O Fea O Le A Tau Atu i ai Lenei [Filifiliga]?

O nisi faaiuga o ni filifiliga i le va o le faia o se mea po o le lē faia o se mea. Sa ou faalogo i se faataitaiga o lenei ituaiga o filifiliga i se konafesi faalesiteki i le Iunaite Setete i le tele o tausaga ua alu.

O le nofoaga [o le tala] o se lotoa matagofie o se kolisi. O se motu o tamaiti a’oga laiti sa nonofo i luga o le mutia. O le failauga sa faamatalaina lenei tulaga sa fai mai sa latou matamata i se squirrel ma sona siusiu fulufulua telē o taalo solo i lalo o se laau failaupapa matagofie. O nisi taimi sa taalo i luga o le palapala, o nisi taimi o luga ma lalo ma faataamilo i le ogalaau. Ae aisea na tosina atu ai se motu o tamaiti a’oga i lena vaaiga masani?

O loo fālōlō ma ta’oto i luga o le mutia e lata ane se ituaiga taifau Aialani. O ia o loo taulai i ai tamaiti a’oga, ae o le squirrel o loo taulai i ai le taifau. O taimi uma e lē vaaia ai le squirrel o faataamilo i le laau, e tolotolo lemu atu ai le taifau i luma i ni nai inisi ona toe taotooto foi lea e peisea’i e lē āno i le mea o tupu. O le mea lenei sa tosina i ai tamaiti a’oga. Sa filemu ma leai se minoi, sa tāmau o latou mata i le mea o loo tupu lea sa faateleina le manino mai o lona taunuuga.

Sa i’u lava ina latalata tele atu le taifau ma puna atu i le squirrel ma pu’e i lona gutu. Sa manu ā’e se manuō ma le fefe, ma sa taufetuli atu le motu o tamaiti a’oga ma se’i ese le tamai manu mai le taifau, ae sa fai si tuai. Ua pe le squirrel.

Sa ono mafai ona lapata’ia e soo se tasi o tamaiti le squirrel i soo se taimi e ala i le talotalo atu o lona lima pe alalaga atu, ae leai ma se tasi na faia. Sa na o na latou matamata atu a o latalata mai pea le taunuuga mautinoa. E leai ma se tasi na fesili, “O fea o le a tau i ai lenei filifiliga?” Ina ua tupu le mea sa faamoemoeina, sa tele’a’i atu uma e taofi le taunuuga, ae ua fai si tuai. Sa na o le salamo ma loimata na mafai ona latou ofo atua.

O lena tala moni o se ituaiga foi o tala faataoto. E faatatau i mea tatou te vaai i ai i o tatou lava olaga, ma i olaga ma tulaga o siomiaina i tatou. A tatou vaai atu i ni mea taufaamatau o tolotolo atu i tagata po o mea tatou te alolofa i ai, o loo ia i tatou le filifiliga o le tautatala atu po o le minoi ia po o le lē pisa. E sili lava lo tatou fesili ifo ia i tatou lava, “O fea o le a tau i ai lenei filifiliga?” I tulaga e vave ma ogaoga ai taunuuga, e le mafai ona tatou lē faia se mea. E tatau ona tatou faaleo atu ni lapataiga talafeagai pe lagolago i taumafaiga talafeagai e puipuia manū o loo i ai pea le taimi.

O faaiuga ia faato’a uma ona ou faamatalaina atu e aofia ai filifiliga i le va o le faia o nisi o faatinoga po o le leai foi o ni faatinoga e faia. O filifiliga sili ona taatele o filifiliga na e i le va o le tasi faatinoga po o le isi. Ua aofia ai i nei filifiliga, o filifiliga i le va o le lelei po o le leaga, ae e tele lava o filifiliga i le va o ni mea lelei se lua. O i foi e manaomia ai pea ona fesili po o fea o le a tau i ai lenei filifiliga. Ua tatou faia le tele o filifiliga i le va o ni mea lelei se lua, e tele ina aofia ai le auala o le a tatou faaaluina ai o tatou taimi. E leai ma se leaga i le taaalo i taaloga vitio po o le tesi po o le matamata i le TV po o le talanoa i se telefoni feaveai. Ae o nei mea taitasi e aofia ai le mea ua ta’ua “tau o le avanoa,” o lona uiga afai tatou te faaaluina le taimi e fai ai se mea se tasi, tatou te maumauina le avanoa e faia ai se isi mea. Ou te mautinoa e mafai ona outou vaaia e manaomia ona tatou manatu ma le faaeteete i mea o loo tatou maumauina i le taimi tatou te faaaluina ai i se gaoioiga se tasi, e tusa lava po o se mea e lelei atoatoa.

I sina taimi ua leva atu sa ou faia ai se lauga e ta’ua “Lelei, Lelei Tele, Lelei Silisili.” I lena lauga sa ou fai atu ai e faapea “ona o se mea e lelei e lē lava lea mafuaaga e fai ai. O le aofaiga o mea lelei e mafai ona tatou faia, e sili mamao atu i lo le taimi e maua e faataunuu ai. O nisi mea e sili atu i le na o le lelei, ma e i ai mea e tatau ai ona ave i ai le faamuamua i o tatou olaga. … E ao ona tatou tuuese nisi o mea lelei ina ia filifili ai isi mea e lelei atu pe silisili ona lelei.”¹

Ia vaai mamao. O le a le aafiaga o lo tatou lumanai ona o faaiuga tatou te faia i le taimi nei? Manatua le taua o le mauaina o le a’otauina, suesueina o le talalelei, faafouina o a tatou feagaiga e ala i le taumamafa i le faamanatuga, ma le auai i le malumalu.

“O fea o le a tau i ai lenei filifiliga?” e taua foi i le filifilia o le auala tatou te faailogaina ai pe manatu ai ia i tatou lava. O le mea e sili ona taua, o i tatou taitoatasi o se atalii o le Atua faatasi ma se taunuuga faamoemoeina o le ola e faavavau. O isi faailoga uma, e aofia ai tulaga faalegaluega, ituaiga, uiga faaletino po o mamalu, e lē tumau pe lē taua i tuutuuga e faavavau. Aua ne’i filifili e faailoga outou lava pe manatu ia te outou lava i tuutuuga e tuuina se tapulaa i se sini e te ono taumafai i ai.

O’u uso e ma o’u tuafafine, o e o ono maimoaina pe faitau i mea o o’u talanoa ai iinei, ou te faamoemoe tou te iloaina le mafuaaga ua avatu ai e tou taitai aoaoga ma fautuaga ua matou avatu. Matou te alolofa ia te outou, ma e alofa foi lo tatou Tama Faalelagi ma Lona Alo, o Iesu Keriso, ia te outou. O le La fuafuaga mo i tatou o le “fuafuaga sili o le fiafia” (Alema 42:8). O lena fuafuaga ma a La poloaiga ma sauniga ma feagaiga e taitai atu ai i tatou i le fiafia ma le olioli silisili i lenei olaga ma i le olaga a sau. I le avea ai ma auauna a le Tama ma le Alo, matou te aoao atu ma fautua atu e pei ona La’ua faatonu i matou e ala i le Agaga Paia. E leai so matou manao e ese mai nai lo lē talanoa atu i mea e moni ma ia uunaia outou e fai mea ua La’ua otooto maia i le ala i le ola e faavavau, “le meaalofa silisili lea o meaalofa uma a le Atua” (Matatupu Faavae ma Feagaiga 14:7).

O le isi faataitaiga lenei o le aafiaga o lo tatou lumanai ona o faaiuga tatou te faia i le taimi nei. O lenei faataitaiga e faatatau i le filifiliga ia osia se taulaga i le taimi nei e ausia ai se sini taua i le lumanai.

I se konafesi faalesiteki i Cali, Kolomupia, sa faamatala ai e se tuafafine lo la mananao ma lana manamea ina ia faaipoipo i le malumalu, ae i lena taimi o le malumalu sili ona lata ane sa mamao i Peru. Mo se taimi umi, sa la sefeina ai a la tupe mo le totogi o le pasi. Mulimuli ane sa la malaga loa i le pasi i Bogotá, ae ina ua la taunuu iina, sa la iloa ai ua leai ma se nofoa avanoa i le pasi e alu i Lima, Peru. Sa ono la toefoi i le fale e aunoa ma le faaipoipoga pe faaipoipo foi i fafo o le malumalu. O le mea na lelei ai, sa i ai se isi filifiliga. Sa mafai ona la tietie i le pasi i Lima pe afai la te loto e saofafai i luga o le fola o le pasi mo le malaga atoa e lima aso lima po. Sa la filifili e fai lenei mea. Sa ia fai mai sa faigata, e ui o nisi taimi sa tuu atu ai e nisi o tagata o latou nofoa e saofafa’i ai ina ia mafai ona latou fālō i luga o le fola.

O le mea na faagaeetia ai a’u i lana lauga o le faamatalaga a lenei tuafafine faapea sa faafetai o ia na mafai e i la’ua ma lona toalua ona o i le malumalu i lenei auala, ona sa suia ai le auala sa la’ua lagonaina e uiga i le talalelei ma le auala na la lagonaina e uiga i le faaipoipo i le malumalu. Sa tauia i la’ua e le Alii i le tuputupu a’e lea e sau mai le ositaulaga. Sa ia matauina foi o le la malaga lima-aso i le malumalu sa ausiaina ai se mea tele lava i le fausiaina o lo la faaleagaga nai lo le tele o asiasiga i le malumalu e leai se osigataulaga na faia ai.

I le tele o tausaga talu ona ou faalogo i lena molimau, sa ou mafaufau ai lava pe faape’i se eseesega o le olaga o lena ulugalii talavou pe ana faapea la te faia se isi filifiliga—e lē faia le osigataulaga na tatau ai ina ia faaipoipo i le malumalu.

Uso e, tatou te faia le mau filifiliga lēmafaitaulia i le olaga, o nisi e tetelē ma o nisi e foliga mai e laiti. Pe a toe tepa i tua, e mafai ona tatou vaaia se eseesega tele na faia e a tatou filifiliga i o tatou olaga. Tatou te faia filifiliga ma faaiuga lelei atu pe afai tatou te vaai atu i isi filifiliga ma mafaufau loloto po o fea o le a tau atu i ai. A tatou faia, o le a tatou mulimuli i le fautuaga a Peresitene Russell M. Nelson ia amata ma le taunuuga i le mafaufau.² Mo i tatou, o le taunuuga o loo i ai pea i luga o le ala o feagaiga e ui atu i le malumalu e tau i le ola e faavavau, le meaalofa silisili lea o meaalofa uma a le Atua.

Ou te molimau atu ia Iesu Keriso ma aafiaga o Lana Togiola atoa ai ma isi upumoni o Lana talalelei e faavavau i le suafa o Iesu Keriso, amene.