Usbechall a Rechad er a Budech
Kau a ngarngii a lemeltem el melilt el lomtok malechub eng budech. Ak dmu er kemiu el mo melilt el mo chad er a budech, er chelechang el mong.
Rodam me a rodos er ngak, ng klou el deureng el kmei lobengkemiu. Aikal mla mo merek el elolem el buil, e kom blechoel ngara uldesuek me a nglunguchek. Ak meluluuch lolengit me a Chedaol Reng louchais aikel Rubak a soal om renges er chelchal kungedecheduch er kemiu.
Sera ak direke toktang er a betok el rak er a memong, e ak kulngeseu er a tara toktang ra botk el milluk er a ochil a chad leng kmal mle terechel. Ng mle meringel botk. E uaia, le blo lolengasechereng, le tara toktang a dimlak lungil rulii a ureor, me ngika el toktang er a botk a kmal ngilasech a rengul. Me ngesechel a rengul, eng mildesii a olsengel er a botk el mui er a baiking. Tial oles a milked er a chimak!
A rebek el chad el mla er tial delmerab er a botk—el diak luldimukl er ngikal kesib a rengul toktang er a botk—a kmal mlo mechas a rengrir er tial kengaol teletael er a tekoi er a ukeruul. Ngungil, leng dimlak lengasech a baiking er ngak. Eng di tial teletael a kmal klou a lulsisecheklii er ngak. Tiaikid el taem, a rirellak el yaksok el kmo ngii di el ngera el duubech er a urerek er a chelsel a blil a botk, eng kmal diak el bol kesib a renguk. Ak dirrek el mle yaksok el diak kumetech a ngii dil ngerang leng ngasechereng a uchul—a lolsengir a rechad er a botk a lechub eng tekoi er a ngasechereng.
Molmuut er chelchal sils, el betok el rak ruriul, eak melebedebek er sel mle baiking lolsengir a rechad er a botk el milked er a chimak el uase ng locha lmuut loberaod a telmellel a lechub eng tekoi er a ngasechereng el tomall a deleuill er a rebetok el chad er a chelechal sils. A ungil klechad er a chad a uai ea blal bol lak er chelechal taem el betok a kakaerous el mesisiich el klaultok er a uldasu.
Omelius, osiik a telmellel a tang, e melekoi a mekngit el kirir a rebebil a kmal di chemotang. Betok el semmong er a cheldecheduch, rechad er a balatiks, me a rechad er a ongelaod, me a lmuut el bebil a blechoel di melekoi a mekngit. Ng suebek a renguk el betok el chad oumera el kmo ng di ungil besul a doltuub, douketui, e dolekoi a mekngit el kirel a ngii di el chad el diak el kengei a uldesuir. Betok a sorir el melemall chisel a tang lolab a betok el mekngit el tekoi!
A ngasechereng a diak locheuir a chad. A mekngit el blekeradel a diak a ngera el relii. E a mondai a diak a ngera el ungil relii. Mekngit el dolekoi, le bebil er a taem e kede mes a klaumondai er a deruchelled. Kede rongesterir tirkel metengel osengir er a rebecherir me a rengelekir, lolab a ngasechereng el mengedereder er a rebebil, me tirkel mengelbus er a rechedal a telungalek er tir “loba luk.” Kede rongesterir a rengeasek me a rengalek lomecheracheb me a rechad er a tal ureor el kaketuub.
Rodam me a rodos er ngak, ng kmal diak el kirel uaisei. Kid loltirakl er a Jesus Kristo, eng kired lokesiu er a ungil deleuill lobengterir a rebebil—oumesingd sel kakerous a uldasu. A tara kot el beot el rolel e kede metik er a meral oltirakl er a Jesus Kristo a sel chubchub er a chad el kirir a rebebil.
A Osobel a milketeklii tiang lokiu a Tekingel el mo er a roltirakl er ngii ra ikel leru el beluu. “Ngeltengat a rechad er a budech,” Ngii a millekoi.1 “Ngike el olbedii a klisichel otengem, e bsa bitang el dirrek.”2 E dirrek, el Ngii, a milskid a llach el melasm er kid: “Moubeltikereng er a rechereuem, momekngletengat er a roltuub er kau, moruul a ungil mo er tir, moluluuch el kirir tirkel lousbech er kau, e oldechelakl er kau.”3
Uchei er a kodellel, e a Osobel a dilu er a Reteruich me a teru el Apostol er Ngii el mo kaubeltikereng el uai Ngii el betik a rengul er tir.4 E dilchelii el kmo, “Me tia ikid e a rokui el chad a mo medengei el kmo kom oltirakl er ngak, a lsekum e kom kaubeltikelreng.”5
A klemechel Osobel a bleketakl: A re meral oltirakl er Ngii a meleketek, mesebechakl, mengelechel, mengesuseu, e omekellomes—el diak el iior er a kmong meringel ng diak. A re meral oltirakl er a Jesus Kristo a chad er a budech.6
Chelechal sils eng Sandei er a Baskua. Kede mengedmokl er kid el mo oudkeu er a kot el klou a ututelel e klebokel reksi er a beluuelchad, el ngii a Tngakireng me a Okiis er a kodall er a Rubak el Jesus Kristo. A tara kot el ungil rolel e kede mengull er a Osobel a sel bo dechad er a budech.7
A Osobel a uchul eng sebeched el mo mesisiich er a rokui el mekngit—luldimukl a klautok. Lak bol rrau a rengmiu el kirel: a klautok a mekngit! A Jesus Kristo a dilu el kmo ngkel loba “reng er a klautok” a diak el Chedak, ngbai “chedal a diablong, el ngii a demerir a rumtok, me [ngoldurch] er a rengrir a rechad el mo kautok loba ngasechereng, er a ta el mora tang.”8 Tirkel lomuchel a klautok a chedal a Diablong, a lotebengar me a lak. “Ng diak a chad el mesiou a teblo el mastang.”9 Ng diak el sebeched e loldubech er a moktek er a Diablong el loba ngasechereng me a mekngit lomelekoi e uase kede mesiou er a Dios.
Rodam me a rodos er ngak, a omerelled el mo er a rebebil a kmal klou a ultutelel! A teletelel omelkinged el mo er a rechad er a blid, ikelesia, ureor, me a online a kmal klou a belkul. Chelechal sils, e a kulengit me lungil a deleuill er kid loba ngarbab, e chedaol teletael. A kulengit me bo mungil lorrenges. “A le ngarngii a ngii di el ngerang el kldung, klebokel, a lechub e ngungil tekoi”10 el dedung el kirel a tang—a dechau ngii ma lechub e kede iikrii—a kirel ngii a teleteled ra teletael er a ungil cheldecheduch.
A rengeasek el bechiil el medort a chebechilir, a lechub a ngeasek el misionari el mle mereched el me remei, a lechub a ngeasek el direke oumededenger a klaumera er ngii, eng diak el kirem el mesaod er tir. Ng kirir el mo medengelii sel bliochel beltkil a rengul a Jesus Kristo lokiu omelkingem me a omerellem.
A lsekum a chad el ngara social media a kmal kesib a rengul kirel a kmo ngerang el melemall a rokui el moumerang, e a bol kesib a rengum, e molai itechei eng diak a ngera el relii. Meleketek a rael ra ungil deleuiil a klou a usbechem el kirel, ngdi tiakid a kmal lousbech er ngii a sechelim.
A ultok a oridii a Chedaol Reng—er a bek el taem. A ultok a melisiich er a klsuul luldasu el kmo a mouteketok er a chad a ngii a rael el mo mesmechokl a tekoi; eng di diak el uasiei. A ultok a dolilt el kirel. A omekbudech a dolilt el kirel. Kau a ngarngii a lemeltem el melilt el lomtok malechub eng budech. Ak dmu er kemiu el mo melilt el mo chad er a budech, er chelechang el mong.11
Rodam ma rodos, kid a sebeched eldi ngodechii a beluulechad—lomuchel ra imol chad ra tal taem. Ng mekerang e uaisei? El moltirakl ra dokerang a domtebechel a bleketakl el kakerous el luldasu e loba tmolech e lomengull ma ultebechel el cheldecheduch.
A klekakerous er a uldasu a telengtengil a klengar. Ngak a oureor er a bek el sils lobengterir a re blak a rengrir el mesiungel a Rubak el diak el blechoel losisiu osengir er a tekoi. Te medengei el uase ng soak el remenges a meral uldesuir el kirel a rokui el tekoi el ki mosaod—oumesingd a okedeldaol tekoi.
Tirkal teru el chetengakl el counselor ngak, er a President Dallin H. Oaks me a President Henry B. Eyring, a kot lungil okesiu er a rolel a lolecholt a uldesuir—oumesingd sel sekum eng kakerous a uldesuir. Te oureor e loba klikiid el beltik el reng ra delongelir. Ng diak a ta er tir el kmo a uldesuel a ungil me tiaikid a kirir el mo oltirakl er ngii. A lechub e le kora melasm el mengemeai er a tang. Le tir el mui er a beltikereng, “bliochel el beltikereng er a Kristo,”12 me a ki mosaod el tekoi a ulekrael er a Chedaol Reng er a Rubak. Ng meral betik a renguk e mengull er tirkal teru el chad!
A bliochel beltikereng a techil a ultok. A bliochel el beltikereng a chedaol sengk el ngosukid lotebedii sel di rengul a chad el kedidai a rengul, bechechelingaol e meleakl. A bliochel beltikereng a meral blekerdelel a chad loltirakl er a Jesus Kristo.13 A bliochel beltikereng a blekerdelel a chad er a budech.
Sel bo doba ngariou el reng er medal a Dios e doluluuch lolab a rokui el klisichel a rengud, e a Dios a mo meskid a bliochel beltikereng.14
Tirkel ngeltengat loba tial meang el sengk a meklou a rengrir e bekokouii. Te diak el mechechei er a rebebil e diak di lomdasu el kirir. Ng diak el bekesngasech a rengrir e diak lomdasu a mekngit el kirir a rebebil.15
Rodam me a rodos, a bliochel beltikereng e ra Kristo a ngii a nger er a ultok lomekringel er kid er chelechal sils. A bliochel beltikereng a oderchid el mo “otekau a chelngelel a ta me a tang”16 e bai diak dongisois a berraod er a chad. A bliochel beltikereng er a Kristo a rullid el mo “dechor el sioning er a Dios er a rokui el taem me a rokui el tekoi”17—oumesingd ra aikel okedeldaol el teletael. A bliochel beltikereng a rulid lochotii el mekera rsechal me a redil chedal a Kristo a longedecheduch me a loruul a tekoi—oumesingd a chelsel a mondai.
Chelechang, e morenges ng diak kusaod er a “ngarbab el budech.”18 Ak melekoi el kirel a blekerdeled el mora bebil ra ikel rael el loltirakl a telbiil el kau a kiltmokl er sera mnguu a chedaol belsoil. Ke tibir el mo blechoel melbedebek er a Osobel. Ma ikel teletael el kmal imis el mui ra ultok, e ak siotai er kau el mo melebedebek e ra Jesus Kristo. Moluluuch me le borngii a klisiich ma llomes el ngar kau el kmung malechub e ke meruul a ikel Ngii a bo loruul. Sel doltirakl er a Prince er a Budech, e kid a mo Chedal er a budech.
Chelechal taem e ke locha omdasu el kmo tial klumech a sebechel ngoseuir a chad el modengelii. Ke locha oureng el kmo ng sebechel ngoseuir el mo ungil er kau. A kuureng ulekum ng sebechel! Eng di ak dirrek loureng me momes er a chelsel a rengum el uase ngarngii a telkib el kldidai el reng ma lechub eng bechechelingaol reng el tomer kau el mo diak mchad ra budech.19
A lsekum ng meral blak a rengum lolngeseu el mengideb ra Israel e meleketek a deleuill el mora ulebongel, e chelechang eng sel taem el bobechei a mekngit el reng. Chelechang eng taem el bobechei a di olab a uldesuem e diak morrenges ra rebebil. Chelechang taem el mterob aikel omeruul el rulterir a rebebil el kora di medakt e longesechii a rengum. Chelechang taem el mdakl a mekngit el blekerdelem.20 A lsekum a omelkingem a mui er a ultelechakl me a mekngit el blekeradel, e chelechang taem el mngai el mo mechei.21 Kemo dechor el chedaol mesisiich el sechal a lechub e ke redil el ngara Kristo.
A templo sebechel ngosukid er a omeroled. Seikid e kede nguu a klisichel a Dios, el ngosukid el mo mesisiich er a Diabong, el ngii omuchel a rokui el ultok.22 Mcheridii er a delongeliu! Bo modengei el uase kede dirrek el torbengii a cherarou sel bek el taem el dongedechuul a cheleuid e diak lengasech a rengud. Kede bai, ochotii a delmedemk el klechubchub el ngii a blekerdelir a remeral loltirakl er a Jesus Kristo. A rechad er a budech a torbengii a cherarou.
Bo de meral okesiul a llomes el ngarbab—el llomes el “diak el sebechel lobart.”23 Me dochotii el uase ngarngii a ungil teletael lokiu a budech ma omengull a dosmechokl a mondai me a ungil rolel a dongedechuul a blol kakerous a uldasu. Sel mochotii a bliochel beltikereng el blekerdelir a remeral oltirakl er a Jesus Kristo, e a Rubak a mo smisichii a blakereng er kau el ngelakl ersel kau a medengelii.
A iebedel a ebangkelio a kot el klou iebed er tial beluulechad. A Dios a mla siotai er a rokui el mei er Ngii, a “rmechedelekelk me a rebecheleleu, rekelebus me a remimokl, sechal me a redil.”24 Ngarngii a basio er a rebek el chad. Eng di, ng diak a basio er a klauketui, oltuub, a lechub a ultok er a ngii di el bedengel.
Rodam me a rodos er ngak, a ungil a direke merael mei el mo er tirkel melisiich er a rebebil. Chelechal sils, ak siotai er kemiu el mo omes a blekerdeliu lokiu omerelliu el mo er a rebebil. Ak omekngeltengat er kemiu el mo melodech omerelliu me a ikel moruul a mo chedaol, e ngar a omengull, e meral olchotel ra oltirakl er a Jesus Kristo.
Ak omekngeltengat er kemiu el mtechir a mekngit el reng loba delemdemk, klauketui loba ungil klemedengei, me a ultok loba budech.
A Dios a ngar! A Jesus a Kristo. A Osobel a dechor el bdelul tia el Ikelesia. Kid a mesiungel. Ng mo ngosukid el mo chad er a budech er Ngii. Aika kuuchais el ngara chedaol ngklel a Jesus Kristo, amen.