Dahme Mehlel?

Riei kan, kalahngan ohng koaros pwehki kapokon kaselel wet! Mwurin kapokon lap samwalahro, kitail kilangehr sohng tohto me wiwiawi nan sampah wet, me kansensuwed oh pil me kaselel kan.

Se pereniki mehlel repwoht pen kapokon lap kan en me pwulopwul kan me wiwiawi nan sampah pwon.¹ Nan soangen kapokon lap pwukat, neitail me pwulopwul kan kin esehla me mehndahte dahme wiewiawi nan arail mour, arail kehlail kin kohsang rehn Kauno.²

Kitail ahniki peren mehlel pwehki tehnpas sarawi kan ahr wie kokouda nan sampah pwon. E kin mie laudlahn manaman en Koht pohn sampah me kin iangedo kasarawi en ehu ehu tehnpas sarawi kapw kan, pwehn kakehlakaikitail oh pelian lalaudlahn doadoahk en tepelo.

Tiahk en wiakau wia kisehn doadoahk en tepelo. E wia dihp lapala ehu.³ Ni ahi wia President en Mwomwohdisoht, I kadehde padahk kan en Kaun Sises Krais me pid ire wet. I en koasaoi ni sansal: sohte lipilipil soangen wiakau da; wiakawe de kamedeke lih, seri, de emen aramas torohr wia tiahk samin mwohn Kauno. Eh kin ketin pahtoukihla oh I pil kin pahtoukihla anosu me emen sohte lipilipil kin ahniki lokolok. Eh kin ketin patoukihla oh kitail kin patoukihla emen emen me iang pwopwidiong nan songesongen wiakau kan. Irail akan me kin iang wiahda mwekid sohte mwahu pwukat pahn dipekihda pahn kosonned en aramas oh pil alehdi engieng en Koht.

Pahrehr ngeder, Mwomwohdisoht kin wiahda koasoandi kehlail pwehn pere—koaros ahpw ni mehlel—seri kan sang nan kahpwal. Mie sawas tohto nan website en Mwomwohdisoht. I luke kumwail en onopiki sawas pwukat.⁴ Iren kaweid pwukat mie pwehn pere irail akan me sohte wiahda sapwung. I kangoangehki kitail koaros en tehk mwahu ma mie me mihmi nan soangen keper wet, oh mwadangete sewese irail. Kauno sohte pahn pohnsehse mwekid suwed pwukat, oh kitail me wia Sapwellime tohn doadoahk, pil sohte kak.

Tohto wiepen an pali suwedo ah mehn pitihkitaildi. Ehu wiepehu iei doadoahk en kapingada nanpwungen me mehlel oh me sohte mehlel. Pehki atail kak audahte diar soang tohto nan internet, e kin apwal en ese dahme mehlel.

Kahpwal wet kin kataman ong ie en ngehi oh Sister Nelson aht kohla tuhwong ohl lapalap men nan wehi ehu me aramas akan sohte nohn wewehki ihs Sises Krasi. Kempoakapahio mahlahr oh kin kohwa soumwahu. E ndahieng kiht me ni ah kin wonohn pohn ah pehto, e kalapw kilkilang densohu oh medemedewe, “Dahme mehlel?”

Tohto nan sampah rahn wet “sohte ahniki mehlelo pwehki irail sohte ese ia wasa me re pahn diar ie.”⁵ Ekei kamehlele me emen emen kak pein koasoanedi dahme mehlel oh dahme sohte mehlel. Lamalam wet wia ouraman ieu en irail akan me wiahki me irail sohte pahn pwukoahki arail wiewia mwohn Koht.

Riei ohl oh lih akan, mehlel koaros kin kohsang rehn Koht. Mwomwohdiso en Sises Krais en Souleng en Imwin-rahn Akan kin kesempwaliki mehlel kan koaors me Koht kin ketkiong Sapwellime seri kan, mehlel kan en pelien sains oh pil mehlel kan en kaudiahl sang Reh.

Sang wasahn kapahrek wet rahnwet oh lakapw, kumwail pahn kin rongorong duwen mehlel kan. Menlau intingihdi iren madamadau kan me sair kumwail oh koaros me kodohng nan kumwail oh mihmi nan amwail mongiong kan. I kapakapki Kauno en kadehde ohng kumwail mehlel en mepwukat.

I poakohng kumwail, riei ohl oh lih akan. Ih kapakapki kapokon lap wet en kak sewese kumwail oh kiong kumwail kamadipw en pali ngehn me kumwail raparapahki. Ni lengileng sarawi en Sises Krais, amen.