Faauta i le Tamai Mamoe a le Atua

Sa ou lelei lava seia oo ina ou vaaia loimata o na tagata talavou i lenei aufaipese. O na loimata o se lauga e sili atu ona mamana nai lo se [lauga] e mafai ona ou tuuina atu.

I le vaai atu mai le si’uvai, i talaatu o le motu o tagata naunautai o loo saili mo lona papatisoina o i latou, sa iloa atu ai e Ioane le Papatiso i se mea mamao lona tausoga, o Iesu le Nasareta, o loo savali sa’o atu ia te ia e fai atu lea lava talosaga e tasi. Ma le faaaloalo, ae leotele lelei mo i latou na latalata ane na lagonaina, sa fai atu ai Ioane ma le faamemelo i upu ia o loo uunaia ai pea i tatou i le lua meleniuma mulimuli ane: “Faauta i le Tamai Mamoe a le Atua.”¹

E taua ona iloa o lenei teuteu-ala ua loa ona valoia mo Iesu sa le’i valaauina o Ia ia “Ieova” po o le “Faaola” po o le “Togiola” ia po o le “Alo o le Atua”—o suafa talafeagai uma ia. Leai, na filifilia e Ioane le faatusa sili ona leva ma masalo o le faatusa sili ona taatele i le tumasani faalelotu o lona nuu. Na ia faaaogaina le faatusa o se tamai mamoe mo taulaga e ofo atu mo le togiolaina o agasala ma faanoanoaga o se lalolagi pa’ū atoa ai ma tagata pa’ū’ū uma o loo i ai.

Faamolemole faataga a’u se’i faamatalaina teisi lena talafasolopito.

Ina ua tuliesea mai le Faatoaga o Etena, sa feagai Atamu ma Eva ma se lumanai lofituina. O le tatalaina ai o le faitotoa i le oti ma le olaga faaletino mo i tatou, sa la’ua tapunia ai le faitotoa i le tino ola pea ma le ola e faavavau mo i la’ua lava ia. Ona o se solitulafono sa la’ua filifili ma le loto i ai e fai, ua la feagai nei ma se oti faaletino ma se tafiesega faaleagaga, vavaeesea mai le afioaga o le Atua e faavavau.² O le a le mea e ao ona la faia? E i ai ea se auala e sao ai mai lenei pagatia? Tatou te lē mautinoa po o le a le tele o mea na faatagaina le toalua lenei e manatua e uiga i faatonuga na la maua a o i ai pea i le faatoaga, ae sa la’ua manatua lelei sa ao ona la osi atu e le aunoa se taulaga i le Atua i se tamai mamoe mamā ma le lē ponā, o le uluai po’a o le la lafu.³

Mulimuli ane sa oo mai se agelu e faamalamalama mai o lea taulaga o se ituaiga, o se muaifaatusa o le taulaga o le a faia mo i latou e le Faaola o le lalolagi o lē o le a afio mai. “O lenei mea o se faatusa lea o le taulaga a le Toatasi na Fanaua e le Tamā,” na fetalai atu ai le agelu. “O le mea lea, … ia e salamo ma valaau atu i le Atua i le suafa o le Alo e faavavau.”⁴ O le mea e lelei ai, sa i ai se ala i fafo ma luga.

I aufono i le muai olaga i le lagi, sa folafola atu ai e le Atua ia Atamu ma Eva (ma i tatou uma) lena fesoasoani o le a oo mai mai Lona Alo Ulumatua mamā ma le lē ponā, le Tamai Mamoe a le Atua “na fasia talu ona faavaeina o le lalolagi,”⁵ e pei ona faamatala mulimuli ai o Ia e le Aposetolo o Ioane. E ala i le ofoina atu o ā latou lava tama’i mamoe e fai ma faatusa i le olaga nei, sa faailoa atu ai e Atamu ma ana fanau lo latou malamalamaaga ma le faalagolagoga i le taulaga togiola a Iesu Lē ua Faauuina.⁶ Mulimuli ane, o le falefētāfa’i i le vao na avea ma tulaga mo lenei sauniga ma, i le mavae ai o lena, sa fausia ai le malumalu o Solomona,

Ae paga lea, i le avea ai ma se faatusa o le salamo faamaoni ma le ola faatuatua, sa le’i galue lelei tele ai lenei taulaga faalesauniga o tamai mamoe lē pona, e pei ona faaalia i le tele o le Feagaiga Tuai. O nisi taimi, o le naunautaiga mamā sa tatau ona ō faatasi ma na taulaga, sa na o sina taimi lava na tumau ai. I soo se tulaga, sa le’i lava lona tumau e puipuia ai le uluai fasioti tagata, i le fasiotiga e Kaino o lona uso o Apelu i le uluai tupulaga.⁷

Faatasi ma ia tofotofoga ma faafitauli sa faifai pea mo seneturi, e leitioa pepese agelu o le lagi i le olioli ina ua i’u ina soifua mai Iesu—le Mesia lava Ia ua loa na folafola mai. Ona sosoo ai lea ma Lana auaunaga puupuu i la le tino, o lenei mamoe sili ona mamā o mamoe uma o le Paseka, sa sauniaina Ona soo mo Lona maliu e ala i le faailoa atu o le faamanatuga o le Tausamaaga a le Alii, o se ituaiga o sauniga e sili atu ona patino lea sa faalauiloa mai i fafo mai o Etena. O le a i ai pea se foai, o le a aofia ai pea se taulaga, ae o le a faia i se faatusa e sili atu ona loloto, sili atu ona faamatuā’ia ai se tasi e mafaufau loloto ma patino nai lo le fasia o se tamai mamoe ulumatua. I le au sa Nifaē, i le mavae ai o Lona Toetu, na fetalai atu ai le Faaola:

“Ma ia outou le toe osia mai ia ia te au se taulaga i le faamaligiina o le toto. …

“… Ma ia outou osi mai mo se taulaga ia te au le loto momomo ma le agaga salamo. Ma o soo se tasi e sau ia te au ma le loto momomo ma le agaga salamo, o ia lea o le a ou papatisoina i le afi ma le Agaga Paia. …

“… O lea, salamo, … ma faaolaina ai.”⁸

O’u uso e ma tuafafine pele, faatasi ai ma le faamamafa fou faagaeetiaina i le faateleina o le aoaoina o le talalelei i totonu o le aiga, e taua tele mo i tatou ona manatua o loo poloaiina pea i tatou ia “o atu i le fale tatalo ma osi aʼe i luga au faamanatuga i loʼu aso paia.”⁹ E faaopoopo atu i le faaavanoaina o taimi mo aoaoga o le talalelei e faatotonugalemu-i-le-aiga, o a tatou sauniga o le Aso Sa ua fetuunaia ina ia faaitiitia ai le faigata o faasologa o sauniga i se auala e faamamafa lelei ai le faamanatuga o le Tausamaaga a le Alii e fai ma taulaiga autu paia, ma faamamaluina o o tatou aafiaga i tapuaiga i vaiaso taitasi. E ao ona tatou manatuaina i se ala sili ona patino tatou te mafai ai, na maliu Keriso mai se loto nutimomoia i Lona tauaveina atoa na o Ia o agasala ma faanoanoaga o le aiga atoa o le tagata.

Talu ai na tatou saofagā i lena avega matautia, o se taimi faapena e matua manaomia ai lo tatou faaaloalo. O lea, ua uunaia ai tatou ia o mai vave ma le faaaloalo ia tatou sauniga, laei ma le talafeagai ia auai i se sauniga paia. O “laei sili o le Aso Sa” ua tau galoma atu lona uiga moni i o tatou taimi, ma o le faaalia o le faaaloalo mo Ia o Lē e Ana le [sauniga] lea tatou te o mai i ai, e tatau ai ona tatou toefuatai maia lena tumasani o foligavaaia ma laei tauagafau i le taimi ma le nofoaga e tatau ai.

Ae mo le vave mai [i sauniga], e tatau ona tatou onosai ma malamalama i nai tina e faananati mea uma ma le vevesi o le mafaufau, e tapena tamaiti, o pepa keke, o pamper, ia e laki ae maua mai le faamanatuga. Ma le isi, o le a i ai isi o le a lē maalofia le tau atu i a latou povi o pa’ū’ū i le lua i se taeao o se Aso Sa. Peitai, i le vaega lea e tuai mai lava, matou te faapea atu o se tuai mai lea taimi i lea taimi e malamalama lava i ai, ae afai e pa’u soo lau povi i totonu o le lua i Aso Sa uma lava, ona matou fautua malosi atu lea e faatau ese lau povi pe faatumu le lua.

I lena lava agaga e tasi, matou te fai atu ai se talosaga faaaposetolo ia faaitiitia le pisapisaō i le saogalemu o o tatou falelotu. Tatou te fiafia e feiloai i le tasi ma le isi, ma e tatau ai—o se tasi lea o olioliga o le auai i le Lotu—ae e lē tatau lava ona faia i nofoaga ua faapaiaina faapitoa mo tapuaiga. Ou te popole i tagata asiasi e le o nisi o lo tatou faatuatuaga e faate’ia i nisi taimi i le fe’ei ma le lē migao i totonu o se nofoaga e tatau ona faailogaina [e fai ai] tatalo, [maua ai] faaaliga, ma le filemu. Masalo e faate’ia ai foi le lagi latou ia.

O le a faaopoopo atu i le agaga o a tatou sauniga faamanatuga pe afai e i ai le au pule faamalumalu i luga o le tulaga ae le’i taitai amata sauniga, faalogologo i musika muai tataina ma faia ma le migao le faataitaiga mo isi uma o i tatou e tatau ona mulimuli i ai. Afai o loo faia ni talanoaga i luga o le tulaga, e lē tatau la ona faate’ia i tatou i talanoaga i lalo i le faapotopotoga. Matou te faamālō atu i na au epikopo ua aveesea faasilasilaga ia e faaitiitia ai le agaga o a tatou tapuaiga. Mo a’u, e lē mafai ona ou vaai faalemafaufau i se ositaulaga e pei o Sakaria—iina i totonu o le malumalu anamua o le Alii, o le a auai i le avanoa faaositaulaga lava e tasi o le a oo mai ia te ia i lona olaga atoa—e lē mafai ona ou vaai faalemafaufau ia te ia o tu i luma o le fata faitaulaga e faamanatu mai ia i tatou e toe ono vaiaso fai le tolauapiga ma o le a faagata le lesitala [e pei e leai se sauniga paia o faia].

Uso e ma tuafafine, o lenei itula ua faauuina e le Alii o le itula aupito sili ona paia lea i lo tatou vaiaso. E ala i le poloaiga, ua tatou potopoto ai mo le sauniga sili ona maua soo e tagata o le Ekalesia i le lalolagi atoa. Ua faia lea e manatua ai o Ia o lē na ōle atu pe mafai ona aveese le ipu o le a Ia inuina, ae sa faaauau pea aua sa Ia silafia ona o lo tatou manuia e lē mafai ai ona aveese [lea ipu]. O le a fesoasoani pe afai tatou te manatuaina o se faatusa o lena ipu [po o le taulaga] o loo faasolo lemu mai i le laina nofoa agai mai ia i tatou i lena lava taimi.

Pe a oo mai le itula paia e tuu atu ai a tatou meaalofa ua taulagaina i le Alii, ua i ai a tatou lava agasala ma vaivaiga ia foiaina. Ae atonu e sili atu ona faamanuiaina i tatou i se salamo faapena pe afai tatou te mafaufau i isi loto momomo ma agaga salamo o loo siomiaina i tatou. O loo nonofo e lē mamao mai ia i tatou nisi atonu o loo fetagisi—iloa atu loimata po o tagi le loto—i le taimi atoa o le viiga faamanatuga. Tau ina ia tatou ofo atua a tatou fasi falaoa o le faamafanafanaga ma tamai ipu vai o le agaalofa mo i latou—e mafai ona tatou tuuina atu ia i latou? pe mo le tagata o tagi ma tauivi o lē e lē o i ai i le sauniga ma, se’i vagana ai ua tatou faia se faatinoga laveai, o le a lē toe i ai foi iina i le vaiaso e sosoo ai? pe agaalofa atu foi i o tatou uso ma tuafafine e le o ni tagata o le Ekalesia ae o o tatou uso ma tuafafine? E lē toe muta lava mafatiaga i lenei lalolagi, totonu o le Ekalesia ma fafo atu, o lea ia vaai ai i soo se itu ma o le a e maua ai se tasi o ona tiga e foliga mai ua mamafatū tele e tauave ma o lē e foliga mai e lē toe uma lona lototiga. O le tasi auala ia “manatua [ai] pea o ia”¹⁰ o le auai lea ma le Fomai Sili i Lana galuega lē muta o le aveesega o avega mai ia i latou o ē mafatia ma aveese tiga o i latou o ē faanoanoa.

Uo pele, a o tatou lotogatasi ai i le lalolagi atoa i vaiaso taitasi i le mea ua tatou faamoemoe o se faamamaluga paia faateleina o le meaalofa mamalu o le togiola a Keriso i tagata uma, tau ina ia tatou aumaia i le fata faitaulaga o le faamanatuga “nisi loimata mo ona faanoanoaga [ma] nisi tiga e faavauvau ai o ia.” A o tatou manatunatu ai, tatalo, ma faafou feagaiga, tau ina ia tatou ave mai lena taimi paia se “onosai [atili] i tiga, … [ma viia atili] se mapusaga.”¹¹ Mo sea onosai ma le toomaga, mo sea paia ma le faamoemoe, ou te tatalo ai mo i tatou uma i le suafa o Ia o lē na tofitofia le areto faapelepele o le faamagaloga ma liligi le uaina paia o le togiola, o Iesu Keriso lava lea, le Tamai Mamoe faapelepele ma le alofa mutimutivale a le Atua, amene.