Tial uldasu el kirel a Jesus Kristo
Sel om blak a rengum el omtab er sel uldasu el kirel Jesus Kristo, e ak yaksok er kau el diak dim nguu a ulekrael er a babeluades ke dirrek el nguu a klisichel a babeluades.
Tial klebokel el sils ra Baskua, e ak lmuut melekoi er sel nglunguuch er tial mesisiich el chelitakl el, “Guide us, O thou great Jehovah [Momekrael er kemam, Kau el ungil Jehovah].”1
A meang el cheldecheduch er a Babier er a Mormon ouchais el kirel a ngeasek el chad er a merael chisel telungalek el ngklel a Alma el chedaol llechukl a melekoi el kmo ng dimlak loumerang.2 Ng mle meduch el mengedecheduch a melaok el tekoi, el mengesuseu er a rechad el mo oltirakl er ngii. Ng mengasireng, el anghel a dilum er a Alma me a resechelil. A Alma mlo biou er a chutem e kmal mlo mechitechut me a rechad a kilderii el mo er a blil a demal. Ng dimlak lodengelii a rengul el edei el klebesei.3 Uriul, eng millekoi el kmo ng uaisei el dimlak lolchesuar a bedengel er tirkal meliuekl er ngii, eng di a uldesuel a mle klekar e a rengul a mlara ringel, lomdasu el kirel a klengar ngii el dimlak loltirakl a llechul a Dios. Ng milsaod er a ringel er a uldesuel “el kirel omeletkel [er] a kmal betok el kngtil”4 el “oberaod el ringel a le mla er ngii.”5
Chelsel tial klou el ringel le bla er ngii, eng dilbedebek osisechakl el bla lsuub er a le ngeasek el kirel a “chimol Jesus Kristo, el Ngelekel a Dios, el me melngakireng el kirel a kngtil a beluulechad.”6 Eng dilii tiakid el mesisiich el tekoi: “Sera kumtab el kirel tial tekoi, eng lilangel a renguk el kmo: Kau el Jesus, el Ngelekel a Dios, bom chebkak.”7 Me sera lolengit er a chedaol klisichel Osobel, e a mengasireng el tekoi a dilubech: “Sera kumdasu el uaisei,” ngii a millekoi, “E ak mlo omelchesiu el dikea ringel el ngar ngak.”8 Ng di mle mereched el mo omelchesiu ra budech me a llomes. “Ng diak a [ngii] di el ngerang el mo mekesiur a deurreng el mlei er ngak,”9 } ng millekoi.
A Alma “urrekodel” er a klaumera er a Jesus Kristo. Omko kede ousbech er a tekoi el “urrekodel” er a kmo ngera el klalou, eng sebeched el kmo, “Ng mlo urrekodel er a baeb le kilong ruebet,” el belkul a kmo ngulebult lorkedii e merkedii er a kmo ngerang el mesisiich lultab e ra uchetemel.
A tetelel a Alma, eng mle uldesuel el orkedii e ultab er tial mesisiich el klaumerang el kirel a tngakireng er a Jesus Kristo. Milruul a tekoi lokiu a klaumerang, eng okiu a klisichel ma krasia er a Dios, eng milsobel ra kerior e mlo klou a rengul.
Ng uaisei locha diak el dubech a uai tial el teletael mlo er a Alma el mei er kid, eng di kmal klou a ultutelel suobel. Kede dirrek el mla “mtebengar tiakid el tekoi” el kirel a Jesus Kristo me a chubchub el tngkaireng er Ngii, e mla melchesuar a llomes me a deureng lobengkel.
Metebechelii a Uldasu el kiel a Jesus Kristo
A nglunguchek er tiakid el temel a Baskua a kmo bo el blak a rengud el mesmechokl, melisiich e metebechelii a uldesued el kirel a Jesus Kristo er a chelsel a rengud,10 el mecherei me lolemolem el medechel er a uldesued, lomekrael er kid er a ikel domdasu me a ikel doruul, me le beskid a deurreng er a beltkil a rengul Osobel.11
Sele mui a uldesued er a klisichel a Jesus Kristo a diak el belkul kmo ng di Ngii a chimol ngara uldesued. Engdi eng belkul a kmo a rokui el uldesued a bleiull er a Beltkilarengul, klengar Ngii ma osischeklel, me sel tngakireng me a meang el Okiis er a kodall. A Jesus a diak el ngara dobesbes er ngii el basio, ele uldesued el Kirel a di ngarngii ea “ikel rokui el ngar er [kid a oldanges] er ngii!”12 Kede meluluuch e melbedebk er a uldesued aikel tekoi bla de ruul el ngoikid lokedid er Ngii. Kede mengemedaol el mera uldesuel a ungil ues, chedaol llechukl, me a chelitakl el melemdemk aikal betok el uldasu el mediderurt er a uldesued er a bek el sils. A belktil a rengud el mo er Ngii a diak el choroid a klengitelreng er tial beluulechad, ng bai rulid meng sebeched el otekau aikel ringel loba klisiich el muut el mesisiich er sel sekum ng di kid.
Jesus, the very thought of thee[Jesus, el uldasu a di kirem]
With sweetness fills my breast; [a mekekii a renguk er a deurreng]
But sweeter far thy face to see [E bai ungil a renguk mesa medam]
And in thy presence rest.[E mo olengull er a rengedem]13
Lak mobes, el kmo kau a ngelekel a Chedam er a Babeluades er a reng. El uaia Apostol Paulus el kmo, kid a “ulechellel a Dios.”14 Ke kiliei loba sel ngii a meral lolchotem el kmo ke techang ruchei er a omei er a beluulechad. A Demad er a Babeluades a kiltmeklii a cherrungel el uldasu el kede mei er a beluulechad, el mo mesuub, e lmuut el mo er Ngii. Ng uldereklii a Betik er a Rengul el Ngelekel Sechal lokiu a klisichel a diak a ulebengelel Tngakireng er Ngii me a Okiis er a kodall, ekede kiei el imuul er a debull; esel de semeriar el oumerang er Ngii e ouuchel a rengud er a kengtid,15 ekid a mousubes e nguu sel cherengelel a diak a ulebengelel klengar.16
Uldesued me a Rengud a Ousbech a Mui el Moktek er Kid
Ngar tial klengar er kid er a beluulechad, ea uldesued me a rengud a ousbech a mui el moktek er kid.17 A uldesued a uchul me kede ngar, e melilt, e medengelii a ungil me a mekngit.18 A rengud a nguu sel ulterekokl el sioning el kmo a Dios a Demad, e a Jesus Kristo a Ngelekel a Dios, e a Osischeklir a ulekrael e mei er kid el kirel a deurreng er chelechang me a diak a ulebengelel klengar ruriul er a kodall.
A uldesuel a Alma a miltebengar tiaikid el tekoi el kirel a Jesus Kristo. Ngildechii a klengar ngii. A klou el ongdibel a a taem el bo dodengei el kmo a Rubak ngera soal bo doruul e mo ua ngerang. Ng dirrek el taem el bo dolbedebek a omerolled. Ma urerek el mla ngoikak el mekelkelii a beluulechad, e ak mla mesa mesisiich el chedaol klisiich er tirkel melemalt, e blak a rengrir el rechedal a Ikelesia.
Eim el rak er a memong, e kede mlongit el mo nguu a Osobel el mo kot el ngaruchei er a rokui el doruul el mo ousbech er a meral ngklel a Ikelesia er a Jesus Kristo er a Uriul-klebesei el Santo.19 Me kede oba blakerreng el melekoi er a Ngklel.
Eua el rak er a memong, er a de kedebengii a temel a sakrament, e kede mlo melchesuar sel kmal uchul me kede melai er a sakrament er a Rubak. Me kede blechoel el omdasu er a Jesus Kristo e mesisiich a rengud loltirakl er sel yaksok er kid el mo blechoel melebedebek er Ngii.20
Me a klechacheroid er kid er tial lomekodall el rakt a uchul, me a ngesou er a hong el Mei, e Moltirakl er Ngak, a osisecheklel a Osobel a kmal mlo mesisiich er a chelsel a rekeblid, el olngeseu er sel dongull er a Osobel sel temel a ureor.
Me sel doltirakl er a osisecheklel a President Russell M. Nelson el mo “Rongesii,”21 e kede melisiich er a duch er kid el mo omtab er a ngerel a Chedaol Reng e mo mesa chimal a Rubak loureor er a klengar er kid.
Ngokiu a chisel me a urerel a templo, e kede mla mo blechoel mo soiseb er a blil a Rubak e ngmai a ikel bla el yaksok el klengletengat er Ngii. E kede omelchesiu er sel kmal mesisiich el klebekelel a Osobeled.
A President Nelson a millekoi: “Ng diak el beot ma lechub el mereched el bo [de] meral mesisiich [loltirakl]. A moktek er kid a kirel bereked er a Osobel me a ebangkelio er Ngii. Ng kmal meringel a dolasm el di omes el bedul Ngii er a bek eluldasu.”22
Me sel denguu a moktek er kid el bedul a Jesus Kristo, e a rokui el tekoi el meliuekl er kid—er chelechal taem—a mo melutk el kirel a beltkil a rengud el mo er Ngii. A diak a kmal belkul tekoi a mo diak, e kid a choroid aikel tekoi el diak lolutk el bedul a llomes me a Blekerdelel. A bol blak a rengum el urrekodel er tiaikid el uldasu el kirel a Jesus Kristo, e oumera er Ngii, e moltirakl a Llechul, e ak yakosk el kmo ng diak el di lulekrael ng dirrek el klisiich er a babeluades—el ngii el klisiich a smisichau er a telbilem, me a budech er a ringel, me a klengeltnegat er a deureng.
Melebedebek er a Jesus Kristo
Sesei el sandei er a memong, e a Kathy me a ngak a mlo oldingel er a Matt me a Sarah Johnson er a blirir. A ngara kboub a siasing er a telungalek er tir, me a klebokel siasing er a Osobel, me a lecheklel a templo.
A reteua el ngelekir el redil, er a Maddy, Ruby, Claire, me a June, a mle dmeu a rengrir el melekoi el kirel a beltkil a rengrir el mo er a derir.
Ng mla chengelakl ra tal rak er a Sarah er a lekedmeklii a iioter er a telungalek er ngii el mo er a templo er a bek el Sabadong me tirkal ngelekir redil bol sebechir el meruul a ureor el kirir a rechederir el mla mad.
Sera Ongeteruich me a tal buil er tial mlo merek el rak, e a Sarah rirelii a temir el mo er a templo er sel mle ulebongel sandei er a December el Thursday el diak el Sabadong. “Ng locha di ungil er kau,”ng millekoi er a Matt.
A Sarah a bla le betik er ngii el smecher er a kasinoma, eng di a retoktang omtibek el kmo ng locha chad el erung a lechub eng edei el rak. Sera temel a sakrament, e a Sarah ulechais er a mesisiich el klaumera er ngii, el kmo ngii di el ngera el mo duubech, e ngii a di betik a rengul er a Osobel, el “klisiich a mla modars” el mo er Ngii. A lorael mocha er a ulebongel er a December, ea Sarah luueta el kmal socherang, meng mocha nuiing er a osbitar. Sel dirk tutau er a Ongeua el ureor, el mle December 29, eng di mle chelellakl e suebek a telil. A Matt a di mla er a bita er a Sarah el tal kesus.
Me ngara klengitelreng, e meral skareter a bedengel me a rengul, eng merola el mo remei, el ngara klengitelreng ngii me a rengelekel redil. A Matt er a lomes er a dengua er ngii, eng miltebengar tial uleklatk el kirel a mo er a templo er a Thursday el Sarah rirelii. Me a Matt a millekoi el kmo, “Sera kot el mesang, e ak uase, tia diak el sebechel tekoi.”
Eng di a uldesuel a Matt a mlo melebedebek er tiakid el tekoi: “A Osobel a ngar. Ng diak a ngodech el basio el kiram el ngarngii el telungalek ng di chedaol Blil.”
A Matt, Maddy, Ruby, me a Claire ma June a mlo er a templo er sel taem el Sarah rirelii el kirir. Meng medidelangel a Matt, e mocha mengedmokl a techolbechelid ngii me a rengelekel. Te mlo omelchesiu er a dmolech el beltikereng me a deleuill er tir lobengkel a Sarah, me a dirrek el dmolech el beltikereng me a ongelaod er a budech er a Osobel. A Matt a mildidelangel e kmo, “Ng uaisei el kngara klengitelreng me a ringel, eng di ak dirrek el ngara deurreng, el medengelii a klebokel el moktek er a Demak el kirel a mo suobel.”
Chelechal temel a Baskua, e ak sioning er a cherrungel el klemerang el diak a mekesiur el tngakireng er a Osobel me a meang el Okisel er a kodall. Me a uldesuem sel bla lotebengar e lurrekodel er a Jesus Kristo, me a moktek er kau mngai el bedul a Osobel, e ak yaksok el kmo ko mo melchesuar a Urungulel, Budech er ngii me a beltikereng er Ngii. El ngara a ngklel a Jesus Kristo, amen.