“Mobengkek, me Ngak Kubengkem; Me Morael Lobengkek”

A Rubak el Jesus Kristo a siotai er kau me a ngak el mo Obengkel.⁵ Eng di kede mekerang e mesuub el mo Obengkel?

A tekoi el obengkek a belkul a kmo ngulterekokl e outekangel el diak el mesim. A Elder Jeffrey R. Holland a silodii el kmo a “obengkek” a tekoi er a omeruul el belkul a kmo “‘[mo] kiei—e[kiei] el mo er a ulebongel.’ Tiaikid okedongel a klemechel ebangkelio el mo er a … rokui el chad … el ngara beluulechad. Mei, e di mereko el kiei. Mei el meral mla obult e moutekangel kiei. Mei e di mereko el kiei, el kirem e kirel a rokui el telcheroll lokiuellem.”⁶ A leuaisei, e kede obengkel a Kristo sel sekum e kede mesisiich e diak de mesim er a blakereng er kid el mo er a Osobel me a chedaol moktek er Ngii, er a ikel ungil me a mekngit el taem er kid.⁷

Kede omuchel el mo obengkel a Rubak sel de mimokl melilt el ngmai a chelngeled er Ngii⁸ lokiu a telbiil me a chedaol ruoll er a mla moluut el ebangkelio. A telbiil el deruul lobengkel a Demad er a Babeluades me a mla mekiis er a kodall e ngar el Ngelekel a kot el ngaruchei luchul a moktek er kid, urunguled, budech, me a diak a ulebengelel deureng, e bedul a dodai⁹er a klengar kid.

Kede Obengkel sel dolasm el melemolem el melisiich a telbiled lobengkel a Chedam me a Ngalek. Okesiul tiang, a blakereng el nglunguuch el mo er a Diak a Ulebengelel Chedam el ngara ngklel a Betik er a Rengul Ngelekel a dolchii a smisiich a telbiled Lobengterir.

Kede Obengkel sel de meral mesuub a tekingel a Kristo. A osischeklel a Osobel a ngoikid, kid el ngalek er a telbiil, el mo kmeed er Ngii¹⁰ e ouchais er a kid a ikel rokui el kired el meruul.¹¹

Kede Obengkel sel blak a rengud el kudmeklid el mo melai er a chedaol ruoll er a sakrament, lomes e melbedebek a yaksok er a telbiled, e meral ouchel a rengud. Sel de klikiid el melai er a sakrament a sioning el mo er a Dios el kmo kede kongei el mo nguu a ngklel a Jesus Kristo e melasm el “melbedebek er ngii”¹² ruriul er a di kedeb el taem el dongedmokl er tial chedaol ruoll.

E dirrek Lobengkel sel dosiou er a Dios lokiu omesiunged el mo er a Rengelekel e oldingel er a rodam me a rodos er kid.¹³

A Osobel a dilu el kmo, “A lsekum e ko moltirakl a llechuk, e ke mo nguu a beltik el reng er ngak; el di uai ngak loltirakl a llechul a Demak, me ak nguu a beltik el reng er ngii.”¹⁴

Ak di mle telkib el smodii a bebil er a rolel a bode oltirakl a Osobel. Chelecha e ak siotai er kid a roltirakl er Ngii el mo olengit, osiik, melengod, e mesuub lokiu a klisichel Chedaol Reng el ngii a bebil er a rolel e kede nguu a Kristo el mo kot er a klengar kid er a ikel rokui el doruul.

A yaksok er a Osobel elmo er a roltirakl er Ngii a eru el medal: a lsekum e kede Obengkel, e Ngii a mo obengked. Eng di ng locha meral sebechel a Kristo el mo obengkem e obengkek—a dersta er kid? A nger er tial ker a oi!

Chelsel a Babier er a Mormon, e kede metik er a Alma lolisechakl e ouchais el mo er a remechebuul el berredel a ringel el mla er tir a rirelterir el mo ngariou a rengrir. Aikaikid losischeklel, eng ulmekesiu er a osisechakl el mo er a tane el kirel medalem e mukeroul, e silodii el kmo a “osisechakl“ a klengar, e urerel, e tngakireng er a Jesus Kristo.

A ALma dilu el kmo, “Momuchel el m oumera er a Ngelekel a Dios, el k mo ng mei el me olsobel er a rechedal, e mo chemau a ringel e mo er a kodall el tngakireng er a kengterir; e dirrek el mo mekiis er a kodall, el mo uchul okisel a kodall, me a rokui el chad bol dechor medal, e le mukerkeriil er sel klou el kerkeriil ruriul, loltirakl a urerir.”¹⁵

Tiaikid lomesodel “osisechakl” er a Alma, e momtab er a mesisiich el tekoi el ngii a silodii.

“Me chelecha … e a kulengit me mdelemii osisechakl er a rengmiu, me sel lomuchel el merael mo klou e mo mekeroul er ngii lultuil er a klaumera er kemiu. E seikid, eng mukeroul mo klou el kerrekar, el merael mo mesisiich el mo er a ulebongel. A Dios bol beskid me a chelngeled] bol kebeka, lokiu a deureng er a Ngelekel Sechal. Me a ikaikid el rokui a sebechemiu el meruul a le ngarngii er a rengmiu.”¹⁶

A tane el kired el dolemii er a rengud a tekingel a Dios—el ngii a klengar, urerel, me a osischeklel a Jesus Kristo. E a dongoeas er a tekingel a Dios lultuil er a klaumera, er kid eng sebechel mukeroul er a rengudel mo er a diak a ulebengelel klengar.¹⁷

Ngera mle olengchelel sel kerrekar el mla er a berrusel a Lehi? Sel kerrekar a sebechel uaia lolchotel a Jesus Kristo.¹⁸

Betik er a renguk el rodam me a rodos, kede urrekodel er a Tekingel a Dios? A klemerang er a ebangkelio er a Osobel ngellechukl el medechel er a chelsle a rengud?¹⁹ Kede mekekokid el merael mo uai Ngii? Kede omekeroul a tekingel a Dios el dolab? Kede melasm el merael kuk mo “beches el [chad] ”²⁰ Lobengkel?²¹

Tiaikid a locha milkrolii Alma el mo oker el kmo: “Kede mla mechell el beches el ngara Dios? Kede mla nguu a lecheklel me kede obang? Kede mla melchesuar tial mesisiich el ngedechel a rengud?”²²

Ng kired el blechoel melbedebek a tekingel a Rubak el mo er a Enoch: “Bom kiei lobengkek, me a ngak kubengkem.”²³ E ngak a sioning er a yaksok er a Osobel el kmo ng mo kiei lobengked a klemerang e ngarngii el medechel el kirir a rebek loltirakl a telbiil el chedal a mla moluut el Ikelesia er Ngii.

A Apostol Paulus a ulisechakl er a roumerang el tir a mla kongei er a Rubak: “El mo merael lobengkel.”²⁴

A merael lobengkel Osobel a meketakl a eru el meklou a belkul lolchotel a roltirakl: (1) oltirakl a llechul a Dios, e a (2) melatk e mengull a chedaol telbiil el ngii omak er kid el mo er a Chedam me a Ngalek.

A Johanes a millekoi:

“Seikid e kid a mo medengei el kmo kede medengelii, sel sekum kede oltirakl a llechul.

“Ngike el dmu el kmo, ak medengelii, e diak loltirakl a llechul, a bulak, e diak loba klemerang.

“Eng di ngike loltirakl a tekingel a,obengkel a oba beltikerreng er a Dios: e seikid e kid a mo medengei el kmo kede obengkel.

“Ngike el kmo ngobengkel a kirel el dirrek el el merael, lobengkel.”²⁵

A Jesus olengit er kid, “Mei, e moltirakl er ngak”²⁶ e “morael lobengkek.”²⁷

A kuuchais el kmo sel dolemolem el merael bedul uchei lultuil er a klaumerang e doba delemdemk el reng er a Rubak, ²⁸ e kede mo mukngeltengat er a klisiich, ulekrael, ucheliu, me a budech.

A Alma smodii a ungil deleuill er a beltikereng er a Dios el mo er a rokui el chad:

“E le, ngii a siotai er a rokui el chad, le chubechub er ngii a mo er tir, e ngii a mla dmu el kmo: Bo mouchel a rengmiu, me bok ngikemiu.

“… Mei er ngak me bom nguu a rdechel a kerrekar er a klengar; oi, ko mo mimokl el melim e menga er a blauang me a ralm er a klengar.”²⁹

Ak meketteklii sel meral bleketakl el ongtil Osobel. Ngii oureng el omekngeltengat loba chubechub er Ngii el mo er a dersta el chad el kiei, re mla kiei, me a re mo kiei er a beluulechad.

A rebebil er a rechedal a Ikelesia a kongei el klemerang a osisechakl, suobel, me a klemerang el mla mo betok el medung er tia el Klou el Ongdibel me a ikel kuk basio er tir el meliuekl er a beluulechad—eng di ng meringel er tir el mo oumera aika el diak a ulebengelel klemrang el kmo aika kmal melutk el kirel a klengar tir me a teletael er a klechad el tir a ngara chelsel. Te kmal loumerang e blak a rengrir el mesiou, eng di a deleuill er tir me a Chedam me a Olsobel Ngelekel a dirkak el bol mocholt el mesisiich el ngmodech a klengar tir.

Ak yaksok el kmo ngokiu a klisichel Chedaol Reng, eng sebechem el mo medengei e melchesiu a klemerang er a ebangkelio el bla kulasm el mesaod leko er kmiu— dersta er kemiu.

Ak sioning el kmo a Jesus Kristo a ngii a ngar el Osobeled e Olsobel er kid. A bo de kiei Lobengkel, e Ngii a mo obengked.³⁰ E sel dorael Lobengkel, e kede mo mukngeltengat er a betok el klungiaol. A kuuchais loba chedaol ngklel a Rubak el Jesus Kristo, amen.