Peren oh Kokolahte

Kompokepahi ko, reie ohl oh lih akan, kumwail tamataman duwen kamelele, de men kamelele, ni peren soutuk?

Eri mour wiawi. Kitail “keirida.“ Ehupene kasahliel la. Sampah wet me mwoaroangoaroang, ngeder, idihd, ki mwohmw me aramas pahn kilang oh pereniki. Ahpw, nan atail “mongiong kan,“¹se kamelele, de mwahuki kamelele, wasa ehu, ni mwomw ehu, peren oh kokolahte me mehlel oh kak wiawi.

“Peren oh kokolahte“ kaidehn mehkot me kitail kin pein medewehda nan soai kan. Mehlel, peren soutuk oh kokolahte rehn irail akan me ke poakohng wia mehkot kesempwal ong sapwelimen Koht pilahn ong peren. E kounopadahr ahl me kak wiahda atail seilok wet peren oh pil kokohlate.

Diren mehkot kitail anahne kapingki oh pil kalahnganki. Ahpw, sohte emen kitail unsek, pil duwehte nan peneinei kan. Atail ehupene kan kin iangahki limpok, patpene, oh mwomwetail ahpw ekei pahn e kin duwehte mete me kin loipene, kamedek, ekei pak kin inenen medek laud.

“Pwe duwen aramas koaros ar kin mehkihla pwehki Adam, ih duwen koaros pahn iasadahng mour pwehki ar miniminiong Krais.“² Momour rehn Sises iangahki momour en mour teio—Sapwelime kisakis en iasadahn paliweretail kan. Ni atail momouriki pwoson oh peik, momour rehn Krais kak pil iangahki peren en mour soutuk rehn Koht oh koaros me kitail poakohng.

Ni ahl kaselel ehu, sapwelimen Kauno soukohp akan weuwai kitail do rehn Sounkomour o, me iangahki tiahk sarawi kan en tehnpas sarawi oh inou kan kokodohng kitail nan wasa tohto. Kitail ahneki ansou lapalahn ansou mwahu ehu en diarada kisakis en marainkihla ngehn, limpok, koluhla, oh mahkpene nanpwungatail oh atail peneinei kan, nan ansou et oh kokohlate.

Sang ni mweimwei, I ehukiwei ire sarawi riau me kohsang rehn kompokepahi kan duwen Sises Krais ah kin ehuieng peneinei kan sang ni kamwahuihla soahng koaros me wahdo kapingiping.³ “Soutuk oh potopot,”⁴ “kehlail sang sahl en mehla,”⁵ Tomwpen Sises Krais kak sewese kitail wahdo meleilei ong dahme nekier oh kopworopwor ong dahme pahn kohdo mwuhr.

Ni ansou me re iangala Mwomwodiso en Sises Krais en Souleng en Imwin-Rahn akan, kompokepahi o iangahki ah pwoudo pereniki esehla duwen ahnenepen ehupenehn peneinei kan kaidehn lel te “lau mehla irepeseng kumwa.“ Nan tehnpas en Kauno, peneinei kan kak ehupene kokolahte {katengetengedi}.

Ahpw kompokepahi o sohte men katengeteng iong ah pahpao. “E sohte wia ohl pwopwoud mwahu men ong ai nohnou. E sohte wia pahpa mwahu men ong nah seri kan,“ e kosoia. “Ai pahpao anahne awih. I sohte inangih wia ah dodohk en tehnpas sarawi oh katengeteng iong ih kokolahte.“

Sounpar ehu, e kin kaisihsol, kapakpa, kin kosoiaiong sohng tohto ong Kauno me pid duwen ah pahpao. Mwuri, e onopadahr. An ah pahpao dodohk en nan tehnpas sarawio kanekneklahr. Mwuri, e kosoia.“Nan ai meir ai pahpao pwarohng ie nan ai ouraman o, likou pwetepwet. E wekila. E patowan, ‘kilang dohng ie. Ih mwakelekelahr. Kalahngan en amw wiahda ai dodohk kan nan tehnpas sarawi.’” Ah pahpao pil kosoia, “Pwourda oh pwurala ni tehnpas sarawio; riomw pwutako awiawi en pepdaisla.“

Kompokepahi o kosoia, “Kadoudouke pahi kan koaros oh koaros me tienglahr wie awiawi arail dodohk kan en nekila.“

“Ong ie,“ e kosoia, “tehnpas sarawi iei wasahn kamwahuila, kasukuhlki, oh wewehkila Tomwpen Sises Krais.“

Keriaun ire. Emen kompokepahi rapahki laud duwehn poadopoad en eh peneinei. E men esehla ah pahpa kahlap ako.

Ehu mensengo, kompokepahi o kosoia me eh kehn ngehn en ohl emen nan ah pereho. Ohlo men dierekda oh dehde ong ah peneinei. Ohlo kehn doh pwehki sang ni sapwung ehu me e anahne kouluhkila. Ohlo sewese kompokepahi o en wewehkida me e sohte ahneki DNA ong aramas me kompokepahi o medewe me dene ih me ah pahpa kahlap o. “Ni kosoi teikan,“ kompokepahi o kosoia, “Ih diarada ai pahpa kahlap o oh esehda me kaidehn ih aramas me mih nan record en aht peneinei me se kin inda me iei aht pahpa kahlap.“

Ah peneinei dedehier, kompokepahi o kosoia, “I saledekla, ni meleilei. E wia mehkot wekila ehu en esehla ihs ai peneinei.“ Kompokepahi o kosoia, “Rahn tuhke ehu me pireklahr sohte wewehki me tuhkeo sakanakan. Ia mwomwen atail kohdo nan sampah inenen tikitik sang atail esehla ihs kitail ansou me kitail mweselda.“

Pwuhk sarawi kan oh mwekid sarawi kan pein amw kamwahula kan oh meleilei, me iangahki koaros me momour nan sapwen ngehn, wiahda ire kesempwal limau.

Keieu: Poahsoan en Sapwellimen Koht pilahn en doarehla sang oh peren, Sises Krais, sang ni Sapwelime Tomw o, inoukihdi me E pahn ketin kapwure pene ngenitail kan oh palin weretail kan. “oh sohte pahn pwurehng kohpeseng, pwe kitail en alehdi unsek pen pereno.“6

Keriau: Tomw o—ni-ansou-ehu rehn Krais—kohdo ansou me kitail kin kakehlailih atail pwoson oh wahdo wah kan en koluhla.⁷ Nan mour wet, pil nan mour teio. Tiahk sarawi en tehnpas sarawi kan sohte kin kawekala kitail oh pil irail kan nan sapwen ngehn. Ahpw tiahk sarawi pwukat kalaudehla inou kan ong Kauno, me pahn kak wahdo insenamwahu oh Ih oh pil ong emen emen.

Atail peren pahn usekla ni atail pahn kehn lingan en Sises Krais oh sapwelime mahk ong kitail. Eri, ni atail pahn dodohngki Sapwelime manaman en ah lingan oh mahk ong emen emen, mahk me kitail kin alehdi oh lingan me kitail kin dodohngki kak sewese mour en pwung.⁸

Kesiluh: Koht mangih oh poakoang kitail koaros ni unsek. “Sohte me kak mwamwaliki Koht,,”⁹ de sohte me kak pitihdi Ih. Sang ni mahk oh pwung unseko, E ketikiong nan Lime doarepen me karakarahk oh ngong.

Nan Tehnpas Sarawi en Kirtland, Soukohp Joseph Smith kilangada kaudiahl en rie pwutak Alvin komourlahr nan wein celestial. Soukohp Joseph kosoia, sang Alvin ah mehla mwohn ah alehdi tiahk sarawi en pepdais.¹⁰ Ni kansenamwahu, Kauno kawewehda kahrepe: Kauno “pahn kadeik [kitail] sang ni [atail] dodohk kan, en ineng en [atail] mongiong kan.”¹¹ Palingenitail kan kolokol record en atail dodohk kan oh inengitail kan.

Kapingki, kitail ese me momour kan oh “me mehlahr akan me koluhla pahn komourla, sang ni peik ong dodohk sarawi kan en tehnpas en Koht”¹² oh sapwelimen Krais Tomwo. Nan sapwen ngehn, koaros me mihmi nan dihp oh me wekilahr pahn ahneki ansou mwahu en koluhla.¹³

Ni oralap, koaros me pilada pali suwedo, me kin kasakasawala arail koluhla, de me kin kapwkapwureiong de ese me re kawehla kosonned akan, pilahneda ahl mengei en koluhla, pahn kadeik rehn Koht oh “alehdi koalokepen [arail] dihp oh dipekihda.”¹⁴ Kitail sohte kak en ese me kitail pahn wiahda dihp Rahnkounop, eri kasik me kitail pahn alehdi mahkpe sang ni atail pahn ale kamadipw sarawi Rahn sarawio. Ong misineri kan de meteikan me kin kosoia idahwen Ngeno wewehki kaidehn te kehn kin kapwaiada mwekid kan en misineri men de kosonned akan, menlau tamataman me peikiong mwekid en misineri oh kosonned akan kin kahluwahdo Ngehno. Kitail anahne koarusie en dehr kin kasawala koluhla. Kapai en koluhla kin tepida ansou me ke tepida koluhla.

Kapahieu: Kauno ketikiong kitail ansou mwahu ehu en duwehla Ih ni atail kin welian me melahr akan nan dodohk en tehnpas sarawi me meteikan anahne ahpw sohte kak pein wia. Kitail kin mwahula oh unsekila¹⁵ ni atail kin wia “sounkomour kei … pohn Nahna en Zion.”¹⁶ Ni atail kin papah meteikan, Ngehn Sarawi en Inou o kak kasarawiala tiahk sarawi kan oh kalaudehla koaros me wia dodohko oh me alehdi dodohko. Koaros me wia oh ale dodohko kak wiahda oh koaloalehla wekiwekilahn inou kan, nan ansou kan ale alehdi kapai kan me inou iong ehr Abraham, Isaac, and Jacob.

Kaimwsekila, kelimau: Kosonned me keieu kesempwal o¹⁷ padahngki, kaladelahn ni koluhla oh mahk kin lukehdo kitail en seweseki meteikan me kitail pil kin ahnane oh inengieng.

Ekei pak atail kin men mahkong emen torohr in kahreiong kitail koaros en kamelele me kitail kak koluhla oh pil mahk. Ekei pak men koluhla oh mahk kin kohdo nan ansou torohr kei. Atail Sounkomouro me wia soun Sawaspatail rehn Koht, ahpw E pil kin sawas oh kapwuredohng kitail rehtail oh emen emen ni atail kin pwuredo Reh. Ahpw mehlel ansou me medekla oh weirek inenen loal, koakonepene atail ehupene oh kamwahulahn atail mongiong kan inenen apwal, mwein en inenen apwal ong kitail. Ahpw nanleng kak kieng kitail kehlail oh eripit me mwahu sang pein atail pwe kitail en ese ansou en kolokoldi, oh mwomwen atail pahn kadarala.

Kitail sohte kin kelehpw ansou me kitail kin medewe me kitail kelehpw. Atail Sounkomouro kin wewehki ansou koaros.¹⁸ Sang ni sawas en Sounkomour o, kitail kak kalowehdi atail pohnmwahso, atail weirek kan, dipatail kan ong Koht. Ahpw kitail kak kehn ansou me kitail tepida, kitail kin unsekla ansou me kitail kin kopworopworki Ih en wiahda ahtail ehupene en unsekla.

Kauno, me kin masanih oh wewehki unsek, kin mahkong me E pahn; kitail {me sohte kin unsek} anahne kin mahkong koaros. Ni atail kin kohdo rehn Sounkomour o, kitail kin sohla nohn tehk pein kitail. Kitail sohla kin kadeik oh kin ansou koaros mahk. Kopworopworki Sapwelime kalahngan, mahk, oh lingan¹⁹ kak kapitala kitail sang uhpene, lingeringer, lemei, kelehpwila, sohte pahrek, oh kahpwal akan en paliwar oh pali ngehn me ekei pak kin kohdo ni paliwar nan sampah wet. Peren oh soutuk sohte wewehki me aramas koaros kin peren oh soutuk. Ahpw sounpar kid kei ansou me Sehdan pahn selidi²⁰ pahn kak kihong kitail ansou mwahu oh ahl akan en ahneki limpok, wehwe, oh kapwungala sohng tohto, ni atail kin kounop ong mour soutuk.

Kitail diarada ehupenen nanleng rehn emen emen.²¹ Doadoahk en Koht oh lingan iangahki wahdo peren oh soutuk.²² Mour soutuk oh sarawihla iei en esehla Koht oh Sises Krais eri, sang ni manaman en koht, wasa Re pahn mih ie iei wasa me kitail pahn mih.²³

Riei mwanakapw oh peinakapw ko, Koht Samatail Nanleng oh Sapwelime Iehroso ieias. Irail kin kihda meleilei, peren, oh kamwahuihala aramas koaros oh peneinei koaros, ong emen emen kitail. Sapwelimen Kauno soukohp me wie kakahluwai kitail. Kaudiahl en Imwin-Rahn akan wie doudoulahte mwowe. Pwe Kitail en karaniala atail Sounkomour o nan Sapwelime tehnpas sarawi, oh En ketin waikitaildo rehn Koht oh emen emen, ni atail pahn ehukipene atail mongiong kan ki limpok en Krais, mehlel, oh mahk nan dih koaros—nan ansou wet oh kokolahte, peren oh soutuk. Ni mwaren Sises Krais, met kak wiawi; rehn Sises Krais, met e mehlel. Eri I kadehdehki ni lengileng kapai en Sises Krais, ahmen.