Lub Hwj Chim Vim Muaj Kev Ntseeg uas Txhawb Nqa

Muaj ntau zaus uas kuv hnov lub pov thawj hwj cov thawj coj ua tsaug rau cov neeg uas lawv pab vim lawv txhawb nqa cov thawj coj. Yus hnov los ntawm lawv lub suab, uas qhia tseeb tias lawv muaj kev ris txiaj ntau. Hnub no kuv lub hom phiaj yog los qhia tus Tswv txoj kev ris txiaj vim nej txhawb nqa Nws cov tub qhe hauv Nws lub Koom Txoos. Thiab yog thov kom nej xyaum ua thiab ua rau lub hwj chim txhawb nqa lwm cov neeg nrog nej txoj kev ntseeg yuav loj hlob tuaj thiab.

Ua ntej nej yug los, nej qhia hais tias nej muaj lub hwj chim no. Xav txog tej yam uas peb paub txog lub ntuj ntsuj plig ua ntej peb yug los. Peb Leej Txiv Saum Ntuj Ceeb Tsheej qhia txog ib txoj hau kev rau Nws cov me nyuam. Peb twb nyob ntawd. Luxifaws, peb tus tij laug ntawm sab ntsuj plig, tau tawm tsam txoj hau kev uas yuav cia peb muaj kev ywj siab xaiv. Yehauvas, Leej Txiv Saum Ntuj Ceeb Tsheej tib Leeg Tub, txhawb nqa qhov no. Luxifaws tau ua tus thawj coj rau kev ntxeev siab no. Yehauvas lub tswv yim tau yeej, thiab Nws zoo siab hlo los ua peb tus Cawm Seej.

Qhov uas nej ua neej nyob tam sim no qhia peb tseeb hais tias nej tau txhawb nqa Leej Txiv thiab tus Cawm Seej txoj hau kev. Yuav tsum muaj kev ntseeg Yexus Khetos thiaj txhawb nqa tau txoj kev cawm seej thiab Yexus Khetos txoj hauj lwm thaum nej tsis tshua paub txog tej teeb meem uas nej yuav muaj hauv lub neej no.

Nej txoj kev ntseeg uas txhawb nqa Vajtswv cov tub qhev yog qhov uas ua rau nej lub neej no muaj kev zoo siab thiab. Thaum nej kam ua raws li tus tub txib txoj kev caw los thov Vajtswv pab nej paub seb Phau Ntawv Maumoos puas yog Vajtswv txoj lus, nej muaj kev ntseeg txaus los txhawb nqa Vajtswv ib tug tub qhev. Thaum nej kam los ua kev cai raus dej, nej thiaj txhawb nqa Vajtswv ib tug tub qhev.

Thaum nej cia leej twg tso tes rau saum nej taub hau thiab hais tias, “Txais yuav tus Vaj Ntsuj Plig Dawb Huv,” nej thiaj txhawb nqa nws los ua ib tug uas tuav lub Pov Thawj Hwj Mekixedes.

Txij hnub ntawd los, nej tau, thaum rau siab ntso ua tej hauj lwm, tau txhawb nqa txhua tus neeg uas tau muab lub pov thawj hwj rau nej thiab txhua tus uas tau tsa nej los ua ib txoj hauj lwm hauv lub pov thawj hwj ntawd.

Puag ntxov hauv lub pov thawj hwj, nej txhua txoj hauj lwm yog kev txhawb nqa Vajtswv ib tug tub qhev. Nim no, nej coob leej tau nce los rau ib qho chaw uas yuav tsum haj yam muaj kev txhawb nqa.

Nej txiav txim seb nej puas yuav txhawb nqa cov uas tus Tswv hu los ua hauj lwm—tab txawm tus Tswv hu lawv los ua hauj lwm dab tsi los xij. Txoj kev txiav txim ntawd nyob hauv cov rooj sab laj thoob plaws ntiaj teb no. Twb muaj li no hauv lub rooj sab laj no. Nyob hauv tej kev sab laj no, tej npe rau cov txiv neej thiab poj niam—Vajtswv cov tub qhev—raug nyeem, thiab nej raug caw los tsa tes seb nej puas pom zoo txhawb nqa lawv. Nej muaj cai tsis txhob tsa tes txhawb nqa lawv, los sis muaj cuab kav tsa tes hais tias nej yuav muaj kev ntseeg txhawb nqa lawv. Thaum nej tsa tes txhawb nqa lawv, nej thiaj cog lus tseg. Nej cog lus nrog Vajtswv, vim cov no yog nws cov tub qhe, hais tias nej yuav txhawb nqa lawv.

Cov no yog cov neeg uas tsis zoo tag nrho, ib yam li nej txhua tus. Thaum ua raws nej tej kev cog lus nej yuav muaj kev ntseeg uas hais tias tus Tswv tau hu lawv. Thaum ua raws li tej kev cog lus no nej thiaj yuav muaj kev zoo siab uas kav mus ib txhis. Txoj kev tsis ua raws li tej kev cog lus no yuav ua rau nej thiab cov uas nej hlub muaj kev tu siab—thiab ua rau nej poob tej yam uas nej xav tsis txog.

Tej zaum twb thov nej, los sis tseem yuav thov nej, seb nej puas txhawb nqa nej tus npisov, ceg txheem ntseeg tus thawj tswj hwm, cov Tuam Thawj Coj, thiab cov Tuam Nom Tswv hauv lub Koom Txoos. Tej zaum muaj li no thaum nej raug caw los tsa tes txhawb nqa cov nom tswv thiab thawj coj hauv lub rooj sab laj. Tej thaum yuav yog xam phaj nrog ib tug npisov los sis ceg txheem ntseeg tus thawj tswj hwm.

Kuv ntuas nej kom nug nej tus kheej cov lus nug ntawd ua ntej nej tuaj, ua tib zoo thov Vajtswv thiab tshawb nrhiav txog cov lus nug no. Thaum nej ua li no, ces tej zaum nej yuav nco txog nej tej kev xav, cov lus, thiab tej hauj lwm nej tau ua tsis ntev tas los no. Sim nco qab txog thiab sim teb raws li nej yuav teb thaum tus Tswv xam phaj nej, vim nej yeej paub hais tias yuav muaj ib hnub twg uas Nws yuav ua li ntawd. Nej yuav npaj tau zoo zoo yog nej nug nej tus kheej cov lus zoo li no:

1. Kuv puas tau xav los sis hais lus txog tej kev qaug zog hauv cov neeg uas kuv tau cog lus hais tias kuv yuav txhawb nqa?

2. Kuv puas tau xyuas seb puas muaj puav pheej qhia tias tus Tswv tab tom coj lawv kev?

3. Kuv puas tau ua tib zoo thiab rau siab ntso ua raws li lawv coj?

4. Kuv puas tau tham txog tej puav pheej uas kuv pom uas qhia tias lawv yeej yog Vatjswv cov tub qhev?

5. Kuv puas ib sij tuav lawv npe thov Vajtswv pab lawv thiab puas hlub lawv?

Rau peb sawv daws feem coob, cov lus nug ntawd yuav ua rau peb nyob tsis tswm thiab ua rau peb tau hloov siab lees txim. Vajtswv txib peb hais tias peb yuav tsum tsis txhob txiav txim tsis ncaj rau lwm tus neeg, tiam sis peb muaj teeb meem ua li ntawd. Yuav luag txhua yam uas peb ua nrog lwm tus neeg yeej ua rau peb ntsuam xyuas cov neeg ntawd. Thiab nyob hauv yuav luag txhua yam hauv peb lub neej, ces peb muab peb tus kheej piv rau lwm leej lwm tus. Muaj ntau lub ntsiab lus uas qhia seb yog vim li cas peb ua li ntawd, ib txhia yeej zoo, tiam sis feem ntau mas tej ntawd ua rau peb thuam lwm tus.

Thawj Tswj Hwm George Q. Canon ceeb toom peb txog qhov no thiab nim no kuv xav ceeb toom nej ib yam li ntawd. Kuv ntseeg hais tias nws hais qhov tseeb hais tias: “Vajtswv tau xaiv Nws cov tub qhe. Nws muaj cai rau txim rau lawv, yog tias Nws xav tias tsim nyog lawv raug txim. Nws tsis tau muab txoj cai rau peb qhuab qhia los sis muab lawv rau txim. Tsis muaj ib tug txiv neej twg, txawm nws rau siab ntseeg npaum li cas los, txawm nws muaj txoj hauj lwm siab npaum li cas hauv lub Pov Thawj Hwj, uas muaj cuab kav hais lus phem txog cov neeg uas tus Tswv xaiv cia thiab nrhiav tau lub txim hauv Vajtswv txoj cai hauv ntiaj teb no tsuas yog ntshe Vajtswv yuav tsis zoo siab rau tus ntawd. Tus Vaj Ntsuj Plig Dawb Huv yuav khiav ntawm ib tug txiv neej zoo li ntawd, thiab nws yuav nyob hauv qhov tsuas ntuj lawm. Vim muaj li no ces, nej puas pom hais tias tseem ceeb heev rau peb tau ua tib zoo xyuam xim?”¹

Kuv pom hais tias cov mej zeej hauv lub Koom Txoos thoob plaws ntiaj teb no feem coob ib leeg muab siab npuab rau ib leeg thiab rau cov uas ua lawv cov thawj coj. Tiam sis, tseem muaj tej yam uas peb yuav tsum ua thiab kho kom zoo dua. Peb muaj cuab kav haj yam siv peb lub hwj chim ib leeg txhawb nqa ib leeg. Yuav tsum rau siab ntso thiab muaj kev ntseeg. Nov yog plaub lub tswv yim uas kuv xav kom peb ua tau hauv lub rooj sab laj no.

1. Peb yuav tsum xaiv tej yam uas cov uas hais lus txib kom peb ua thiab hnub no cia li pib ua tej ntawd. Thaum peb ua li no, peb yuav haj yam muaj hwj chim txhawb nqa lawv.

2. Peb yuav tsum thov Vajtswv pab lawv thaum lawv hais lus xwv kom tus Vaj Ntsuj Plig Dawb Huv yuav coj lawv tej lus mus tog rau hauv cov neeg uas peb hlub lub siab lub ntsws. Tom qab ntawd thaum peb paub hais tias Vajtswv tau teb zaj lus thov ntawd, peb yuav haj yam muaj hwj chim txhawb nqa cov thawj coj ntawd.

3. Peb muaj cuab kav thov Vajtswv pab cov neeg uas hais lus yuav tau koob hmoov thiab tau hwj chim thaum lawv tab tom hais lus. Thaum peb pom hais tias Vajtswv twb ntxiv hwj chim rau lawv, ces peb txoj kev ntseeg yuav loj hlob tuaj es txhawb nqa lawv, thiab qhov ntawd yuav kav ntev mus.

4. Peb muaj cuab kav mloog tej zaj lus no seb peb puas txais lus teb rau peb tej zaj lus thov Vajtswv los pab peb. Thaum peb tau lus teb lawm, vim yeej yuav muaj lus teb, peb txoj kev ntseeg yuav loj hlob tuaj uas pab tau peb txhawb nqa tag nrho tus Tswv cov tub qhev.

Tsis yog yuav pab peb txhawb nqa cov neeg uas ua hauj lwm hauv lub Koom Txoos xwb, peb kuj yuav kawm hais tias qhov no yuav pab peb muaj hwj chim ua lwm yam thiab. Nyob ntawd, qhov no yuav pab peb txais koob hmoov ntxiv. Yuav pab peb tom tsev thiab hauv peb tsev neeg.

Kuv xav hais lus rau cov tub hluas uas tuav lub pov thawj hwj uas nyob tom tsev nrog lawv txiv. Cia kuv qhia nej txog tej yam uas kawj hauv kuv lub neej seb nej txoj kev ntseeg thiab txhawb pab nej txiv tseem ceeb npaum li cas. Tej zaum nej xav tias nws muaj siab loj. Tiam sis nws yeej muaj kev cov nyom ntau tshaj nej paub. Tej lub sij hawm nws tsis pom tom ntej dhau tej teeb meem uas nyob tom nws hauv ntej.

Nej txoj kev qhuas nws yuav pab me ntsis. Nej txoj kev hlub nws yuav pab ntau me ntsis. Tiam sis qhov uas yuav pab nws ntau tshaj plaws yog thaum nej hais tej lus zoo li no hais tias: “Txiv es, kuv twb thov Vatjswv pab koj lawm, thiab kuv xav tias tus Tswv yeej yuav pab koj. Txhua yam yeej yuav zoo. Kuv paub tseeb li ntawd.”

Tej lus ntawd kuj muaj hwj chim uas pab, thaum leej txiv hais li ntawd rau nws tus tub. Thaum ib tug tub twb ua txhaum loj lawm, tej zaum txhaum ib qho ntawm sab ntsuj plig, tej zaum nws yuav xav tias nws tsis tsim nyog lawm. Ua nws leej txiv, lub sij hawm ntawd, tej zaum nej yuav xav tsis thoob, tom qab nej twb thov Vajtswv pab nej lawm, tos nco tus Vaj Ntsuj Plig Dawb Huv yuav tso tej lus no hauv nej lub qhov ncauj hais tias: “Me tub, kuv yuav nrog nraim koj txhua lub sij hawm. Tus Tswv hlub koj. Vim muaj Nws txoj kev pab, koj yeej yuav rov qab los. Kuv paub hais tias koj yeej muaj cuab kav thiab koj yuav ua zoo. Kuv hlub koj.”

Nyob hauv lub pov thawj hwj thiab hauv tsev neeg, qhov uas peb ntxiv zog rau peb txoj kev ntseeg kom txhawb nqa tib neeg yog txoj kev uas yuav pab peb txhim tsa Xi-oos raws li tus Tswv xav kom peb ua. Vim muaj nws txoj kev pab, peb yeej ua tau thiab peb yuav ua mus. Peb yuav tsum kawm los hlub tus Tswv kawg siab, kawg ntsws, kawg plab, kawg plawv thiab ib leeg hlub ib leeg li peb hlub peb tus kheej.

Thaum peb haj yam muaj kev hlub dawb paug rau Khetos, peb tej siab yuav muag nthas. Txoj kev hlub ntawd yuav pab peb txo hwj chim thiab coj peb los hloov siab lees txim. Peb txoj kev tso siab rau tus Tswv thiab rau lwm tus neeg yuav loj hlob tuaj. Ces peb yuav rais los mus koom ib lub siab, ib yam li tus Tswv cog lus hais tias peb ua tau.²

Kuv ua tim khawv tias Leej Txiv Saum Ntuj Ceeb Tsheej paub thiab hlub nej. Yexus yog tus Khetos uas muaj sia nyob. Nov yog Nws lub Koom Txoos. Peb tuav Nws lub pov thawj hwj. Nws yuav ntxiv zog rau peb tej hauj lwm thaum peb xyaum kom haj yam muaj hwj chim siv lub pov thawj hwj thiab ib leeg txhawb nqa ib leeg. Kuv ua tim khawv li no los ntawm Yexus Khetos lub npe dawb ceev, amees.