“Sau, Mulimuli Mai ia te A’u”

O’u uso e ma tuafafine pele, ua ma fiafia lava ma lo’u toalua o Wendy e faatasi ma outou i lenei taeao o le Sapati. E tele mea ua tutupu talu mai le tatou konafesi aoao talu ai. Ua faapaiaina malumalu fou i Concepción, Chile; Barranquilla, Kolomupia; ma Roma, Italia. Ua tatou lagonaina se liligi faaūa mai o le Agaga i nei mea paia na tutupu.

Ou te faamalo atu i le toatele o tamaitai (ma alii) ua faitauina talu ai nei le Tusi a Mamona ma maua ai le olioli ma oa natia. Ua musuia lava a’u i lipoti e uiga i vavega ua mauaina.

Ou te maofa i alii talavou ta’i 11-tausaga-le-matutua o ē, ua avea nei ma tiakono, ua tufa atu ma le agavaa le faamanatuga i Aso Sa taitasi. Ua latou ō atu i le malumalu faatasi ma tamaitai talavou ta’i 11-tausaga-le-matutua, o ē ua aoao ma auauna atu nei ma le naunautai o ni Ofagāpi. O loo tala’i atu e alii talavou ma tamaitai talavou uma ia upumoni o le talalelei ma le manino ma le talitonuga maumaututu.

Ou te olioli i fanauiti ma le autalavou o loo fesoasoani e aoao atu le talalelei i totonu o o latou aiga a o latou galulue faatasi ai ma o latou matua e mulimuli i le mataupu aoaoina e faatotonugalemu-i-le-aiga, ma lagolagoina-e-le-Ekalesia.

Na matou mauaina lenei ata o Blake e fa-tausaga-le-matua, o lē, i le taeaopo lava o se Aso Toonai na ia toso maia se tusi Lotu ma alaga, “Ua manaomia ona ou fafaga lo’u agaga!”

Blake, ua faagaeetia lava matou ia te oe ma isi o loo filifili e fafaga o latou agaga e ala i le taumamafa i upumoni o le talalelei toefuataiina a Iesu Keriso. Ma ua matou fiafia i le iloaina e toatele o loo mauaina le mana o le Atua i o latou olaga a o latou tapuai ma auauna atu i le malumalu.

E pei ona silafia e le toatele o outou, sa oo lo matou aiga i se tete’aga faamomoiloto i le tolu masina talu ai ina ua tuua e lo ma afafine o Wendy lenei olaga faaletino. I aso faaiu o lana tauiviga ma le kanesa, sa faamanuiaina ai a’u i le avanoa na faia ai le ma talanoaga faamavae o se tamā-ma-se-afafine.

Sa ou uuina lona lima ma ta’u atu ia te ia le tele o lo’u alofa ia te ia ma lo’u lotofaafetai i le avea ai o a’u ma ona tamā. Sa ou fai i ai: “Sa e faaipoipo i le malumalu ma faamamaluina ma le faamaoni au feagaiga. Sa oulua talisapaiaina ma lau tane ni fanau se toafitu i le lua aiga ma tausi a’e i latou ia avea ma ni soo tuuto o Iesu Keriso, ni tagata totoa o le Ekalesia, ma ni tagatanuu faisaofaga. Ma ua latou filifilia ni taitoalua e i ai na lava uiga auau mama e tasi. Ua matua mitamita tele lou tamā ia te oe. Ua e aumaia ia te a’u se olioli tele!”

Sa ia tali lemu mai, “Faafetai, Tamā.”

O se taimi faamomoiloto ma loimata maligi mo i ma’ua. I lona olaga 67 tausaga, na ma galulue faatasi ai, pepese faatasi, ma sa tele ina faasee faatasi i le aisa. Ae i lena afiafi, sa ma talanoa i mea sa sili atu ona taua, e pei o feagaiga, sauniga, usiusitai, faatuatua, aiga, faamaoni a’ia’i [i le va ma le toalua], alofa, ma le ola e faavavau.

Ua ma misia tele le ma afafine. Peitai, ona o le talalelei toefuataiina a Iesu Keriso, matou te lē popole ai ia te ia. A faaauau pea ona matou faamamalu i a matou feagaiga ma le Atua, matou te ola ma tulimatai atu e toefaatasi ma ia. O le taimi nei, o loo matou auauna i le Alii iinei ae o loo ia auauna ia te Ia iina—i le parataiso.¹

O le mea moni, sa ma asiasi atu ma lo’u toalua i Parataiso i le amataga o lenei tausaga—O Parataiso, Kalefonia. E pei ona tupu ai, sa faatulagaina ai le matou asiasiga iina e itiiti ifo ma le 40 itula talu ona malaga ese atu lo ma afafaine mai lenei lalolagi. O ma’ua, faatasi ma Elder Kevin W. Pearson ma lona faletua, o June, sa faamalolosia e le Au Paia o le Siteki o Chico Kalefonia. Sa matou iloaina lo latou faatuatua tele, o ā latou auaunaga, atoa ai ma vavega na tutupu e oo lava i le taimi na maumauina ai a latou mea ma lotonutimomoia mai le afi sili ona faataumaoi i le talafaasolopito o Kalefionia.

A o i ai iina, sa umi se taimi o matou talanoa ma se alii leoleo talavou, o Ioane, o se tasi o le toatele o uluai tagata totoa na tali atu. Sa ia faamatalaina le mafiafia o le pogisa na oo ifo i luga o Parataiso i le aso 8 o Novema, 2018, a o sosolo saoasaoa atu le afi ma susunuina le aai, ma faatafunaina fale ma fanua ma meatotino e pei o se mala ma leai ma se mea na tuua ae na o faaputugā efuefu ma alaāsu piliki.

Mo le 15 itula, sa fealuai ai Ioane [i le taavale] i se pogisa mafiafia sa faatumulia i mea sa saoasaoa le susunuina ma le taufaamatau a o ia fesoasoani i lea tagata ma lea tagata, lea aiga ma lea aiga ia sosola ese atu i le saogalemu—ma faia na mea uma i le lamatia ai o lona lava ola. Ae i le taimi o lena luitau malosi, o le mea sa matua popole ai Ioane o lana fesili sili ona taua: “O fea ea lo’u aiga?” I le tele o itula uumi taufaamatau o lea tiga, sa mulimuli ane ia iloa sa aveese atu i latou i le saogalemu.

O le tala i le popolega o Ioane mo lona aiga ua uunaia ai a’u e talanoa atu i le asō ia te outou atonu o loo fesili pe a latalata atu i le faaiuga o lou olaga faaletino, “O fea ea lo’u aiga?” I lena aso o le a oo mai pe a e faamaeaina lou vaavaaiga faaletino ma ulufale atu i le lalolagi o agaga, o le a e faafesagai ma lena fesili faigata matuitui: “O fea o i ai lo’u aiga?”

Ua aoao mai e Iesu Keriso le ala e toefoi atu ai i lo tatou aiga e faavavau. E sili atu le malamalama o Ia i le fuafuaga a lo tatou Tama Faalelagi o le alualu i luma e faavavau nai lo se isi lava o i tatou. E sili i lo mea uma, o Ia o le maa ‘au’au o le fuafuaga atoa. O Ia o lo tatou Togiola, lo tatou Faamalologa, ma lo tatou Faaola.”

Talu mai le taimi ne tutuliese ai Atamu ma Eva mai le Faatoaga o Etena, ua ofo mai ai lava e Iesu Keriso Lona aao malosi e fesoasoani ia i latou uma o ē filifili e mulimuli ia te Ia. Ua tusia faatele i tusitusiga paia e faapea, e ui i ituaiga uma o agasala mai ituaiga uma o tagata, ae o loo faaloaloa mai pea Ona aao.²

O loo faananau fua mai le agaga i totonu o i tatou taitoatasi mo le alofa faaleaiga ia tumau e faavavau. O loo i ai pea i pese alofa faamama’i se manatu sese e faapea, o le alofa na o le pau lea o le mea e te manaomia pe afai e te manao ia faatasia e faavavau. Ma e talitonu sese nisi o le Toetu o Iesu Keriso ua maua ai se folafolaga o le a toe faatasi tagata uma ma ē pele ia i latou pe a mavae le oti.

O le mea moni, sa matua faamanino mai e le Faaola lava Ia e ui ua faamautinoa mai e Lona Toetu o le a toetutu moni tagata uma o ē soifua mai ma ola e faavavau,³ ae e tele atu isi mea e manaomia pe afai tatou te mananao ia maua le faamanuiaga maualuga o le faaeaga. O le faaolataga o se mataupu e patino i le tagata, ae o le faaeaga o se mataupu faaleaiga.

Faafofoga i upu nei na fetalai i ai le Alii o Iesu Keriso i Lana perofeta: “O feagaiga konekarate, ioega, tautinoga, tautoga, folafolaga, tu, sootaga, mafutaga, po o faamoemoega uma, e lē faia ma osia ma faamauina i le Agaga Paia o le folafolaga, … e leai se aoga, ‘auga, po o le malosi i le toetutu mai ma pe a mavae le toetutu mai le oti; ona o konekarate uma e le faia mo lenei faamoemoe e i ai se iuga pe a oti tagata.”⁴

O lea la, o le a le mea e manaomia mo se aiga ina ia faaeaina ai e faavavau? Tatou te agavaa mo lena faamanuiaga e ala i le osia o feagaiga ma le Atua, tausia o na feagaiga, ma le mauaina o sauniga taua.

E moni lenei mea talu mai le amataga o taimi. O Atamu ma Eva, Noa ma lana avā, Aperaamo ma Sarai, Liae ma Sarai, ma isi uma soo tuuto o Iesu Keriso—talu mai le foafoaga o le lalolagi—na osia ia lava feagaiga e tasi ma le Atua. Ua latou mauaina ia sauniga lava e tasi ia na tatou faia o ni tagata o le Ekalesia toefuataiina a le Alii i aso nei, o na sauniga ua tatou mauaina i le papatisoga ma i totonu o le malumalu.

Ua valaaulia e le Faaola tagata uma ia mulimuli atu ia te Ia i vai o le papatisoga ma, i le taimi e tatau ai, ia osia ni feagaiga faaopoopo ma le Atua i totonu o le malumalu ma maua ma faamaoni i na sauniga taua faaopoopo. E manaomia nei mea uma pe afai tatou te mananao ina ia faaeaina faatasi ma o tatou aiga ma le Atua e faavavau.

E tiga matuitui lo’u loto ona o le toatele o tagata o e ou te alofa i ai, o e ou te faamemelo i ai, ma o e ou te faaaloalo i ai e teenaina Lana valaaulia. Latou te le ano i aioiga a Iesu Keriso ina ua Ia augani mai, “Sau, mulimuli mai ia te au.”⁵

Ou te malamalama i le mafuaaga e tutulu ai le Atua.⁶ Ou te tagi foi mo ia uo ma tagata o aiga. O i latou o ni alii ma ni tamaitai lelei, e tuuto atu i o latou tiutetauave faaleaiga ma faalemalo. Latou te foai atu ma le agalelei o latou taimi, malosi, ma punaoa. Ma e lelei atu le lalolagi ona o a latou taumafaiga. Ae ua latou filifili e lē osia ni feagaiga ma le Atua. Latou te le’i mauaina sauniga ia o le a faaeaina ai i latou faatasi ma o latou aiga ma fusia faatasi ai i latou e faavavau.⁷

E maeu lo’u moomoo ia mafai ona ou asiasi ia i latou ma valaaulia i latou ia mafaufau mamafa i tulafono a le Alii e faatatau i le agavaa. Ou te mafaufau lava po o le a sa’u tala e mafai ona fai atu ina ia mafai ai ona latou lagonaina le tele o le alofa o le Faaola ia i latou ma oo ina iloa le tele o lo’u alofa ia i latou, ma ia iloa le auala e mafai ona maua ai e tamaitai ma alii tausi-feagaiga se “atoatoaga o le olioli”⁸

E manaomia ona latou malamalama e ui o loo i ai se nofoaga mo i latou pe a mavae lenei olaga—faatasi ma alii ma tamaitai lelei o ē na filifili foi e lē osia ni feagaiga ma le Atua—ae e lē o le nofoaga lena o le a toe faatasia ai aiga ma tuu atu i ai le avanoa e ola ma alualu ai i luma e faavavau. E lē o le malo lena o le a latou lagonaina ai le atoatoaga o le olioli—o le alualu i luma ma le fiafia e le gata.⁹ E na o le pau le auala e oo mai ai na faamanuiaga silisili o faamanuiaga uma e ala lea i le ola ai i se malo selesitila faaeaina faatasi ma le Atua, lo tatou Tama Faavavau; o Lona Alo, o Iesu Keriso; ma tagata o o tatou aiga lelei, ta’uaogaina ma agavaa.

Ua musuia a’u e fai atu i a’u uo ia e mumusu:

“I lenei olaga, e le faamalieina oe i se tulaga lua i soo se mea. Ae, a e teenaina atoa le taliaina o le talalelei toefuataiina a Iesu Keriso, o loo e filifili e faamalieina oe mo le tulaga lua.

“Sa fetalai le Faaola, ‘E tele mea e nonofo ai i le maota o lo’u Tama.’¹⁰ Peitai, afai e te lē filifili e osia ni feagaiga ma le Atua, o loo faamalieina la oe mo se taui sili ona lē lava mo le faavavau atoa.”

Ou te toe faatauanau atu i a’u uo ia e mumusu i le faapea atu:

“Sasaa atu lou loto i le Atua. Ōle atu ia te Ia pe le moni nei mea. Fai se taimi e suesue ai Ana afioga. Ia suesue moni lava! Afai e te alofa moni i lou aiga ma afai e te manao ina ia faaeaina faatasi ma i latou i le faavavau atoa, totogi le tau i le taimi nei—e ala i suesuega moni ma tatalo faatauanau—ia iloa nei upumoni e faavavau ona tausisi lea i ai.

“Afai e te le o mautinoa pe e te talitonu moni i le Atua, amata la iina. Ia malamalama o le leai o ni aafiaga ma le Atua, e mafai ai e se tasi ona masalosalo i le i ai moni o le Atua. O lea la, tuu oe lava ia i se tulaga e amata ai ona maua aafiaga faatasi ma Ia. Faalotomaualalo oe lava ia. Tatalo ia i ai mata e vaaia ai le aao o le Atua i lou olaga ma i le lalolagi o siomia oe. Ōle atu ia te Ia e ta’u atu ia te oe o loo i ai moni lava o Ia iina—pe afai Na te silafia oe. Ōle atu ia te Ia po o a ni Ona lagona e uiga ia te oe. Ona e faalogo lea.”

E i ai sa’u uo pele faapena e tapulaa ona aafiaga ma le Atua. Ae sa ia faananau ina ia faatasi ma lana avā ua maliu. O lea sa ia fesili mai ai ia te a’u e fesoasoani atu ia te ia. Sa ou uunaia o ia ia feiloai ma a tatou faifeautalai ina ia malamalama ai i le mataupu faavae a Keriso ma aoao i feagaiga o le talalelei, o sauniga, ma faamanuiaga.

Lea sa ia faia. Ae sa ia lagonaina o le auala sa la’ua fautua atu o le a ia manaomia ai ona faia le tele na’ua o suiga i lona olaga. Fai mai o ia, “O na poloaiga ma feagaiga ua faigata tele mo a’u. Ma le isi, e lē mafai ona ou totogia le sefuluai, ma e leai so’u taimi e auauna atu ai i le Ekalesia.” Ona ia fesili mai lea ia te a’u, “O le taimi lava ou te oti ai, faamolemole ia faia galuega talafeagai o le malumalu mo lo’u toalua ma a’u ina ia mafai ai ona toe faatasia i ma’ua.”

O le mea e faafetai ai, e le o a’u o le faamasino o lenei tagata. Ae ou te fesiligia le aoga o galuega sui o le malumalu mo se tagata sa maua le avanoa ina ia papatiso ai i lenei olaga—ina ia faauuina i le perisitua ma maua faamanuiaga o le malumalu a o i ai iinei i le olaga faaletino—ae na faia le faaiuga ma le iloa e teena lena auala.

O’u uso e ma tuafafine pele, ua valaaulia i tatou e Iesu Keriso ia ui i le ala o feagaiga e toefoi atu ai i le aiga i o tatou Matua Faalelagi ma faatasi ai ma i latou tatou te alolofa i ai. Ua Ia valaaulia i tatou ia, “Sau, mulimuli mai ia te au.”

O lenei, i le avea ai ma Peresitene o Lana Ekalesia, ou te augani atu ia te outou ua faataumamao outou lava mai le Ekalesia ma outou tou te le’i saili moni lava ia iloa o le Ekalesia a le Faaola ua toefuataiina mai. Ia fai le galuega faaleagaga ia iloa ai mo outou lava, ma faamolemoe ia fai nei loa. O le a uma le taimi.

Ou te molimau atu o loo soifua le Atua. O Iesu o le Keriso. Ua toefuatai mai Lana Ekalesia ma le atoaga o Lana talalelei e faamanuia ai o tatou olaga i le olioli, iinei ma le olaga a sau. Ou te molimau atu ai i le suafa o Iesu Keriso, amene.