Mehlel ohng Koht oh Sapwellime Doadoahk

Nan Oaktohpe me nekiero, ih alehdi pwukoah en iangih President M. Russell Ballard oh Elder Jeffrey R. Holland, en pwarek wehi en United Kingdom, wasa me kiht silimen et wia ie aht doadoahk en misineri. Se ahneki ansou mwahu en padahngki oh kadehdehki, pil katamando duwen poadoapoad en Mwomwohdiso nan Dekehn British kan wasa me ai pahpa kahlapo Heber C. Kimball oh ienge kan wia tepin misineri ie.¹

President Russell M. Nelson, kin kamwankiong kiht duwen pwukoah wet, me e intingdier me Wahnpoaron silimen pahn pwarek wasa ieu me irail wia arail doadoahk en misineri ie ni ansou me re pwulopwul. E padahkiong kiht me koaros ahneki ineng en alehdi pwukoah en pwarek wasa re wia arail doadoahk en misineri ie. Sirei laud mih pohn mesehu, e kawehwehda ma mie pilehu pwihnen Wahnpoaron silimen me papah nan misinohte mwurin sounpar 60 samwahu, eri irail pil pahn alehdi soangen pwukoahute.

Kilel

Heber C. Kimball

Nan kounopadahn pwukoah wet, I kin wie wadewadek Mour en Heber C. Kimball, me intingdahr sang pwutak me e pahn naineki, Orson F. Whitney, me mwuri alehdi pwukoahn wahnpoaron. Ire wet kohieng ie sang rehn ai nohno ni ansou me ih sounpar kereniong isuh. Se kaukaunop en iang patehng kasarawih en This Is the Place Monument ni Sulai 24, 1947, sang President George Albert Smith.² E men ien esehla laud duwen kadaudokei me sang Heber C. Kimball.

Pwuhk wet audaudkihda kosoai kasalel oh lingan ong President Kimball me kesempwal ong atail mwehi. Mwohn ai pahn ehukihwei kosoi wet, mweidohng ie iehn kawehweda mahs ekis mwomwehu.

Ni ansou me Soukohp Joseph Smith selidier nan Kalapwuhs en Liberty, Wahnparon Brigham Young oh Heber C. Kimball ahneki pwukoah, pahn irair apwal, en kawkaweid mwekid dahn Souleng kan koaros sang Missouri. Mweselda wet wia dodohk laud pwehki sang ni kalohk en kamala sang Governor Lilburn W. Boggs.³

Mwurin sounpar 30 mwuri Heber C. Kimball, uhd mih nan Presidensi Keieu, sang ni katamandahn podopoad wet me iangahki dih kapw ehu, ahpw padahngkier, “Mweidohng ie iehn padahkiong kumwail, me pali tohto en kumwail pahn kilang ansou ehu me kumwail pahn ahneki kahpwal koaros, kasongisong oh mehla me ke kakohng, oh songen ahl tohto me kasalehiong uhk me kowe kin mehlel ong Koht oh Sapwelime doadoahk.”⁴

Heber pil doulahte kosoia: ”Pwe kitail en kak sohpai kahpwal akan me kokohdo, e inenen kesempwal ong uhk en esehla duwen mehlel en dodohk wet ong pein kumwail koaros. Kahpwal kat pahn mih ni mwohmw me pahn elehiong ohl oh lih me sohte ahneki pein arail marain de kadehde pahn pwopwidiong loale. Ma kowe emen me saikinte alehdi ah kadehde, momouriki pwung, oh likwer iong Kauno oh dehr tokedihsang [lahu] ke [alehdi]. Ma ke sohte wia ke sohte pahn kak kesihnenda. … Ansou o pahn kohdo me sohte ohl de lih pahn kak en doudoulahte nan en emen marain. Emen emen pahn anahne ale kaweid sang ni pein omw marain. … Ma ke sohte ahneki ke sohte pahn kak kesihnenda; eri rapahki kadehde pen Sises oh kolokol teng, pwe ansou me kasongisong o pahn leledo ke sohte pahn tipekelekel oh pwopwidi.”⁵

Emen emen kitail anahne pein atail kadehde pen Sapwelimen Koht dodohk⁶ oh pwukoah kesempwal en Sises Krais. Eri iralaud 76 en Doctrine and Covenants kosokosoia duwen wasa lingan siluh oh karasahieng lingan en celestial ong ketipin. Mwuri eri pil karasahieng wehin terrestrial ong maram.⁷

E inenen kapwuriamwei duwen ketipin ah ahneki pein ah marain, ahpw maram e wia lingen marain ehu de ”marain pekipekda ehu.” Ni kosokosoia duwen wehin terrestrial, iretikitik 79 masanih, ”Met kan iei irail akan me sohte kehlail nan arail kadehdepen Sises.” Kitail sohte kak alehdi wein celestrial oh kouson rehn Samatail Koht ki marain pekipek da ehu; kitail anahne pein atail kadehde pen Sises Krais oh Sapwelime rongamwahu o.

Kitail koukouson nan sampah ehu wasa me tiahk suwed akan inenen kehlail ⁸ oh mongiong kan sohpeisang Koht pwehki kosonned en aramas.⁹ Ehu karasaras me keieu sansal nan iren pwuhk sarawi kan me pid duwen en Heber Kimball kapwunod duwen raparapahki kadehde pen Sapwelimen Koht dodohk oh Sises Krais mih nan an Alma kaweid ong nah pwutak silimeno—Helaman, Shiblon, oh Corianton.¹⁰ Riemen nah pwutak ko kin mehlel iong Koht oh Sapwelime dodohk. Ahpw emen pwutangko kin lemehda kosondi sohte mwahu kei. Ong ie me keieu sansal sang ni kaweid en Alma iei eh wie kikihwei sang ni ah wia pahpa men ong kamwahu pen pein nah serihko.

Keieu en ah iren kapwunod, me duwehte Heber C. Kimball, me iei emen emen en ahneki kadehde pen Sises Krais oh mehlel ong Koht oh Sapwelime dodohk.

Nan an Alma padahk mwahu ong nah pwutak Helaman, e wiahda inou kehlail ehu ong koaros me ”ahneki kopworopwor ong Koht pahn alehdi sawas nan arail kasongosong kan, oh arail kahpwal akan, oh arail kansensuwed akan, oh pahn iang komourala ni imwin rahn akan.”¹¹

Ni ansou me Alma alehdi utuht wasa me e kilangada tohnleng men, met sohte kalapw wiawi. Kapwuriamwei kan me kin wiawihda sang Ngehn Sarawi kin inenen mwahu. Kapwuriamwei pwukat kak pahrekiong kesempwal pen utuht kan en tohnleng men. President Joseph Fielding Smith padahngki: ”Kapwuriamwei kan ong pali ngehn kin kohsang rehn Ngehn Sarawi kin inenen kesempwal sang kaudiahl. Ansou me Ngehno kin kosoiong ngehn, lihpw me mih pohn ngehno kin inenen apwal en sohrala.”¹²

Met kahredohng kitail ni kaweid en Alma ong keriemen en nah pwutak, Shiblon. Shiblon kin mwahu, duwehte rie pwutak Helaman. Kaweid me ih men kalaudehla iei Alma 38:12, me kisehn wadawad kosoia, ”Kilang ma ke saliedi amw ineng kan, pwe ken kak audaudkihda limpoak.”

Saliedi wia lepin lokaia kapwuriamwei ehu. Ansou me kitail kin dake oahs, kitail kin dodohngki sahlo pwe en kahluwa. Lepin lokaia me duwehte kak en katanga, kaweid, de katengehdi. Kadehde Mering padahkiong kitail me kitail weriwerki peren ansou me kitail pahn alehda paliwar.¹³ Paliwar sohte wia mehkot sakanakan ehu—e inenen lingan oh kesempwal—ahpw ekei ineng, ma sohte pahn dodohk ni pwung oh soalidi ni pwung, kak kadohwan kitail sang Koht oh Sapwelime dodohk oh uhwongada mwomwen atail kadehde.

Kitail kosoia sohngen ineng riau—keieu, lingeringer, oh keriau, ineng suwed.¹⁴ E inenen kapwuriamwei me koaros me sohte saliedi de sohte kak kaweid kak karehda lapalahn olahn mongiong, katikala mwekid en Ngehno, oh kadohwansang kitail Koht oh Sapwelime dodohk. Me kin uhwong o kin kihsang ansou mwahu kan koaros oh audehkida atail mour kan ki sansal en pingiping oh mour sohte mwahu.

Nan ekei peneinei kan, e sohte wia mehkot mwahu ehu ohl de lih lingeringer men en keme ah pwoud de seri. Nan Sulaio, I iang patehng United Kingdom All-Party Parliamentary Forum nan London.¹⁵ Lemei ong lih oh me pwulopwul kan wia ehu kahpwal me inenen laud nan sampah. Ni kapatapat en mwekid en lemei wet, ekei pil iangehr mih nan kahpwal en lemei wet. Nan kalohk en peneinei padahkiong kitail me ”koaros me kin lemeieng arail pwoud akan de neirail seri … pahn ehu rahn kadeik ki mwohn Koht.”¹⁶

President Nelson koasaoiaga met ni eimah aio nimeneng.¹⁷ Menlau koasonehdi nan amw mour me mendahte ma amw pahpa oh nohno wia de sohte wia mwekid en lemei ong kowe, ke sohte pahn lemei ih ni paliwar de ni kosoi de ni pepehm amw pwoud oh noumw seri.

Nan rahn pwukat ehu me keieu laud iei akamaipene oh lemei en kosoi me doke mwekid en sampah kan. Nan irair tohto lingeringer oh lemei en kosoi weliandi kahrepe, kosoipene, oh onepek mwahu. Me tohto sohpeisangehr kaweid en Wahnparon en Sounkomour o, Pihter, me kitail en rapahki dake kan en Krais me duwehte sohte mih pahn litopw, kanengamah, sarawihla, mwahu ong meteikan, oh tohnmetei. ¹⁸ Irail pil sohpeisang mwekid en Krais me iei aktikitik.

Nan kapatapat en koledi amw lingeringer oh saliehdi ineng teikan, kitail anahne kahluwa mour mwakelekel kan sang ni atail pahn katanga atail madamadau kan, lokaia, oh mwekid kan. Kitail anahne keper kin kitail kilel mwekid suwed akan, kasawih pein kitail ong dahme kitail kin kilekilang nan ihmwatail kan, oh keper kin kitail songen mwekid en dihp koaros.

Met wadohng kitail an Alma kaweid ong nah pwutak Corianton. E sohte duwehte rie pwutak ko, Helaman oh Shibon, Corianton kin iang wia mwekid suwed akan.

Pwehki Corianton ah kin iang wia tiahk sohte mwahu kan, e inenen kesempwal ong Alma en padahkiong ih duwen koluhla. E anahne padahkiong ih duwen mehlel en dihp oh ia mwomwen koluhla.¹⁹

Eri an Alma kaweid iei en saliedi ineng kan, ahpw ah kaweid ong irail akan me paswungalahr, iei en koluhla. President Nelson kiong towe kan kaweid kesempwal ehu ong koluhla ni kapokon lap en Epreil 2019. E kawewehda ni sansal me koluhla rahn koaros inenen kesempwal ong atail mour kan. Koluhla sohte kin wiawi ni ansou tehkis; e wia mwekid en ehu ehu rahn. E padahngki me, E wia kih en peren oh meleilei en paliwar.” “Koluhla rahn koaros pahn kahrehieng kitail en mwakelekella, oh mwakelekel kin wahdo manaman.“²⁰ Ma Corianthon wia dahme President Nelson kaweidkier, e pahn koluhla ansou me e tapiada ahnekida madamadau suwed kan. Wekila laud kan sohte pahn kak wiawi.

Kaimwseklahn kaweid me Alma kiong nah pwutangko wia ekei ire me keieu kesempwal nan iren pwuhk sarawi kan. E sairada Tomw me wiawi sang Sises Krais.

Alma kadehdedahr me Krais pahn ketikihwei sang dihp.²¹ Ma sohte Tomwpen Sounkomour o, kadeik soutuk o pahn anahne kalokolok.²² Pwehki Tomwpen Sounkomour o, mahk kak kohiong irail akan me koluhla oh mweidohng irail en pwuredo mwohn silangin Koht. Kitail kak wia mwahu en medewe iren padahk kaselel wet.

Sohte me kak pwurala rehn Koht sang ni pein ah wiewia mwahu kelehpw; kitail koaros anahne kamwahupen tohnmetei en Sounkomouro. Koaros mihla nan dihp, oh sang ni Tomwpen Sises Krais me karehda atail kak ale mahk oh mour rehn Koht.²³

Alma pil kihda kaweid kaselel ong Corianton ong kitail koaros me ahneki de me pahn wia dodohk en koluhla mendahte ma dihpo tikitik de laud duwehte me Corianton wiadahr ko. Iretikitik 29 en Alma 42 masanih, ”Eri met, nei pwutak, imen ken dehr mweidohng mepwukat en kadirapwihiuk, ahpw mweidohng te dipomw kan en kansensuwedihiuk, ni kansensuwed wet pahn kahreiong uhk nan koluhla.”

Corianton rong an Alma kaweid oh ih koluhla oh papah ni mehlel. Pwehki Tomwpen Sounkomour o, kamwahula kak wiawiong koaruhsie.

Nan mwein Alma, nan mwein Heber, oh pil nan atail ansou wet kitail koaros anahne rapahki pein atail kadehdepen Sises Krais, saliedi atail ineng kan, koluhkila dipatail kan koaros, oh alehdi meleilei sang ni Tomwpen Sises Krais oh mehlel ong Koht oh Sapwellime doadoahk.

Me keren mie padahk ehu oh kasansal sang nan social media President Russell M. Nelson kosoia ni duwe met: “I peki rehmwail en pein katanga pein amwail kadehdepen Sises Krais. Koadoahke. Ahnekila. Apwalih Mwahu. Apwalih pwe en kak keirida. Eri kasik manaman kapwuriamwei kan en wiawi nan amw mour.”²⁴

Ih kapingki atail pahn pil rong sang President Nelson met. I kadedehki me Presiden Nelson me Sapwellimen Koht soukohp en rahn pwukat. Ih kapingki oh kesempwaliki kokohp kapwuriamwei kan oh kaweid me kitail kin alehdi sang ih.

Nin duwen Wahnparon en Kaun Sises Krais, I wia ai kadehde laud duwen mwakelekel en Sounkomouro oh mehlel en Sapwelime tomwo ni mwaren Sises Krais, amen.