Na Toso ki Liu

Kemuni na taciqu kei na ganequ lomani, sa dua na ka rekitaki me mai sota kei kemuni ni da mai tekivutaka na ika 190 ni Koniferedi Raraba Vakayabaki ni Lotu i Jisu Karisito ni Yalododonu Edaidai. Au taleitaka na duavata kei kemuni ena nomuni veitikotiko se vanua ga o ni tiko kina, ka vakarorogo ki na nodra itukutuku na parofita, daurairai, ka daunivakatakila kei na iliuliu eso ni Lotu.

Eda sa vakavinavinaka vakalevu ki na tekinolaji e rawa kina meda sema me dua na isoqoni raraba cecere e vuravura ni tisaipeli i Jisu Karisito. Na koniferedi raraba ni Epereli sa dromu a levu cake na tamata a sarava mai na kedra e liu, ka da sa namaka tiko me na yaco tale oqo.

Ena loma ni vica na vula sa oti, na mate dewa e vuravura raraba, na kama rerevaki, kei na tavuki ni draki eso sa vakatobuicu kina na noda vuravura. Au sa mai rarawa vata kei kemuni e sa takali e dua na nomuni daulomani ena vei gauna oqori. Au masulaki ira era vakila tiko na mosi kei na rararawa ena gauna oqo.

Ia, na cakacaka ni Turaga sa toso tudei tikoga ki liu. Ena loma ni tiko veiyawaki, na matavulo, kei na bose ena Zoom, eda sa vulica kina me da cakava na veika e duidui eso ka so mada ga era sa mana sara. Na veigauna duatani e rawa ni kauta mai na kalougata duatani.

O ira na noda daukaulotu kei na iliuliu ni kaulotu era sa ivurevure cecere, gugumatua, ka totoka sara. Dina ga ni vuqa na daukaulotu era se bera tiko ni kunea na sala vou, mera cakacaka kina, e vuqa na tabana ni kaulotu era kaya ni ra sa veivakavulici vakalevu cake tiko mai na kena e liu.

Sa gadrevi kina meda sa sogota mada na valetabu, kei na cakacaka ni tara vale era sa tu vakawawa, ia ena gauna oqo era sa toso kece ki liu. Ena yabaki taucoko ni 2020, eda na vakasobuduru ki na 20 na valetabu vou!

Sa tubu cake sara na cakacaka ni tuva kawa. E vuqa na tabanalevu kei na iteki vou era sa tauyavutaki. Keitou marautaka me vakaraitaka yani ni Lotu sa vakarautaka e 895 na veivakatorocaketaki ni matatamata ena mate dewa raraba ena 149 na matanitu.

Na tubu cake ni vulici ni kosipeli ena vuqa na itikotiko sa qaqaco kina na ivakadinadina kei na veimaliwai ni vuvale. E dua na tina a vola: “Keimami sa veivolekati sara kei ira na luvei keimami kei na makubui keimami nikua ena veisotari ena Zoom e vei Sigatabu. Keimami a dui soli vakasama ena vuku ni Lako Mai, Mo Muri Au. Na qaqa ni masu baleti ira na neimami vuvale sa veisau baleta ni keimami sa kila vinaka na nodra gagadre.”

Sa noqu masu ni da sa duavata ena vakayagataka na gauna talei oqo meda tubu vakayalo. Eda sa tiko eke e vuravura meda vakatovolei, ka raica ke da na digitaka meda muri Jisu Karisito, meda veivutuni ena veigauna, meda vuli, ka tubu cake. Sa gagadre na lomada meda torocake tiko. Eda cakava vakavinaka sara oqo ni da tudei tiko ena salatu ni veiyalayalati.

Ena kena kece oqo, na Tamada Vakalomalagi kei na Luvena, o Jisu Karisito, sa lomani keda! Rau sa dau karoni keda! Oi Rau kei na Nodrau agilosi tabu era sa wanonovi keda tiko. ¹ Au kila ni dina oya.

Ni da soqoni mai meda rogoca na vosa sa uqeti ira kina na Nona italai na Turaga mera kaya, au sa sureti kemuni mo ni vakasamataka vakatitobu e dua na yalayala ni Turaga. A kaya ni “ko koya yadua sa lomana, sa rawa me taura matua na vosa ni Kalou, na ka sa bula ka kaukauwa ka na tawasea rua na ilawaki … kei na vere kecega ni tevoro, ka tubera na [tisaipeli] i Karisito ena sala qiqo ka rabailailai.” ²

Sa noqu masu mo ni digitaka mo ni taura na vosa ni Kalou ni sa vakaraitaki mai ena gauna ni koniferedi raraba oqo. Sa noqu masu mo ni vakila na taucoko ni loloma uasivi na Turaga me baleti iko, ³ ena yacana tabu o Jisu Karisito, emeni.