia uma, a o faataunuu ma le faamaoni e tagata o le ekalesia o latou tofiga faaleauaunaga, faapea foi ma le mea ou te ta’ua o le auaunaga “e lei fuafuaina”, faapea ma le tele o le faaaliga o le alofa FaaKeriso i le tali atu i avanoa e le’i faamoemoeina. I lo matou lava aiga, sa matou molimauina patino, lenei ituaiga o auaunaga.

E masani ona ta’u e John, lea sa avea ma se peresitene o le misiona, le uo a Mika ma le uso o auaunaga, i ana faifeautalai faapea, “afai e fai mai se tasi o loo i le lisi ‘e le o manao i ai,’ aua e te faavaivai ai. E suia tagata.” Ona ia ta’u mai lea ia i matou, “na maoae le suiga o Mika.”⁵ Na muamua avea John ma se uo, tuuina atu faamalosiauga ma le lagolago faifai pea—ae sa le’i muta lana auaunaga i asiasiga faaleuo. Na silafia e John o se auaunaga e sili atu nai lo se uo ma e faalauteleina lena faigauo a o tatou auauna atu.

E le manaomia mo se tasi o mafatia mai se ma’i o loo lamatia ai le ola ona manaomiaina se tautua faaleauaunaga. O na manaoga e oo mai i foliga eseese, tetelē, ma tulaga eseese. O se matua nofotoatasi, se ulugalii e le toaaga mai, se talavou o loo tauivi, tina lofituina, se tofotofoga o le faatuatua, faafitauli tau tupe, soifua maloloina, po o faaipoipoga—e toetoe lava a le muta le lisi. Peitai, faapei o lo’u uso o Mika, e leai lava se tasi ua oo i se tulaga e le manaomia ai se fesoasoani, ma e le o tuai lava mo le aapa mai ma le alofa o le Faaola.

Ua aoaoina i tatou i le uepisaite o Auaunaga a le Ekalesia faapea, “e ui ina tele faamoemoega o le auaunaga, ae o a tatou taumafaiga e tatau ona taialaina e le manao e fesoasoani i isi e ausia se liua loloto patino ma avea atili ai e pei o le Faaola.”⁶ Sa saunoa mai Elder Neal A. Maxwell i le ala lenei:

“O se tagata e i ai se loto lelei e mafai ona fesoasoani i se tasi e fai se pa’u [ua pa], ave se tuaoi i le fomai, fai se taumafataga o le aoauli ma se tasi o faanoanoa, pe ‘ata’ata ma fai atu talofa e faafiafia ai se aso.

“Ae o sē mulimuli i le poloaiga muamua o le a faaopoopo lava e pei ona masani ai i nei faatinoga taua o le auaunaga.”⁷

O le mamanuina ai o a tatou auaunaga ia Iesu Keriso, e taua ona manatua o Ana taumafaiga e alofa, siitia, auauna atu, ma faamanuia atu sa i ai se sini maualuga atu nai lo o le taulimaina o le manaoga vave. Na Ia silafia manino lava o latou manaoga i lea aso ma lea aso ma sa i ai le agaalofa i o latou mafatiaga i lea taimi a o Ia faamaloloina, fafaga, faamagalo, ma aoao atu. Ae sa finagalo o Ia e faia ni mea se tele atu nai lo o le taulimaina o le asō. Na Ia finagalo ia i latou na siomiaina o Ia e mulimuli atu ia te Ia, iloa o Ia, ma ausia o latou faamoemoega paia.⁸

A tatou saili e auauna atu “e pei ona sa Ia faia,”⁹ o le a tatou maua avanoa e faagalo ai i tatou lava ae siitia a’e isi. O nei avanoa atonu e tele ina lē faigofie, o le tofotofoina o lo tatou manao ia avea atili faapei o le Matai, o lē ana le auaunaga silisili o auaunaga uma, o Lana Togiola le i’u, sa le’i faigofie. I le Mataio mataupu 25, ua faamanatu mai ai ia i tatou lagona o le Alii e uiga ia i tatou, pe a pei o Ia, tatou te nofouta i tauiviga, tofotofoga, ma luitau o fetaiai ma le toatele, ae e masani ona laaloa ai le vaai:

“O mai ia, o outou ua faamanuiaina e lo’u Tama, ia fai mo outou tofi le malo ua saunia mo outou a o lei faavaeina le lalolagi:

“Aua na ou fia ‘ai ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai, sa fai a’u ma tagata ese, ona outou talia lea o a’u. …

“Ona tali mai ai lea ia te ia o e amiotonu, e faapea mai, Le Alii e, o anafea ua matou iloa ai oe ua fia ‘ai ma matou fagaina oe? po o fia inu, ma matou avane e te inu ai?

“O anafea foi na matou iloa ai oe o le tagata ese, ma matou talia oe? …

“Ona tali atu ai lea o le Tupu, e faapea atu ia te i latou, E moni, ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai.”¹⁰

Pe o tatou auauna atu o ni uso po o tuafafine o auaunaga, pe na o le taimi lava tatou te iloa ai se tasi o mafatia, ua uunaia i tatou e saili le taiala ma le taitaiga a le Agaga—ona faatinoa lea. Atonu tatou te mafaufau po o le a le auala sili e auauna atu ai, ae e silafia e le Alii, ma e ala atu i Lona Agaga o le a taitaiina ai i tatou i a tatou taumafaiga. E pei o Nifae, o lē “sa taitai … e le Agaga, ona sa ou le muai iloa muamua mea e tatau ona [ia] faia,”¹¹ o le a taitaiina foi i tatou e le Agaga a o tatou taumafai e avea ma meafaigaluega i aao o le Alii e faamanuia Ana fanau. A o tatou saili atu i le taitaiga a le Agaga ma faalagolago i le Alii, o le a tuu i tatou i ni tulaga ma avanoa e mafai ai ona tatou galulue ma faamanuia atu—i nisi upu, auauna atu.

Atonu e i ai nisi taimi tatou te iloa ai se manaoga ae lagona e le gafatia ona tali atu i ai, ma manatu ai e lē lava mea ua ia i tatou e ofo atu. O le faia “e pei ona sa Ia faia”¹² o le auauna atu lea e ala i le tuuina atu o mea tatou te mafai ona tuuina atu ma faatuatuaina o le a faalauteleina e le Alii a tatou taumafaiga e faamanuia “ē o tatou tagata malaga faatasi i lenei faigamalaga o le olaga.”¹³ Mo nisi, atonu o le tuuina atu o le meaalofa o taimi ma taleni; mo isi, atonu o se upu alofa po o se fesoasoaniga faaletino. E ui atonu tatou te lagona le lē lava o a tatou taumafaiga, ae na faasoa mai e Peresitene Dallin H. Oaks se mataupu faavae taua e faatatau i le “laitiiti ma faatauvaa.” Na ia aoao mai faapea o galuega laiti ma faatauvaa e mamana ona latou te valaauliaina “le mafutaga a le Agaga Paia,”¹⁴ o se soa e faamanuia uma lē e foai ma lē e taliaina.

O le iloaina o le a lē umi ae maliu o ia, na fai mai ai lo’u uso o Mika, “E ofoofogia le ala e mafai ai e le kanesa o le ate ona faia oe ia e taulai atu i mea e sili ona taua.”¹⁵ Faafetai i alii ma tamaitai lelei o ē na iloa atu se manaoga, sa le’i faamasino atu, ae na auauna atu faapei o le Faaola, sa le’i tuai lea mo Mika. Mo nisi, o suiga e ono oo vave mai; mo isi, masalo o tua atu o le veli. Peitai, e tatau ona tatou manatua e le tuai lava ma e leai se tasi ua sē mamao ese mai le ala latou te lē mafai ai ona maua le Togiola le i’u a Iesu Keriso, lea e lē faatapulaaina lona umi ma le lautele.

I le konafesi aoao ia Oketopa ua te’a, na aoao mai ai Elder Dale G. Renlund faapea “pe o le a le umi tatou te le’i i ai i le ala … o le taimi lava tatou te filifili ai ia sui, e fesoasoani mai le Atua ia tatou toe foi mai.”¹⁶ Peitai, o le filifiliga e sui e masani lava o le taunuuga o se valaaulia, e pei o le “ou te manatu o le a e fiafia e faalogo i savali o le talalelei.” E pei lava ona le o tuai tele mo le Faaola, e le o vave tele foi e tuuina atu se valaaulia.

Ua toe tuuina mai foi i lenei vaitau o le Eseta, se avanoa mamalu e tomanatu ai i le taulaga togiola maoae a lo tatou Faaola o Iesu Keriso, atoa ai ma mea sa Ia faia mo i tatou taitoatasi i se tau maoae—o se tau na tautino mai lava Ia “na oo ai ia te [Ia], o le ua silisili i tagata uma, le gatete ona o le tiga.” “E ui i lea,” na Ia fetalai mai, “sa Ou inu ma faauma ai a’u tapenapenaga mo le fanauga a tagata.”¹⁷

Ou te molimau atu ona ua Ia “faaumaina,” e lē muta le faamoemoe. I le suafa, o Iesu Keriso, amene.