Peb Muaj Peev Xwm Ua Zoo Dua thiab Ua Neeg Zoo Dua

Cov kwv tij, qhov uas kuv saib nej cov uas yog tus Tswv cov tub rog uas tuav lub pov thawj hwj coob heev tshoov kuv lub siab. Nej yog ib pawg uas ua zoo! Peb hlub nej. Peb thov Vajtswv pab nej. Thiab peb yeej ris nej txiaj heev.

Tsis ntev tas los no, kuv pheej rov qab xav txog tus Tswv tej lus qhia uas Nws muab los ntawm tus Yaj Saub Yauxej Xamiv: “Tsis txhob hais dab tsi li tsuas yog kev hloov siab lees txim rau tiam neeg no xwb.”¹ Cov lus no los tus Tswv hais ntau nyob hauv vaj lug kub² Ua rau yus nug hais tias: “Txhua leej txhua tus yuav tsum hloov siab lees txim los?” Lus teb hais tias yog.

Neeg coob xav tias kev hloov siab lees txim yog kev raug txim—ib yam uas yuav tsum tsis txhob ua tsuas yog yus tau ua txhaum loj heev. Tiam sis Dab Ntxwg Nyoog yog tus uas ua rau yus xav tias yus raug txim. Nws xav kom peb tsis txhob ntsia Yexus Khetos,³ tus uas qhib caj npab tos nej,⁴ cia siab thiab txaus siab kom kho mob, zam txim, ua kom huv, txhawb zog, thiab muab peb hloov ua dawb huv.

Lo lus rau hloov siab lees txim nyob hauv Phau Tshiab lus Kilis yog metanoeo. Lo lus tom hauv ntej meta- txhais tias “hloov.” Lo lus tom qab -noeo muaj lub ntsiab nrog cov lus Kilis uas txhais tias “lub siab,” “kev txawj ntse,” “ntsuj plig,” thiab “cov pa.”⁵

Yog li ntawd, thaum Yexus hais kom peb “hloov siab lees txim,”⁶ Nws caw peb hloov peb lub siab, peb txoj kev txawj ntse, peb tus ntsuj plig—thiab peb txoj kev ua pa. Nws hais kom peb hloov peb txoj kev hlub, peb txoj kev xav, kev pab lwm tus, kev siv sij hawm, kev ua zoo rau peb cov poj niam, kev qhia peb cov me nyuam, thiab kev tu peb lub cev.

Tsis muaj ib yam dab tsi uas pab yus dim txim, pab yus ua zoo, los yog tseem ceeb rau peb txoj kev vam meej npaum li kev hloov siab lees txim txhua hnub. Kev hloov siab lees txim tsis yog qhov uas yus ua ib zaug xwb; yog ib tug txheej txheem. Yog tus yawm sij ntawm kev zoo siab thiab kev kaj siab lug. Thaum muaj kev ntseeg, kev hloov siab lees txim qhib peb txoj kev txais tau Yexus Khetos txoj Kev Theej Txhoj lub hwj chim.⁷

Txawm yog nej rau siab ua raws li nej tej kev khi lus, los sis nej tsis tshua ua raws li nej tej kev khi lus, los yog nej tsis ua raws li nej tej kev khi lus hlo li los, kuv thov kom nej hloov siab lees txim. Cia li txais tau lub hwj chim uas ntxiv dag zog rau nej los ntawm kev hloov siab lees txim txhua hnub—ua zoo dua thiab ua neeg zoo dua txhua hnub.

Thaum peb xaiv hloov siab lees txim, peb txiav txim siab tias peb yuav hloov! Peb cia tus Cawm Seej muab peb hloov los ua tus neeg zoo tshaj peb ua tau. Peb xaiv kom peb sab ntsuj plig loj tuaj thiab muaj kev xyiv fab—yog kev xyiv fab uas los ntawm Nws txoj kev txhiv dim.⁸ Thaum peb xaiv hloov siab lees txim, peb xaiv kev hloov los ua neeg zoo li Yexus Khetos ntxiv.⁹

Cov kwv tij, peb yuav tsum ua zoo dua thiab ua neeg zoo dua vim peb ua tsov ua rog. Kev tawm tsam kev txhaum los muaj tseeb tiag. Tus yeeb ncuab siv zog rhuav tib neeg zaj lus tim khawv thiab tab kaum tus Tswv tej hauj lwm. Nws muab rab ntaj rau nws cov tub rog kom txwv tsis pub peb txais tau kev xyiv fab thiab kev hlub los ntawm tus Tswv.¹⁰

Kev hloov siab lees txim yog qhov uas yuav pab peb dim kev tu siab uas los ntawm tus yeeb ncuab tej rooj ntxiab. Tus Tswv tsis xav tias peb yuav ua neeg zoo tag nrho nyob rau lub sij hawm no hauv peb txoj kev vam meej mus ib txhis li. Tiam sis Nws xav tias peb yuav ua neeg huv ntxiv zuj zus mus. Kev hloov siab lees txim txhua hnub yog txoj kev rau peb ua neeg huv, thiab kev ua neeg huv ua rau peb muaj hwj chim. Kev ua neeg huv ua rau peb muaj peev xwm ua cuab yeej hauv Vajtswv txhais tes uas muaj zog. Peb txoj kev hloov siab lees txim—peb txoj kev dawb huv—yuav ua rau peb muaj hwj chim pab muab Ixayees sib sau ua ke.

Tus Tswv qhia tus Yaj Saub Yauxej Xamiv “hais tias tej kev muaj cai ntawm lub pov thawj hwj sib txuas nrog tej lub hwj chim saum ntuj ceeb tsheej uas yeej tsis sib cais, thiab hais tias tsis muaj peev xwm tswj thiab tuav tau tej lub hwj chim saum ntuj ceeb tsheej tsuas yog los ntawm tej ntsiab cai ncaj ncees xwb.”¹¹

Peb paub tej yam twg yuav ua rau peb txais tau lub hwj chim saum ntuj ntxiv. Peb kuj paub tias tej yam twg yuav tab kaum peb txoj kev vam meej—tej yam uas peb yuav tsum tsis txhob ua ntxiv kom peb thiaj txais tau hwj chim saum ntuj ntxiv. Cov kwv tij, thov Vajtswv kom to taub tias muaj dab tsi uas tab kaum nej txoj kev hloov siab lees txim. Cia li saib seb muaj dab tsi uas ua rau nej tsis hloov siab lees txim. Ces, cia li hloov siab! Hloov siab lees txim! Peb txhua tus muaj peev xwm ua zoo dua thiab ua neeg zoo dua yav tas los.¹²

Muaj tej yam uas peb muaj peev xwm ua zoo dua ntxiv. Ib yam yog qhov uas peb tu peb lub cev zoo li cas. Kuv yeej xav tsis thoob txog qhov txuj ci tseem ceeb uas yog peb lub cev. Yog ib yam zoo kawg nkaus, thiab tseem ceeb rau peb txoj kev muaj peev xwm los ua neeg zoo li Vajtswv. Peb vam meej tsis taus yog tsis muaj. Thaum Vajtswv muab lub cev ua lub txiaj ntsim rau peb, Nws tau muab ib yam tseem ceeb kom peb hloov tau ua neeg zoo li Nws.

Dab Ntxwg Nyoog to taub qhov no. Nws ntxub qhov uas nws txoj kev tso qhov tseeb tseg hauv lub neej ua ntej lub neej no ua rau nws txais tsis taus lub cim fim no, ua rau nws pheej khib siab thiab npau taws. Yog li ntawd, tej kev ntxias feem coob uas nws ua rau peb raug ua rau peb ua tsis zoo rau peb lub cev los yog lwm tus lub cev. Vim Dab Ntxwg Nyoog tu siab vim nws tsis muaj ib lub cev, nws xav kom peb tu siab vim peb muaj.¹³

Nej lub cev zoo li nej lub tuam tsev, uas Vajtswv tsim kom nej tus ntusj plig uas nyob mus ib txhis nyob tau.¹⁴ Nej txoj kev saib xyuas lub tuam tsev ntawd tseem ceeb heev. Kuv nug nej cov kwv tij, Nej puas xav tu nej lub cev kom neeg ntiaj teb qhuas ntau dua li nej xav haum Vajtswv siab? Nej teb li cas los qhia Nws txog nej tej kev xav txog Nws lub txiaj ntsim uas Nws tau pub rau nej. Hais txog kev saib xyuas peb lub cev los, cov kwv tij, kuv xav tias peb ua tau zoo dua thiab ua neeg zoo dua ntxiv.

Ib yam uas peb kuj ua tau zoo dua thiab ua neeg zoo dua ntxiv yog peb txoj kev saib taus cov poj niam hauv peb lub neej, qhov tseem ceeb yog peb cov poj niam thiab cov ntxhais, peb cov niam thiab cov muam.¹⁵

Ob peb hli tas los, kuv tau txais ib tsab ntawv los ntawm ib tug muam zoo. Nws sau hais tias: “[Kuv cov ntxhais thiab kuv] peb xav tias peb yuav tsum sib tw kom kuv tus txiv thiab kuv cov tub txoj kev tsom ntsoov rau peb, vim lawv mloog kev tshaj tawm txog kev sib tw 24/7, ua si video games, seb kev lag luam zoo li cas, [thiab] pheej saib thiab mloog kev ntsuam xyuas txog kev sib tw ntaus pob ncaws pob tas li. Zoo ib yam li peb xiam peb qhov chaw nrog kuv tus txiv thiab cov tub vim lawv yeej nyob nraim qhov chaw saib [kev sib tw ntaus pob ncaws pob].”¹⁶

Cov kwv tij, nej tej dej num tseem ceeb tshaj plaws vim nej tuav lub pov thawj hwj yog kom hlub thiab saib xyuas nej cov poj niam. Nrog nws koom siab koom ntsws. Ua nws tus khub. Ua kom yooj yim rau nws xav nrog nej. Tsis muaj ib yam dab tsi hauv nej lub neej uas yuav tsum tseem ceeb tshaj qhov uas nej xav sib raug zoo nrog nws mus ib txhis li. Tsis muaj dab tsi nyob hauv TV, lub xov tooj ntawm tes, los yog lub computer yuav tseem ceeb dua li nws txoj kev nyob zoo. Cia li ntsuam xyuas seb nej siv sij hawm thiab siv zog ua dab tsi. Qhov ntawd yuav qhia tias nej lub siab nyob qhov twg. Cia li thov Vajtswv kom muaj ib lub siab uas sib haum nrog nej tus poj niam lub siab. Cia li nrhiav kev kom nws muaj kev xyiv fab. Thov kom txais tau nws cov lus ntuas, ces cia li mloog nws lus. Nws tej lus qhia rau nej yuav ua rau nej muaj peev xwm ntxiv.

Yog tias nej yuav tsum hloov siab lees txim vim nej ua tsis zoo rau cov poj niam nyob ze nej, ces cia li pib tam sim no. Thiab nco ntsoov tias yog nej txoj kev lav ris kom pab cov poj niam hauv nej lub neej txais cov koob hmoov uas los ntawm kev ua raws li tus Tswv txoj kev cai coj dawb huv. Tsis txhob ua tus neeg uas ua rau ib tug poj niam txais tsis taus nws cov koob hmoov hauv lub tuam tsev.

Cov kwv tij, peb txhua tus yuav tsum hloov siab lees txim. Peb yuav tsum sawv los, tso lub qhib TV tseg, thiab tsim los ntawm peb txoj kev tsaug zog ntawm sab ntsuj plig. Yog lub sij hawm rau peb rau Vajtswv tej cuab yeej tiv rog tag nrho xwv kom peb ua tau txoj hauj lwm tseem ceeb tshaj plaws hauv lub ntiaj teb. Yog lub sij hawm “cev [peb] tej liag mus, thiab sau kom kawg [peb] lub dag lub zog thiab lub siab.”¹⁷ Cov phem los yeej tsis tau ua lim hiam npaum lawv ua hnub no. Vim peb yog tus Tswv cov tub qhe, peb yuav tsum tsis txhob tsaug zog thaum ua tsov ua rog li no.

Nej tsev neeg xav tau nej txoj kev coj thiab txoj kev hlub. Nej pawg pov thawj hwj thiab cov hauv nej pawg ntseeg xav tau nej lub dag zog. Thiab tag nrho cov uas ntsib nej yuav tsum paub tias tus Tswv ib tug thwj tim tseeb zoo li cas thiab ua li cas.

Kuv cov kwv tij, Leej Txiv tau xaiv nej los rau hauv lub ntiaj teb no thaum lub sij hawm tseem ceeb no vim nej sab ntsuj plig khov kho hauv lub neej ua ntej lub neej no. Nej yog ib txhia ntawm cov txiv neej zoo tshaj plaws uas tau los rau hauv lub ntiaj teb no. Dab Ntxwg Nyoog paub tias nej yog leej twg tam sim no thiab ua ntej lub neej no thiab to taub tias yuav tsum ua tej hauj lwm twg ua ntej tus Cawm Seej rov qab los. Thiab tom qab ntau txhiab xyoos uas nws xyaum ua nws tej kev dag ntxias, tus yeeb ncuab tau kawm ntau thiab yeej yuav tsis hloov.

Zoo siab uas lub pov thawj hwj muaj zog tshaj tus yeeb ncuab tej kev ntxias. Kuv thov kom nej hloov los ua cov txiv neej thiab cov tub hluas uas tus Tswv xav kom nej ua. Tsom ntsoov rau kev hloov siab lees txim txhua hnub hauv nej lub neej kom nej muaj hwj chim ntxiv siv tau lub pov thawj hwj tshaj yav tas los. Nov yog tib txoj kev uas yuav pab nej thiab nej tsev neeg sab ntsuj plig nyob nyab xeeb thaum raug tej teeb meem ntawm yav tom ntej.

Tus Tswv xav tau cov txiv neej tsis cuaj khaum uas pab lwm tus ua ntej lawv pab lawv tus kheej. Nws xav tau cov txiv neej uas ua hauj lwm kom hnov tau tus Ntsuj Plig lub suab meej heev. Nws xav tau cov txiv neej uas khi lus thiab ua raws nraim li lawv tej kev khi lus. Nws xav tau cov txiv neej uas rau siab coj dawb huv—cov txiv neej tsim nyog uas Nws hu tau thaum twg los tau kom muaj siab dawb huv thiab txhais tes uas kam foom koob hmoov rau lwm tus. Tus Tswv xav tau cov txiv neej uas xav hloov siab lees txim—cov txiv neej uas mob siab xav pab lwm tus thiab koom tus Tswv pawg tub rog ntawm cov neeg txim nyog tuav lub pov thawj hwj.

Kuv foom koob hmoov rau nej kom hloov los ua txiv neej zoo li ntawd. Kuv foom koob hmoov rau nej kom ua siab loj hloov siab lees txim txhua hnub thiab kawm paub siv lub hwj chim pov thawj hwj tag nrho. Kuv foom koob hmoov rau nej kom paub qhia tus Cawm Seej txoj kev hlub rau nej cov poj niam thiab me nyuam thiab txhua tus uas paub nej. Kuv foom koob hmoov rau nej ua zoo dua ntxiv thiab ua neeg zoo dua ntxiv Thiab kuv foom koob hmoov rau nej tias thaum nej ua tej yam no, nej yuav muaj txuj ci tseem ceeb hauv nej lub neej.

Peb ua Vajtswv tus uas Muaj Hwj Chim Tag Nrho tej hauj lwm. Yexus yog tus Khetos. Peb yog Nkawd cov tub qhe. Kuv hais lus tim khawv txog qhov no los ntawm Yexus Khetos lub npe, amees.