Marama e Saioni

Kemuni na ganequ lomani, au kalougata niu mai vosa ena gauna vakasakiti oqo ni itukutuku kei vuravura. Ena veisiga yadua, eda sa toro volekata tiko yani na gauna lagilagi oya ena lako tale mai kina ki vuravura na iVakabula ko Jisu Karisito. Eda kila e dua na ka ena veika rerevaki ena ikau ni Nona lako mai, ia e reki na yaloda ka dei ni da sa kila talega na veiyalayala lagilagi ena vakataucokotaki ni se bera ni lesu mai o Koya.

Ni da luvena yalewa daulomani na Tamada Vakalomalagi, vakakina ni da luvena yalewa na Turaga ko Jisu Karisito ena Nona matanitu, ¹ ena nomu e dua na itavi bibi ena veisiga cecere sa tu mai liu. Eda kila ni na lako mai na iVakabula vei ira e dua na matatamata era sa sokumuni ka vakarautaki me ra bula me vakataki ira na tamata ena koro levu ko Inoke. Era a duavata ena vakabauti Jisu Karisito na tamata e kea ka ra sa yaco me ra tamata savasava ka ra sa kau cake kina ki lomalagi.

Oqo na nona ivakamacala vakatakilai mai na Turaga ena veika ena yaco vei ira na tamata nei Inoke kei na veika ena yaco ena iotioti ni itabagauna oqo ni iotioti ni gauna:

Ia ena yaco na siga me na qai vakacegu kina ko vuravura, ia ni bera na siga ko ya ena vakabutobutotaki mada ko lomalagi, ka ubi vuravura tale ga e dua na ilati butobuto; ia ena sakure na lomalagi, ka vakakina na vuravura; ka na yaco ena kedra maliwa na luve ni tamata na veivakararawataki levu, ia au na taqomaki ira ga era sa noqu;

“Kau na tala sobu mai lomalagi na ka dodonu; ka tala yani mai vuravura na dina, me vakadinadinataki koya na noqu Le Duabau ga; na nona tucake tale mai na mate; io, ka vakakina na nodra tucake tale na tamata kecega; io au na cakava me lako siviti“ vuravura na cakacaka dodonu kei na dina me vaka sa lako siviti vuravura na waluvu, me ra vakasoqoni mai kina na noqu digitaki mai na yasai vuravura e va, ki na Koro Tabu ka’u sa vakarautaka, me ra vakadreta na ivau ni tolodra ko ira na noqu tamata, ka waraka na noqu lako mai ni na tu kina na noqu valecavu, ka na vakatokai ko Saioni, e dua na Jerusalemi Vou.

“A sa kaya vei Inoki na Turaga: Ia ko ni na sota mai kea kei ira na lewe ni nomuni koro, io eda na kidavaki ira ki loma sereda, era na raici keda; ka da na mokoti ira, ka ra mokoti keda, eda na regu;

“Ia ena tiko kina na noqu itikotiko, io na Saioni, ka’u sa qisia mai na veika kecega ka’u a bulia; ia ena kune vakacegu ko vuravura me dua na udolu na yabaki.” ² .

Oi kemunu na marama, o ira na luvemuni yalewa, o ira na makubumuni yalewa, kei ira na marama ko ni a susuga era na uto ni kena buli na isoqosoqo tamata oqori ka ra na duavata ena veivakaduavatataki lagilagi ko ya kei na iVakabula. O kemuni e dua na kaukauwa yaga sara ena vakasoqoni kei Isireli kei na buli ni dua na matatamata vaka-Saioni ka ra na tiko sautu e Jerusalemi Vou.

Sa vakayacora vei kemuni na Turaga e dua na yalayala, mai vei ira na Nona parofita. E muri, a qai kaya o Parofita Josefa Simici vei ira na marama, “Kevaka ko na rawata rawa tiko mo caka dodonu, era na sega ni tarovi rawa na agilosi me ra mai nomu itokani.” ³

Na isausau vakasakiti oya e davo tu e lomamuni, ko ni sa vakarautaki tu kina.

E kaya vakaoqo o Peresitedi Gordon B. Hinckley:

“O kemuuni na marama …e sega ni nomuni e dua na ikarua ni itutu ena nona ituvatuva na Tamada me baleta na nodra marau tawamudu na Luvena. Ko ni sa tiki bibi vakaidina ni ituvatuva o ya.

“Ni sega oi kemuni ena sega ni cakacaka rawa na ituvatuva. “Ni sega oi kemuni ena takiveiyaga na parokaramu taucoko. …

“Oi kemuni yadua na luvena yalewa na Kalou, ka edaumenitaki tu ena itutu vakalou.” ⁴

Na noda parofita nikua, o Peresitedi Russell M. Nelson, sa solia na ivakamacala oqo me baleta na nomuni itavi ena vakavakarau ni nona lako mai na iVakabula:

Ena ka dredre toka na sasagataka me kilai na veivakayarayarataki e tiko vei ira na marama, sega walega ena matavuvale, ia sa vaka talega ena Lotu ni Turaga, ena itutu vaka radini vale, vaka tina, vaka buinigone, ganena, kei na nei, vaka qasenivuli kei na iliuliu ka vakauasivi ena ivakaraitaki ka tutaka na vakabauta.

“A dina oqo ena veitabagauna kece sara vakosipeli me tekivu mai na gauna i Atama kei Ivi. Ia o ira na marama ena itabagauna oqo era duatani sara mai vei ira na marama ena veitabagauna kece tale baleta na itabagauna oqo e duatani mai vei ira tale e so. Na duidui oqo e kauta mai na gauna vinaka kei na itavi.” ⁵ .

E duatani na itabagauna oqo baleta na Turaga ena liutaki keda me da yaco me vakarau me da vaka na koro ko Inoke. Sa vakamacalataka oti o koya mai vei ira na Nona iapositolo kei ira na parofita na cava soti ena gadrevi ena veisau oqo ki na tamata vaka-Saioni.

E vakavuvulitaka o Elder Bruce R. McConkie:

“Na gauna nei Inoke a gauna ni caka ca kei na ca, na gauna ni butobuto kei na veisaqasaqa, a gauna ni veivaluvaluti kei na veivakarusai, na siga sa voleka mai kina me vakasavasavataki na vuravura ena wai.

“Ia, a yalodina tikoga o Inoke. A ‘raica na Turaga,’ ko koya, ka veitalanoa vata kaya e ‘matana votu’ me vaka ga e rau veivosaki tiko e le rua na tamata.(Mosese 7:4.) A talai koya na Turaga me vunautaka na veivutuni ki vuravura, ka lesi koya me ‘veipapitaisotaki ena yaca ni Tamada kei na Luvena, o koya sa sinai ena loloma soli wale kei na dina, kei koya tale ga na Yalo Tabu, o koya sa tukuni Tamada kei na Luvena.’ (Mosese 7:11.) A veiyalayalati ko Inoke ka soqona vata e dua na ivavakoso ni tamata vakabauta dina, sa yaco o ira kece me ra yalodina sara ‘sa lako mai kina na Turaga me mai tiko vata kei ira na nona tamata, ka ra sa tiko kina ena buladodonu,’ ka ra vakalougatataki mai lagi. A sa vakatokai ira na nona tamata na Turaga ko Saioni, ni ra sa yalovata ka duavata ena nodra vakasama, ka ra kitaka na ivalavala dodonu; a sa sega vei ira sa dravudravua.’ (Mosese 7:18.)

“Ni sa oti na nona vakatokai ira na nona tamata ko Saioni, e kaya na ivolanikalou ni qai ‘tara e dua na koro ka vakatokai na Koro Tabu, io ko Saioni;’ ko Inoke, ko Saioni oqori sa kau cake ki lomalagi ‘ni sa tokia na Kalou ki na nona iserau, ko ya sa tukuni kina vaoqo, sa kau tani ko Saioni.’ (Mosese 7:19, 21, 69.)

“Na Saioni vata ga oqo a kau ki lomalagi ena lesu tale mai … ni sa kauti Saioni tale mai na Turaga, ka ra mai duavata kei na Jerusalemi vou ena qai tauyavu na lewena.” ⁶

Kevaka e ivakamacala taumada na itukutuku makawa, ena gauna ena lako mai kina na iVakabula, o ira na yalewa era sa dromuci ira tu vakatitobu ki na nodra veiyalayalati kei na Kalou era na sivia na kedra veimama o ira era sa vakarau tu me ra kidavaki Koya ena gauna ena lako mai kina. Ia se cava ga na iwiliwili, na nomuni cau ena nomuni vakavuna na duavata vei ira na tamata era vakavakarau tiko ki na Saioni oya ena sivia sara vakalevu na veimama.

Au na tukuna vei kemuni na vuna au nanuma kina ni na vakakina. Na iVola i Momani e tukuna e dua na itukutuku baleta e dua na matatamata ni Saioni. O ni na nanuma ni sa oti na nodra vakavulici, lomani, ka vakalougatataki mai vua na iVakabula sa vakaturi cake mai na mate “sa sega na veileti ena vanua, ni sa tiko e lomadra na tamata na loloma ni Kalou.” ⁷

Sa vakavulica vei au na veika au sotava ni tu vei kemuni na luvena yalewa na Tamada Vakalomalagi e dua na isolisoli mo ni vakalailaitaka na veiqati ka vakalevulevuya na buladodonu ena nomuni lomana na Kalou kei na lomana na Kalou o ni vakaitovotaki ira kina o ni qarava.

Au a raica ena noqu gauna ni itabagone ni keimami dau soqoni na neitou tabana lailai ena neitou itikotiko ena noqu gauna ni gone. Keirau ga kei taciqu e na Matabete i Eroni, o tamaqu ga na Matabete i Melikiseteki. Na peresitedi ni iSoqosoqo ni Veivukei e dua a saumaki mai ka dau sega ni marautaka na turaga watina na nona veiqaravi ena Lotu. O ira na lewena era sa kena marama taucoko ka sega na matabete ena nodra vale. Au sarava na tinaqu kei ira na marama oya ena nodra loloma, veilaveti, ka veikauwaitaki sega ni guce vakataki ira. Au sa qai raica rawa oqo ni a sa vakaraitaki taumada vei au ko Saioni.

Na noqu vakavulici me baleta na nodra dau veivakayarayarataki na marama yalodina a laki tomani ena dua na tabana lailai ni Lotu mai Albuquerque e New Mexico. Au sarava na nodratou mea na yalodra o ira kece era lako vou yani kei ira na saumaki mai, na watina na peresitedi ni tabana, na watina na peresitedi ni tikina, kei na peresitedi ni iSoqosoqo ni Veivukei. Ena Sigatabu au biuti Albuquerque kina, ni oti e rua na yabaki noqu dikeva voli na nodra veivakayarayarataki na marama mai kea, sa tauyavu na imatai ni iteki. Ena gauna oqo na Turaga sa biuta e dua na valetabu mai kea.

Au a toso tarava ki Boston, kau veiqaravi kina ena mataveiliutaki ni tikina ka veiliutaki vei ira na veitabana lalai era tu ena rua na yasana. Era yaco vakavica na duidui era qai walia na marama dauloloma ka dauveivosoti era a veivuke me ra vakamalumutaka na yalo. Ena Sigatabu au biuti Boston kina, a tauyavutaka na imatai ni iteki mai Massachusetts e dua ena Maataveiliutaki Taumada. Sa tu ekea e dua na valetabu ena gauna oqo, voleka ki na vanua a dau vakaitikotiko kina na peresitedi ni tikina. A qai vakabulabulataki mai ki na Lotu ka qai kacivi e muri me peresitedi ni iteki oti qai peresitedi ni tabana ni kaulotu, ena veivakayarayarataki ni dua na marama vakawati yalodina ka dauloloma.

Kemuni na ganequ, a soli vei kemuni na veivakalougatataki mo ni luvena yalewa na Kalou ka tu vei kemuni na isolisoli digitaki. O ni kauta mai vata kei kemuni ki na bula oqo e dua na kaukauwa vakayalo mo ni susugi ira eso tale ka laveti ira vakalevu cake ki na loloma kei na savasava ena rawa kina vei ira me ra laki bula vata ena dua na itikotiko vaka-Saioni. E sega kina ni vakacalaka ni mai ibole tu ni iSoqosoqo ni Veivukei, na imatai ni isoqosoqo ena Lotu ka baleti ira vakatabakidua na luvena yalewa na Tamada Vakalomalagi “Sa Sega ni Mudu na Loloma.”

“Na loloma uasivi sa ikoya na loloma taucoko i Karisito.” Ia sai koya na vakabauti Koya kei na mana taucoko ni Nona iSoro ni Veivakaduavatataki o na vakadonui kina, vakakina o ira o lomana ka qarava, me baleta na isolisoli vakalou mo laki bula ena veimaliwai ni Saioni sa yalataki tu ka sa vaqarai tu vakabalavu. E kea o ni na veitacini kina e Saioni, ka na lomani kemuni sara ga kei ira o ni sa vakalougatataka na Turaga.

Au vakadinadinataka ni ko ni lewenivanua ena matanitu ni Turaga e vuravura. Ko ni luvena yalewa e dua na Tamada Vakalomalagi dau loloma, o koya a talai kemuni mai ki vuravura kei na veisolisoli duidui o ni sa yalataka mo ni vakayagataka mo ni vakalougatataki ira kina eso tale. Au yalataka vei kemuni ni na tubera na ligamuni na Turaga, mai vua na Yalo Tabu. Ena liu e matamuni ko Koya ena nomuni vukei Koya me ra vakarautaki na Nona tamata me ra yaco me Nona Saioni yalataki. Au sa vakadinadinataka ena yaca tabu i Jisu Karisito, emeni.