Kunea na Reki vei Karisito

Na Turaga e sega ni kerei ira noda itabagone ni Matabete i Eroni mera cakava na ka kecega, ia na ka e kerea e veivakurabuitaki.

Ena vica na yabaki sa oti, a lako curuma na noqu vuvale na veika era a sotava e vuqa na vuvale ena vuravura malumalumu oqo. Na neirau cauravou goneduadua, o Tanner Christian Lund, a tauvi koya na kenisa. A dua na gone yalovinaka, me vakataki ira ga na gone yabaki ciwa. E dau vakadrecike toka ka vakavudredre, ena gauna vata oqo, e qaqarauni sara ena veika vakayalo. vosalevu, ia e agilosi, vadrecike ia e gone vinaka. Ni se gonelailai e dau vakurabuitaki keitou e veisiga ena nona maqusa kei na vakadrecike, ka keitou vakabauta ni na tubu cake me na laki parofita se dua na daubutako baqe. Se cava ga, e vaka me sa na biuta toka mai e dua na maka e vuravura.

Vakasauri ga, sa tauvimate bibi sara. Ena tolu na yabaki a tarava, a cokovata na wainimate vou kei na sasaga qaqa, oka kina e rua na sele ni lewe ni sui, ka a tauvi niumonia kina, a gadrevi kina me cegu tu ena misini me 10 na macawa sega tu ni vakilai koya. E veivakurabuitaki, ni sa bula mai vakalailai ga, ka lesu tale mai na nona kenisa.

Ni vo vakalailai me takali yani, na mate nei Tanner sa curuma na nona sui, dina ga ni qaravi ena wainimate kaukauwa, se mosi ga o koya. Sa dredre sara me siro mai na loga. Ena dua na mataka ni Sigatabu, o tinana, o Kalleen, a gole yani ki na nona rumu me la’ki raici koya ni bera ni gole na vuvale ki lotu. A kurabui ni raica ni sa vakaisulutaki koya oti tu ka sa dabe toka ena yasa ni nona loga, ka saga mosimosi toka me bulukautaka na nona sote. A dabe tikivi koya o Kalleen. “Tanner,” a kaya o koya, “o sa bula vinaka beka mo gole rawa ki lotu? Mo sa na tiko ga e vale nikua mo cegu.”

A rai sobu ena fuloa. E a dikoni o koya. E tiko na nona kuoramu. E dua talega na nona ilesilesi.

“E dodonu me’u na la’ki pasi sakaramede nikua.”

“Au vakabauta ni dua ena cakava ena vukumu.”

“Io,” a kaya, “ia … au raica na nodra dau raici au na tamata niu pasi sakaramede. Au vakabauta ni vukei ira.”

Sa qai vukei koya o Kalleen me bulukautaka na nona sote ka bukia na nona neketai, ka vodo yani ki lotu. E matata, ni dua na ka bibi sa yaco tiko.

Au a gole ki lotu ni oti mai e dua na bose ka kurabui niu raici Tanner ni dabe toka ena iyatu ni dikoni. A kaya malua vei au o Kalleen na vuna a mai tiko kina kei na ka a kaya: “E vukei ira na tamata.”

Au sa qai raici ira na dikoni ni ra tu yani ki na teveli ni sakaramede. A ravi malua vua e dua tale na dikoni ni ratou sa solia mai na bete na terea ni madrai vei iratou. A toso yani o Tanner ki na nona itutu ka qumia na tutu ni idabedabe me tudonutaki koya ni solia yani na sakaramede.

E vaka me mata kece e valenilotu era raici koya, ka ra uqeti ena nona saga me vakayacora na nona itavi lailai. Ia a vakaraitaka o Tanner e dua na vunau malua ka toso vakavinaka, vakatatao mai na iyatu yadua—ka buno na uluna tasi—e matataka na iVakabula ena nodra ivakarau na dikoni. Na dikoni qaqa ena dua na gauna oqo sa mai mavoa toka, ramusu, ka kadresu, sa bolea na rarawa me qaravi ira ena nona kauta yani na ivakatakarakara ni Veisorovaki ni iVakabula ki na noda bula.

Ni raici na sala sa mai vakasamataka o koya me dua na dikoni e mai vakavurea me veisau talega na vakasama—me baleta na sakaramede, baleta na iVakabula, ka baleti ira na dikoni, na ivakavuvuli, kei na bete.

Au vakasamataka na cakamana tawakilai a uqeti koya me rogoca ena qaqa na kaci malua, veiqaravi lailai, kei na kaukauwa kei na igu ni noda itabagone vou mera sasagataki ira ena nodra vakadonuya na kaci ni parofita mera curu ki na mataivalu ni Kalou ka sema ki na cakacaka ni veivakabulai kei na bula vakacecerei.

Na gauna yadua e taura kina e dua na dikoni na terea ni sakaramede, eda nanuma na italanoa tabu ni iOtioti ni Kana Vata, Kecisemani, Kalivari, kei na qaravatu ena were. Ena nona kaya na iVakabula vei iratou na Nona iApositolo, “Dou cakava oqo mo dou vakananumi au kina,” ¹ Sa vosa talega ki na veitabayabaki kivei keda yadua. Sa vosa tiko o Koya baleta na cakamana ena vakarautaka o Koya vei ira na dikoni, ivakavuvuli, kei na bete ni ra na solia na Nona ivakatakarakara ka sureti ira na Luvena mera ciqoma na Nona isolisoli ni veisorovaki.

Na ivakatakarakara taucoko vakasakaramede sa dusimaki keda ki na isolisoli oya. Eda vakananuma na madrai a dovia o Koya—kei na madrai e matadra na bete, era sa mai dovia tiko oqo. Eda vakasamataka na ibalebale ni wai vakatabui, e liu kei na gauna oqo, ni tau malua na vosa ni sakaramede mai na gusudra na bete gone ki na lomada vakakina ki lomalagi, ka vakavoui na veiyalayalati sa semati keda ki na kaukauwa ni veivakabulai i Karisito. Eda na nanuma beka na kena ibalebale ni kauta mai o dikoni na ivakatakarakara tabu kivei keda, tucake tu ena vanua vataga ena tu kina o Jisu ke tu e kea o Koya, me colata na noda icolacola bibi kei na mosi.

E ka marautaki, o ira na cauravou kei na goneyalewa e sega ni gadrevi mera tauvimate mera raica kina na reki kei na inaki ni ra qarava na iVakabula.

A vakavulica o Elder David A. Bednar ni gadrevi meda tubu ka vaka na daukaulotu sara, meda cakava na ka era cakava, na daukaulotu ka qai, “vosa ena vosa ka vunau ena vunau, … [eda] na rawa meda daukaulotu … sa namaka tiko na iVakabula.” ²

Sa vakakina, kevaka eda sa gadreva “me da vakataki Jisu,” ³ meda cakava vakataki Jisu, ena dua ga na yatuvosa cecere, a kaya na Turaga na veika e cakava o Koya: A kaya, “Ia raica, oqo na noqu cakacaka kei na lagilagi—meu vakavuna na tawa mate rawa kei na bula tawamudu ni tamata.” ⁴

Na ilesilesi ni iVakabula me qarava e veigauna ka tawamudu na Tamana ena Nona vakabulai ira na Luvena.

Na sala vakadeitaki me kunea na reki ena vuravura oqo o ya meda duavata kei Karisito mera vukei eso.

Oqo na dina rawarawa a uqeti kina na parokaramu ni Gonelalai kei na iTabagone.

Na itaviqaravi kei na ivakavuvuli kece ni Gonelalai kei na iTabagone sa baleta nodra vukei na itabagone mera vakataki Jisu cake ni ra vakaitavi vata kei Koya ena Nona cakacaka ni veivakabulai kei na bula cecere.

Na Gonelalai kei na iTabagone sa iyaya me vukea na gone yadua ena Lalai kei na iTabagone mera tubu vakatisaipeli ka rawata na raivotu sinai ena vakabauta nai rairai ni marau. Sa rawa mera na nanamaki ka gadreva na kedra vanua kei na ivakatakilakila ena salatu ni veiyalayalati, me kauti ira mera na papitaiso ka vakadeitaki ena isolisoli ni Yalo Tabu ka ra na taukeni ena kuoramu kei na kalasi ni Goneyalewa, era na vakila kina na reki ni vukei ira eso ena rawati ni bula veiqaravi sa Vakarisito. Era na tuva na lalawa, ka levu ka lailai, ena vakarautaka na tudonu ki na nodra bula ka yaco mera vakataka cake na iVakabula. Ena koniferedi kei na mekasini ni Me iSakisaki ni iTabagone, na iTokani, kei na app ni Bula Vakosipeli ena vukei ira dina mera kunea na reki mai vei Karisito. Era na namaka na veivakalougatataki mera taura na ivolatara vakaiyalayala ka vakila na yaloi Ilaija ena veivakauqeti ni Yalo Tabu ni ra vakasaqara na veivakalougatataki ni valetabu kei na tuva kawa. Era na dusimaki ena veivakalougatataki vakapeteriaki. Ena qai yaco, mera raica ni ra sa gole ki valetabu me sobuti ira ena kaukauwa, mera kune reki; ka semati tawamudu, se cava ga e yaco, kei na nodra vuvale.

Mani cava na cagi kaukauwa ni mate raraba, na taucoko ni yalayala ni parokaramu vou ni Gonelalai kei na iTabagone se tomani tikoga na kena toso—ia me vakusakusataki. O ira na noda itabagone era sa sega ni waraka na vuravura me vakadodonutaki koya mera qai kila kina na iVakabula. Eso era sa mai digidigi cala ena gauna oqo baleta ni ra sega nikila na dina me baleti ira—kei Koya.

Koya gona, na kaci bibi ni mataivalu ni Kalou ena revurevu o ya me “vakarau na tamata kece!”

Kemuni na tama kei na tina, era gadreva na luvemuni tagane mo tokoni ira nikua ena yalololoma me vaka e liu ni ra a se oka tiko ena veika lalai eso me vaka na beji kei na pini. Kemuni na tama kei na tina, iliuliu ni matabete kei na Goneyalewa, kevaka era sasaga bula tiko na nomuni itabagone, na Gonelalai kei na iTabagone ena vukei ira mera gole vua na iVakabula, ka na vakacegui ira na iVakabula.

Kemuni na mataveiliutaki ni kuoramu kei na kalasi, ni tu mai ka taura na nomuni itutu dina ena cakacaka ni Turaga.

Bisopi, ni semata na nomuni idola vei ira na peresitedi ni kuoramu, kei na nomu kuoramu—ena yaco na nomu tabanalevu—me veisau vakadua.

Oi kemuni na itabatamata tubu tiko mai, au sa vakadinadinataka, niu sa kila, o ni sa luvena tagane kei na yalewa lomani na Kalou ka sa tiko Vua na nomuni cakacaka.

Ni ko tu yani ki na nomu lagilagi ni veikacivi, ena yalomu taucoko, kaukauwa, vakasama, kei na igu, o na yaco mo lomana na Kalou ka maroroya na nomu veiyalayalati ka nuitaka na Nona matabete ni ko cakacaka mo vakalougatataki ira na tani, tekivu ena nomu itikotiko.

Sa noqu masu ni ko na sasaga, ena igu vakalevutaki, kilikili ena gauna oqo, me veiqaravi, cakacaka ena vakabauta; veivutuni, ka torocake e veisiga, mo rawata na kalougata ni valetabu kei na reki gugumatua e yaco ga mai ena kosipeli i Jisu Karisito. Sa noqu masu ni ko na vakavakarau mo na daukaulotu qaqa, tamata vakawati yalodina, tama se tina dauloloma, sa yalataki tu mo na yaco mo dua na tisaipeli dina i Jisu Karisito.

Mo na veivuke ena vakarautaki ni vuravura me baleta na nona lesu mai na iVakabula ena veisureti vei ira kece na tamata me lako mai vei Karisito ka ciqoma na veivakalougatataki ni Nona Veisorovaki. Ena yacai Jisu Karisito, emeni.