“Los, Nrog Kuv Mus”
Yexus Khetos caw peb ua raws li peb tej kev khi lus kom rov qab mus tsev nrog Leej Txiv Leej Niam Saum Ntuj Ceeb Tsheej thiab nrog cov uas peb hlub nyob.
Kuv cov kwv tij thiab cov muam, kuv tus poj niam Wendy thiab kuv wb zoo siab koom nrog nej thaum Hnub Caiv sawv ntxov no. Txij thaum lub tuam rooj sab laj tas los peb twb ua ntau yam. Peb tau muab tej lub tuam tsev fij tseg nyob hauv Concepción, Chile; Barranquilla, Colombia; thiab Rome, Italy. Peb tau txais tus Ntsuj Plig nplua mias nyob rau tej lub sij hawm ntawd.
Kuv qhuas cov poj niam (thiab txiv neej) uas tau nyeem Phau Ntawv Maumoos thiab nrhiav kev xyiv fab thiab tej yam uas muaj nqis nyob haud. Kuv txais kev tshoov siab los ntawm tej lus uas qhia kuv txog tej txuj ci tseem ceeb uas los.
Kuv xav tsis thoob uas muaj cov tub hluas uas muaj 11 xyoos, lawv yog cov dikas tam sim no, es lawv tsim nyog muab lub cim nco txog rau lwm tus txhua hnub Sunday. Lawv mus rau lub tuam tsev nrog rau cov ntxhais hluas uas muaj 11 xyoos, es tam sim no yog cov Beehives uas xav kawm thiab pab lwm tus. Cov tub hluas ntxhais hluas qhia qhov tseeb txog txoj moo zoo; lawv qhia meej thiab nrog kev ntseeg.
Kuv zoo siab uas cov me nyuam thiab cov tub hluas ntxhais hluas pab qhia txoj moo zoo hauv tsev thaum lawv nrog lawv niam lawv txiv siv cov ntaub ntawv qhia hauv tsev uas lub Koom Txoos txhawb nqa.
Peb tau txais daim duab no txog Blake uas muaj plaub xyoos, es thaum Saturday sawv ntxov, nws nqa ib phau ntawv los ntawm lub Koom Txoos thiab hais tias, “Kuv yuav tsum pub kuv tus ntsuj plig noj!”
Blake, peb zoo siab uas koj thiab lwm tus xav pub lawv sab ntsuj plig noj thaum lawv mloog ntsoov tej lus tseeb ntawm Yexus Khetos txoj moo zoo. Thiab peb zoo siab heev vim peb paub tias neeg coob txais Vajtswv lub hwj chim hauv lawv lub neej thaum lawv teev tiam Vajtswv thiab ua hauj lwm hauv lub tuam tsev.
Ib yam li nej feem coob paub lawm, peb tsev neeg raug kev sib cais peb lub hlis tas los thaum kuv tus ntxhais Wendy tau tso lub ntiaj teb no tseg. Ob peb hnub kawg thaum nws tseem sim kov yeej qhov mob cancer, kuv tau koob hmoov vim kuv muaj cib fim sib tham zaum kawg ntawm leej txiv thiab tus ntxhais.
Kuv tuav nws tes thiab qhia nws tias kuv hlub nws npaum li cas thiab kuv zoo siab npaum li cas uas kuv yog nws txiv. Kuv hais tias: ‘Koj tau yuav txiv hauv lub tuam tsev thiab ua raws nraim li koj tej kev khi lus. Koj thiab koj tus txiv tau tu xya tus me nyuam hauv nej tsev thiab pab lawv los ua Yexus Khetos cov thwj tim zoo, cov mej zeej hauv lub Koom Txoos uas rau siab, thiab cov pej xeem uas pab zej zog. Thiab lawv twb yuav txiv thiab yuav poj niam uas zoo ib yam. Koj txiv zoo siab rau koj. Koj twb ua rau kuv muaj kev xyiv fab heev!”
Nws teb ntsiag to hais tias, “Ua tsaug, Txiv.”
Yog ib lub sij hawm zoo uas wb los kua muag ntau. Nws ua neej tau 67 xyoos, es wb tau ua hauj lwm ua ke, hu nkauj ua ke, thiab ntau zaus mus ski ua ke. Tiam sis hmo ntawd, wb tau sib tham txog tej yam uas muaj nqis tshaj, xws li kev khi lus, cov kab ke, kev mloog lus, kev ntseeg, tsev neeg, kev ncaj ncees, kev hlub, thiab txoj sia nyob mus ib txhis.
Wb nco wb tus ntxhais heev. Tiam sis, vim muaj Yexus Khetos txoj moo zoo, peb tsis txhawj txog nws. Thaum peb tseem ua raws li peb tej kev khi lus rau Vajtswv, peb tos ntsoov txog hnub uas peb yuav rov qab nrog kuv tus ntxhais nyob. Txij no mus txog lub sij hawm ntawd, peb ua hauj lwm rau tus Tswv thiab kuv tus ntxhais ua hauj lwm rau tus Tswv nyob ntawd—nyob hauv lub yeeb tsheej.1
Es, kuv tus poj niam thiab kuv wb twb mus xyuas Paradise xyoo no—Paradise, California. Lub sij hawm uas tau teem tseg mus xyuas lub nroog ntawd yog 40 teev tom qab kuv tus ntxhais tau tso lub ntiaj teb no tseg. Wb nrog Txwj Laug Kevin W. Pearson thiab nws tus poj niam, June, mus es Tsoom Haiv Neeg Ntseeg hauv Ceg Txheem Ntseeg Chico California twb txhawb peb lub siab. Peb tau kawm txog lawv txoj kev ntseeg, lawv txoj kev txhawb pab, thiab tej txuj ci tseem ceeb uas tshwm sim txawm yog lawv raug txhua yam ploj mus nyob hauv hluav taws qus tshaj hauv lub xeev California txij thaum chiv keeb los.
Thaum peb nyob ntawd, peb sib tham nrog ib tug tub ceev xwm hluas, John, uas yog ib tug ua siab loj xub tuaj pab. Nws hais txog qhov uas kev tsaus nti tau nqis los rau hauv Paradise thaum lub Kaum Ib Hlis Ntuj hnub tim 8, xyoo 2018, es hluav taws thiab thee me me nyob thoob plaws lub zos ntawd, ua rau cov tsev thiab cov khoom kub hnyiab tas thiab ua rau txhua yam hloov ua hmoov tshuav tseg tej raj pa taws uas siv thwv cib ua xwb.
Tau 15 teev, John tsav tsheb hauv kev tsaus nti uas muaj tej chaw tseem kub hnyiab es nws pab ib tug dhau ib tug, ib tsev neeg dhau ib tsev neeg kom dim tau—txhua lub sij hawm ntshe nws yuav raug kub hnyiab thiab. Tiam sis thaum lub sij hawm nyuaj heev ntawd, qhov uas ua rau John ntshai tshaj plaws yog qhov uas nws xav paub: “Kuv tsev neeg nyob qhov twg?” Ntau teev tom qab ntawd, tom qab nws ntshai heev, nws kawm tias lawv twb khiav dim lawm.
Zaj uas hais txog John txoj kev txhawj txog nws tsev neeg ua rau kuv txais kev tshoov siab txog cov uas yuav xav paub “Kuv tsev neeg nyob qhov twg?” thaum nej tas sim neej no. Thaum txog hnub uas nej yuav tas sim neej no thiab mus rau hauv lub ntuj ntsuj plig, nej yeej yuav xav paub tias: “Kuv tsev neeg nyob qhov twg?”
Yexus Khetos qhia txoj kev kom rov qab mus rau peb tsev neeg nyob mus ib txhis. Nws to taub peb Leej Txiv Saum Ntuj Ceeb Tsheej txoj hau kev kom vam meej mus ib txhis li zoo tshaj peb txhua tus. Vim hais tias Nws yeej yog lub plawv zeb ntawm txoj hau kev ntawd. Nws yog peb tus Txhiv Dim, tus uas Kho Mob, thiab peb tus Cawm Seej.
Txij thaum Adas thiab Evas raug ntiab tawm ntawm lub Vaj Edees, Yexus uas yog tus Khetos tau muab Nws txhais npab pab tag nrho cov uas xaiv coj raws li Nws. Cov vaj lug kub hais ntau txog qhov uas Nws tseem xyab nws caj npab txais peb, txawm tib neeg ua txhua yam kev txhaum los yog.2
Tus ntsuj plig nyob hauv peb txhua tus yeej xav kom muaj kev hlub los ntawm ib tsev neeg tas mus li. Tej zaj nkauj txog kev hlub qhia qhov cuav tias yog muaj kev hlub xwb ces yuav nyob ua ke tas mus li. Thiab ib txhia xav yuam kev tias Yexus Khetos txoj Kev Sawv Rov Los yuav ua rau txhua tus nyob tau nrog cov uas lawv hlub tom qab lawv tuag.
Qhov tseeb yog qhov uas tus Cawm Seej Nws tus kheej tau qhia meej tias txawm yog Nws txoj Kev Sawv Rov Los yuav ua rau txhua tus neeg uas ua neej nyob yuav sawv rov los thiab nyob mus ib txhis,3 peb yuav tsum ua ntxiv yog tias peb xav txais kev tsa nto. Kev cawm seej yog ib yam uas nyob ntawm ib tug neeg, kev tsa nto yog ib yam uas nyob ntawm ib tsev neeg.
Cia li mloog tej lus uas tus Tswv Yexus Khetos tau hais rau Nws tus yaj saub: “Txhua txoj kev khi lus, kev cog lus, kev sib pom zoo, kev yuav tsum ua, kev lav lus, kev lav ris, kev ua kev cai, kev sib txuas, kev sib koom, los yog kev zeem tos, uas tsis yog ua thiab muab khi tseg cia los ntawm tus Ntsuj Plig Dawb Huv ntawm kev cog lus … ces tsis muaj kev tij lim, hwj chim, los yog peev xwm khi tau ua ke thaum cov neeg tuag sawv rov los thiab tom qab ntawd, vim txhua txoj kev cog lus uas tsis yog ua raws li qhov no ces yuav muaj qhov kawg thaum neeg tas sim neej.”4
Yog li ntawd, yuav ua li cas kom ib tsev neeg txais kev tsa nto tas mus li? Peb tsim nyog txais koob hmoov ntawd thaum peb khi lus nrog Vajtswv, ua raws li kev khi lus ntawd, thiab ua cov kab ke uas yuav tsum ua.
Twb muaj li no txij thaum chiv keeb los. Adas thiab Evas, Nau-as thiab nws tus poj niam, Anplaham thiab Xalas, Lihais thiab Xaliyas, thiab txhua tus thwj tim ntawm Yexus Khetos—txij thaum ntuj tsim teb raug los—lawv twb ua kev khi lus zoo ib yam nrog Vajtswv. Lawv twb tau ua cov kab ke uas peb cov mej zeej hauv tus Tswv lub Koom Txoos ua zoo ib yam: kev khi lus uas peb ua thaum peb ua kev cai raus dej thiab ua kab ke hauv lub tuam tsev.
Tus Cawm Seej caw txhua tus coj raws li Nws ua kev cai raus dej, thiab tom qab ntawd, ua kev khi lus ntxiv nrog Vajtswv hauv lub tuam tsev thiab txais thiab ua raws li cov kab ke ntawd. Yuav tsum ua txhua yam no yog peb xav txais kev tsa nto nrog peb tsev neeg thiab Vajtswv tas mus li.
Kuv nyuaj siab txhawj xeeb vim muaj ntau tus neeg uas kuv hlub, qhuas, thiab saib rau nqi tsis ua raws li Nws caw lawv ua. Lawv tsis quav ntsej Yexus Khetos txoj kev thov kom lawv “Los, nrog kuv mus.”5
Kuv to taub vim li cas Vajtswv quaj.6 Kuv kuj quaj rau cov phooj ywg thiab cov txheeb ze zoo li no. Lawv yog txiv neej thiab poj niam zoo, uas hlub lawv tsev neeg thiab ua raws li lawv tej kev lav ris. Lawv pub lawv lub sij hawm, lub zog, thiab tej yam lawv muaj kom pab lwm tus. Thiab lub ntiaj teb zoo dua vim lawv ua li no. Tiam sis lawv tau xaiv kom tsis txhob ua kev khi lus nrog Vajtswv. Lawv tsis tau txais cov kab ke uas yuav muab lawv thiab lawv tsev neeg tsa nto thiab khi ua ke tas mus li.7
Kheev lam kuv mus ntsib tau lawv thiab caw lawv xav txog tus Tswv tej kev cai uas pab tau lawv. Kuv tau xav tias kuv yuav hais li cas rau lawv kom lawv paub tias tus Cawm Seej hlub lawv npaum li cas thiab kuv hlub lawv npaum li cas thiab pab lawv paub ua li cas cov poj niam thiab cov txiv neej uas ua raws li lawv tej kev khi lus yuav txais “kev xyiv fab puv npo.”8
Lawv yuav tsum to taub tias txawm muaj ib qho chaw rau lawv hauv lub neej tom ntej—uas muaj cov txiv neej thiab cov poj niam uas kuj xaiv tsis txhob ua kev khi lus nrog Vajtswv—qhov chaw ntawd tsis yog qhov chaw uas tsev neeg yuav nyob ua ke thiab muaj cib fim kom ua neej thiab vam meej mus ib txhis li. Qhov chaw ntawd tsis yog lub nceeg vaj uas yuav muaj kev xyiv fab puv npo—kev vam meej thiab kev zoo siab uas tsis paub tas.9 Cov koob hmoov zoo kawg no yeej los ntawm kev nyob hauv ib lub ntuj xilethi-aus nrog Vajtswv, peb Leej Txiv Nyob Mus Ib Txhis; Nws Leej Tub, Yexus Khetos; thiab peb tsev neeg uas zoo thiab tsim nyog.
Kuv xav hais rau kuv cov phooj ywg uas tseem tsis paub:
“Nyob hauv lub neej no, nej yeej tsis txaus siab yog txais tau qhov uas yuav luag zoo tshaj plaws. Tiam sis, thaum nej tsis kam txais Yexus Khetos txoj moo zoo, nej xaiv kom tau qhov uas yuav luag zoo tshaj plaws xwb.
“Tus Cawm Seej hais tias, ‘Kuv Txiv lub tsev muaj chaw ntau rau sawv daws nyob.’10 Tiam sis, thaum nej xaiv kom tsis txhob ua kev khi lus nrog Vajtswv, nej txaus siab nyob hauv ib qhov chaw me me xwb tas mus ib txhis.”
Kuv kuj yuav thov kuv cov phooj ywg uas tseem tsis paub hais tias:
“Thov Vajtswv kawg siab kawg ntsws. Thov Nws seb tej no puas muaj tseeb. Siv sij hawm kawm Nws tej lus. Kawm tiag tiag! Yog nej hlub nej tsev neeg thiab nej xav txais kev tsa nto nrog lawv nyob mus ib txhis, cia li them tus nqi tam sim no—los ntawm kev kawm thiab kev thov Vajtswv tiag tiag—kom thiaj paub tej yam tseeb mus ib txhis no thiab ua raws li tej ntawd.
“Yog nej tsis paub tseeb nej puas ntseeg Vajtswv, kawm txog qhov ntawd ua ntej. Cia li to taub tias thaum yus tsis paub Vajtswv, ua rau yus tsis ntseeg tias muaj Vajtswv tiag. Yog li ntawd, ua tej yam kom nej paub Nws. Txo nej lub hwj chim. Thov Vajtswv kom muaj qhov muag uas pom tau Vajtswv txoj kev pab hauv nej lub neej thiab nyob hauv lub ntiaj teb no. Thov nws kom qhia nej tias Nws puas nyob tiag tiag—thov seb Nws puas paub nej. Thov Nws seb Nws xav li cas txog nej. Ces cia li mloog.”
Ib tug phooj ywg zoo twb tsis tshua paub Vajtswv. Tiam sis nws xav nrog nws tus poj niam uas tau tas sim neej no. Nws tau thov kuv pab nws. Kuv yaum nws kom ntsib cov tub txib kom to taub Khetos cov lus qhuab qhia thiab kawm txog kev khi lus, cov kab ke, thiab cov koob hmoov ntawm txoj moo zoo.
Nws tau ua li ntawd. Tiam sis nws xav tias tej yam lawv qhia nws ntshe nws yuav tsum hloov ntau dhau hauv nws lub neej. Nws hais tias, “Cov lus txib thiab kev khi lus nyuaj dhau rau kuv. Thiab kuv them tsis tau ib feem kaum, thiab kuv tsis muaj sij hawm ua hauj lwm hauv lub Koom Txoos.” Ces nws thov kuv tias, “Thaum kuv tso lub ntiaj teb no tseg, thov koj ua cov kab ke hauv lub tuam tsev sawv cev rau kuv tus poj niam thiab kuv wb thiaj nyob tau ua ke.”
Zoo siab heev uas kuv tsis yog tus txiav txim rau tus txiv neej no. Tiam sis kuv tsis paub yog kev sawv cev ua kab ke hauv lub tuam tsev puas pab tau ib tug txiv neej uas muaj cib fim ua kev cai raus dej hauv lub neej no—muaj cib fim txais lub pov thawj hwj thiab cov koob hmoov hauv lub tuam tsev thaum nws nyob hauv lub ntiaj teb no—tiam sis nws txhob txwm txiav txim siab tias yuav tsis ua li ntawd.
Kuv cov kwv tij thiab cov muam, Yexus Khetos caw peb ua raws li peb tej kev khi lus kom rov qab mus tsev nrog Leej Txiv Leej Niam Saum Ntuj Ceeb Tsheej thiab nrog cov uas peb hlub nyob. Nws caw peb “los, nrog kuv mus.”
Nim no, kuv uas yog tus Thawj Tswj Hwm ntawm lub Koom Txoos, kuv thov kom nej cov uas mus deb ntawm lub Koom Txoos no thiab nej cov uas tsis tshua xav paub tias tau muab tus Cawm Seej lub Koom Txoos txum tim rov qab los. Ua tej hauj lwm no kom paub ntawm nej tus kheej, thiab thov ua tam sim no. Tshuav tsis ntev.
Kuv ua tim khawv tias Yexus Khetos muaj txoj sia nyob! Yexus yog tus Khetos. Twb tau muab Nws lub Koom Txoos thiab Nws txoj moo zoo tag nrho txum tim rov qab los kom foom koob hmoov rau peb lub neej ua rau peb muaj kev xyiv fab, tam sim no thiab txij no mus. Kuv hais lus tim khawv txog qhov no los ntawm Yexus Khetos lub npe, amees.